ශ්රීමද්වාල්මීකීය රාමායණේ අයෝධ්යාකාංඩම් ।
අථ සප්තචත්වාරිංශස්සර්ගඃ ।
ප්රභාතායාං තු ශර්වර්යාං පෞරාස්තේ රාඝවං විනා ।
ශෝකෝපහතනිශ්චේෂ්ටා බභූවුර්හතචේතසඃ ॥ 1 ॥
ශෝකජාශ්රුපරිද්යූනා වීක්ෂමාණාස්තතස්තතඃ ।
ආලෝකමපි රාමස්ය න පශ්යංති ස්ම දුඃඛිතාඃ ॥ 2 ॥
තේ විෂාදාර්තවදනා රහිතාස්තේන ධීමතා ।
කෘපණාඃ කරුණා වාචෝ වදංති ස්ම මනස්විනඃ ॥ 3 ॥
ධිගස්තු ඛලු නිද්රාං තාං යයාऽපහෘතචේතසඃ ।
නාද්ය පශ්යාමහේ රාමං පෘථූරස්කං මහාභුජම් ॥ 4 ॥
කථං නාම මහාබාහු ස්ස තථාවිතථක්රියඃ ।
භක්තං ජනං පරිත්යජ්ය ප්රවාසං රාඝවෝ ගතඃ ॥ 5 ॥
යෝ නඃ සදා පාලයති පිතා පුත්රානිවෞරසාන් ।
කථං රඝූණාං ස ශ්රේෂ්ඨස්ත්යක්ත්වා නෝ විපිනං ගතඃ ॥ 6 ॥
ඉහෛව නිධනං යාමෝ මහාප්රස්ථානමේව වා ।
රාමේණ රහිතානාං හි කිමර්ථං ජීවිතං හි නඃ ॥ 7 ॥
සංති ශුෂ්කාණි කාෂ්ඨානි ප්රභූතානි මහාංති ච ।
තෛඃ ප්රජ්වාල්ය චිතාං සර්වේ ප්රවිශාමෝऽථ පාවකම් ॥ 8 ॥
කිං වක්ෂ්යාමෝ මහාබාහුරනසූයඃ ප්රියංවදඃ ।
නීත ස්ස රාඝවෝऽස්මාභිරිති වක්තුං කථං ක්ෂමම් ॥ 9 ॥
සා නූනං නගරී දීනා දෘෂ්ට්වාऽස්මාන් රාඝවං විනා ।
භවිෂ්යති නිරානංදා සස්ත්රීබාලවයෝධිකා ॥ 10 ॥
නිර්යාතාස්තේන වීරේණ සහ නිත්යං ජිතාත්මනා ।
විහීනාස්තේන ච පුනඃ කථං පශ්යාම තාං පුරීම් ॥ 11 ॥
ඉතීව බහුධා වාචෝ බාහුමුද්යම්ය තේ ජනාඃ ।
විලපංති ස්ම දුඃඛාර්තා විවත්සා ඉව ධේනවඃ ॥ 12 ॥
තතෝ මාර්ගානුසාරේණ ගත්වා කිංචිත් ක්ෂණං පුනඃ ।
මාර්ගනාශාද්විෂාදේන මහතා සමභිප්ලුතාඃ ॥ 13 ॥
රථස්ය මාර්ගනාශේන න්යවර්තංත මනස්විනඃ ।
කිමිදං කිං කරිෂ්යාමෝ දෛවේනෝපහතා ඉති ॥ 14 ॥
තතෝ යථාගතේනෛව මාර්ගේණ ක්ලාංතචේතසඃ ।
අයෝධ්යාමාගමන්සර්වේ පුරීං ව්යථිතසජ්ජනාම් ॥ 15 ॥
ආලෝක්ය නගරීං තාං ච ක්ෂයව්යාකුලමානසාඃ ।
ආවර්තයංත තේऽශ්රූණි නයනෛඃ ශෝකපීඩිතෛඃ ॥ 16 ॥
ඒෂා රාමේණ නගරී රහිතා නාතිශෝභතේ ।
ආපගා ගරුඩේනේව හ්රදාදුද්ධෘතපන්නගා ॥ 17 ॥
චංද්රහීනමිවාකාශං තෝයහීනමිවාර්ණවම් ।
අපශ්යන්නිහතානංදං නගරං තේ විචේතසඃ ॥ 18 ॥
තේ තානි වේශ්මානි මහාධනානි දුඃඛේන දුඃඛෝපහතා විශංතඃ ।
නෛව ප්රජජ්ඤුඃ ස්වජනං ජනං වා නිරීක්ෂමාණාඃ ප්රවිනෂ්ටහර්ෂාඃ ॥ 19 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ සප්තචත්වාරිංශස්සර්ගඃ ॥
