ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ପଂଚସପ୍ତତିତମସ୍ସର୍ଗଃ ।
ରାମ ଦାଶରଥେ ରାମ ଵୀର୍ୟଂ ତେ ଶ୍ରୂୟତେଽଦ୍ଭୁତମ୍ ।
ଧନୁଷୋ ଭେଦନଂ ଚୈଵ ନିଖିଲେନ ମୟା ଶ୍ରୁତମ୍ ॥ 1 ॥
ତଦଦ୍ଭୁତମଚିଂତ୍ୟଂ ଚ ଭେଦନଂ ଧନୁଷସ୍ତ୍ଵୟା ।
ତଚ୍ଛ୍ରୁତ୍ଵାଽହମନୁପ୍ରାପ୍ତୋ ଧନୁର୍ଗୃହ୍ୟାପରଂ ଶୁଭମ୍ ॥ 2 ॥
ତଦିଦଂ ଘୋରସଂକାଶଂ ଜାମଦଗ୍ନ୍ୟଂ ମହଦ୍ଧନୁଃ ।
ପୂରୟସ୍ଵ ଶରେଣୈଵ ସ୍ଵବଲଂ ଦର୍ଶୟସ୍ଵ ଚ ॥ 3 ॥
ତଦହଂ ତେ ବଲଂ ଦୃଷ୍ଟ୍ଵା ଧନୁଷୋଽସ୍ୟ ପ୍ରପୂରଣେ ।
ଦ୍ଵଂଦ୍ଵୟୁଦ୍ଧଂ ପ୍ରଦାସ୍ୟାମି ଵୀର୍ୟଶ୍ଲାଘ୍ୟସ୍ୟ ରାଘଵ ॥ 4 ॥
ତସ୍ୟ ତଦ୍ଵଚନଂ ଶ୍ରୁତ୍ଵା ରାଜା ଦଶରଥସ୍ତଦା ।
ଵିଷଣ୍ଣଵଦନୋ ଦୀନଃ ପ୍ରାଂଜଲିର୍ଵାକ୍ୟମବ୍ରଵୀତ୍ ॥ 5 ॥
କ୍ଷତ୍ରରୋଷାତ୍ପ୍ରଶାଂତସ୍ତ୍ଵଂ ବ୍ରାହ୍ମଣଶ୍ଚ ମହାୟଶାଃ ।
ବାଲାନାଂ ମମ ପୁତ୍ରାଣାମଭୟଂ ଦାତୁମର୍ହସି ॥ 6 ॥
ଭାର୍ଗଵାଣାଂ କୁଲେ ଜାତଃ ସ୍ଵାଧ୍ୟାୟଵ୍ରତଶାଲିନାମ୍ ।
ସହାସ୍ରାକ୍ଷେ ପ୍ରତିଜ୍ଞାୟ ଶସ୍ତ୍ରଂ ନିକ୍ଷିପ୍ତଵାନସି ॥ 7 ॥
ସ ତ୍ଵଂ ଧର୍ମପରୋ ଭୂତ୍ଵା କାଶ୍ୟପାୟ ଵସୁଂଧରାମ୍ ।
ଦତ୍ତ୍ଵା ଵନମୁପାଗମ୍ୟ ମହେଂଦ୍ରକୃତକେତନଃ ॥ 8 ॥
ମମ ସର୍ଵଵିନାଶାୟ ସଂପ୍ରାପ୍ତସ୍ତ୍ଵଂ ମହାମୁନେ ।
ନ ଚୈକସ୍ମିନ୍ ହତେ ରାମେ ସର୍ଵେ ଜୀଵାମହେ ଵୟମ୍ ॥ 9 ॥
ବ୍ରୁଵତ୍ୟେଵଂ ଦଶରଥେ ଜାମଦଗ୍ନ୍ୟଃ ପ୍ରତାପଵାନ୍ ।
ଅନାଦୃତ୍ୟୈଵ ତଦ୍ଵାକ୍ୟଂ ରାମମେଵାଭ୍ୟଭାଷତ ॥ 10 ॥
ଇମେ ଦ୍ଵେ ଧନୁଷୀ ଶ୍ରେଷ୍ଠେ ଦିଵ୍ୟେ ଲୋକାଭିଵିଶ୍ରୁତେ ।
ଦୃଢେ ବଲଵତୀ ମୁଖ୍ୟେ ସୁକୃତେ ଵିଶ୍ଵକର୍ମଣା ॥ 11 ॥
ଅତିସୃଷ୍ଟଂ ସୁରୈରେକଂ ତ୍ର୍ୟଂବକାୟ ୟୁୟୁତ୍ସଵେ ।
ତ୍ରିପୁରଘ୍ନଂ ନରଶ୍ରେଷ୍ଠ ଭଗ୍ନଂ କାକୁତ୍ସ୍ଥ ୟତ୍ତ୍ଵୟା ॥ 12 ॥
ଇଦଂ ଦ୍ଵିତୀୟଂ ଦୁର୍ଧର୍ଷଂ ଵିଷ୍ଣୋର୍ଦତ୍ତଂ ସୁରୋତ୍ତମୈଃ ।
ତଦିଦଂ ଵୈଷ୍ଣଵଂ ରାମ ଧନୁଃ ପରମଭାସ୍ଵରମ୍ ।
ସମାନସାରଂ କାକୁତ୍ସ୍ଥ ରୌଦ୍ରେଣ ଧନୁଷା ତ୍ଵିଦମ୍ ॥ 13 ॥
ତଦା ତୁ ଦେଵତାସ୍ସର୍ଵାଃ ପୃଚ୍ଛଂତି ସ୍ମ ପିତାମହମ୍ ।
ଶିତିକଂଠସ୍ୟ ଵିଷ୍ଣୋଶ୍ଚ ବଲାବଲନିରୀକ୍ଷୟା ॥ 14 ॥
