śrīmadvālmīkīya rāmāyaṇē bālakāṇḍam ।
atha pañchasaptatitamassargaḥ ।
rāma dāśarathē rāma vīryaṃ tē śrūyatē'dbhutam ।
dhanuṣō bhēdanaṃ chaiva nikhilēna mayā śrutam ॥ 1 ॥
tadadbhutamachintyaṃ cha bhēdanaṃ dhanuṣastvayā ।
tachChrutvā'hamanuprāptō dhanurgṛhyāparaṃ śubham ॥ 2 ॥
tadidaṃ ghōrasaṅkāśaṃ jāmadagnyaṃ mahaddhanuḥ ।
pūrayasva śarēṇaiva svabalaṃ darśayasva cha ॥ 3 ॥
tadahaṃ tē balaṃ dṛṣṭvā dhanuṣō'sya prapūraṇē ।
dvandvayuddhaṃ pradāsyāmi vīryaślāghyasya rāghava ॥ 4 ॥
tasya tadvachanaṃ śrutvā rājā daśarathastadā ।
viṣaṇṇavadanō dīnaḥ prāñjalirvākyamabravīt ॥ 5 ॥
kṣatrarōṣātpraśāntastvaṃ brāhmaṇaścha mahāyaśāḥ ।
bālānāṃ mama putrāṇāmabhayaṃ dātumarhasi ॥ 6 ॥
bhārgavāṇāṃ kulē jātaḥ svādhyāyavrataśālinām ।
sahāsrākṣē pratijñāya śastraṃ nikṣiptavānasi ॥ 7 ॥
sa tvaṃ dharmaparō bhūtvā kāśyapāya vasundharām ।
dattvā vanamupāgamya mahēndrakṛtakētanaḥ ॥ 8 ॥
mama sarvavināśāya samprāptastvaṃ mahāmunē ।
na chaikasmin hatē rāmē sarvē jīvāmahē vayam ॥ 9 ॥
bruvatyēvaṃ daśarathē jāmadagnyaḥ pratāpavān ।
anādṛtyaiva tadvākyaṃ rāmamēvābhyabhāṣata ॥ 10 ॥
imē dvē dhanuṣī śrēṣṭhē divyē lōkābhiviśrutē ।
dṛḍhē balavatī mukhyē sukṛtē viśvakarmaṇā ॥ 11 ॥
atisṛṣṭaṃ surairēkaṃ tryambakāya yuyutsavē ।
tripuraghnaṃ naraśrēṣṭha bhagnaṃ kākutstha yattvayā ॥ 12 ॥
idaṃ dvitīyaṃ durdharṣaṃ viṣṇōrdattaṃ surōttamaiḥ ।
tadidaṃ vaiṣṇavaṃ rāma dhanuḥ paramabhāsvaram ।
samānasāraṃ kākutstha raudrēṇa dhanuṣā tvidam ॥ 13 ॥
tadā tu dēvatāssarvāḥ pṛchChanti sma pitāmaham ।
śitikaṇṭhasya viṣṇōścha balābalanirīkṣayā ॥ 14 ॥
abhiprāyaṃ tu vijñāya dēvatānāṃ pitāmahaḥ ।
virōdhaṃ janayāmāsa tayō ssatyavatāṃ varaḥ ॥ 15 ॥
virōdhē cha mahadyuddhamabhavadrōmaharṣaṇam ।
śitikaṇṭhasya viṣṇōścha parasparajigīṣuṇōḥ ॥ 16 ॥
tadā tu jṛmbhitaṃ śaivaṃ dhanurbhīmaparākramam ।
huṅkārēṇa mahādēva stambhitō'tha trilōchanaḥ ॥ 17 ॥
dēvaistadā samāgamya sarṣisaghai ssachāraṇaiḥ ।
yāchitau praśamaṃ tatra jagmatustau surōttamau ॥ 18 ॥
jṛmbhitaṃ taddhanurdrṛṣṭvā śaivaṃ viṣṇuparākramaiḥ ।
adhikaṃ mēnirē viṣṇuṃ dēvā ssarṣigaṇāstadā ॥ 19 ॥
dhanū rudrastu saṅkṛddhō vidēhēṣu mahāyaśāḥ ।
dēvarātasya rājarṣērdadau hastē sasāyakam ॥ 20 ॥
idaṃ cha vaiṣṇavaṃ rāma dhanuḥ parapurañjayam ।
ṛchīkē bhārgavē prādādviṣṇuḥ sa nyāsamuttamam ॥ 21 ॥
ṛchīkastu mahātējāḥ putrasyāpratikarmaṇaḥ ।
piturmama dadau divyaṃ jamadagnērmahātmanaḥ ॥ 22 ॥
nyastaśastrē pitari mē tapōbalasamanvitē ।
arjunō vidadhē mṛtyuṃ prākṛtāṃ buddhimāsthitaḥ ॥ 23 ॥
vadhamapratirūpaṃ tu pitu śśṛtvā sudāruṇam ।
kṣatramutsādayanrōṣājjātaṃ jātamanēkaśaḥ ॥ 24 ॥
pṛthivīṃ chākhilāṃ prāpya kāśyapāya mahātmanē ।
yajñasyāntē tadā rāma dakṣiṇāṃ puṇyakarmaṇē ।
dattvā mahēndranilayastapōbalasamanvitaḥ ॥ 25 ॥
adyatūttamavīryēṇa tvayā rāma mahābala ।
śrutavān dhanuṣō bhēdaṃ tatō'haṃ drutamāgataḥ ॥ 26 ॥
tadidaṃ vaiṣṇavaṃ rāma pitṛpaitāmahaṃ mahat ।
kṣatradharmaṃ puraskṛtya gṛhṇīṣva dhanuruttamam ॥ 27 ॥
yōjayasva dhanuśśrēṣṭhē śaraṃ parapurañjayam ।
yadi śaknōṣi kākutstha dvandvaṃ dāsyāmi tē tataḥ ॥ 28 ॥
ityārṣē śrīmadrāmāyaṇē vālmīkīya ādikāvyē bālakāṇḍē pañchasaptatitamassargaḥ ॥
