ശ്രീമദ്വാല്മീകീയ രാമായണേ അരണ്യകാംഡമ് ।
അഥ പ്രഥമസ്സര്ഗഃ ।
പ്രവിശ്യ തു മഹാരണ്യം ദംഡകാരണ്യമാത്മവാന് ।
ദദര്ശ രാമോ ദുര്ധര്ഷസ്താപസാശ്രമമംഡലമ് ॥ 1 ॥
കുശചീരപരിക്ഷിപ്തം ബ്രാഹ്മ്യാ ലക്ഷ്മ്യാ സമാവൃതമ് ।
യഥാ പ്രദീപ്തം ദുര്ദര്ശം ഗഗനേ സൂര്യമംഡലമ് ॥ 2 ॥
ശരണ്യം സർവഭൂതാനാം സുസമ്മൃഷ്ടാജിരം സദാ ।
മൃഗൈര്ബഹുഭിരാകീര്ണം പക്ഷിസംഘൈസ്സമാവൃതമ് ॥ 3 ॥
പൂജിതം ച പ്രനൃത്തം ച നിത്യമപ്സരസാം ഗണൈഃ ।
വിശാലൈരഗ്നിശരണൈഃ സ്രുഗ്ഭാംഡൈരജിനൈഃ കുശൈഃ ॥ 4 ॥
സമിദ്ഭിസ്തോയകലശൈഃ ഫലമൂലൈശ്ച ശോഭിതമ് ।
ആരണ്യൈശ്ച മഹാവൃക്ഷൈഃ പുണ്യൈസ്സ്വാദുഫലൈർവൃതമ് ॥ 5 ॥
ബലിഹോമാര്ചിതം പുണ്യം ബ്രഹ്മഘോഷനിനാദിതമ് ।
പുഷ്പൈശ്ചാന്യൈഃ പരിക്ഷിപ്തം പദ്മിന്യാ ച സപദ്മയാ ॥ 6 ॥
ഫലമൂലാശനൈര്ദാംതൈശ്ചീരകൃഷ്ണാജിനാംബരൈഃ ।
സൂര്യവൈശ്വാനരാഭൈശ്ച പുരാണൈര്മുനിഭിർവുതമ് ॥ 7 ॥
പുണ്യൈശ്ച നിയതാഹാരൈഃ ശോഭിതം പരമര്ഷിഭിഃ ।
തദ്ബ്രഹ്മഭവനപ്രഖ്യം ബ്രഹ്മഘോഷനിനാദിതമ് ॥ 8 ॥
ബ്രഹ്മവിദ്ഭിര്മഹാഭാഗൈര്ബ്രാഹ്മണൈരുപശോഭിതമ് ।
തദ്ദൃഷ്ട്വാ രാഘവഃ ശ്രീമാംസ്താപസാശ്രമമംഡലമ് ॥ 9 ॥
അഭ്യഗച്ഛന്മഹാതേജാ വിജ്യം കൃത്വാ മഹദ്ധനുഃ ।
ദിവ്യജ്ഞാനോപപന്നാസ്തേ രാമം ദൃഷ്ട്വാ മഹര്ഷയഃ ॥ 10 ॥
അഭ്യഗച്ഛന്സ്തദാ പ്രീതാ വൈദേഹീം ച യശസ്വിനീമ് ।
തേ തം സോമമിവോദ്യംതം ദൃഷ്ട്വാ വൈ ധര്മചാരിണമ് ॥ 11 ॥
ലക്ഷ്മണം ചൈവ ദൃഷ്ട്വാ തു വൈദേഹീം ച യശസ്വിനീമ് ।
മംഗലാനി പ്രയുംജാനാഃ പ്രത്യഗൃഹ്ണംദൃഢവ്രതാഃ ॥ 12 ॥
രൂപസംഹനനം ലക്ഷ്മീം സൌകുമാര്യം സുവേഷതാമ് ।
ദദൃശുർവിസ്മിതാകാരാ രാമസ്യ വനവാസിനഃ ॥ 13 ॥
വൈദേഹീം ലക്ഷ്മണം രാമം നേത്രൈരനിമിഷൈരിവ ।
ആശ്ചര്യഭൂതാംദദൃശുഃ സർവേ തേ വനചാരിണഃ ॥ 14 ॥
അത്രൈനം ഹി മഹാഭാഗാ സ്സർവഭൂതഹിതേ രതാഃ ।
അതിഥിം പര്ണശാലായാം രാഘവം സംന്യവേശയന് ॥ 15 ॥
തതോ രാമസ്യ സത്കൃത്യ വിധിനാ പാവകോപമാഃ ।
ആജഹ്രുസ്തേ മഹാഭാഗാഃ സലിലം ധര്മചാരിണഃ ॥ 16 ॥
പുഷ്പം മൂലം ഫലം സർവമാശ്രമം ച മഹാത്മനഃ ।
നിവേദയിത്വാ ധര്മജ്ഞാസ്തേ തതഃ പ്രാംജലയോഽബ്രുവന് ॥ 17 ॥
ധര്മപാലോ ജനസ്യാസ്യ ശരണ്യസ്ത്വം മഹായശാഃ ।
പൂജനീയശ്ച മാന്യശ്ച രാജാ ദംഡധരോ ഗുരുഃ ॥ 18 ॥
ഇംദ്രസ്യേഹ ചതുര്ഭാഗഃ പ്രജാ രക്ഷതി രാഘവ ।
രാജാ തസ്മാദ്വരാന്ഭോഗാന്രമ്യാന് ഭുങക്തേലോകനമസ്കൃതഃ ॥ 19 ॥
തേ വയം ഭവതാ രക്ഷ്യാ ഭവദ്വിഷയവാസിനഃ ।
നഗരസ്ഥോ വനസ്ഥോ വാ ത്വം നോ രാജാ ജനേശ്വരഃ ॥ 20 ॥
ന്യസ്തദംഡാ വയം രാജംജിതക്രോധാ ജിതേംദ്രിയാഃ ।
രക്ഷണീയാസ്ത്വയാ ശശ്വദഗര്ഭഭൂതാസ്തപോധനാഃ ॥ 21 ॥
ഏവമുക്ത്വാ ഫലൈര്മൂലൈഃ പുഷ്പൈർവന്യൈശ്ച രാഘവമ് ।
അന്യൈശ്ച വിവിധാഹാരൈഃ സലക്ഷ്മണമപൂജയന് ॥ 22 ॥
തഥാന്യേ താപസാസ്സിദ്ധാ രാമം വൈശ്വാനരോപമാഃ ।
ന്യായവൃത്താ യഥാന്യായം തര്പയാമാസുരീശ്വരമ് ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ പ്രഥമസ്സര്ഗഃ ॥
