ශ්රීමද්වාල්මීකීය රාමායණේ අයෝධ්යාකාංඩම් ।
අථ ඒකෝනවිංශත්යධිකශතතමස්සර්ගඃ ।
අනසූයා තු ධර්මජ්ඤා ශ්රුත්වා තාං මහතීං කථාම් ।
පර්යෂ්වජත බාහුභ්යාං ශිරස්යාඝ්රාය මෛථිලීම් ॥ 1 ॥
ව්යක්තාක්ෂරපදං චිත්රං භාෂිතං මධුරං ත්වයා ।
යථා ස්වයංවරං වෘත්තං තත්සර්වං හි ශ්රුතං මයා ॥ 2 ॥
රමේऽහං කථයා තේ තු දෘඪං මධුරභාෂිණි ।
රවිරස්තංගතශ්ශ්රීමානුපෝහ්ය රජනීං ශිවාම් ॥ 3 ॥
දිවසං ප්රතිකීර්ණානාමාහාරාර්ථං පතත්රිණාම් ।
සංධ්යාකාලේ නිලීනානාං නිද්රාර්ථං ශ්රූයතේ ධ්වනිඃ ॥ 4 ॥
ඒතේ චාප්යභිෂේකාර්ද්රා මුනයඃ කලශෝද්යතාඃ ।
සහිතා උපවර්තංතේ සලිලාප්ලුතවල්කලාඃ ॥ 5 ॥
ඍෂීණාමග්නිහෝත්රේෂු හුතේෂු විධිපූර්වකම් ।
කපෝතාංගාරුණෝ ධූමෝ දෘශ්යතේ පවනෝද්ධතඃ ॥ 6 ॥
අල්පපර්ණා හි තරවෝ ඝනීභූතාස්සමංතතඃ ।
විප්රකෘෂ්ටේංද්රියේ දේශේऽස්මින්න ප්රකාශංති වෛ දිශඃ ॥ 7 ॥
රජනීචරසත්ත්වානි ප්රචරංති සමංතතඃ ।
තපෝවනමෘගා හ්යේතේ වේදිතීර්ථේෂු ශේරතේ ॥ 8 ॥
සංප්රවෘත්තානිශා සීතේ නක්ෂත්රසමලංකෘතා ।
ජ්යෝත්ස්නාප්රාවරණශ්චංද්රෝ දෘශ්යතේऽභ්යුදිතෝऽංබරේ ॥ 9 ॥
ගම්යතාමනුජානාමි රාමස්යානුචරී භව ।
කථායංත්යා හි මධුරං ත්වයාऽහං පරිතෝෂිතා ॥ 10 ॥
අලංකුරු ච තාවත්ත්වං ප්රත්යක්ෂං මම මෛථිලි ।
ප්රීතිං ජනය මේ වත්සේ දිව්යාලංකාරශෝභිතා ॥ 11 ॥
සා තථා සමලංකෘත්ය සීතා සුරසුතෝපමා ।
ප්රණම්ය ශිරසා තස්යෛ රාමං ත්වභිමුඛී යයෞ ॥ 12 ॥
තථා තු භූෂිතාං සීතාං දදර්ශ වදතාං වරඃ ।
රාඝවඃ ප්රීතිදානේන තපස්වින්යා ජහර්ෂ ච ॥ 13 ॥
න්යවේදයත්තතස්සර්වං සීතා රාමාය මෛථිලී ।
ප්රීතිදානං තපස්වින්යා වසනාභරණස්රජම් ॥ 14 ॥
ප්රහෘෂ්ටස්ත්වභවද්රාමෝ ලක්ෂ්මණශ්ච මහාරථඃ ।
මෛථිල්යාස්සත්ක්රියාං දෘෂ්ට්වා මානුෂේෂු සුදුර්ලභාම් ॥ 15 ॥
තතස්තාං ශර්වරීං ප්රීතඃ පුණ්යාං ශශිනිභානනඃ ।
අර්චිතස්තාපසෛ ස්සිද්ධෛරුවාස රඝුනංදනඃ ॥ 16 ॥
තස්යාං රාත්ර්යාං ව්යතීතායාමභිෂිච්ය හුතාග්නිකාන් ।
ආපෘච්ඡේතාං නරව්යාඝ්රෞ තාපසාන්වනගෝචරාන් ॥ 17 ॥
තාවූචුස්තේ වනචරාස්තාපසා ධර්මචාරිණඃ ।
වනස්ය තස්ය සංචාරං රාක්ෂසෛස්සමභිප්ලුතම් ॥ 18 ॥
රක්ෂාංසි පුරුෂාදානි නානාරූපාණි රාඝව ।
වසංත්යස්මින්මහාරණ්යේ ව්යාලාශ්ච රුධිරාශනාඃ ॥ 19 ॥
උච්ඡිෂ්ටං වා ප්රමත්තං වා තාපසං ධර්මචාරිණම් ।
අදංත්යස්මින්මහාරණ්යේ තාන්නිවාරය රාඝව ॥ 20 ॥
ඒෂ පංථා මහර්ෂීණාං ඵලාන්යාහරතාං වනේ ।
අනේන තු වනං දුර්ගං ගංතුං රාඝව තේ ක්ෂමම් ॥ 21 ॥
ඉතීව තෛඃ ප්රාංජලිභිස්තපස්විභිර්ද්විජෛඃ කෘතස්වස්ත්යයනඃ පරංතපඃ ।
වනං සභාර්යඃ ප්රවිවේශ රාඝවස්සලක්ෂ්මණස්සූර්ය ඉවාභ්රමංඩලම් ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ඒකෝනවිංශත්යධිකශතතමස්සර්ගඃ ॥
