ശ്രീമദ്വാല്മീകീയ രാമായണേ ബാലകാംഡമ് ।
അഥ പംചസപ്തതിതമസ്സര്ഗഃ ।
രാമ ദാശരഥേ രാമ വീര്യം തേ ശ്രൂയതേഽദ്ഭുതമ് ।
ധനുഷോ ഭേദനം ചൈവ നിഖിലേന മയാ ശ്രുതമ് ॥ 1 ॥
തദദ്ഭുതമചിംത്യം ച ഭേദനം ധനുഷസ്ത്വയാ ।
തച്ഛ്രുത്വാഽഹമനുപ്രാപ്തോ ധനുര്ഗൃഹ്യാപരം ശുഭമ് ॥ 2 ॥
തദിദം ഘോരസംകാശം ജാമദഗ്ന്യം മഹദ്ധനുഃ ।
പൂരയസ്വ ശരേണൈവ സ്വബലം ദര്ശയസ്വ ച ॥ 3 ॥
തദഹം തേ ബലം ദൃഷ്ട്വാ ധനുഷോഽസ്യ പ്രപൂരണേ ।
ദ്വംദ്വയുദ്ധം പ്രദാസ്യാമി വീര്യശ്ലാഘ്യസ്യ രാഘവ ॥ 4 ॥
തസ്യ തദ്വചനം ശ്രുത്വാ രാജാ ദശരഥസ്തദാ ।
വിഷണ്ണവദനോ ദീനഃ പ്രാംജലിർവാക്യമബ്രവീത് ॥ 5 ॥
ക്ഷത്രരോഷാത്പ്രശാംതസ്ത്വം ബ്രാഹ്മണശ്ച മഹായശാഃ ।
ബാലാനാം മമ പുത്രാണാമഭയം ദാതുമര്ഹസി ॥ 6 ॥
ഭാര്ഗവാണാം കുലേ ജാതഃ സ്വാധ്യായവ്രതശാലിനാമ് ।
സഹാസ്രാക്ഷേ പ്രതിജ്ഞായ ശസ്ത്രം നിക്ഷിപ്തവാനസി ॥ 7 ॥
സ ത്വം ധര്മപരോ ഭൂത്വാ കാശ്യപായ വസുംധരാമ് ।
ദത്ത്വാ വനമുപാഗമ്യ മഹേംദ്രകൃതകേതനഃ ॥ 8 ॥
മമ സർവവിനാശായ സംപ്രാപ്തസ്ത്വം മഹാമുനേ ।
ന ചൈകസ്മിന് ഹതേ രാമേ സർവേ ജീവാമഹേ വയമ് ॥ 9 ॥
ബ്രുവത്യേവം ദശരഥേ ജാമദഗ്ന്യഃ പ്രതാപവാന് ।
അനാദൃത്യൈവ തദ്വാക്യം രാമമേവാഭ്യഭാഷത ॥ 10 ॥
ഇമേ ദ്വേ ധനുഷീ ശ്രേഷ്ഠേ ദിവ്യേ ലോകാഭിവിശ്രുതേ ।
ദൃഢേ ബലവതീ മുഖ്യേ സുകൃതേ വിശ്വകര്മണാ ॥ 11 ॥
അതിസൃഷ്ടം സുരൈരേകം ത്ര്യംബകായ യുയുത്സവേ ।
ത്രിപുരഘ്നം നരശ്രേഷ്ഠ ഭഗ്നം കാകുത്സ്ഥ യത്ത്വയാ ॥ 12 ॥
ഇദം ദ്വിതീയം ദുര്ധര്ഷം വിഷ്ണോര്ദത്തം സുരോത്തമൈഃ ।
തദിദം വൈഷ്ണവം രാമ ധനുഃ പരമഭാസ്വരമ് ।
സമാനസാരം കാകുത്സ്ഥ രൌദ്രേണ ധനുഷാ ത്വിദമ് ॥ 13 ॥
തദാ തു ദേവതാസ്സർവാഃ പൃച്ഛംതി സ്മ പിതാമഹമ് ।
ശിതികംഠസ്യ വിഷ്ണോശ്ച ബലാബലനിരീക്ഷയാ ॥ 14 ॥
