શ્રીમદ્વાલ્મીકીય રામાયણે બાલકાંડમ્ ।
અથ પંચસપ્તતિતમસ્સર્ગઃ ।
રામ દાશરથે રામ વીર્યં તે શ્રૂયતેઽદ્ભુતમ્ ।
ધનુષો ભેદનં ચૈવ નિખિલેન મયા શ્રુતમ્ ॥ 1 ॥
તદદ્ભુતમચિંત્યં ચ ભેદનં ધનુષસ્ત્વયા ।
તચ્છ્રુત્વાઽહમનુપ્રાપ્તો ધનુર્ગૃહ્યાપરં શુભમ્ ॥ 2 ॥
તદિદં ઘોરસંકાશં જામદગ્ન્યં મહદ્ધનુઃ ।
પૂરયસ્વ શરેણૈવ સ્વબલં દર્શયસ્વ ચ ॥ 3 ॥
તદહં તે બલં દૃષ્ટ્વા ધનુષોઽસ્ય પ્રપૂરણે ।
દ્વંદ્વયુદ્ધં પ્રદાસ્યામિ વીર્યશ્લાઘ્યસ્ય રાઘવ ॥ 4 ॥
તસ્ય તદ્વચનં શ્રુત્વા રાજા દશરથસ્તદા ।
વિષણ્ણવદનો દીનઃ પ્રાંજલિર્વાક્યમબ્રવીત્ ॥ 5 ॥
ક્ષત્રરોષાત્પ્રશાંતસ્ત્વં બ્રાહ્મણશ્ચ મહાયશાઃ ।
બાલાનાં મમ પુત્રાણામભયં દાતુમર્હસિ ॥ 6 ॥
ભાર્ગવાણાં કુલે જાતઃ સ્વાધ્યાયવ્રતશાલિનામ્ ।
સહાસ્રાક્ષે પ્રતિજ્ઞાય શસ્ત્રં નિક્ષિપ્તવાનસિ ॥ 7 ॥
સ ત્વં ધર્મપરો ભૂત્વા કાશ્યપાય વસુંધરામ્ ।
દત્ત્વા વનમુપાગમ્ય મહેંદ્રકૃતકેતનઃ ॥ 8 ॥
મમ સર્વવિનાશાય સંપ્રાપ્તસ્ત્વં મહામુને ।
ન ચૈકસ્મિન્ હતે રામે સર્વે જીવામહે વયમ્ ॥ 9 ॥
બ્રુવત્યેવં દશરથે જામદગ્ન્યઃ પ્રતાપવાન્ ।
અનાદૃત્યૈવ તદ્વાક્યં રામમેવાભ્યભાષત ॥ 10 ॥
ઇમે દ્વે ધનુષી શ્રેષ્ઠે દિવ્યે લોકાભિવિશ્રુતે ।
દૃઢે બલવતી મુખ્યે સુકૃતે વિશ્વકર્મણા ॥ 11 ॥
અતિસૃષ્ટં સુરૈરેકં ત્ર્યંબકાય યુયુત્સવે ।
ત્રિપુરઘ્નં નરશ્રેષ્ઠ ભગ્નં કાકુત્સ્થ યત્ત્વયા ॥ 12 ॥
ઇદં દ્વિતીયં દુર્ધર્ષં વિષ્ણોર્દત્તં સુરોત્તમૈઃ ।
તદિદં વૈષ્ણવં રામ ધનુઃ પરમભાસ્વરમ્ ।
સમાનસારં કાકુત્સ્થ રૌદ્રેણ ધનુષા ત્વિદમ્ ॥ 13 ॥
તદા તુ દેવતાસ્સર્વાઃ પૃચ્છંતિ સ્મ પિતામહમ્ ।
શિતિકંઠસ્ય વિષ્ણોશ્ચ બલાબલનિરીક્ષયા ॥ 14 ॥
અભિપ્રાયં તુ વિજ્ઞાય દેવતાનાં પિતામહઃ ।
વિરોધં જનયામાસ તયો સ્સત્યવતાં વરઃ ॥ 15 ॥
વિરોધે ચ મહદ્યુદ્ધમભવદ્રોમહર્ષણમ્ ।
શિતિકંઠસ્ય વિષ્ણોશ્ચ પરસ્પરજિગીષુણોઃ ॥ 16 ॥
તદા તુ જૃંભિતં શૈવં ધનુર્ભીમપરાક્રમમ્ ।
હુંકારેણ મહાદેવ સ્તંભિતોઽથ ત્રિલોચનઃ ॥ 17 ॥
દેવૈસ્તદા સમાગમ્ય સર્ષિસઘૈ સ્સચારણૈઃ ।
યાચિતૌ પ્રશમં તત્ર જગ્મતુસ્તૌ સુરોત્તમૌ ॥ 18 ॥
જૃંભિતં તદ્ધનુર્દ્રૃષ્ટ્વા શૈવં વિષ્ણુપરાક્રમૈઃ ।
અધિકં મેનિરે વિષ્ણું દેવા સ્સર્ષિગણાસ્તદા ॥ 19 ॥
ધનૂ રુદ્રસ્તુ સંકૃદ્ધો વિદેહેષુ મહાયશાઃ ।
દેવરાતસ્ય રાજર્ષેર્દદૌ હસ્તે સસાયકમ્ ॥ 20 ॥
ઇદં ચ વૈષ્ણવં રામ ધનુઃ પરપુરંજયમ્ ।
ઋચીકે ભાર્ગવે પ્રાદાદ્વિષ્ણુઃ સ ન્યાસમુત્તમમ્ ॥ 21 ॥
ઋચીકસ્તુ મહાતેજાઃ પુત્રસ્યાપ્રતિકર્મણઃ ।
પિતુર્મમ દદૌ દિવ્યં જમદગ્નેર્મહાત્મનઃ ॥ 22 ॥
ન્યસ્તશસ્ત્રે પિતરિ મે તપોબલસમન્વિતે ।
અર્જુનો વિદધે મૃત્યું પ્રાકૃતાં બુદ્ધિમાસ્થિતઃ ॥ 23 ॥
વધમપ્રતિરૂપં તુ પિતુ શ્શૃત્વા સુદારુણમ્ ।
ક્ષત્રમુત્સાદયન્રોષાજ્જાતં જાતમનેકશઃ ॥ 24 ॥
પૃથિવીં ચાખિલાં પ્રાપ્ય કાશ્યપાય મહાત્મને ।
યજ્ઞસ્યાંતે તદા રામ દક્ષિણાં પુણ્યકર્મણે ।
દત્ત્વા મહેંદ્રનિલયસ્તપોબલસમન્વિતઃ ॥ 25 ॥
અદ્યતૂત્તમવીર્યેણ ત્વયા રામ મહાબલ ।
શ્રુતવાન્ ધનુષો ભેદં તતોઽહં દ્રુતમાગતઃ ॥ 26 ॥
તદિદં વૈષ્ણવં રામ પિતૃપૈતામહં મહત્ ।
ક્ષત્રધર્મં પુરસ્કૃત્ય ગૃહ્ણીષ્વ ધનુરુત્તમમ્ ॥ 27 ॥
યોજયસ્વ ધનુશ્શ્રેષ્ઠે શરં પરપુરંજયમ્ ।
યદિ શક્નોષિ કાકુત્સ્થ દ્વંદ્વં દાસ્યામિ તે તતઃ ॥ 28 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે પંચસપ્તતિતમસ્સર્ગઃ ॥
