ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ഏകോനവിംശത്യധികശതതമസ്സര്ഗഃ ।
അനസൂയാ തു ധര്മജ്ഞാ ശ്രുത്വാ താം മഹതീം കഥാമ് ।
പര്യഷ്വജത ബാഹുഭ്യാം ശിരസ്യാഘ്രായ മൈഥിലീമ് ॥ 1 ॥
വ്യക്താക്ഷരപദം ചിത്രം ഭാഷിതം മധുരം ത്വയാ ।
യഥാ സ്വയംവരം വൃത്തം തത്സർവം ഹി ശ്രുതം മയാ ॥ 2 ॥
രമേഽഹം കഥയാ തേ തു ദൃഢം മധുരഭാഷിണി ।
രവിരസ്തംഗതശ്ശ്രീമാനുപോഹ്യ രജനീം ശിവാമ് ॥ 3 ॥
ദിവസം പ്രതികീര്ണാനാമാഹാരാര്ഥം പതത്രിണാമ് ।
സംധ്യാകാലേ നിലീനാനാം നിദ്രാര്ഥം ശ്രൂയതേ ധ്വനിഃ ॥ 4 ॥
ഏതേ ചാപ്യഭിഷേകാര്ദ്രാ മുനയഃ കലശോദ്യതാഃ ।
സഹിതാ ഉപവര്തംതേ സലിലാപ്ലുതവല്കലാഃ ॥ 5 ॥
ഋഷീണാമഗ്നിഹോത്രേഷു ഹുതേഷു വിധിപൂർവകമ് ।
കപോതാംഗാരുണോ ധൂമോ ദൃശ്യതേ പവനോദ്ധതഃ ॥ 6 ॥
അല്പപര്ണാ ഹി തരവോ ഘനീഭൂതാസ്സമംതതഃ ।
വിപ്രകൃഷ്ടേംദ്രിയേ ദേശേഽസ്മിന്ന പ്രകാശംതി വൈ ദിശഃ ॥ 7 ॥
രജനീചരസത്ത്വാനി പ്രചരംതി സമംതതഃ ।
തപോവനമൃഗാ ഹ്യേതേ വേദിതീര്ഥേഷു ശേരതേ ॥ 8 ॥
സംപ്രവൃത്താനിശാ സീതേ നക്ഷത്രസമലംകൃതാ ।
ജ്യോത്സ്നാപ്രാവരണശ്ചംദ്രോ ദൃശ്യതേഽഭ്യുദിതോഽംബരേ ॥ 9 ॥
ഗമ്യതാമനുജാനാമി രാമസ്യാനുചരീ ഭവ ।
കഥായംത്യാ ഹി മധുരം ത്വയാഽഹം പരിതോഷിതാ ॥ 10 ॥
അലംകുരു ച താവത്ത്വം പ്രത്യക്ഷം മമ മൈഥിലി ।
പ്രീതിം ജനയ മേ വത്സേ ദിവ്യാലംകാരശോഭിതാ ॥ 11 ॥
സാ തഥാ സമലംകൃത്യ സീതാ സുരസുതോപമാ ।
പ്രണമ്യ ശിരസാ തസ്യൈ രാമം ത്വഭിമുഖീ യയൌ ॥ 12 ॥
തഥാ തു ഭൂഷിതാം സീതാം ദദര്ശ വദതാം വരഃ ।
രാഘവഃ പ്രീതിദാനേന തപസ്വിന്യാ ജഹര്ഷ ച ॥ 13 ॥
ന്യവേദയത്തതസ്സർവം സീതാ രാമായ മൈഥിലീ ।
പ്രീതിദാനം തപസ്വിന്യാ വസനാഭരണസ്രജമ് ॥ 14 ॥
പ്രഹൃഷ്ടസ്ത്വഭവദ്രാമോ ലക്ഷ്മണശ്ച മഹാരഥഃ ।
മൈഥില്യാസ്സത്ക്രിയാം ദൃഷ്ട്വാ മാനുഷേഷു സുദുര്ലഭാമ് ॥ 15 ॥
തതസ്താം ശർവരീം പ്രീതഃ പുണ്യാം ശശിനിഭാനനഃ ।
അര്ചിതസ്താപസൈ സ്സിദ്ധൈരുവാസ രഘുനംദനഃ ॥ 16 ॥
തസ്യാം രാത്ര്യാം വ്യതീതായാമഭിഷിച്യ ഹുതാഗ്നികാന് ।
ആപൃച്ഛേതാം നരവ്യാഘ്രൌ താപസാന്വനഗോചരാന് ॥ 17 ॥
താവൂചുസ്തേ വനചരാസ്താപസാ ധര്മചാരിണഃ ।
വനസ്യ തസ്യ സംചാരം രാക്ഷസൈസ്സമഭിപ്ലുതമ് ॥ 18 ॥
രക്ഷാംസി പുരുഷാദാനി നാനാരൂപാണി രാഘവ ।
വസംത്യസ്മിന്മഹാരണ്യേ വ്യാലാശ്ച രുധിരാശനാഃ ॥ 19 ॥
ഉച്ഛിഷ്ടം വാ പ്രമത്തം വാ താപസം ധര്മചാരിണമ് ।
അദംത്യസ്മിന്മഹാരണ്യേ താന്നിവാരയ രാഘവ ॥ 20 ॥
ഏഷ പംഥാ മഹര്ഷീണാം ഫലാന്യാഹരതാം വനേ ।
അനേന തു വനം ദുര്ഗം ഗംതും രാഘവ തേ ക്ഷമമ് ॥ 21 ॥
ഇതീവ തൈഃ പ്രാംജലിഭിസ്തപസ്വിഭിര്ദ്വിജൈഃ കൃതസ്വസ്ത്യയനഃ പരംതപഃ ।
വനം സഭാര്യഃ പ്രവിവേശ രാഘവസ്സലക്ഷ്മണസ്സൂര്യ ഇവാഭ്രമംഡലമ് ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ഏകോനവിംശത്യധികശതതമസ്സര്ഗഃ ॥
