ශ්රීමද්වාල්මීකීය රාමායණේ අරණ්යකාංඩම් ।
අථ චතුශ්චත්වාරිංශස්සර්ගඃ ।
තථා තු තං සමාදිශ්ය භ්රාතරං රඝුනංදනඃ ।
බබංධාසිං මහාතේජා ජාංබූනදමයත්සරුම් ॥ 1 ॥
තත ස්ත්ර්යවනතං චාපමාදායාऽත්මවිභූෂණම් ।
ආබධ්ය ච කලාපෞ ද්වෞ ජගාමෝදග්රවික්රමඃ ॥ 2 ॥
තං වංචයානෝ රාජේංද්රමාපතංතං නිරීක්ෂ්යවෛ ।
බභූවාංතර්හිතස්ත්රාසාත්පුනස්සංදර්ශනේऽභවත් ।
ච ॥ 3 ॥
බද්ධාසිර්ධනුරාදාය ප්රදුද්රාව යතෝ මෘගඃ ।
තං ස්ම පශ්යති රූපේණ ද්යෝතමානමිවාග්රතඃ ॥ 4 ॥
අවේක්ෂ්යාවේක්ෂ්ය ධාවංතං ධනුෂ්පාණිර්මහාවනේ ।
අතිවෘත්තමිෂෝඃ පාතාල්ලෝභයානං කදාචන ॥ 5 ॥
ශංකිතංතු සමුද්භ්රාංතමුත්පතංතමිවාංබරේ ।
දෘශ්යමානමදෘශ්යං ච වනෝද්දේශේෂු කේෂුචිත් ॥ 6 ॥
ඡින්නාභ්රෛරිව සංවීතං ශාරදං චංද්රමංඩලම් ।
මුහුර්තාදේව දදෘශේ මුහුර්දූරාත්ප්රකාශතේ ॥ 7 ॥
දර්ශනාදර්ශනාදේවං සෝऽපාකර්ෂත රාඝවම් ।
සුදූරමාශ්රමස්යාස්ය මාරීචෝ මෘගතාං ගතඃ ॥ 8 ॥
ආසීත් ක්රුද්ධස්තු කාකුත්ස්ථෝ විවශස්තේන මෝහිතඃ ।
අථාවතස්ථේ සංභ්රාංතශ්චායාමාශ්රිත්ය ශාද්වලේ ॥ 9 ॥
ස තමුන්මාදයාමාස මෘගරූපෝ නිශාචරඃ ।
මෘගෛඃ පරිවෘතෝ වන්යෛරදූරාත්ප්රත්යදෘශ්යත ॥ 10 ॥
ගෘහීතුකාමං දෘෂ්ට්වෛවං පුනරේවාභ්යධාවත ।
තත්ක්ෂණාදේව සංත්රාසාත්පුනරංතර්හිතෝऽභවත් ॥ 11 ॥
පුනරේව තතෝ දූරාද්වෘක්ෂෂංඩාද්විනිස්සෘතම් ।
දෘෂ්ට්වා රාමෝ මහාතේජාස්තං හංතුං කෘතනිශ්චයඃ ॥ 12 ॥
භූයස්තු ශරමුද්ධෘත්ය කුපිතස්තත්ර රාඝවඃ ।
සූර්යරශ්මිප්රතීකාශං ජ්වලංතමරිමර්දනඃ ॥ 13 ॥
සංධාය සුදෘඪේ චාපේ විකෘෂ්ය බලවද්බලී ।
තමේව මෘගමුද්දිශ්ය ශ්වසංතමිව පන්නගම් ॥ 14 ॥
මුමෝච ජ්වලිතං දීප්තමස්ත්රං බ්රහ්මවිනිර්මිතම් ।
ශරීරං මෘගරූපස්ය විනිර්භිද්ය ශරෝත්තමඃ ॥ 15 ॥
මාරීචස්යෛව හෘදයං බිභේදාශනිසන්නිභඃ ।
තාලමාත්රමථෝත්ප්ලුත්ය න්යපතත්සශරාතුරඃ ॥ 16 ॥
විනදන්භෛරවං නාදං ධරණ්යාමල්පජීවිතඃ ।
ම්රියමාණස්තු මාරීචෝ ජහෞ තාං කෘත්රිමාං තනුම් ॥ 17 ॥
ස්මෘත්වා තද්වචනං රක්ෂෝ දධ්යෞ කේන තු ලක්ෂ්මණම් ।
ඉහ ප්රස්ථාපයේත්සීතා ශූන්යේ තාං රාවණෝ හරේත් ॥ 18 ॥
ස ප්රාප්තකාලමාජ්ඤාය චකාර ච තත ස්වනම් ।
සදෘශං රාඝවස්යේහ හා සීතේ ලක්ෂ්මණේති ච ॥ 19 ॥
තේන මර්මණි නිර්විද්ධං ශරේණානුපමේන හි ।
මෘගරූපං තු තත්ත්යක්ත්වා රාක්ෂසං රූපමාස්ථිතඃ ॥ 20 ॥
චක්රේ ස සුමහාකායං මාරීචෝ ජීවිතං ත්යජන් ।
තං දෘෂ්ට්වා පතිතං භූමෞ රාක්ෂසං ඝෝරදර්ශනම් ॥ 21 ॥
රාමෝ රුධිරසික්තාංගං චේෂ්ටමානං මහීතලේ ।
ජගාම මනසා සීතාං ලක්ෂ්මණස්ය වචස්ස්මරන් ॥ 22 ॥
මාරීචස්ය තු මායෛෂා පූර්වෝක්තං ලක්ෂ්මණේන තු ।
තත්තථා හ්යභවච්චාද්ය මාරීචෝऽයං මයා හතඃ ॥ 23 ॥
හා සීතේ ලක්ෂ්මණේත්යේවමාක්රුශ්ය ච මහාස්වරම් ।
මමාර රාක්ෂසස්සෝऽයං ශ්රුත්වා සීතා කථං භවේත් ॥ 24 ॥
ලක්ෂ්මණශ්ච මහාබාහුඃ කාමවස්ථාං ගමිෂ්යති ।
ඉති සංචිංත්ය ධර්මාත්මා රාමෝ හෘෂ්ටතනූරුහඃ ॥ 25 ॥
තත්ර රාමං භයං තීව්රමාවිවේශ විෂාදජම් ।
රාක්ෂසං මෘගරූපං තං හත්වා ශ්රුත්වා ච තත්ස්වරම් ॥ 26 ॥
නිහත්ය පෘෂතං චාන්යං මාංසමාදාය රාඝවඃ ।
ත්වරමාණෝ ජනස්ථානං සසාරාභිමුඛස්තදා ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ චතුශ්චත්වාරිංශස්සර්ගඃ ॥
