ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ඒකෝනචත්වාරිංශස්සර්ගඃ ।
ඉති බ්රුවාණං සුග්රීවං රාමෝ ධර්මභෘතාං වරඃ ।
බාහුභ්යාං සංපරිෂ්වජ්ය ප්රත්යුවාච කෘතාංජලිම් ॥ 1 ॥
යදිංද්රෝ වර්ෂතේ වර්ෂං න තච්චිත්රං භවේත්ක්වචිත් ।
ආදිත්යෝ වා සහස්රාංශුඃ කුර්යාද්විතිමිරං නභඃ ॥ 2 ॥
චංද්රමා රශ්මිභිඃ කුර්යාත්පෘථිවීං සෞම්ය නිර්මලාම් ।
ත්වද්විධෝ වාऽපි මිත්රාණාං ප්රතිකුර්යාත්පරංතප ॥ 3 ॥
ඒවං ත්වයි න තච්චිත්රං භවේද්යත්සෞම්ය ශෝභනම් ।
ජානාම්යහං ත්වාං සුග්රීව සතතං ප්රියවාදිනම් ॥ 4 ॥
ත්වත්සනාථඃ සඛේ සංඛ්යේ ජේතාऽස්මි සකලානරීන් ।
ත්වමේව මේ සුහෘතන්මිත්රං සාහාය්යං කර්තුමර්හසි ॥ 5 ॥
ජහාරාත්මවිනාශාය වෛදේහීං රාක්ෂසාධමඃ ।
වංචයිත්වා තු පෞලෝමීමනුහ්ලාදෝ යථා ශචීම් ॥ 6 ॥
න චිරාත්තං හනිෂ්යාමි රාවණං නිශිතෛශ්ශරෛඃ ।
පෞලෝම්යාඃ පිතරං දෘප්තං ශතක්රතුරිවාऽහවේ ॥ 7 ॥
ඒතස්මින්නංතරේ චෛව රජස්සමභිවර්තත ।
උෂ්ණාං තීව්රාං සහස්රාංශෝශ්ඡාදයද්ගගනේ ප්රභාම් ॥ 8 ॥
දිශඃ පර්යාකුලාශ්චාසන්රජසා තේන මූර්ඡතා ।
චචාල ච මහී සර්වා සශෛලවනකානනා ॥ 9 ॥
තතෝ නගේංද්රසංකාශෛස්තීක්ෂ්ණදංෂ්ට්රෛර්මහාබලෛඃ ।
කෘත්ස්නා සංඡාදිතා භූමිරසංඛ්යේයෛඃ ප්ලවංගමෛඃ ॥ 10 ॥
නිමේෂාංතරමාත්රේණ තතස්තෛර්හරියූථපෛඃ ।
කෝටීශතපරීවාරෛඃ කාමරූපිභිරාවෘතා ॥ 11 ॥
නාදේයෛඃ පාර්වතීයෛශ්ච සාමුද්රෛශ්ච මහාබලෛඃ ।
හරිභිර්මේඝනිර්හ්රාදෛරන්යෛශ්ච වනචාරිභිඃ ॥ 12 ॥
තරුණාදිත්යවර්ණෛශ්ච ශශිගෞරෛශ්ච වානරෛඃ ।
පද්මකේසරවර්ණෛශ්ච ශ්වේතෛර්මේරුකෘතාලයෛඃ ॥ 13 ॥
කෝටීසහස්රෛර්දශභිඃ ශ්රීමාන්පරිවෘතස්තදා ।
වීරශ්ශතවලිර්නාම වානරඃ ප්රත්යදෘශ්යත ॥ 14 ॥
තතඃ කාංචනශෛලාභස්තාරායා වීර්යවාන්පිතා ।
අනේකෛර්දශසාහස්රෛඃ කෝටිභිඃ ප්රත්යදෘශ්යත ॥ 15 ॥
තථාऽපරේණ කෝටීනාං සහස්රේණ සමන්විතඃ ।
පිතා රුමායා සංප්රාප්තස්සුග්රීවශ්වශුරෝ විභුඃ ॥ 16 ॥
පද්මකේසරසංකාශස්තරුණාර්කනිභානනඃ ।
බුද්ධිමාන්වානරශ්රේෂ්ඨස්සර්වවානරසත්තමඃ ॥ 17 ॥
අනේකෛර්බහුසාහස්රෛර්වානරාණාං සමන්විතඃ ।
පිතා හනුමතශ්රශීමාන්කේසරී ප්රත්යදෘශ්යත ॥ 18 ॥
ගෝලාංගූලමහාරාජෝ ගවාක්ෂෝ භීමවික්රමඃ ।
වෘතඃ කෝටිසහස්රේණ වානරාණාමදෘශ්යත ॥ 19 ॥
ඍක්ෂාණාං භීමවේගානාං ධූම්රශ්ශත්රුනිබර්හණඃ ।
වෘතඃ කෝටිසහස්රාභ්යාං ද්වාභ්යාං සමභිවර්තත ॥ 20 ॥
මහාචලනිභෛර්ඝෝරෛඃ පනසෝ නාම යූථපඃ ।
ආජගාම මහාවීර්යස්තිසෘභිඃ කෝටිභිර්වෘතඃ ॥ 21 ॥
නීලාංජනචයාකාරෝ නීලෝ නාමාऽථ යූථපඃ ।
අදෘශ්යත මහාකායඃ කෝටිභිර්දශභිර්වෘතඃ ॥ 22 ॥
තතඃ කාංචනශෛලාභෝ ගවයෝ නාම යූථපඃ ।
