ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକପଂଚାଶସ୍ସର୍ଗଃ ।
ତସ୍ୟ ତଦ୍ଵଚନଂ ଶ୍ରୁତ୍ଵା ଵିଶ୍ଵାମିତ୍ରସ୍ୟ ଧୀମତଃ ।
ହୃଷ୍ଟରୋମା ମହାତେଜାଶ୍ଶତାନଂଦୋ ମହାତପାଃ ॥ 1 ॥
ଗୌତମସ୍ୟ ସୁତୋ ଜ୍ୟେଷ୍ଠସ୍ତପସା ଦ୍ୟୋତିତପ୍ରଭଃ ।
ରାମସଂଦର୍ଶନାଦେଵ ପରଂ ଵିସ୍ମୟମାଗତଃ ॥ 2 ॥
ସ ତୌ ନିଷଣ୍ଣୌ ସଂପ୍ରେକ୍ଷ୍ୟ ସୁଖାସୀନୌ ନୃପାତ୍ମଜୌ ।
ଶତାନଂଦୋ ମୁନିଶ୍ରେଷ୍ଠଂ ଵିଶ୍ଵାମିତ୍ରମଥାମବ୍ରଵୀତ୍ ॥ 3 ॥
ଅପି ତେ ମୁନିଶାର୍ଦୂଲ ମମ ମାତା ୟଶସ୍ଵିନୀ ।
ଦର୍ଶିତା ରାଜପୁତ୍ରାୟ ତପୋ ଦୀର୍ଘମୁପାଗତା ॥ 4 ॥
ଅପି ରାମେ ମହାତେଜା ମମ ମାତା ୟଶସ୍ଵିନୀ ।
ଵନ୍ୟୈରୁପାହରତ୍ପୂଜାଂ ପୂଜାର୍ହେ ସର୍ଵଦେହିନାମ୍ ॥ 5 ॥
ଅପି ରାମାୟ କଥିତଂ ୟଥାଵୃତ୍ତଂ ପୁରାତନମ୍ ।
ମମ ମାତୁର୍ମହାତେଜୋ ଦୈଵେନ ଦୁରନୁଷ୍ଠିତମ୍ ॥ 6 ॥
ଅପି କୌଶିକ ଭଦ୍ରଂ ତେ ଗୁରୁଣା ମମ ସଂଗତା ।
ମମ ମାତା ମୁନିଶ୍ରେଷ୍ଠ ରାମସଂଦର୍ଶନାଦିତଃ ॥ 7 ॥
ଅପି ମେ ଗୁରୁଣା ରାମଃ ପୂଜିତଃ କୁଶିକାତ୍ମଜ ।
ଇହାଗତୋ ମହାତେଜାଃ ପୂଜାଂ ପ୍ରାପ୍ତୋ ମହାତ୍ମନଃ ॥ 8 ॥
ଅପି ଶାଂତେନ ମନସା ଗୁରୁର୍ମେ କୁଶିକାତ୍ମଜ ।
ଇହାଽଗତେନ ରାମେଣ ପ୍ରୟତେନାଭିଵାଦିତଃ ॥ 9 ॥
ତଚ୍ଛ୍ରୁତ୍ଵା ଵଚନଂ ତସ୍ୟ ଵିଶ୍ଵାମିତ୍ରୋ ମହାମୁନିଃ ।
ପ୍ରତ୍ୟୁଵାଚ ଶତାନଂଦଂ ଵାକ୍ୟଜ୍ଞୋ ଵାକ୍ୟକୋଵିଦମ୍ ॥ 10 ॥
ନାତିକ୍ରାଂତଂ ମୁନିଶ୍ରେଷ୍ଠ ୟତ୍କର୍ତଵ୍ୟଂ କୃତଂ ମୟା ।
ସଂଗତା ମୁନିନା ପତ୍ନୀ ଭାର୍ଗଵେଣେଵ ରେଣୁକା ॥ 11 ॥
ତଚ୍ଛ୍ରୁତ୍ଵା ଵଚନଂ ତସ୍ୟ ଵିଶ୍ଵାମିତ୍ରସ୍ୟ ଭାଷିତମ୍ ।
ଶତାନଂଦୋ ମହାତେଜା ରାମଂ ଵଚନମବ୍ରଵୀତ୍ ॥ 12 ॥
ସ୍ଵାଗତଂ ତେ ନରଶ୍ରେଷ୍ଠ ଦିଷ୍ଟ୍ୟା ପ୍ରାପ୍ତୋଽସି ରାଘଵ ।
ଵିଶ୍ଵାମିତ୍ରଂ ପୁରସ୍କୃତ୍ୟ ମହର୍ଷିମପରାଜିତମ୍ ॥ 13 ॥
ଅଚିଂତ୍ୟକର୍ମା ତପସା ବ୍ରହ୍ମର୍ଷିରତୁଲପ୍ରଭଃ ।
ଵିଶ୍ଵାମିତ୍ରୋ ମହାତେଜା ଵେତ୍ସ୍ୟେନଂ ପରମାଂ ଗତିମ୍ ॥ 14 ॥
