ശ്രീമദ്വാല്മീകീയ രാമായണേ സുംദരകാംഡമ് ।
അഥ അഷ്ടാദശസ്സര്ഗഃ ।
തഥാ വിപ്രേക്ഷ്യമാണസ്യ വനം പുഷ്പിതപാദപമ് ।
വിചിന്വതശ്ച വൈദേഹീം കിംചിച്ഛേഷാ നിശാഽഭവത് ॥ 1 ॥
ഷഡംഗവേദവിദുഷാം ക്രതുപ്രവരയാജിനാമ് ।
ശുശ്രാവ ബ്രഹ്മഘോഷാംശ്ച സ വിരാത്രേ ബ്രഹ്മരക്ഷസാമ് ॥ 2 ॥
അഥ മംഗലവാദിത്രശബ്ദൈഃ ശ്രുതിമനോഹരൈഃ ।
പ്രാബുധ്യത മഹാബാഹുര്ദശഗ്രീവോ മഹാബലഃ ॥ 3 ॥
വിബുധ്യതു യഥാകാലം രാക്ഷസേംദ്രഃ പ്രതാപവാന് ।
സ്രസ്തമാല്യാംബരധരോ വൈദേഹീമന്വചിംതയത് ॥ 4 ॥
ഭൃശം നിയുക്തസ്തസ്യാം ച മദനേന മദോത്കടഃ ।
ന സ തം രാക്ഷസഃ കാമം ശശാകാത്മനി ഗൂഹിതുമ് ॥ 5 ॥
സ സർവാഭരണൈര്യുക്തോ ബിഭ്രച്ഛ്രിയമനുത്തമാമ് ।
താം നഗൈര്ബഹുഭിര്ജുഷ്ടാം സർവപുഷ്പഫലോപഗൈഃ ॥ 6 ॥
വൃതാം പുഷ്കരിണീഭിശ്ച നാനാപുഷ്പോപശോഭിതാമ് ।
സദാ മദൈശ്ച വിഹഗൈർവിചിത്രാം പരമാദ്ഭുതാമ് ॥ 7 ॥
ഈഹാമൃഗൈശ്ച വിവിധൈര്ജുഷ്ടാം ദൃഷ്ടിമനോഹരൈഃ ।
വീധീഃ സംപ്രേക്ഷമാണശ്ച മണികാംചനതോരണാഃ ॥ 8 ॥
നാനാമൃഗഗണാകീര്ണാം ഫലൈഃ പ്രപതിതൈർവൃതാമ് ।
അശോകവനികാമേവ പ്രാവിശത്സംതതദ്രുമാമ് ॥ 9 ॥
അംഗനാശതമാത്രം തു തം വ്രജംതമനുവ്രജത് ।
മഹേംദ്രമിവ പൌലസ്ത്യം ദേവഗംധർവയോഷിതഃ ॥ 10 ॥
ദീപികാഃ കാംചനീഃ കാശ്ചിജ്ജഗൃഹുസ്തത്ര യോഷിതഃ ।
വാലവ്യജനഹസ്താശ്ച താലവൃംതാനി ചാപരാഃ ॥ 11 ॥
കാംചനൈരപി ഭൃംഗാരൈര്ജഹ്രുഃ സലിലമഗ്രതഃ ।
മംഡലാഗ്രാന് ബൃസീശ്ചാപി ഗൃഹ്യാന്യാഃ പൃഷ്ഠതോ യയുഃ ॥ 12 ॥
കാചിദ്രത്നമയീം സ്ഥാലീം പൂര്ണാം പാനസ്യ ഭാമിനീ ।
ദക്ഷിണാ ദക്ഷിണേനൈവ തദാ ജഗ്രാഹ പാണിനാ ॥ 13 ॥
രാജഹംസപ്രതീകാശം ഛത്രം പൂര്ണശശിപ്രഭമ് ।
സൌവര്ണദംഡമപരാ ഗൃഹീത്വാ പൃഷ്ഠതോ യയൌ ॥ 14 ॥
നിദ്രാമദപരീതാക്ഷ്യോ രാവണസ്യോത്തമാഃ സ്ത്രിയഃ ।
അനുജഗ്മുഃ പതിം വീരം ഘനം വിദ്യുല്ലതാ ഇവ ॥ 15 ॥
വ്യാവിദ്ധഹാരകേയൂരാഃ സമാമൃദിതവര്ണകാഃ ।
