ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ත්රිපංචාශස්සර්ගඃ ।
ඒවමුක්තශ්ශුභං වාක්යං තාපස්යා ධර්මසංහිතම් ।
උවාච හනුමාන්වාක්යං තාමනිංදිතචේෂ්ටිතාම් ॥ 1 ॥
ශරණං ත්වාං ප්රපන්නා ස්ම සර්වේ වෛ ධර්මචාරිණීම් ।
යඃ කෘතස්සමයෝऽස්මාකං සුග්රීවේණ මහාත්මනා ॥ 2 ॥
ස ච කාලෝ හ්යතික්රාංතෝ බිලේ ච පරිවර්තතාම් ।
සා ත්වමස්මාද්බිලාද්ඝෝරාදුත්තාරයිතුමර්හසි ॥ 3 ॥
තස්මාත්සුග්රීවවචනාදතික්රාංතාන්ගතායුෂඃ ।
ත්රාතුමර්හසි නස්සර්වාන්සුග්රීවභයකර්ශිතාන් ॥ 4 ॥
මහච්චකාර්යමස්මාභිඃ කර්තව්යං ධර්මචාරිණි ।
තච්චාපි න කෘතං කාර්යමස්මාභිරිහ වාසිභිඃ ॥ 5 ॥
ඒවමුක්තා හනුමතා තාපසී වාක්යමබ්රවීත් ।
ජීවතා දුෂ්කරං මන්යේ ප්රවිෂ්ටේන නිවර්තිතුම් ॥ 6 ॥
තපසස්තු ප්රභාවේන නියමෝපාර්ජිතේන ච ।
සර්වානේව බිලාදස්මාදුද්ධරිෂ්යාමි වානරාන් ॥ 7 ॥
නිමීලයත චක්ෂූංෂි සර්වේ වානරපුංගවාඃ ।
න හි නිෂ්ක්රමිතුං ශක්යමනිමීලිතලෝචනෛඃ ॥ 8 ॥
තතස්සම්මීලිතාස්සර්වේ සුකුමාරාංගුලෛඃ කරෛඃ ।
සහසාऽපිදධුර්දෘෂ්ටිං හෘෂ්ටා ගමනකාංක්ෂයා ॥ 9 ॥
වානරාස්තු මහාත්මානෝ හස්තරුද්ධමුඛාස්තදා ।
නිමේෂාංතරමාත්රේණ බිලාදුත්තාරිතාස්තයා ॥ 10 ॥
තතස්තාන්වානරාන්සර්වාංස්තාපසී ධර්මචාරිණී ।
නිස්සෘතාන්විෂමාත්තස්මාත්සමාශ්වාස්යේදමබ්රවීත් ॥ 11 ॥
ඒෂ විංධ්යෝ ගිරිශ්ශ්රීමාන්නානාද්රුමලතාකුලඃ ।
ඒෂ ප්රස්රවණශ්ශෛලස්සාගරෝऽයං මහෝදධිඃ ॥ 12 ॥
ස්වස්ති වෝऽස්තු ගමිෂ්යාමි භවනං වානරර්ෂභාඃ ।
ඉත්යුක්ත්වා තද්බිලං ශ්රීමත්ප්රවිවේශ ස්වයංප්රභා ॥ 13 ॥
තතස්තේ දදෘශුර්ඝෝරං සාගරං වරුණාලයම් ।
අපාරමභිගර්ජංතං ඝෝරෛරූර්මිභිරාවෘතම් ॥ 14 ॥
මයස්ය මායාවිහිතං ගිරිදුර්ගං විචින්වතාම් ।
තේෂාං මාසෝ ව්යතික්රාංතෝ යෝ රාජ්ඤා සමයඃ කෘතඃ ॥ 15 ॥
විංධ්යස්ය තු ගිරේඃ පාදේ සංප්රපුෂ්පිතපාදපේ ।
උපවිශ්ය මහාභාගාශ්චිංතාමාපේදිරේ තදා ॥ 16 ॥
තතඃ පුෂ්පාතිභාරාග්රාන් ලතාශතසමාවෘතාන් ।
ද්රුමාන්වාසංතිකාංදෘෂ්ටවා බභූවුර්භයශංකිතාඃ ॥ 17 ॥
තේ වසංතමනුප්රාප්තං ප්රතිබුද්ධ්වා පරස්පරම් ।
නෂ්ටසංදේශකාලාර්ථා නිපේතුර්ධරණීතලේ ॥ 18 ॥
තතස්තාන්කපිවෘද්ධාංස්තු ශිෂ්ටාංශ්චෛව වනෞකසඃ ।
වාචා මධුරයාऽභාෂ්ය යථාවදනුමාන්ය ච ॥ 19 ॥
ස තු සිංහවෘෂස්කංධඃ පීනායතභුජඃ කපිඃ ।
යුවරාජෝ මහාප්රාජ්ඤඃ අංගදෝ වාක්යමබ්රවීත් ॥ 20 ॥
ශාසනාත්කපිරාජස්ය වයං සර්වේ විනිර්ගතාඃ ।
