ශ්රීමද්වාල්මීකීය රාමායණේ බාලකාංඩම් ।
අථ පංචසප්තතිතමස්සර්ගඃ ।
රාම දාශරථේ රාම වීර්යං තේ ශ්රූයතේऽද්භුතම් ।
ධනුෂෝ භේදනං චෛව නිඛිලේන මයා ශ්රුතම් ॥ 1 ॥
තදද්භුතමචිංත්යං ච භේදනං ධනුෂස්ත්වයා ।
තච්ඡ්රුත්වාऽහමනුප්රාප්තෝ ධනුර්ගෘහ්යාපරං ශුභම් ॥ 2 ॥
තදිදං ඝෝරසංකාශං ජාමදග්න්යං මහද්ධනුඃ ।
පූරයස්ව ශරේණෛව ස්වබලං දර්ශයස්ව ච ॥ 3 ॥
තදහං තේ බලං දෘෂ්ට්වා ධනුෂෝऽස්ය ප්රපූරණේ ।
ද්වංද්වයුද්ධං ප්රදාස්යාමි වීර්යශ්ලාඝ්යස්ය රාඝව ॥ 4 ॥
තස්ය තද්වචනං ශ්රුත්වා රාජා දශරථස්තදා ।
විෂණ්ණවදනෝ දීනඃ ප්රාංජලිර්වාක්යමබ්රවීත් ॥ 5 ॥
ක්ෂත්රරෝෂාත්ප්රශාංතස්ත්වං බ්රාහ්මණශ්ච මහායශාඃ ।
බාලානාං මම පුත්රාණාමභයං දාතුමර්හසි ॥ 6 ॥
භාර්ගවාණාං කුලේ ජාතඃ ස්වාධ්යායව්රතශාලිනාම් ।
සහාස්රාක්ෂේ ප්රතිජ්ඤාය ශස්ත්රං නික්ෂිප්තවානසි ॥ 7 ॥
ස ත්වං ධර්මපරෝ භූත්වා කාශ්යපාය වසුංධරාම් ।
දත්ත්වා වනමුපාගම්ය මහේංද්රකෘතකේතනඃ ॥ 8 ॥
මම සර්වවිනාශාය සංප්රාප්තස්ත්වං මහාමුනේ ।
න චෛකස්මින් හතේ රාමේ සර්වේ ජීවාමහේ වයම් ॥ 9 ॥
බ්රුවත්යේවං දශරථේ ජාමදග්න්යඃ ප්රතාපවාන් ।
අනාදෘත්යෛව තද්වාක්යං රාමමේවාභ්යභාෂත ॥ 10 ॥
ඉමේ ද්වේ ධනුෂී ශ්රේෂ්ඨේ දිව්යේ ලෝකාභිවිශ්රුතේ ।
දෘඪේ බලවතී මුඛ්යේ සුකෘතේ විශ්වකර්මණා ॥ 11 ॥
අතිසෘෂ්ටං සුරෛරේකං ත්ර්යංබකාය යුයුත්සවේ ।
ත්රිපුරඝ්නං නරශ්රේෂ්ඨ භග්නං කාකුත්ස්ථ යත්ත්වයා ॥ 12 ॥
ඉදං ද්විතීයං දුර්ධර්ෂං විෂ්ණෝර්දත්තං සුරෝත්තමෛඃ ।
තදිදං වෛෂ්ණවං රාම ධනුඃ පරමභාස්වරම් ।
සමානසාරං කාකුත්ස්ථ රෞද්රේණ ධනුෂා ත්විදම් ॥ 13 ॥
තදා තු දේවතාස්සර්වාඃ පෘච්ඡංති ස්ම පිතාමහම් ।
ශිතිකංඨස්ය විෂ්ණෝශ්ච බලාබලනිරීක්ෂයා ॥ 14 ॥
අභිප්රායං තු විජ්ඤාය දේවතානාං පිතාමහඃ ।
විරෝධං ජනයාමාස තයෝ ස්සත්යවතාං වරඃ ॥ 15 ॥
විරෝධේ ච මහද්යුද්ධමභවද්රෝමහර්ෂණම් ।
ශිතිකංඨස්ය විෂ්ණෝශ්ච පරස්පරජිගීෂුණෝඃ ॥ 16 ॥
තදා තු ජෘංභිතං ශෛවං ධනුර්භීමපරාක්රමම් ।
හුංකාරේණ මහාදේව ස්තංභිතෝऽථ ත්රිලෝචනඃ ॥ 17 ॥
දේවෛස්තදා සමාගම්ය සර්ෂිසඝෛ ස්සචාරණෛඃ ।
යාචිතෞ ප්රශමං තත්ර ජග්මතුස්තෞ සුරෝත්තමෞ ॥ 18 ॥
ජෘංභිතං තද්ධනුර්ද්රෘෂ්ට්වා ශෛවං විෂ්ණුපරාක්රමෛඃ ।
අධිකං මේනිරේ විෂ්ණුං දේවා ස්සර්ෂිගණාස්තදා ॥ 19 ॥
ධනූ රුද්රස්තු සංකෘද්ධෝ විදේහේෂු මහායශාඃ ।
දේවරාතස්ය රාජර්ෂේර්දදෞ හස්තේ සසායකම් ॥ 20 ॥
ඉදං ච වෛෂ්ණවං රාම ධනුඃ පරපුරංජයම් ।
ඍචීකේ භාර්ගවේ ප්රාදාද්විෂ්ණුඃ ස න්යාසමුත්තමම් ॥ 21 ॥
ඍචීකස්තු මහාතේජාඃ පුත්රස්යාප්රතිකර්මණඃ ।
පිතුර්මම දදෞ දිව්යං ජමදග්නේර්මහාත්මනඃ ॥ 22 ॥
න්යස්තශස්ත්රේ පිතරි මේ තපෝබලසමන්විතේ ।
අර්ජුනෝ විදධේ මෘත්යුං ප්රාකෘතාං බුද්ධිමාස්ථිතඃ ॥ 23 ॥
වධමප්රතිරූපං තු පිතු ශ්ශෘත්වා සුදාරුණම් ।
ක්ෂත්රමුත්සාදයන්රෝෂාජ්ජාතං ජාතමනේකශඃ ॥ 24 ॥
පෘථිවීං චාඛිලාං ප්රාප්ය කාශ්යපාය මහාත්මනේ ।
යජ්ඤස්යාංතේ තදා රාම දක්ෂිණාං පුණ්යකර්මණේ ।
දත්ත්වා මහේංද්රනිලයස්තපෝබලසමන්විතඃ ॥ 25 ॥
අද්යතූත්තමවීර්යේණ ත්වයා රාම මහාබල ।
ශ්රුතවාන් ධනුෂෝ භේදං තතෝऽහං ද්රුතමාගතඃ ॥ 26 ॥
තදිදං වෛෂ්ණවං රාම පිතෘපෛතාමහං මහත් ।
ක්ෂත්රධර්මං පුරස්කෘත්ය ගෘහ්ණීෂ්ව ධනුරුත්තමම් ॥ 27 ॥
යෝජයස්ව ධනුශ්ශ්රේෂ්ඨේ ශරං පරපුරංජයම් ।
යදි ශක්නෝෂි කාකුත්ස්ථ ද්වංද්වං දාස්යාමි තේ තතඃ ॥ 28 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ පංචසප්තතිතමස්සර්ගඃ ॥
