ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ପ୍ରଥମସ୍ସର୍ଗଃ ।
ପ୍ରଵିଶ୍ୟ ତୁ ମହାରଣ୍ୟଂ ଦଂଡକାରଣ୍ୟମାତ୍ମଵାନ୍ ।
ଦଦର୍ଶ ରାମୋ ଦୁର୍ଧର୍ଷସ୍ତାପସାଶ୍ରମମଂଡଲମ୍ ॥ 1 ॥
କୁଶଚୀରପରିକ୍ଷିପ୍ତଂ ବ୍ରାହ୍ମ୍ୟା ଲକ୍ଷ୍ମ୍ୟା ସମାଵୃତମ୍ ।
ୟଥା ପ୍ରଦୀପ୍ତଂ ଦୁର୍ଦର୍ଶଂ ଗଗନେ ସୂର୍ୟମଂଡଲମ୍ ॥ 2 ॥
ଶରଣ୍ୟଂ ସର୍ଵଭୂତାନାଂ ସୁସମ୍ମୃଷ୍ଟାଜିରଂ ସଦା ।
ମୃଗୈର୍ବହୁଭିରାକୀର୍ଣଂ ପକ୍ଷିସଂଘୈସ୍ସମାଵୃତମ୍ ॥ 3 ॥
ପୂଜିତଂ ଚ ପ୍ରନୃତ୍ତଂ ଚ ନିତ୍ୟମପ୍ସରସାଂ ଗଣୈଃ ।
ଵିଶାଲୈରଗ୍ନିଶରଣୈଃ ସ୍ରୁଗ୍ଭାଂଡୈରଜିନୈଃ କୁଶୈଃ ॥ 4 ॥
ସମିଦ୍ଭିସ୍ତୋୟକଲଶୈଃ ଫଲମୂଲୈଶ୍ଚ ଶୋଭିତମ୍ ।
ଆରଣ୍ୟୈଶ୍ଚ ମହାଵୃକ୍ଷୈଃ ପୁଣ୍ୟୈସ୍ସ୍ଵାଦୁଫଲୈର୍ଵୃତମ୍ ॥ 5 ॥
ବଲିହୋମାର୍ଚିତଂ ପୁଣ୍ୟଂ ବ୍ରହ୍ମଘୋଷନିନାଦିତମ୍ ।
ପୁଷ୍ପୈଶ୍ଚାନ୍ୟୈଃ ପରିକ୍ଷିପ୍ତଂ ପଦ୍ମିନ୍ୟା ଚ ସପଦ୍ମୟା ॥ 6 ॥
ଫଲମୂଲାଶନୈର୍ଦାଂତୈଶ୍ଚୀରକୃଷ୍ଣାଜିନାଂବରୈଃ ।
ସୂର୍ୟଵୈଶ୍ଵାନରାଭୈଶ୍ଚ ପୁରାଣୈର୍ମୁନିଭିର୍ଵୁତମ୍ ॥ 7 ॥
ପୁଣ୍ୟୈଶ୍ଚ ନିୟତାହାରୈଃ ଶୋଭିତଂ ପରମର୍ଷିଭିଃ ।
ତଦ୍ବ୍ରହ୍ମଭଵନପ୍ରଖ୍ୟଂ ବ୍ରହ୍ମଘୋଷନିନାଦିତମ୍ ॥ 8 ॥
ବ୍ରହ୍ମଵିଦ୍ଭିର୍ମହାଭାଗୈର୍ବ୍ରାହ୍ମଣୈରୁପଶୋଭିତମ୍ ।
ତଦ୍ଦୃଷ୍ଟ୍ଵା ରାଘଵଃ ଶ୍ରୀମାଂସ୍ତାପସାଶ୍ରମମଂଡଲମ୍ ॥ 9 ॥
ଅଭ୍ୟଗଚ୍ଛନ୍ମହାତେଜା ଵିଜ୍ୟଂ କୃତ୍ଵା ମହଦ୍ଧନୁଃ ।
ଦିଵ୍ୟଜ୍ଞାନୋପପନ୍ନାସ୍ତେ ରାମଂ ଦୃଷ୍ଟ୍ଵା ମହର୍ଷୟଃ ॥ 10 ॥
ଅଭ୍ୟଗଚ୍ଛନ୍ସ୍ତଦା ପ୍ରୀତା ଵୈଦେହୀଂ ଚ ୟଶସ୍ଵିନୀମ୍ ।
ତେ ତଂ ସୋମମିଵୋଦ୍ୟଂତଂ ଦୃଷ୍ଟ୍ଵା ଵୈ ଧର୍ମଚାରିଣମ୍ ॥ 11 ॥
ଲକ୍ଷ୍ମଣଂ ଚୈଵ ଦୃଷ୍ଟ୍ଵା ତୁ ଵୈଦେହୀଂ ଚ ୟଶସ୍ଵିନୀମ୍ ।