ආජගාම මහාවීර්යඃ පංචභිඃ කෝටිභිර්වෘතඃ ॥ 23 ॥
දරීමුඛශ්ච බලවාන්යූථපෝऽභ්යායයෞ තදා ।
වෘතඃ කෝටිසහස්රේණ සුග්රීවං සමුපස්ථිතඃ ॥ 24 ॥
මෛංදශ්ච ද්විවිදශ්චෝභාවශ්විපුත්රෞ මහාබලෞ ।
කෝටිකෝටිසහස්රේණ වානරාණාමදෘශ්යතාම් ॥ 25 ॥
ගජශ්ච බලවාන් වීරඃ කෝටිභිස්තිසෘභිර්වෘතඃ ।
ආජගාම මහාතේජා සුග්රීවස්ය සමීපතඃ ॥ 26 ॥
ඍක්ෂරාජෝ මහාතේජා ජාංබවාන්නාම නාමතඃ ।
කෝටිභිර්දශභිඃ ප්රාප්තඃ සුග්රීවස්ය වශේ ස්ථිතඃ ॥ 27 ॥
රුමණ්වාන්නාම වික්රාංතෝ වානරෝ වානරේශ්වරම් ।
ආයයෞ බලවාංස්තූර්ණං කෝටීශතසමාවෘතඃ ॥ 28 ॥
තතඃ කෝටිසහස්රාණාං සහස්රේණ ශතේන ච ।
පෘෂ්ඨතෝऽනුගතඃ ප්රාප්තෝ හරිභිර්ගංධමාදනඃ ॥ 29 ॥
තතඃ පද්මසහස්රේණ වෘතශ්ශංකුශතේන ච ।
යුවරාජෝऽංගදඃ ප්රාප්තඃ පිතෘතුල්යපරාක්රමඃ ॥ 30 ॥
තතස්තාරාද්යුතිස්තාරෝ හරිර්භීමපරාක්රමඃ ।
පංචභිර්හරිකෝටීභිර්දූරතඃ ප්රත්යදෘශ්යත ॥ 31 ॥
ඉංද්රජානුඃ කපිර්වීරෝ යූථපඃ ප්රත්යදෘශ්යත ।
ඒකාදශානාං කෝටීනාමීශ්වරස්තෛස්සමාවෘතඃ ॥ 32 ॥
තතෝ රංභස්ත්වනුප්රාප්තස්තරුණාදිත්යසන්නිභඃ ।
අයුතේනාවෘතශ්චෛව සහස්රේණ ශතේන ච ॥ 33 ॥
තතෝ යූථපතිර්වීරෝ දුර්මුඛෝ නාම වානරඃ ।
ප්රත්යදෘශ්යත කෝටීභ්යාං ද්වාභ්යාං පරිවෘතෝ බලී ॥ 34 ॥
කෛලාසශිඛරාකාරෛර්වානරෛර්භීමවික්රමෛඃ ।
වෘතඃ කෝටිසහස්රේණ හනුමාන්ප්රත්යදෘශ්යත ॥ 35 ॥
නලශ්චාපි මහාවීර්යස්සංවෘතෝ ද්රුමවාසිභිඃ ।
කෝටීශතේන සංප්රාප්තස්සහස්රේණ ශතේන ච ॥ 36 ॥
තතෝ දධිමුඛශ්රීමාන්කෝටිභිර්දශභිර්වෘතඃ ।
සංප්රාප්තෝऽභිමතස්තස්ය සුග්රීවස්ය මහාත්මනඃ ॥ 37 ॥
ශරභඃ කුමුදෝ වහ්නිර්වානරෝ රංහ ඒව ච ।
ඒතේ චාන්යේ ච බහවෝ වානරාඃ කාමරූපිණඃ ॥ 38 ॥
ආවෘත්ය පෘථිවීං සර්වාං පර්වතාංශ්ච වනානි ච ।
යූථපා ස්සමනුප්රාප්තා ස්තේෂාං සංඛ්යා න විද්යතේ ॥ 39 ॥
ආගතාශ්ච විශිෂ්ටාශ්ච පෘථිව්යාං සර්වවානරාඃ ।
ආප්ලවංතඃ ප්ලවංතශ්ච ගර්ජංතශ්ච ප්ලවංගමාඃ ।
අභ්යවර්තංත සුග්රීවං සූර්යමභ්රගණා ඉව ॥ 40 ॥
කුර්වාණා බහුශබ්දාංශ්ච ප්රහෘෂ්ටා බාහුශාලිනඃ ।
ශිරෝභිර්වානරේංද්රාය සුග්රීවාය න්යවේදයන් ॥ 41 ॥
අපරේ වානරශ්රේෂ්ඨාස්සංගම්ය ච යථෝචිතම් ।
සුග්රීවේණ සමාගම්ය ස්ථිතාඃ ප්රාංජලය ස්තදා ॥ 42 ॥
සුග්රීවස්ත්වරිතෝ රාමේ සර්වාංස්තාං වානරරර්ෂභාන් ।
නිවේදයිත්වා ධර්මජ්ඤඃ ස්ථිතඃ ප්රාංජලිරබ්රවීත් ॥ 43 ॥
යථාසුඛං පර්වතනිඣරේෂු වනේෂු සර්වේෂු ච වානරේංද්රාඃ ।
නිවේශයිත්වා විධිවද්බලානි බලං බලජ්ඤඃ ප්රතිපත්තුමීෂ්ටේ ॥ 44 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ඒකෝනචත්වාරිංශස්සර්ගඃ ॥
