ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ද්වාදශස්සර්ගඃ ।
ඒතච්ච වචනං ශ්රුත්වා සුග්රීවේණ සුභාෂිතම් ।
ප්රත්යයාර්ථං මහාතේජා රාමෝ ජග්රාහ කාර්මුකම් ॥ 1 ॥
ස ගෘහීත්වා ධනුර්ඝෝරං ශරමේකං ච මානදඃ ।
සාලමුද්දිශ්ය චික්ෂේප ජ්යාස්වනෛඃ පූරයංදිශඃ ॥ 2 ॥
ස විසෘෂ්ටෝ බලවතා බාණස්ස්වර්ණපරිෂ්කෘතඃ ।
භිත්ත්වා සාලාන් ගිරිප්රස්ථං සප්ත භූමිං විවේශ හ ॥ 3 ॥
ප්රවිෂ්ටශ්ච මුහූර්තේන ධරාං භිත්ත්වා මහාජවඃ ।
නිෂ්පත්ය ච පුනස්තූර්ණං ස්වතූණීං ප්රවිවේශ හ ॥ 4 ॥
තාංදෘෂ්ට්වා සප්ත නිර්භින්නාන්සාලාන්වානරපුංගවඃ ।
රාමස්ය ශරවේගේන විස්මයං පරමං ගතඃ ॥ 5 ॥
ස මූර්ධ්නා න්යපතදභ්මෞ ප්රලංබීකෘතභූෂණඃ ।
සුග්රීවඃ පරමප්රීතෝ රාඝවාය කෘතාංජලිඃ ॥ 6 ॥
ඉදං චෝවාච ධර්මජ්ඤං කර්මණා තේන හර්ෂිතඃ ।
රාමං සර්වාස්ත්රවිදුෂාං ශ්රේෂ්ඨං ශූරමවස්ථිතම් ॥ 7 ॥
සේංද්රානපි සුරාන්සර්වාංස්ත්වං බාණෛඃ පුරුෂර්ෂභ ।
සමර්ථස්සමරේ හංතුං කිං පුන ර්වාලිනං ප්රභෝ ॥ 8 ॥
යේන සප්තමහාසාලා ගිරිර්භූමිශ්ච දාරිතාඃ ।
බාණේනෛකේන කාකුත්ස්ථ ස්ථාතා තේ කෝ රණාග්රතඃ ॥ 9 ॥
අද්ය මේ විගතශ්ශෝකඃ ප්රීතිරද්ය පරා මම ।
සුහෘදං ත්වාං සමාසාද්ය මහේංද්රවරුණෝපමම් ॥ 10 ॥
තමද්යෛව ප්රියාර්ථං මේ වෛරිණං භ්රාතෘරූපිණම් ।
වාලිනං ජහි කාකුත්ස්ථ මයා බද්ධෝऽයමංජලිඃ ॥ 11 ॥
තතෝ රාමඃ පරිෂ්වජ්ය සුග්රීවං ප්රියදර්ශනම් ।
ප්රත්යුවාච මහාප්රාජ්ඤෝ ලක්ෂ්මණානුගතං වචඃ ॥ 12 ॥
අස්මාද්ගච්ඡේම කිෂ්කිංධාං ක්ෂිප්රං ගච්ඡ ත්වමග්රතඃ ।
ගත්වා චාහ්වය සුග්රීව වාලිනං භ්රාතෘගංධිනම් ॥ 13 ॥
සර්වේ තේ ත්වරිතං ගත්වා කිෂ්කිංධාං වාලිනඃ පුරීම් ।
වෘක්ෂෛරාත්මානමාවෘත්ය ව්යතිෂ්ඨන්ගහනේ වනේ ॥ 14 ॥
සුග්රීවෝ ව්යනදද්ඝෝරං වාලිනෝऽऽහ්වානකාරණාත් ।
ගාඪං පරිහිතෝ වේගාන්නාදෛර්භිංදන්නිවාංබරම් ॥ 15 ॥
තං ශ්රුත්වා නිනදං භ්රාතුඃ ක්රුද්ධෝ වාලී මහාබලඃ ।
නිශ්චක්රාම සුසංරබ්ධෝ භාස්කරෝऽස්තතටාදිව ॥ 16 ॥
තතස්සුතුමුලං යුද්ධං වාලිසුග්රීවයෝරභූත් ।
ගගනේ ග්රහයෝර්ඝෝරං බුධාංගාරකයෝරිව ॥ 17 ॥
තලෛරශනිකල්පෛශ්ච වජ්රකල්පෛශ්ච මුෂ්ටිභිඃ ।
ජඝ්නතුස්සමරේऽන්යෝන්යං භ්රාතරෞ ක්රෝධමූර්ඡිතෞ ॥ 18 ॥
තතෝ රාමෝ ධනුෂ්පාණිස්තාවුභෞ සමුදීක්ෂ්යතු ।
අන්යෝන්යසදෘශෞ වීරාවුභෞ දේවාවිවාශ්විනෞ ॥ 19 ॥
යන්නාවගච්ඡත්සුග්රීවං වාලිනං වාපි රාඝවඃ ।
තතෝ න කෘතවාන්බුද්ධිං මෝක්තුමංතකරං ශරම් ॥ 20 ॥
ඒතස්මින්නංතරේ භග්නස්සුග්රීවස්තේන වාලිනා ।