ମଂଗଲାନି ପ୍ରୟୁଂଜାନାଃ ପ୍ରତ୍ୟଗୃହ୍ଣଂଦୃଢଵ୍ରତାଃ ॥ 12 ॥
ରୂପସଂହନନଂ ଲକ୍ଷ୍ମୀଂ ସୌକୁମାର୍ୟଂ ସୁଵେଷତାମ୍ ।
ଦଦୃଶୁର୍ଵିସ୍ମିତାକାରା ରାମସ୍ୟ ଵନଵାସିନଃ ॥ 13 ॥
ଵୈଦେହୀଂ ଲକ୍ଷ୍ମଣଂ ରାମଂ ନେତ୍ରୈରନିମିଷୈରିଵ ।
ଆଶ୍ଚର୍ୟଭୂତାଂଦଦୃଶୁଃ ସର୍ଵେ ତେ ଵନଚାରିଣଃ ॥ 14 ॥
ଅତ୍ରୈନଂ ହି ମହାଭାଗା ସ୍ସର୍ଵଭୂତହିତେ ରତାଃ ।
ଅତିଥିଂ ପର୍ଣଶାଲାୟାଂ ରାଘଵଂ ସଂନ୍ୟଵେଶୟନ୍ ॥ 15 ॥
ତତୋ ରାମସ୍ୟ ସତ୍କୃତ୍ୟ ଵିଧିନା ପାଵକୋପମାଃ ।
ଆଜହ୍ରୁସ୍ତେ ମହାଭାଗାଃ ସଲିଲଂ ଧର୍ମଚାରିଣଃ ॥ 16 ॥
ପୁଷ୍ପଂ ମୂଲଂ ଫଲଂ ସର୍ଵମାଶ୍ରମଂ ଚ ମହାତ୍ମନଃ ।
ନିଵେଦୟିତ୍ଵା ଧର୍ମଜ୍ଞାସ୍ତେ ତତଃ ପ୍ରାଂଜଲୟୋଽବ୍ରୁଵନ୍ ॥ 17 ॥
ଧର୍ମପାଲୋ ଜନସ୍ୟାସ୍ୟ ଶରଣ୍ୟସ୍ତ୍ଵଂ ମହାୟଶାଃ ।
ପୂଜନୀୟଶ୍ଚ ମାନ୍ୟଶ୍ଚ ରାଜା ଦଂଡଧରୋ ଗୁରୁଃ ॥ 18 ॥
ଇଂଦ୍ରସ୍ୟେହ ଚତୁର୍ଭାଗଃ ପ୍ରଜା ରକ୍ଷତି ରାଘଵ ।
ରାଜା ତସ୍ମାଦ୍ଵରାନ୍ଭୋଗାନ୍ରମ୍ୟାନ୍ ଭୁଙକ୍ତେଲୋକନମସ୍କୃତଃ ॥ 19 ॥
ତେ ଵୟଂ ଭଵତା ରକ୍ଷ୍ୟା ଭଵଦ୍ଵିଷୟଵାସିନଃ ।
ନଗରସ୍ଥୋ ଵନସ୍ଥୋ ଵା ତ୍ଵଂ ନୋ ରାଜା ଜନେଶ୍ଵରଃ ॥ 20 ॥
ନ୍ୟସ୍ତଦଂଡା ଵୟଂ ରାଜଂଜିତକ୍ରୋଧା ଜିତେଂଦ୍ରିୟାଃ ।
ରକ୍ଷଣୀୟାସ୍ତ୍ଵୟା ଶଶ୍ଵଦଗର୍ଭଭୂତାସ୍ତପୋଧନାଃ ॥ 21 ॥
ଏଵମୁକ୍ତ୍ଵା ଫଲୈର୍ମୂଲୈଃ ପୁଷ୍ପୈର୍ଵନ୍ୟୈଶ୍ଚ ରାଘଵମ୍ ।
ଅନ୍ୟୈଶ୍ଚ ଵିଵିଧାହାରୈଃ ସଲକ୍ଷ୍ମଣମପୂଜୟନ୍ ॥ 22 ॥
ତଥାନ୍ୟେ ତାପସାସ୍ସିଦ୍ଧା ରାମଂ ଵୈଶ୍ଵାନରୋପମାଃ ।
ନ୍ୟାୟଵୃତ୍ତା ୟଥାନ୍ୟାୟଂ ତର୍ପୟାମାସୁରୀଶ୍ଵରମ୍ ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ପ୍ରଥମସ୍ସର୍ଗଃ ॥