സമാഗളിതകേശാംതാഃ സസ്വേദവദനാസ്തഥാ ॥ 16 ॥
ഘൂര്ണംത്യോ മദശേഷേണ നിദ്രയാ ച ശുഭാനനാഃ ।
സ്വേദക്ലിഷ്ടാംഗകുസുമാസ്സുമാല്യാകുലമൂര്ധജാഃ ॥ 17 ॥
പ്രയാംതം നൈഋതപതിം നാര്യോ മദിരലോചനാഃ ।
ബഹുമാനാച്ച കാമാച്ച പ്രിയാ ഭാര്യാസ്തമന്വയുഃ ॥ 18 ॥
സ ച കാമപരാധീനഃ പതിസ്താസാം മഹാബലഃ ।
സീതാസക്തമനാ മംദോ മംദാംചിതഗതിര്ബഭൌ ॥ 19 ॥
തതഃ കാംചീനിനാദം ച നൂപുരാണാം ച നിസ്വനമ് ।
ശുശ്രാവ പരമസ്ത്രീണാം സ കപിര്മാരുതാത്മജഃ ॥ 20 ॥
തം ചാപ്രതിമകര്മാണമചിംത്യബലപൌരുഷമ് ।
ദ്വാരദേശമനുപ്രാപ്തം ദദര്ശ ഹനുമാന് കപിഃ ॥ 21 ॥
ദീപികാഭിരനേകാഭിഃ സമംതാദവഭാസിതമ് ।
ഗംധതൈലാവസിക്താഭിര്ധ്രിയമാണാഭിരഗ്രതഃ ॥ 22 ॥
കാമദര്പമദൈര്യുക്തം ജിഹ്മതാമ്രായതേക്ഷണമ് ।
സമക്ഷമിവ കംദര്പമപവിദ്ധശരാസനമ് ॥ 23 ॥
മഥിതാമൃതഫേനാഭമരജോവസ്ത്രമുത്തമമ് ।
സലീലമനുകര്ഷംതം വിമുക്തം സക്തമംഗദേ ॥ 24 ॥
തം പത്രവിടപേ ലീനഃ പത്രപുഷ്പഘനാവൃതഃ ।
സമീപമിവ സംക്രാംതം നിധ്യാതുമുപചക്രമേ ॥ 25 ॥
അവേക്ഷമാണസ്തു തതോ ദദര്ശ കപികുംജരഃ ।
രൂപയൌവനസംപന്നാ രാവണസ്യ വരസ്ത്രിയഃ ॥ 26 ॥
താഭിഃ പരിവൃതോ രാജാ സുരൂപാഭിര്മഹായശാഃ ।
തന്മൃഗദ്വിജസംഘുഷ്ടം പ്രവിഷ്ടഃ പ്രമദാവനമ് ॥ 27 ॥
ക്ഷീബോ വിചിത്രാഭരണഃ ശംകുകര്ണോ മഹാബലഃ ।
തേന വിശ്രവസഃ പുത്രഃ സ ദൃഷ്ടോ രാക്ഷസാധിപഃ ॥ 28 ॥
വൃതഃ പരമനാരീഭിസ്താരാഭിരിവ ചംദ്രമാഃ ।
തം ദദര്ശ മഹാതേജാസ്തേജോവംതം മഹാകപിഃ ॥ 29 ॥
രാവണോഽയം മഹാബാഹുരിതി സംചിംത്യ വാനരഃ ।
അവപ്ലുതോ മഹാതേജാ ഹനുമാന്മാരുതാത്മജഃ ॥ 30 ॥
സ തഥാപ്യുഗ്രതേജാഃ സന്നിര്ധൂതസ്തസ്യ തേജസാ ।
പത്രഗുഹ്യാംതരേ സക്തോ ഹനുമാന് സംവൃതോഽഭവത് ॥ 31 ॥
സ താമസിതകേശാംതാം സുശ്രോണീം സംഹതസ്ത്നീമ് ।
ദിദൃക്ഷുരസിതാപാംഗാമുപാവര്തത രാവണഃ ॥ 32 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ അഷ്ടാദശസ്സര്ഗഃ ॥
