ശ്രീമദ്വാല്മീകീയ രാമായണേ ബാലകാംഡമ് ।
അഥ ഏകപംചാശസ്സര്ഗഃ ।
തസ്യ തദ്വചനം ശ്രുത്വാ വിശ്വാമിത്രസ്യ ധീമതഃ ।
ഹൃഷ്ടരോമാ മഹാതേജാശ്ശതാനംദോ മഹാതപാഃ ॥ 1 ॥
ഗൌതമസ്യ സുതോ ജ്യേഷ്ഠസ്തപസാ ദ്യോതിതപ്രഭഃ ।
രാമസംദര്ശനാദേവ പരം വിസ്മയമാഗതഃ ॥ 2 ॥
സ തൌ നിഷണ്ണൌ സംപ്രേക്ഷ്യ സുഖാസീനൌ നൃപാത്മജൌ ।
ശതാനംദോ മുനിശ്രേഷ്ഠം വിശ്വാമിത്രമഥാമബ്രവീത് ॥ 3 ॥
അപി തേ മുനിശാര്ദൂല മമ മാതാ യശസ്വിനീ ।
ദര്ശിതാ രാജപുത്രായ തപോ ദീര്ഘമുപാഗതാ ॥ 4 ॥
അപി രാമേ മഹാതേജാ മമ മാതാ യശസ്വിനീ ।
വന്യൈരുപാഹരത്പൂജാം പൂജാര്ഹേ സർവദേഹിനാമ് ॥ 5 ॥
അപി രാമായ കഥിതം യഥാവൃത്തം പുരാതനമ് ।
മമ മാതുര്മഹാതേജോ ദൈവേന ദുരനുഷ്ഠിതമ് ॥ 6 ॥
അപി കൌശിക ഭദ്രം തേ ഗുരുണാ മമ സംഗതാ ।
മമ മാതാ മുനിശ്രേഷ്ഠ രാമസംദര്ശനാദിതഃ ॥ 7 ॥
അപി മേ ഗുരുണാ രാമഃ പൂജിതഃ കുശികാത്മജ ।
ഇഹാഗതോ മഹാതേജാഃ പൂജാം പ്രാപ്തോ മഹാത്മനഃ ॥ 8 ॥
അപി ശാംതേന മനസാ ഗുരുര്മേ കുശികാത്മജ ।
ഇഹാഽഗതേന രാമേണ പ്രയതേനാഭിവാദിതഃ ॥ 9 ॥
തച്ഛ്രുത്വാ വചനം തസ്യ വിശ്വാമിത്രോ മഹാമുനിഃ ।
പ്രത്യുവാച ശതാനംദം വാക്യജ്ഞോ വാക്യകോവിദമ് ॥ 10 ॥
നാതിക്രാംതം മുനിശ്രേഷ്ഠ യത്കര്തവ്യം കൃതം മയാ ।
സംഗതാ മുനിനാ പത്നീ ഭാര്ഗവേണേവ രേണുകാ ॥ 11 ॥
തച്ഛ്രുത്വാ വചനം തസ്യ വിശ്വാമിത്രസ്യ ഭാഷിതമ് ।
ശതാനംദോ മഹാതേജാ രാമം വചനമബ്രവീത് ॥ 12 ॥
സ്വാഗതം തേ നരശ്രേഷ്ഠ ദിഷ്ട്യാ പ്രാപ്തോഽസി രാഘവ ।
വിശ്വാമിത്രം പുരസ്കൃത്യ മഹര്ഷിമപരാജിതമ് ॥ 13 ॥
അചിംത്യകര്മാ തപസാ ബ്രഹ്മര്ഷിരതുലപ്രഭഃ ।
വിശ്വാമിത്രോ മഹാതേജാ വേത്സ്യേനം പരമാം ഗതിമ് ॥ 14 ॥
നാസ്തി ധന്യതരോ രാമ ത്വത്തോഽന്യോ ഭുവി കശ്ചന ।
ഗോപ്താ കുശികപുത്രസ്തേ യേന തപ്തം മഹത്തപഃ ॥ 15 ॥
ശ്രൂയതാം ചാഭിധാസ്യാമി കൌശികസ്യ മഹാത്മനഃ ।
യഥാ ബലം യഥാ വൃത്തം തന്മേ നിഗദതഃ ശ്രുണു ॥ 16 ॥
രാജാഽഭൂദേഷ ധര്മാത്മാ ദീര്ഘകാലമരിംദമഃ ।
ധര്മജ്ഞഃ കൃതവിദ്യശ്ച പ്രജാനാം ച ഹിതേ രതഃ ॥ 17 ॥
പ്രജാപതിസുതശ്ചാസീത്കുശോ നാമ മഹീപതിഃ ।
കുശസ്യ പുത്രോ ബലവാന് കുശനാഭസ്സുധാര്മികഃ ॥ 18 ॥
കുശനാഭസുതസ്ത്വാസീദ്ഗാധിരിത്യേവ വിശ്രൃതഃ ।
ഗാധേഃ പുത്രോ മഹാതേജാ വിശ്വാമിത്രോ മഹാമുനിഃ ॥ 19 ॥
വിശ്വാമിത്രോ മഹാതേജാഃ പാലയാമാസ മേദിനീമ് ।
ബഹുവര്ഷസഹസ്രാണി രാജാ രാജ്യമകാരയത് ॥ 20 ॥
കദാചിത്തു മഹാതേജാ യോജയിത്വാ വരൂഥിനീമ് ।
അക്ഷൌഹീണീപരിവൃതഃ പരിചക്രാമ മേദിനീമ് ॥ 21 ॥
നഗരാണി സരാഷ്ട്രാണി സരിതശ്ച തഥാ ഗിരീന് ।
ആശ്രമാന്ക്രമശോ രാമ വിചരന്നാജഗാമ ഹ ॥ 22 ॥
വസിഷ്ഠസ്യാശ്രമപദം നാനാവൃക്ഷസമാകുലമ് ।
നാനാമൃഗഗണാകീര്ണം സിദ്ധചാരണസേവിതമ് ॥ 23 ॥
ദേവദാനവഗംധർവൈഃ കിന്നരൈരുപശോഭിതമ് ।
പ്രശാംതഹരിണാകീര്ണം ദ്വിജസംഘനിഷേവിതമ് ॥ 24 ॥
ബ്രഹ്മര്ഷിഗണസംകീര്ണം ദേവര്ഷിഗണസേവിതമ് ।
തപശ്ചരണസംസിദ്ധൈരഗ്നികല്പൈര്മഹാത്മഭിഃ ॥ 25 ॥
അബ്ഭക്ഷൈർവായുഭക്ഷൈശ്ച ശീര്ണപര്ണാശനൈസ്തഥാ ।
ഫലമൂലാശനൈര്ദാംതൈര്ജിതരോഷൈര്ജിതേംദ്രിയൈഃ ॥ 26 ॥
ഋഷിഭിർവാലഖില്യൈശ്ച ജപഹോമപരായണൈഃ ।
അന്യൈർവൈഖാനസൈശ്ചൈവ സമംതാദുപശോഭിതമ് ॥ 27 ॥
വസിഷ്ഠസ്യാശ്രമപദം ബ്രഹ്മലോകമിവാപരമ് ।
ദദര്ശ ജയതാം ശ്രേഷ്ഠോ വിശ്വാമിത്രോ മഹാബലഃ ॥ 28 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഏകപംചാശസ്സര്ഗഃ ॥