අපශ්යන්රාඝවං නාථමෘශ්යමූකං ප්රදුද්රුවේ ॥ 21 ॥
ක්ලාංතෝ රුධිරසික්තාංගඃ ප්රහාරෛර්ජර්ඣරීකෘතඃ ।
වාලිනාऽභිද්රුතඃ ක්රෝධාත්ප්රවිවේශ මහාවනම් ॥ 22 ॥
තං ප්රවිෂ්ටං වනං දෘෂ්ට්වා වාලී ශාපභයාර්දිතඃ ।
මුක්තෝ හ්යසි ත්වමිත්යුක්ත්වා ස නිවෘත්තෝ මහාද්යුතිඃ ॥ 23 ॥
රාඝවෝऽසි සහ භ්රාත්රා සහ චෛව හනූමතා ।
තදේව වනමාගච්ඡත්සුග්රීවෝ යත්ර වානරඃ ॥ 24 ॥
තං සමීක්ෂ්යාගතං රාමං සුග්රීවස්සහලක්ෂ්මණම් ।
හ්රීමාංදීනමුවාචේදං වසුධාමවලෝකයන් ॥ 25 ॥
ආහ්වයස්වේති මාමුක්ත්වා දර්ශයිත්වා ච වික්රමම් ।
වෛරිණා ඝාතයිත්වා ච කිමිදානීං ත්වයා කෘතම් ॥ 26 ॥
තාමේන වේලාං වක්තව්යං ත්වයා රාඝව තත්ත්වතඃ ।
වාලිනං න නිහන්මීති තතෝ නාහමිතෝ ව්රජේ ॥ 27 ॥
තස්ය චෛවං බ්රුවාණස්ය සුග්රීවස්ය මහාත්මනඃ ।
කරුණං දීනයා වාචා රාඝවඃ පුනරබ්රවීත් ॥ 28 ॥
සුග්රීව ශ්රූයාතාං තාත ක්රෝධශ්ච ව්යපනීයතාම් ।
කාරණං යේන බාණෝऽයං න මයා ස විසර්ජිතඃ ॥ 29 ॥
අලංකාරේණ වේෂේණ ප්රමාණේන ගතේන ච ।
ත්වං ච සුග්රීව වාලී ච සදෘශෞ ස්ථඃ පරස්පරම් ॥ 30 ॥
ස්වරේණ වර්චසා චෛව ප්රේක්ෂිතේන ච වානර ।
වික්රමේණ ච වාක්යෛශ්ච ව්යක්තිං වාං නෝපලක්ෂයේ ॥ 31 ॥
තතෝऽහං රූපසාදෘශ්යාන්මෝහිතෝ වානරෝත්තම ।
නෝත්සෘජාමි මහාවේගං ශරං ශත්රුනිබර්හණම් ॥ 32 ॥
ජීවිතාංතකරං ඝෝරං සාදෘශ්යාත්තු විශංකිතඃ ।
මූලඝාතෝ න නෞ ස්යාද්ධි ද්වයෝරපි කෘතෝ මයා ॥ 33 ॥
ත්වයි වීරේ විපන්නේ හි අජ්ඤානාල්ලාඝවාන්මයා ।
මෞඪ්යං ච මම බාල්යං ච ඛ්යාපිතං ස්යාත්කපීශ්වර ॥ 34 ॥
දත්තාභයවධෝ නාම පාතකං මහදුච්යතේ ।
අහං ච ලක්ෂ්මණශ්චෛව සීතා ච වරවර්ණිනී ॥ 35 ॥
ත්වදධීනා වයං සර්වේ වනේऽස්මින් ශරණං භවාන් ।
තස්මාද්යුධ්යස්ව භූයස්ත්වං මා මා ශංකේශ්ච වානර ॥ 36 ॥
ඒතන්මුහූර්තේ සුග්රීව පශ්ය වාලිනමාහවේ ।
නිරස්තමිෂුණෛකේන වේෂ්ටමානං මහීතලේ ॥ 37 ॥
අභිජ්ඤානං කුරුෂ්ව ත්වමාත්මනෝ වානරේශ්වර ।
යේන ත්වාමභිජානීයාං ද්වංද්වයුද්ධමුපාගතම් ॥ 38 ॥
ගජපුෂ්පීමිමාං ඵුල්ලාමුත්පාට්ය ශුභලක්ෂණාම් ।
කුරු ලක්ෂ්මණ කංඨේऽස්ය සුග්රීවස්ය මහාත්මනඃ ॥ 39 ॥
තතෝ ගිරිතටේ ජාතාමුත්පාට්ය කුසුමාකුලාම් ।
ලක්ෂ්මණෝ ගජපුෂ්පීං තාං තස්ය කංඨේ ව්යසර්ජයත් ॥ 40 ॥
ස තයා ශුශුභේ ශ්රීමාන් ලතයා කංඨසක්තයා ।
මාලයේව බලාකානාං සසංධ්ය ඉව තෝයදඃ ॥ 41 ॥
විභ්රාජමානෝ වපුෂා රාමවාක්යසමාහිතඃ ।
ජගාම සහ රාමේණ කිෂ්කිංථාං වාලිපාලිතාම් ॥ 42 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ද්වාදශස්සර්ගඃ ॥
