ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ സപ്തഷഷ്ടിതമസ്സര്ഗഃ ।
ആക്രംദിതനിരാനംദാ സാസ്രകംഠജനാകുലാ ।
അയോധ്യായാമവതതാ സാ വ്യതീയായ ശർവരീ ॥ 1 ॥
വ്യതീതായാം തു ശർവര്യാമാദിത്യസ്യോദയേ തതഃ ।
സമേത്യ രാജകര്താരഃ സഭാമീയുര്ദ്വിജാതയഃ ॥ 2 ॥
മാര്കംഡേയോഽഥ മൌദ്ഗല്യോ വാമദേവശ്ച കാശ്യപഃ ।
കാത്യായനോ ഗൌതമശ്ച ജാബാലിശ്ച മഹായശാഃ ॥ 3 ॥
ഏതേ ദ്വിജാ സ്സഹാമാത്യൈഃ പൃഥഗ്വാ ച മുദീരയന് ।
വസിഷ്ഠമേവാഭിമുഖാഃ ശ്രേഷ്ഠം രാജപുരോഹിതമ് ॥ 4 ॥
അതീതാ ശർവരീ ദുഃഖം യാ നോ വര്ഷശതോപമാ ।
അസ്മിന്പംചത്വമാപന്നേ പുത്രശോകേന പാര്ഥിവേ ॥ 5 ॥
സ്വര്ഗതശ്ച മഹാരാജോ രാമശ്ചാരണ്യമാശ്രിതഃ ।
ലക്ഷ്മണശ്ചാപി തേജസ്വീ രാമേണൈവ ഗതസ്സഹ ॥ 6 ॥
ഉഭൌ ഭരതശത്രുഘ്നൌ കേകയേഷു പരംതപൌ ।
പുരേ രാജഗൃഹേ രമ്യേ മാതാമഹനിവേശനേ ॥ 7 ॥
ഇക്ഷ്വാകൂണാമിഹാദ്യൈവ കശ്ചിദ്രാജാ വിധീയതാമ് ।
അരാജകം ഹി നോ രാഷ്ട്രം വിനാശം സമവാപ്നുയാത് ॥ 8 ॥
നാരാജകേ ജനപദേ വിദ്യുന്മാലീ മഹാസ്വനഃ ।
അഭിവര്ഷതി പര്ജന്യോ മഹീം ദിവ്യേന വാരിണാ ॥ 9 ॥
നാരാജകേ ജനപദേ ബീജമുഷ്ടിഃ പ്രകീര്യതേ ।
നാരാജകേ പിതുഃ പുത്രോ ഭാര്യാ വാ വര്തതേ വശേ ॥ 10 ॥
നാരാജകേ ധനം ചാസ്തി നാസ്തി ഭാര്യാ പ്യരാജകേ ।
ഇദ മത്യാഹിതം ചാന്യത്കുതസ്സത്യ മരാജകേ ॥ 11 ॥
നാരാജകേ ജനപദേ കാരയംതി സഭാം നരാഃ ।
ഉദ്യാനാനി ച രമ്യാണി ഹൃഷ്ടാഃ പുണ്യഗൃഹാണി ച ॥ 12 ॥
നാരാജകേ ജനപദേ യജ്ഞശീലാ ദ്വിജാതയഃ ।
സത്രാണ്യന്വാസതേ ദാംതാ ബ്രാഹ്മണാ സ്സംശിതവ്രതാഃ ॥ 13 ॥
നാരാജകേ ജനപദേ മഹായജ്ഞേഷു യജ്വനഃ ।
ബ്രാഹ്മണാ വസുസംപന്നാ വിസൃജംത്യാപ്തദക്ഷിണാഃ ॥ 14 ॥
നാരാജകേ ജനപദേ പ്രഭൂതനടനര്തകാഃ ।
ഉത്സവാശ്ച സമാജാശ്ച വര്ധംതേ രാഷ്ട്രവര്ധനാഃ ॥ 15 ॥
നാരാജകേ ജനപദേ സിദ്ധാര്ഥാ വ്യവഹാരിണഃ ।
കഥാഭിരനുരജ്യംതേ കഥാശീലാഃ കഥാപ്രിയൈഃ ॥ 16 ॥
നാരാജകേ ജനപദേ ഉദ്യാനാനി സമാഗതാഃ ।
സായാഹ്നേ ക്രീഡിതും യാംതി കുമാര്യോ ഹേമഭൂഷിതാഃ ॥ 17 ॥
നാരാജകേ ജനപദേ വാഹനൈ ശശീഘ്രഗാമിഭിഃ ।
നരാ നിര്യാംത്യരണ്യാനി നാരീഭിസ്സഹ കാമിനഃ ॥ 18 ॥
നാരാജകേ ജനപദേ ധനവംതസ്സുരക്ഷിതാഃ ।
