śrīmadvālmīkīya rāmāyaṇē araṇyakāṇḍam ।
atha chatuśchatvāriṃśassargaḥ ।
tathā tu taṃ samādiśya bhrātaraṃ raghunandanaḥ ।
babandhāsiṃ mahātējā jāmbūnadamayatsarum ॥ 1 ॥
tata stryavanataṃ chāpamādāyā'tmavibhūṣaṇam ।
ābadhya cha kalāpau dvau jagāmōdagravikramaḥ ॥ 2 ॥
taṃ vañchayānō rājēndramāpatantaṃ nirīkṣyavai ।
babhūvāntarhitastrāsātpunassandarśanē'bhavat ।
cha ॥ 3 ॥
baddhāsirdhanurādāya pradudrāva yatō mṛgaḥ ।
taṃ sma paśyati rūpēṇa dyōtamānamivāgrataḥ ॥ 4 ॥
avēkṣyāvēkṣya dhāvantaṃ dhanuṣpāṇirmahāvanē ।
ativṛttamiṣōḥ pātāllōbhayānaṃ kadāchana ॥ 5 ॥
śaṅkitantu samudbhrāntamutpatantamivāmbarē ।
dṛśyamānamadṛśyaṃ cha vanōddēśēṣu kēṣuchit ॥ 6 ॥
Chinnābhrairiva saṃvītaṃ śāradaṃ chandramaṇḍalam ।
muhurtādēva dadṛśē muhurdūrātprakāśatē ॥ 7 ॥
darśanādarśanādēvaṃ sō'pākarṣata rāghavam ।
sudūramāśramasyāsya mārīchō mṛgatāṃ gataḥ ॥ 8 ॥
āsīt kruddhastu kākutsthō vivaśastēna mōhitaḥ ।
athāvatasthē sambhrāntaśchāyāmāśritya śādvalē ॥ 9 ॥
sa tamunmādayāmāsa mṛgarūpō niśācharaḥ ।
mṛgaiḥ parivṛtō vanyairadūrātpratyadṛśyata ॥ 10 ॥
gṛhītukāmaṃ dṛṣṭvaivaṃ punarēvābhyadhāvata ।
tatkṣaṇādēva santrāsātpunarantarhitō'bhavat ॥ 11 ॥
punarēva tatō dūrādvṛkṣaṣaṇḍādvinissṛtam ।
dṛṣṭvā rāmō mahātējāstaṃ hantuṃ kṛtaniśchayaḥ ॥ 12 ॥
bhūyastu śaramuddhṛtya kupitastatra rāghavaḥ ।
sūryaraśmipratīkāśaṃ jvalantamarimardanaḥ ॥ 13 ॥
sandhāya sudṛḍhē chāpē vikṛṣya balavadbalī ।
tamēva mṛgamuddiśya śvasantamiva pannagam ॥ 14 ॥
mumōcha jvalitaṃ dīptamastraṃ brahmavinirmitam ।
śarīraṃ mṛgarūpasya vinirbhidya śarōttamaḥ ॥ 15 ॥
mārīchasyaiva hṛdayaṃ bibhēdāśanisannibhaḥ ।
tālamātramathōtplutya nyapatatsaśarāturaḥ ॥ 16 ॥
vinadanbhairavaṃ nādaṃ dharaṇyāmalpajīvitaḥ ।
mriyamāṇastu mārīchō jahau tāṃ kṛtrimāṃ tanum ॥ 17 ॥
smṛtvā tadvachanaṃ rakṣō dadhyau kēna tu lakṣmaṇam ।
iha prasthāpayētsītā śūnyē tāṃ rāvaṇō harēt ॥ 18 ॥
sa prāptakālamājñāya chakāra cha tata svanam ।
sadṛśaṃ rāghavasyēha hā sītē lakṣmaṇēti cha ॥ 19 ॥
tēna marmaṇi nirviddhaṃ śarēṇānupamēna hi ।
mṛgarūpaṃ tu tattyaktvā rākṣasaṃ rūpamāsthitaḥ ॥ 20 ॥
chakrē sa sumahākāyaṃ mārīchō jīvitaṃ tyajan ।
taṃ dṛṣṭvā patitaṃ bhūmau rākṣasaṃ ghōradarśanam ॥ 21 ॥
rāmō rudhirasiktāṅgaṃ chēṣṭamānaṃ mahītalē ।
jagāma manasā sītāṃ lakṣmaṇasya vachassmaran ॥ 22 ॥
mārīchasya tu māyaiṣā pūrvōktaṃ lakṣmaṇēna tu ।
tattathā hyabhavachchādya mārīchō'yaṃ mayā hataḥ ॥ 23 ॥
hā sītē lakṣmaṇētyēvamākruśya cha mahāsvaram ।
mamāra rākṣasassō'yaṃ śrutvā sītā kathaṃ bhavēt ॥ 24 ॥
lakṣmaṇaścha mahābāhuḥ kāmavasthāṃ gamiṣyati ।
iti sañchintya dharmātmā rāmō hṛṣṭatanūruhaḥ ॥ 25 ॥
tatra rāmaṃ bhayaṃ tīvramāvivēśa viṣādajam ।
rākṣasaṃ mṛgarūpaṃ taṃ hatvā śrutvā cha tatsvaram ॥ 26 ॥
nihatya pṛṣataṃ chānyaṃ māṃsamādāya rāghavaḥ ।
tvaramāṇō janasthānaṃ sasārābhimukhastadā ॥ 27 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē chatuśchatvāriṃśassargaḥ ॥
