ශ්රීමද්වාල්මීකීය රාමායණේ සුංදරකාංඩම් ।
අථ අෂ්ටාදශස්සර්ගඃ ।
තථා විප්රේක්ෂ්යමාණස්ය වනං පුෂ්පිතපාදපම් ।
විචින්වතශ්ච වෛදේහීං කිංචිච්ඡේෂා නිශාऽභවත් ॥ 1 ॥
ෂඩංගවේදවිදුෂාං ක්රතුප්රවරයාජිනාම් ।
ශුශ්රාව බ්රහ්මඝෝෂාංශ්ච ස විරාත්රේ බ්රහ්මරක්ෂසාම් ॥ 2 ॥
අථ මංගලවාදිත්රශබ්දෛඃ ශ්රුතිමනෝහරෛඃ ।
ප්රාබුධ්යත මහාබාහුර්දශග්රීවෝ මහාබලඃ ॥ 3 ॥
විබුධ්යතු යථාකාලං රාක්ෂසේංද්රඃ ප්රතාපවාන් ।
ස්රස්තමාල්යාංබරධරෝ වෛදේහීමන්වචිංතයත් ॥ 4 ॥
භෘශං නියුක්තස්තස්යාං ච මදනේන මදෝත්කටඃ ।
න ස තං රාක්ෂසඃ කාමං ශශාකාත්මනි ගූහිතුම් ॥ 5 ॥
ස සර්වාභරණෛර්යුක්තෝ බිභ්රච්ඡ්රියමනුත්තමාම් ।
තාං නගෛර්බහුභිර්ජුෂ්ටාං සර්වපුෂ්පඵලෝපගෛඃ ॥ 6 ॥
වෘතාං පුෂ්කරිණීභිශ්ච නානාපුෂ්පෝපශෝභිතාම් ।
සදා මදෛශ්ච විහගෛර්විචිත්රාං පරමාද්භුතාම් ॥ 7 ॥
ඊහාමෘගෛශ්ච විවිධෛර්ජුෂ්ටාං දෘෂ්ටිමනෝහරෛඃ ।
වීධීඃ සංප්රේක්ෂමාණශ්ච මණිකාංචනතෝරණාඃ ॥ 8 ॥
නානාමෘගගණාකීර්ණාං ඵලෛඃ ප්රපතිතෛර්වෘතාම් ।
අශෝකවනිකාමේව ප්රාවිශත්සංතතද්රුමාම් ॥ 9 ॥
අංගනාශතමාත්රං තු තං ව්රජංතමනුව්රජත් ।
මහේංද්රමිව පෞලස්ත්යං දේවගංධර්වයෝෂිතඃ ॥ 10 ॥
දීපිකාඃ කාංචනීඃ කාශ්චිජ්ජගෘහුස්තත්ර යෝෂිතඃ ।
වාලව්යජනහස්තාශ්ච තාලවෘංතානි චාපරාඃ ॥ 11 ॥
කාංචනෛරපි භෘංගාරෛර්ජහ්රුඃ සලිලමග්රතඃ ।
මංඩලාග්රාන් බෘසීශ්චාපි ගෘහ්යාන්යාඃ පෘෂ්ඨතෝ යයුඃ ॥ 12 ॥
කාචිද්රත්නමයීං ස්ථාලීං පූර්ණාං පානස්ය භාමිනී ।
දක්ෂිණා දක්ෂිණේනෛව තදා ජග්රාහ පාණිනා ॥ 13 ॥
රාජහංසප්රතීකාශං ඡත්රං පූර්ණශශිප්රභම් ।
සෞවර්ණදංඩමපරා ගෘහීත්වා පෘෂ්ඨතෝ යයෞ ॥ 14 ॥
නිද්රාමදපරීතාක්ෂ්යෝ රාවණස්යෝත්තමාඃ ස්ත්රියඃ ।
අනුජග්මුඃ පතිං වීරං ඝනං විද්යුල්ලතා ඉව ॥ 15 ॥
ව්යාවිද්ධහාරකේයූරාඃ සමාමෘදිතවර්ණකාඃ ।
