śrīmadvālmīkīya rāmāyaṇē araṇyakāṇḍam ।
atha prathamassargaḥ ।
praviśya tu mahāraṇyaṃ daṇḍakāraṇyamātmavān ।
dadarśa rāmō durdharṣastāpasāśramamaṇḍalam ॥ 1 ॥
kuśachīraparikṣiptaṃ brāhmyā lakṣmyā samāvṛtam ।
yathā pradīptaṃ durdarśaṃ gaganē sūryamaṇḍalam ॥ 2 ॥
śaraṇyaṃ sarvabhūtānāṃ susammṛṣṭājiraṃ sadā ।
mṛgairbahubhirākīrṇaṃ pakṣisaṅghaissamāvṛtam ॥ 3 ॥
pūjitaṃ cha pranṛttaṃ cha nityamapsarasāṃ gaṇaiḥ ।
viśālairagniśaraṇaiḥ srugbhāṇḍairajinaiḥ kuśaiḥ ॥ 4 ॥
samidbhistōyakalaśaiḥ phalamūlaiścha śōbhitam ।
āraṇyaiścha mahāvṛkṣaiḥ puṇyaissvāduphalairvṛtam ॥ 5 ॥
balihōmārchitaṃ puṇyaṃ brahmaghōṣanināditam ।
puṣpaiśchānyaiḥ parikṣiptaṃ padminyā cha sapadmayā ॥ 6 ॥
phalamūlāśanairdāntaiśchīrakṛṣṇājināmbaraiḥ ।
sūryavaiśvānarābhaiścha purāṇairmunibhirvutam ॥ 7 ॥
puṇyaiścha niyatāhāraiḥ śōbhitaṃ paramarṣibhiḥ ।
tadbrahmabhavanaprakhyaṃ brahmaghōṣanināditam ॥ 8 ॥
brahmavidbhirmahābhāgairbrāhmaṇairupaśōbhitam ।
taddṛṣṭvā rāghavaḥ śrīmāṃstāpasāśramamaṇḍalam ॥ 9 ॥
abhyagachChanmahātējā vijyaṃ kṛtvā mahaddhanuḥ ।
divyajñānōpapannāstē rāmaṃ dṛṣṭvā maharṣayaḥ ॥ 10 ॥
abhyagachChanstadā prītā vaidēhīṃ cha yaśasvinīm ।
tē taṃ sōmamivōdyantaṃ dṛṣṭvā vai dharmachāriṇam ॥ 11 ॥
lakṣmaṇaṃ chaiva dṛṣṭvā tu vaidēhīṃ cha yaśasvinīm ।
maṅgalāni prayuñjānāḥ pratyagṛhṇandṛḍhavratāḥ ॥ 12 ॥
rūpasaṃhananaṃ lakṣmīṃ saukumāryaṃ suvēṣatām ।
dadṛśurvismitākārā rāmasya vanavāsinaḥ ॥ 13 ॥
vaidēhīṃ lakṣmaṇaṃ rāmaṃ nētrairanimiṣairiva ।
āścharyabhūtāndadṛśuḥ sarvē tē vanachāriṇaḥ ॥ 14 ॥
atrainaṃ hi mahābhāgā ssarvabhūtahitē ratāḥ ।
atithiṃ parṇaśālāyāṃ rāghavaṃ sannyavēśayan ॥ 15 ॥
tatō rāmasya satkṛtya vidhinā pāvakōpamāḥ ।
ājahrustē mahābhāgāḥ salilaṃ dharmachāriṇaḥ ॥ 16 ॥
puṣpaṃ mūlaṃ phalaṃ sarvamāśramaṃ cha mahātmanaḥ ।
nivēdayitvā dharmajñāstē tataḥ prāñjalayō'bruvan ॥ 17 ॥
dharmapālō janasyāsya śaraṇyastvaṃ mahāyaśāḥ ।
pūjanīyaścha mānyaścha rājā daṇḍadharō guruḥ ॥ 18 ॥
indrasyēha chaturbhāgaḥ prajā rakṣati rāghava ।
rājā tasmādvarānbhōgānramyān bhuṅaktēlōkanamaskṛtaḥ ॥ 19 ॥
tē vayaṃ bhavatā rakṣyā bhavadviṣayavāsinaḥ ।
nagarasthō vanasthō vā tvaṃ nō rājā janēśvaraḥ ॥ 20 ॥
nyastadaṇḍā vayaṃ rājañjitakrōdhā jitēndriyāḥ ।
rakṣaṇīyāstvayā śaśvadagarbhabhūtāstapōdhanāḥ ॥ 21 ॥
ēvamuktvā phalairmūlaiḥ puṣpairvanyaiścha rāghavam ।
anyaiścha vividhāhāraiḥ salakṣmaṇamapūjayan ॥ 22 ॥
tathānyē tāpasāssiddhā rāmaṃ vaiśvānarōpamāḥ ।
nyāyavṛttā yathānyāyaṃ tarpayāmāsurīśvaram ॥ 23 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē prathamassargaḥ ॥
