ශ්රීමද්වාල්මීකීය රාමායණේ බාලකාංඩම් ।
අථ ඒකපංචාශස්සර්ගඃ ।
තස්ය තද්වචනං ශ්රුත්වා විශ්වාමිත්රස්ය ධීමතඃ ।
හෘෂ්ටරෝමා මහාතේජාශ්ශතානංදෝ මහාතපාඃ ॥ 1 ॥
ගෞතමස්ය සුතෝ ජ්යේෂ්ඨස්තපසා ද්යෝතිතප්රභඃ ।
රාමසංදර්ශනාදේව පරං විස්මයමාගතඃ ॥ 2 ॥
ස තෞ නිෂණ්ණෞ සංප්රේක්ෂ්ය සුඛාසීනෞ නෘපාත්මජෞ ।
ශතානංදෝ මුනිශ්රේෂ්ඨං විශ්වාමිත්රමථාමබ්රවීත් ॥ 3 ॥
අපි තේ මුනිශාර්දූල මම මාතා යශස්විනී ।
දර්ශිතා රාජපුත්රාය තපෝ දීර්ඝමුපාගතා ॥ 4 ॥
අපි රාමේ මහාතේජා මම මාතා යශස්විනී ।
වන්යෛරුපාහරත්පූජාං පූජාර්හේ සර්වදේහිනාම් ॥ 5 ॥
අපි රාමාය කථිතං යථාවෘත්තං පුරාතනම් ।
මම මාතුර්මහාතේජෝ දෛවේන දුරනුෂ්ඨිතම් ॥ 6 ॥
අපි කෞශික භද්රං තේ ගුරුණා මම සංගතා ।
මම මාතා මුනිශ්රේෂ්ඨ රාමසංදර්ශනාදිතඃ ॥ 7 ॥
අපි මේ ගුරුණා රාමඃ පූජිතඃ කුශිකාත්මජ ।
ඉහාගතෝ මහාතේජාඃ පූජාං ප්රාප්තෝ මහාත්මනඃ ॥ 8 ॥
අපි ශාංතේන මනසා ගුරුර්මේ කුශිකාත්මජ ।
ඉහාऽගතේන රාමේණ ප්රයතේනාභිවාදිතඃ ॥ 9 ॥
තච්ඡ්රුත්වා වචනං තස්ය විශ්වාමිත්රෝ මහාමුනිඃ ।
ප්රත්යුවාච ශතානංදං වාක්යජ්ඤෝ වාක්යකෝවිදම් ॥ 10 ॥
නාතික්රාංතං මුනිශ්රේෂ්ඨ යත්කර්තව්යං කෘතං මයා ।
සංගතා මුනිනා පත්නී භාර්ගවේණේව රේණුකා ॥ 11 ॥
තච්ඡ්රුත්වා වචනං තස්ය විශ්වාමිත්රස්ය භාෂිතම් ।
ශතානංදෝ මහාතේජා රාමං වචනමබ්රවීත් ॥ 12 ॥
ස්වාගතං තේ නරශ්රේෂ්ඨ දිෂ්ට්යා ප්රාප්තෝऽසි රාඝව ।
විශ්වාමිත්රං පුරස්කෘත්ය මහර්ෂිමපරාජිතම් ॥ 13 ॥
අචිංත්යකර්මා තපසා බ්රහ්මර්ෂිරතුලප්රභඃ ।
විශ්වාමිත්රෝ මහාතේජා වේත්ස්යේනං පරමාං ගතිම් ॥ 14 ॥
නාස්ති ධන්යතරෝ රාම ත්වත්තෝऽන්යෝ භුවි කශ්චන ।
ගෝප්තා කුශිකපුත්රස්තේ යේන තප්තං මහත්තපඃ ॥ 15 ॥
ශ්රූයතාං චාභිධාස්යාමි කෞශිකස්ය මහාත්මනඃ ।
යථා බලං යථා වෘත්තං තන්මේ නිගදතඃ ශ්රුණු ॥ 16 ॥
රාජාऽභූදේෂ ධර්මාත්මා දීර්ඝකාලමරිංදමඃ ।
ධර්මජ්ඤඃ කෘතවිද්යශ්ච ප්රජානාං ච හිතේ රතඃ ॥ 17 ॥
ප්රජාපතිසුතශ්චාසීත්කුශෝ නාම මහීපතිඃ ।
කුශස්ය පුත්රෝ බලවාන් කුශනාභස්සුධාර්මිකඃ ॥ 18 ॥
කුශනාභසුතස්ත්වාසීද්ගාධිරිත්යේව විශ්රෘතඃ ।
ගාධේඃ පුත්රෝ මහාතේජා විශ්වාමිත්රෝ මහාමුනිඃ ॥ 19 ॥
විශ්වාමිත්රෝ මහාතේජාඃ පාලයාමාස මේදිනීම් ।
බහුවර්ෂසහස්රාණි රාජා රාජ්යමකාරයත් ॥ 20 ॥
කදාචිත්තු මහාතේජා යෝජයිත්වා වරූථිනීම් ।
අක්ෂෞහීණීපරිවෘතඃ පරිචක්රාම මේදිනීම් ॥ 21 ॥
නගරාණි සරාෂ්ට්රාණි සරිතශ්ච තථා ගිරීන් ।
ආශ්රමාන්ක්රමශෝ රාම විචරන්නාජගාම හ ॥ 22 ॥
වසිෂ්ඨස්යාශ්රමපදං නානාවෘක්ෂසමාකුලම් ।
නානාමෘගගණාකීර්ණං සිද්ධචාරණසේවිතම් ॥ 23 ॥
දේවදානවගංධර්වෛඃ කින්නරෛරුපශෝභිතම් ।
ප්රශාංතහරිණාකීර්ණං ද්විජසංඝනිෂේවිතම් ॥ 24 ॥
බ්රහ්මර්ෂිගණසංකීර්ණං දේවර්ෂිගණසේවිතම් ।
තපශ්චරණසංසිද්ධෛරග්නිකල්පෛර්මහාත්මභිඃ ॥ 25 ॥
අබ්භක්ෂෛර්වායුභක්ෂෛශ්ච ශීර්ණපර්ණාශනෛස්තථා ।
ඵලමූලාශනෛර්දාංතෛර්ජිතරෝෂෛර්ජිතේංද්රියෛඃ ॥ 26 ॥
ඍෂිභිර්වාලඛිල්යෛශ්ච ජපහෝමපරායණෛඃ ।
අන්යෛර්වෛඛානසෛශ්චෛව සමංතාදුපශෝභිතම් ॥ 27 ॥
වසිෂ්ඨස්යාශ්රමපදං බ්රහ්මලෝකමිවාපරම් ।
දදර්ශ ජයතාං ශ්රේෂ්ඨෝ විශ්වාමිත්රෝ මහාබලඃ ॥ 28 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ඒකපංචාශස්සර්ගඃ ॥
