śrīmadvālmīkīya rāmāyaṇē ayōdhyākāṇḍam ।
atha ēkōnaviṃśatyadhikaśatatamassargaḥ ।
anasūyā tu dharmajñā śrutvā tāṃ mahatīṃ kathām ।
paryaṣvajata bāhubhyāṃ śirasyāghrāya maithilīm ॥ 1 ॥
vyaktākṣarapadaṃ chitraṃ bhāṣitaṃ madhuraṃ tvayā ।
yathā svayaṃvaraṃ vṛttaṃ tatsarvaṃ hi śrutaṃ mayā ॥ 2 ॥
ramē'haṃ kathayā tē tu dṛḍhaṃ madhurabhāṣiṇi ।
ravirastaṅgataśśrīmānupōhya rajanīṃ śivām ॥ 3 ॥
divasaṃ pratikīrṇānāmāhārārthaṃ patatriṇām ।
sandhyākālē nilīnānāṃ nidrārthaṃ śrūyatē dhvaniḥ ॥ 4 ॥
ētē chāpyabhiṣēkārdrā munayaḥ kalaśōdyatāḥ ।
sahitā upavartantē salilāplutavalkalāḥ ॥ 5 ॥
ṛṣīṇāmagnihōtrēṣu hutēṣu vidhipūrvakam ।
kapōtāṅgāruṇō dhūmō dṛśyatē pavanōddhataḥ ॥ 6 ॥
alpaparṇā hi taravō ghanībhūtāssamantataḥ ।
viprakṛṣṭēndriyē dēśē'sminna prakāśanti vai diśaḥ ॥ 7 ॥
rajanīcharasattvāni pracharanti samantataḥ ।
tapōvanamṛgā hyētē vēditīrthēṣu śēratē ॥ 8 ॥
sampravṛttāniśā sītē nakṣatrasamalaṅkṛtā ।
jyōtsnāprāvaraṇaśchandrō dṛśyatē'bhyuditō'mbarē ॥ 9 ॥
gamyatāmanujānāmi rāmasyānucharī bhava ।
kathāyantyā hi madhuraṃ tvayā'haṃ paritōṣitā ॥ 10 ॥
alaṅkuru cha tāvattvaṃ pratyakṣaṃ mama maithili ।
prītiṃ janaya mē vatsē divyālaṅkāraśōbhitā ॥ 11 ॥
sā tathā samalaṅkṛtya sītā surasutōpamā ।
praṇamya śirasā tasyai rāmaṃ tvabhimukhī yayau ॥ 12 ॥
tathā tu bhūṣitāṃ sītāṃ dadarśa vadatāṃ varaḥ ।
rāghavaḥ prītidānēna tapasvinyā jaharṣa cha ॥ 13 ॥
nyavēdayattatassarvaṃ sītā rāmāya maithilī ।
prītidānaṃ tapasvinyā vasanābharaṇasrajam ॥ 14 ॥
prahṛṣṭastvabhavadrāmō lakṣmaṇaścha mahārathaḥ ।
maithilyāssatkriyāṃ dṛṣṭvā mānuṣēṣu sudurlabhām ॥ 15 ॥
tatastāṃ śarvarīṃ prītaḥ puṇyāṃ śaśinibhānanaḥ ।
architastāpasai ssiddhairuvāsa raghunandanaḥ ॥ 16 ॥
tasyāṃ rātryāṃ vyatītāyāmabhiṣichya hutāgnikān ।
āpṛchChētāṃ naravyāghrau tāpasānvanagōcharān ॥ 17 ॥
tāvūchustē vanacharāstāpasā dharmachāriṇaḥ ।
vanasya tasya sañchāraṃ rākṣasaissamabhiplutam ॥ 18 ॥
rakṣāṃsi puruṣādāni nānārūpāṇi rāghava ।
vasantyasminmahāraṇyē vyālāścha rudhirāśanāḥ ॥ 19 ॥
uchChiṣṭaṃ vā pramattaṃ vā tāpasaṃ dharmachāriṇam ।
adantyasminmahāraṇyē tānnivāraya rāghava ॥ 20 ॥
ēṣa panthā maharṣīṇāṃ phalānyāharatāṃ vanē ।
anēna tu vanaṃ durgaṃ gantuṃ rāghava tē kṣamam ॥ 21 ॥
itīva taiḥ prāñjalibhistapasvibhirdvijaiḥ kṛtasvastyayanaḥ parantapaḥ ।
vanaṃ sabhāryaḥ pravivēśa rāghavassalakṣmaṇassūrya ivābhramaṇḍalam ॥ 22 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ēkōnaviṃśatyadhikaśatatamassargaḥ ॥