ശേരതേ വിവൃതദ്വാരാഃ കൃഷിഗോരക്ഷജീവിനഃ ॥ 19 ॥
നാരാജകേ ജനപദേ ബദ്ധഘംടാവിഷാണിനഃ ।
അടംതി രാജമാര്ഗേഷു കുംജരാ ഷഷ്ടിഹായനാഃ ॥ 20 ॥
നാരാജകേ ജനപദേ ശരാന്സംതതമസ്യതാമ് ।
ശ്രൂയതേ തലനിര്ഘോഷ ഇഷ്വസ്ത്രാണാമുപാസനേ ॥ 21 ॥
നാരാജകേ ജനപദേ വണിജോ ദൂരഗാമിനഃ ।
ഗച്ഛംതി ക്ഷേമമധ്വാനം ബഹുപണ്യസമാചിതാഃ ॥ 22 ॥
നാരാജകേ ജനപദേ ചരത്യേകചരോ വശീ ।
ഭാവയന്നാത്മനാഽത്മാനം യത്ര സായംഗൃഹോ മുനിഃ ॥ 23 ॥
നാരാജകേ ജനപദേ യോഗക്ഷേമം പ്രവര്തതേ ।
നചാപ്യരാജകേ സേനാ ശത്രൂന്വിഷഹതേ യുധി ॥ 24 ॥
നാരാജകേ ജനപദേ ഹൃഷ്ടൈഃ പരമവാജിഭിഃ ।
നരാസ്സംയാംതി സഹസാ രഥൈശ്ച പരിമംഡിതാഃ ॥ 25 ॥
നാരാജകേ ജനപദേ നരാശ്ശാസ്ത്രവിശാരദാഃ ।
സംവദംതോഽവതിഷ്ഠംതേ വനേഷൂപവനേഷു ച ॥ 26 ॥
നാരാജകേ ജനപദേ മാല്യമോദകദക്ഷിണാഃ ।
ദേവതാഭ്യര്ചനാര്ഥായ കല്പ്യംതേ നിയതൈര്ജനൈഃ ॥ 27 ॥
നാരാജകേ ജനപദേ ചംദനാഗരുരൂഷിതാഃ ।
രാജപുത്രാ വിരാജംതേ വസംത ഇവ ശാഖിനഃ ॥ 28 ॥
യഥാ ഹ്യനുദകാ നദ്യഃ യഥാ വാഽപ്യതൃണം വനമ് ।
അഗോപാലാ യഥാ ഗാവസ്തഥാ രാഷ്ട്രമരാജകമ് ॥ 29 ॥
നാരാജകേ ജനപദേ സ്വകം ഭവതി കസ്യചിത് ।
മത്സ്യാ ഇവ നരാ നിത്യം ഭക്ഷയംതി പരസ്പരമ് ॥ 30 ॥
യേ ഹി സംഭിന്നമര്യാദാ നാസ്തികാശ്ഛിന്നസംശയാഃ ।
തേഽപി ഭാവായ കല്പംതേ രാജദംഡനിപീഡിതാഃ ॥ 31 ॥
യഥാ ദൃഷ്ടി ശ്ശരീരസ്യ നിത്യമേവ പ്രവര്തതേ ।
തഥാ നരേംദ്രോ രാഷ്ട്രസ്യ പ്രഭവസ്സത്യധര്മയോഃ ॥ 32 ॥
രാജാ സത്യം ച ധര്മശ്ച രാജാ കുലവതാം കുലമ് ।
രാജാ മാതാ പിതാ ചൈവ രാജാ ഹിതകരോ നൃണാമ് ॥ 33 ॥
യമോ വൈശ്രവണ ശ്ശക്രഃ വരുണശ്ച മഹാബലഃ ।
വിശേഷ്യംതേ നരേംദ്രേണ വൃത്തേന മഹതാ തതഃ ॥ 34 ॥
അഹോ തമ ഇവേദം സ്യാന്നപ്രജ്ഞായേത കിംചന ।
രാജാ ചേ ന്ന ഭവേ ല്ലോകേ വിഭജ സാധ്വസാധുനീ ॥ 35 ॥
ജീവത്യപി മഹാരാജേ തവൈവ വചനം വയമ് ।
നാതിക്രമാമഹേ സർവേ വേലാം പ്രാപ്യേവ സാഗരഃ ॥ 36 ॥
സ ന സ്സമീക്ഷ്യ ദ്വിജവര്യ വൃത്തം നൃപം വിനാ രാജ്യമരണ്യഭൂതമ് ।
കുമാരമിക്ഷ്വാകുസുതം വദാന്യം ത്വമേവ രാജാനമിഹാഭിഷിംച ॥ 37 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ സപ്തഷഷ്ടിതമസ്സര്ഗഃ ॥
