ශ්රීමද්වාල්මීකීය රාමායණේ අරණ්යකාංඩම් ।
අථ ප්රථමස්සර්ගඃ ।
ප්රවිශ්ය තු මහාරණ්යං දංඩකාරණ්යමාත්මවාන් ।
දදර්ශ රාමෝ දුර්ධර්ෂස්තාපසාශ්රමමංඩලම් ॥ 1 ॥
කුශචීරපරික්ෂිප්තං බ්රාහ්ම්යා ලක්ෂ්ම්යා සමාවෘතම් ।
යථා ප්රදීප්තං දුර්දර්ශං ගගනේ සූර්යමංඩලම් ॥ 2 ॥
ශරණ්යං සර්වභූතානාං සුසම්මෘෂ්ටාජිරං සදා ।
මෘගෛර්බහුභිරාකීර්ණං පක්ෂිසංඝෛස්සමාවෘතම් ॥ 3 ॥
පූජිතං ච ප්රනෘත්තං ච නිත්යමප්සරසාං ගණෛඃ ।
විශාලෛරග්නිශරණෛඃ ස්රුග්භාංඩෛරජිනෛඃ කුශෛඃ ॥ 4 ॥
සමිද්භිස්තෝයකලශෛඃ ඵලමූලෛශ්ච ශෝභිතම් ।
ආරණ්යෛශ්ච මහාවෘක්ෂෛඃ පුණ්යෛස්ස්වාදුඵලෛර්වෘතම් ॥ 5 ॥
බලිහෝමාර්චිතං පුණ්යං බ්රහ්මඝෝෂනිනාදිතම් ।
පුෂ්පෛශ්චාන්යෛඃ පරික්ෂිප්තං පද්මින්යා ච සපද්මයා ॥ 6 ॥
ඵලමූලාශනෛර්දාංතෛශ්චීරකෘෂ්ණාජිනාංබරෛඃ ।
සූර්යවෛශ්වානරාභෛශ්ච පුරාණෛර්මුනිභිර්වුතම් ॥ 7 ॥
පුණ්යෛශ්ච නියතාහාරෛඃ ශෝභිතං පරමර්ෂිභිඃ ।
තද්බ්රහ්මභවනප්රඛ්යං බ්රහ්මඝෝෂනිනාදිතම් ॥ 8 ॥
බ්රහ්මවිද්භිර්මහාභාගෛර්බ්රාහ්මණෛරුපශෝභිතම් ।
තද්දෘෂ්ට්වා රාඝවඃ ශ්රීමාංස්තාපසාශ්රමමංඩලම් ॥ 9 ॥
අභ්යගච්ඡන්මහාතේජා විජ්යං කෘත්වා මහද්ධනුඃ ।
දිව්යජ්ඤානෝපපන්නාස්තේ රාමං දෘෂ්ට්වා මහර්ෂයඃ ॥ 10 ॥
අභ්යගච්ඡන්ස්තදා ප්රීතා වෛදේහීං ච යශස්විනීම් ।
තේ තං සෝමමිවෝද්යංතං දෘෂ්ට්වා වෛ ධර්මචාරිණම් ॥ 11 ॥
ලක්ෂ්මණං චෛව දෘෂ්ට්වා තු වෛදේහීං ච යශස්විනීම් ।
මංගලානි ප්රයුංජානාඃ ප්රත්යගෘහ්ණංදෘඪව්රතාඃ ॥ 12 ॥
රූපසංහනනං ලක්ෂ්මීං සෞකුමාර්යං සුවේෂතාම් ।
දදෘශුර්විස්මිතාකාරා රාමස්ය වනවාසිනඃ ॥ 13 ॥
වෛදේහීං ලක්ෂ්මණං රාමං නේත්රෛරනිමිෂෛරිව ।
ආශ්චර්යභූතාංදදෘශුඃ සර්වේ තේ වනචාරිණඃ ॥ 14 ॥
අත්රෛනං හි මහාභාගා ස්සර්වභූතහිතේ රතාඃ ।
අතිථිං පර්ණශාලායාං රාඝවං සංන්යවේශයන් ॥ 15 ॥
තතෝ රාමස්ය සත්කෘත්ය විධිනා පාවකෝපමාඃ ।
ආජහ්රුස්තේ මහාභාගාඃ සලිලං ධර්මචාරිණඃ ॥ 16 ॥
පුෂ්පං මූලං ඵලං සර්වමාශ්රමං ච මහාත්මනඃ ।
නිවේදයිත්වා ධර්මජ්ඤාස්තේ තතඃ ප්රාංජලයෝऽබ්රුවන් ॥ 17 ॥
ධර්මපාලෝ ජනස්යාස්ය ශරණ්යස්ත්වං මහායශාඃ ।
පූජනීයශ්ච මාන්යශ්ච රාජා දංඩධරෝ ගුරුඃ ॥ 18 ॥
ඉංද්රස්යේහ චතුර්භාගඃ ප්රජා රක්ෂති රාඝව ।
රාජා තස්මාද්වරාන්භෝගාන්රම්යාන් භුඞක්තේලෝකනමස්කෘතඃ ॥ 19 ॥
තේ වයං භවතා රක්ෂ්යා භවද්විෂයවාසිනඃ ।
නගරස්ථෝ වනස්ථෝ වා ත්වං නෝ රාජා ජනේශ්වරඃ ॥ 20 ॥
න්යස්තදංඩා වයං රාජංජිතක්රෝධා ජිතේංද්රියාඃ ।
රක්ෂණීයාස්ත්වයා ශශ්වදගර්භභූතාස්තපෝධනාඃ ॥ 21 ॥
ඒවමුක්ත්වා ඵලෛර්මූලෛඃ පුෂ්පෛර්වන්යෛශ්ච රාඝවම් ।
අන්යෛශ්ච විවිධාහාරෛඃ සලක්ෂ්මණමපූජයන් ॥ 22 ॥
තථාන්යේ තාපසාස්සිද්ධා රාමං වෛශ්වානරෝපමාඃ ।
න්යායවෘත්තා යථාන්යායං තර්පයාමාසුරීශ්වරම් ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ප්රථමස්සර්ගඃ ॥