ଅଭିପ୍ରାୟଂ ତୁ ଵିଜ୍ଞାୟ ଦେଵତାନାଂ ପିତାମହଃ ।
ଵିରୋଧଂ ଜନୟାମାସ ତୟୋ ସ୍ସତ୍ୟଵତାଂ ଵରଃ ॥ 15 ॥
ଵିରୋଧେ ଚ ମହଦ୍ୟୁଦ୍ଧମଭଵଦ୍ରୋମହର୍ଷଣମ୍ ।
ଶିତିକଂଠସ୍ୟ ଵିଷ୍ଣୋଶ୍ଚ ପରସ୍ପରଜିଗୀଷୁଣୋଃ ॥ 16 ॥
ତଦା ତୁ ଜୃଂଭିତଂ ଶୈଵଂ ଧନୁର୍ଭୀମପରାକ୍ରମମ୍ ।
ହୁଂକାରେଣ ମହାଦେଵ ସ୍ତଂଭିତୋଽଥ ତ୍ରିଲୋଚନଃ ॥ 17 ॥
ଦେଵୈସ୍ତଦା ସମାଗମ୍ୟ ସର୍ଷିସଘୈ ସ୍ସଚାରଣୈଃ ।
ୟାଚିତୌ ପ୍ରଶମଂ ତତ୍ର ଜଗ୍ମତୁସ୍ତୌ ସୁରୋତ୍ତମୌ ॥ 18 ॥
ଜୃଂଭିତଂ ତଦ୍ଧନୁର୍ଦ୍ରୃଷ୍ଟ୍ଵା ଶୈଵଂ ଵିଷ୍ଣୁପରାକ୍ରମୈଃ ।
ଅଧିକଂ ମେନିରେ ଵିଷ୍ଣୁଂ ଦେଵା ସ୍ସର୍ଷିଗଣାସ୍ତଦା ॥ 19 ॥
ଧନୂ ରୁଦ୍ରସ୍ତୁ ସଂକୃଦ୍ଧୋ ଵିଦେହେଷୁ ମହାୟଶାଃ ।
ଦେଵରାତସ୍ୟ ରାଜର୍ଷେର୍ଦଦୌ ହସ୍ତେ ସସାୟକମ୍ ॥ 20 ॥
ଇଦଂ ଚ ଵୈଷ୍ଣଵଂ ରାମ ଧନୁଃ ପରପୁରଂଜୟମ୍ ।
ଋଚୀକେ ଭାର୍ଗଵେ ପ୍ରାଦାଦ୍ଵିଷ୍ଣୁଃ ସ ନ୍ୟାସମୁତ୍ତମମ୍ ॥ 21 ॥
ଋଚୀକସ୍ତୁ ମହାତେଜାଃ ପୁତ୍ରସ୍ୟାପ୍ରତିକର୍ମଣଃ ।
ପିତୁର୍ମମ ଦଦୌ ଦିଵ୍ୟଂ ଜମଦଗ୍ନେର୍ମହାତ୍ମନଃ ॥ 22 ॥
ନ୍ୟସ୍ତଶସ୍ତ୍ରେ ପିତରି ମେ ତପୋବଲସମନ୍ଵିତେ ।
ଅର୍ଜୁନୋ ଵିଦଧେ ମୃତ୍ୟୁଂ ପ୍ରାକୃତାଂ ବୁଦ୍ଧିମାସ୍ଥିତଃ ॥ 23 ॥
ଵଧମପ୍ରତିରୂପଂ ତୁ ପିତୁ ଶ୍ଶୃତ୍ଵା ସୁଦାରୁଣମ୍ ।
କ୍ଷତ୍ରମୁତ୍ସାଦୟନ୍ରୋଷାଜ୍ଜାତଂ ଜାତମନେକଶଃ ॥ 24 ॥
ପୃଥିଵୀଂ ଚାଖିଲାଂ ପ୍ରାପ୍ୟ କାଶ୍ୟପାୟ ମହାତ୍ମନେ ।
ୟଜ୍ଞସ୍ୟାଂତେ ତଦା ରାମ ଦକ୍ଷିଣାଂ ପୁଣ୍ୟକର୍ମଣେ ।
ଦତ୍ତ୍ଵା ମହେଂଦ୍ରନିଲୟସ୍ତପୋବଲସମନ୍ଵିତଃ ॥ 25 ॥
ଅଦ୍ୟତୂତ୍ତମଵୀର୍ୟେଣ ତ୍ଵୟା ରାମ ମହାବଲ ।
ଶ୍ରୁତଵାନ୍ ଧନୁଷୋ ଭେଦଂ ତତୋଽହଂ ଦ୍ରୁତମାଗତଃ ॥ 26 ॥
ତଦିଦଂ ଵୈଷ୍ଣଵଂ ରାମ ପିତୃପୈତାମହଂ ମହତ୍ ।
କ୍ଷତ୍ରଧର୍ମଂ ପୁରସ୍କୃତ୍ୟ ଗୃହ୍ଣୀଷ୍ଵ ଧନୁରୁତ୍ତମମ୍ ॥ 27 ॥
ୟୋଜୟସ୍ଵ ଧନୁଶ୍ଶ୍ରେଷ୍ଠେ ଶରଂ ପରପୁରଂଜୟମ୍ ।
ୟଦି ଶକ୍ନୋଷି କାକୁତ୍ସ୍ଥ ଦ୍ଵଂଦ୍ଵଂ ଦାସ୍ୟାମି ତେ ତତଃ ॥ 28 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ପଂଚସପ୍ତତିତମସ୍ସର୍ଗଃ ॥