මාසඃ පූර්ණෝ බිලස්ථානාං හරයඃ කිං න බුද්ධ්යතේ ॥ 21 ॥
වයමාශ්වයුජේ මාසි කාලසංඛ්යාව්යවස්ථිතාඃ ।
ප්රස්ථිතාස්සෝऽපි චාතීතඃ කිමතඃ කාර්යමුත්තරම් ॥ 22 ॥
භවංතඃ ප්රත්යයං ප්රාප්තාඃ නීතිමාර්ගවිශාරදාඃ ।
හිතේෂ්වභිරතා භර්තුර්නිසෘෂ්ටාස්සර්වකර්මසු ॥ 23 ॥
කර්මස්වප්රතිමාස්සර්වේ දික්ෂු විශ්රුතපෞරුෂාඃ ।
මාං පුරස්කෘත්ය නිර්යාතාඃ පිංගාක්ෂප්රතිචෝදිතාඃ ॥ 24 ॥
ඉදානීමකෘතාර්ථානාං මර්තව්යං නාත්ර සංශයඃ ।
හරිරාජස්ය සංදේශමකෘත්වා කස්සුඛී භවේත් ॥ 25 ॥
තස්මින්නතීතේ කාලේ තු සුග්රීවේණ කෘතේ ස්වයම් ।
ප්රායෝපවේශනං යුක්තං සර්වේෂාං ච වනෞකසාම් ॥ 26 ॥
තීක්ෂ්ණඃ ප්රකෘත්යා සුග්රීවස්ස්වාමිභාවේ ව්යවස්ථිතඃ ।
න ක්ෂමිෂ්යති නස්සර්වානපරාධකෘතෝ ගතාන් ॥ 27 ॥
අප්රවෘත්තෞ ච සීතායාඃ පාපමේව කරිෂ්යති ।
තස්මාත් ක්ෂමමිහාද්යෛව ගංතුං ප්රායෝපවේශනං හි නඃ ॥ 28 ॥
ත්යක්ත්වා පුත්රාංශ්ච දාරාංශ්ච ධනානි ච ගෘහාණි ච ।
ධෘවං නෝ හිංසිතා රාජා සර්වාන්ප්රතිගතානිතඃ ॥ 29 ॥
වධේනාප්රතිරූපේණ ශ්රේයාන්මෘත්යුරිහෛව නඃ ।
න චාහං යෞවරාජ්යේන සුග්රීවේණාභිෂේචිතඃ ॥ 30 ॥
නරේංද්රේණාභිෂික්තෝऽස්මි රාමේණාක්ලිෂ්ටකර්මණා ।
ස පූර්වං බද්ධවෛරෝ මාං රාජා දෘෂ්ට්වා ව්යතික්රමම් ॥ 31 ॥
ඝාතයිෂ්යති දංඩේන තීක්ෂ්ණේන කෘතනිශ්චයඃ ।
කිං මේ සුහෘදභිර්ව්යසනං පශ්යද්භිර්ජීවිතාංතරේ ॥ 32 ॥
ඉහෛව ප්රායමාසිෂ්යේ පුණ්යේ සාගරරෝධසි ।
ඒතච්ඡ්රුත්වා කුමාරේණ යුවරාජේන භාෂිතම් ॥ 33 ॥
සර්වේ තේ වානරශ්රේෂ්ඨාඃ කරුණං වාක්යමබ්රුවන් ।
තීක්ෂ්ණඃ ප්රකෘත්යා සුග්රීවඃ ප්රියාසක්තශ්ච රාඝවඃ ॥ 34 ॥
අදෘෂ්ටායාං තු වෛදේහ්යාං දෘෂ්ට්වාऽස්මාංශ්ත සමාගතාන් ।
රාඝවප්රියකාමාර්ථං ඝාතයිෂ්යත්යසංශයම් ॥ 35 ॥
න ක්ෂමං චාපරාද්ධානාං ගමනං ස්වාමිපාර්ශ්වතඃ ।
ඉහෛව සීතාමන්විෂ්ය ප්රවෘත්තිමුපලභ්ය වා ॥ 36 ॥
නෝ චේද්ගච්ඡාම තං වීරං ගමිෂ්යාමෝ යමක්ෂයම් ।
ප්ලවංගමානාං තු භයාර්දිතානාං ශ්රුත්වා වචස්තාර ඉදං බභාෂේ ।
අලං විෂාදේන බිලං ප්රවිශ්ය වසාම සර්වේ යදි රෝචතේ වඃ ॥ 37 ॥
ඉදං හි මායාවිහිතං සුදුර්ගමං ප්රභූතවෘක්ෂෝදකභෝජ්යපේයකම් ।
ඉහාස්ති නෝ නෛව භයං පුරංදරා න්න රාඝවාද්වානරරාජතෝऽපි වා ॥ 38 ॥
ශ්රුත්වාऽංගදස්යාපි වචෝऽනුකූල මූචුශ්ච සර්වේ හරයඃ ප්රතීතාඃ ।
යථා න හිංස්යේම තථා විධාන මසක්තමද්යෛව විධීයතාං නඃ ॥ 39 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ත්රිපංචාශස්සර්ගඃ ॥