അഭിപ്രായം തു വിജ്ഞായ ദേവതാനാം പിതാമഹഃ ।
വിരോധം ജനയാമാസ തയോ സ്സത്യവതാം വരഃ ॥ 15 ॥
വിരോധേ ച മഹദ്യുദ്ധമഭവദ്രോമഹര്ഷണമ് ।
ശിതികംഠസ്യ വിഷ്ണോശ്ച പരസ്പരജിഗീഷുണോഃ ॥ 16 ॥
തദാ തു ജൃംഭിതം ശൈവം ധനുര്ഭീമപരാക്രമമ് ।
ഹുംകാരേണ മഹാദേവ സ്തംഭിതോഽഥ ത്രിലോചനഃ ॥ 17 ॥
ദേവൈസ്തദാ സമാഗമ്യ സര്ഷിസഘൈ സ്സചാരണൈഃ ।
യാചിതൌ പ്രശമം തത്ര ജഗ്മതുസ്തൌ സുരോത്തമൌ ॥ 18 ॥
ജൃംഭിതം തദ്ധനുര്ദ്രൃഷ്ട്വാ ശൈവം വിഷ്ണുപരാക്രമൈഃ ।
അധികം മേനിരേ വിഷ്ണും ദേവാ സ്സര്ഷിഗണാസ്തദാ ॥ 19 ॥
ധനൂ രുദ്രസ്തു സംകൃദ്ധോ വിദേഹേഷു മഹായശാഃ ।
ദേവരാതസ്യ രാജര്ഷേര്ദദൌ ഹസ്തേ സസായകമ് ॥ 20 ॥
ഇദം ച വൈഷ്ണവം രാമ ധനുഃ പരപുരംജയമ് ।
ഋചീകേ ഭാര്ഗവേ പ്രാദാദ്വിഷ്ണുഃ സ ന്യാസമുത്തമമ് ॥ 21 ॥
ഋചീകസ്തു മഹാതേജാഃ പുത്രസ്യാപ്രതികര്മണഃ ।
പിതുര്മമ ദദൌ ദിവ്യം ജമദഗ്നേര്മഹാത്മനഃ ॥ 22 ॥
ന്യസ്തശസ്ത്രേ പിതരി മേ തപോബലസമന്വിതേ ।
അര്ജുനോ വിദധേ മൃത്യും പ്രാകൃതാം ബുദ്ധിമാസ്ഥിതഃ ॥ 23 ॥
വധമപ്രതിരൂപം തു പിതു ശ്ശൃത്വാ സുദാരുണമ് ।
ക്ഷത്രമുത്സാദയന്രോഷാജ്ജാതം ജാതമനേകശഃ ॥ 24 ॥
പൃഥിവീം ചാഖിലാം പ്രാപ്യ കാശ്യപായ മഹാത്മനേ ।
യജ്ഞസ്യാംതേ തദാ രാമ ദക്ഷിണാം പുണ്യകര്മണേ ।
ദത്ത്വാ മഹേംദ്രനിലയസ്തപോബലസമന്വിതഃ ॥ 25 ॥
അദ്യതൂത്തമവീര്യേണ ത്വയാ രാമ മഹാബല ।
ശ്രുതവാന് ധനുഷോ ഭേദം തതോഽഹം ദ്രുതമാഗതഃ ॥ 26 ॥
തദിദം വൈഷ്ണവം രാമ പിതൃപൈതാമഹം മഹത് ।
ക്ഷത്രധര്മം പുരസ്കൃത്യ ഗൃഹ്ണീഷ്വ ധനുരുത്തമമ് ॥ 27 ॥
യോജയസ്വ ധനുശ്ശ്രേഷ്ഠേ ശരം പരപുരംജയമ് ।
യദി ശക്നോഷി കാകുത്സ്ഥ ദ്വംദ്വം ദാസ്യാമി തേ തതഃ ॥ 28 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ പംചസപ്തതിതമസ്സര്ഗഃ ॥