සමාගළිතකේශාංතාඃ සස්වේදවදනාස්තථා ॥ 16 ॥
ඝූර්ණංත්යෝ මදශේෂේණ නිද්රයා ච ශුභානනාඃ ।
ස්වේදක්ලිෂ්ටාංගකුසුමාස්සුමාල්යාකුලමූර්ධජාඃ ॥ 17 ॥
ප්රයාංතං නෛඍතපතිං නාර්යෝ මදිරලෝචනාඃ ।
බහුමානාච්ච කාමාච්ච ප්රියා භාර්යාස්තමන්වයුඃ ॥ 18 ॥
ස ච කාමපරාධීනඃ පතිස්තාසාං මහාබලඃ ।
සීතාසක්තමනා මංදෝ මංදාංචිතගතිර්බභෞ ॥ 19 ॥
තතඃ කාංචීනිනාදං ච නූපුරාණාං ච නිස්වනම් ।
ශුශ්රාව පරමස්ත්රීණාං ස කපිර්මාරුතාත්මජඃ ॥ 20 ॥
තං චාප්රතිමකර්මාණමචිංත්යබලපෞරුෂම් ।
ද්වාරදේශමනුප්රාප්තං දදර්ශ හනුමාන් කපිඃ ॥ 21 ॥
දීපිකාභිරනේකාභිඃ සමංතාදවභාසිතම් ।
ගංධතෛලාවසික්තාභිර්ධ්රියමාණාභිරග්රතඃ ॥ 22 ॥
කාමදර්පමදෛර්යුක්තං ජිහ්මතාම්රායතේක්ෂණම් ।
සමක්ෂමිව කංදර්පමපවිද්ධශරාසනම් ॥ 23 ॥
මථිතාමෘතඵේනාභමරජෝවස්ත්රමුත්තමම් ।
සලීලමනුකර්ෂංතං විමුක්තං සක්තමංගදේ ॥ 24 ॥
තං පත්රවිටපේ ලීනඃ පත්රපුෂ්පඝනාවෘතඃ ।
සමීපමිව සංක්රාංතං නිධ්යාතුමුපචක්රමේ ॥ 25 ॥
අවේක්ෂමාණස්තු තතෝ දදර්ශ කපිකුංජරඃ ।
රූපයෞවනසංපන්නා රාවණස්ය වරස්ත්රියඃ ॥ 26 ॥
තාභිඃ පරිවෘතෝ රාජා සුරූපාභිර්මහායශාඃ ।
තන්මෘගද්විජසංඝුෂ්ටං ප්රවිෂ්ටඃ ප්රමදාවනම් ॥ 27 ॥
ක්ෂීබෝ විචිත්රාභරණඃ ශංකුකර්ණෝ මහාබලඃ ।
තේන විශ්රවසඃ පුත්රඃ ස දෘෂ්ටෝ රාක්ෂසාධිපඃ ॥ 28 ॥
වෘතඃ පරමනාරීභිස්තාරාභිරිව චංද්රමාඃ ।
තං දදර්ශ මහාතේජාස්තේජෝවංතං මහාකපිඃ ॥ 29 ॥
රාවණෝऽයං මහාබාහුරිති සංචිංත්ය වානරඃ ।
අවප්ලුතෝ මහාතේජා හනුමාන්මාරුතාත්මජඃ ॥ 30 ॥
ස තථාප්යුග්රතේජාඃ සන්නිර්ධූතස්තස්ය තේජසා ।
පත්රගුහ්යාංතරේ සක්තෝ හනුමාන් සංවෘතෝऽභවත් ॥ 31 ॥
ස තාමසිතකේශාංතාං සුශ්රෝණීං සංහතස්ත්නීම් ।
දිදෘක්ෂුරසිතාපාංගාමුපාවර්තත රාවණඃ ॥ 32 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ අෂ්ටාදශස්සර්ගඃ ॥