ନାସ୍ତି ଧନ୍ୟତରୋ ରାମ ତ୍ଵତ୍ତୋଽନ୍ୟୋ ଭୁଵି କଶ୍ଚନ ।
ଗୋପ୍ତା କୁଶିକପୁତ୍ରସ୍ତେ ୟେନ ତପ୍ତଂ ମହତ୍ତପଃ ॥ 15 ॥
ଶ୍ରୂୟତାଂ ଚାଭିଧାସ୍ୟାମି କୌଶିକସ୍ୟ ମହାତ୍ମନଃ ।
ୟଥା ବଲଂ ୟଥା ଵୃତ୍ତଂ ତନ୍ମେ ନିଗଦତଃ ଶ୍ରୁଣୁ ॥ 16 ॥
ରାଜାଽଭୂଦେଷ ଧର୍ମାତ୍ମା ଦୀର୍ଘକାଲମରିଂଦମଃ ।
ଧର୍ମଜ୍ଞଃ କୃତଵିଦ୍ୟଶ୍ଚ ପ୍ରଜାନାଂ ଚ ହିତେ ରତଃ ॥ 17 ॥
ପ୍ରଜାପତିସୁତଶ୍ଚାସୀତ୍କୁଶୋ ନାମ ମହୀପତିଃ ।
କୁଶସ୍ୟ ପୁତ୍ରୋ ବଲଵାନ୍ କୁଶନାଭସ୍ସୁଧାର୍ମିକଃ ॥ 18 ॥
କୁଶନାଭସୁତସ୍ତ୍ଵାସୀଦ୍ଗାଧିରିତ୍ୟେଵ ଵିଶ୍ରୃତଃ ।
ଗାଧେଃ ପୁତ୍ରୋ ମହାତେଜା ଵିଶ୍ଵାମିତ୍ରୋ ମହାମୁନିଃ ॥ 19 ॥
ଵିଶ୍ଵାମିତ୍ରୋ ମହାତେଜାଃ ପାଲୟାମାସ ମେଦିନୀମ୍ ।
ବହୁଵର୍ଷସହସ୍ରାଣି ରାଜା ରାଜ୍ୟମକାରୟତ୍ ॥ 20 ॥
କଦାଚିତ୍ତୁ ମହାତେଜା ୟୋଜୟିତ୍ଵା ଵରୂଥିନୀମ୍ ।
ଅକ୍ଷୌହୀଣୀପରିଵୃତଃ ପରିଚକ୍ରାମ ମେଦିନୀମ୍ ॥ 21 ॥
ନଗରାଣି ସରାଷ୍ଟ୍ରାଣି ସରିତଶ୍ଚ ତଥା ଗିରୀନ୍ ।
ଆଶ୍ରମାନ୍କ୍ରମଶୋ ରାମ ଵିଚରନ୍ନାଜଗାମ ହ ॥ 22 ॥
ଵସିଷ୍ଠସ୍ୟାଶ୍ରମପଦଂ ନାନାଵୃକ୍ଷସମାକୁଲମ୍ ।
ନାନାମୃଗଗଣାକୀର୍ଣଂ ସିଦ୍ଧଚାରଣସେଵିତମ୍ ॥ 23 ॥
ଦେଵଦାନଵଗଂଧର୍ଵୈଃ କିନ୍ନରୈରୁପଶୋଭିତମ୍ ।
ପ୍ରଶାଂତହରିଣାକୀର୍ଣଂ ଦ୍ଵିଜସଂଘନିଷେଵିତମ୍ ॥ 24 ॥
ବ୍ରହ୍ମର୍ଷିଗଣସଂକୀର୍ଣଂ ଦେଵର୍ଷିଗଣସେଵିତମ୍ ।
ତପଶ୍ଚରଣସଂସିଦ୍ଧୈରଗ୍ନିକଲ୍ପୈର୍ମହାତ୍ମଭିଃ ॥ 25 ॥
ଅବ୍ଭକ୍ଷୈର୍ଵାୟୁଭକ୍ଷୈଶ୍ଚ ଶୀର୍ଣପର୍ଣାଶନୈସ୍ତଥା ।
ଫଲମୂଲାଶନୈର୍ଦାଂତୈର୍ଜିତରୋଷୈର୍ଜିତେଂଦ୍ରିୟୈଃ ॥ 26 ॥
ଋଷିଭିର୍ଵାଲଖିଲ୍ୟୈଶ୍ଚ ଜପହୋମପରାୟଣୈଃ ।
ଅନ୍ୟୈର୍ଵୈଖାନସୈଶ୍ଚୈଵ ସମଂତାଦୁପଶୋଭିତମ୍ ॥ 27 ॥
ଵସିଷ୍ଠସ୍ୟାଶ୍ରମପଦଂ ବ୍ରହ୍ମଲୋକମିଵାପରମ୍ ।
ଦଦର୍ଶ ଜୟତାଂ ଶ୍ରେଷ୍ଠୋ ଵିଶ୍ଵାମିତ୍ରୋ ମହାବଲଃ ॥ 28 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକପଂଚାଶସ୍ସର୍ଗଃ ॥
