ශ්රීමද්වාල්මීකීය රාමායණේ අයෝධ්යාකාංඩම් ।
අථ අෂ්ටාවිංශස්සර්ගඃ ।
ස ඒවං බ්රුවතීං සීතාං ධර්මජ්ඤෝ ධර්මවත්සලඃ ।
න නේතුං කුරුතේ බුද්ධිං වනේ දුඃඛානි චිංතයන් ॥ 1 ॥
සාංත්වයිත්වා පුනස්තාං තු බාෂ්පදූෂිතලෝචනාම් ।
නිවර්තනාර්ථේ ධර්මාත්මා වාක්යමේතදුවාච හ ॥ 2 ॥
සීතේ මහාකුලීනාऽසි ධර්මේ ච නිරතා සදා ।
ඉහාऽචර ස්වධර්මං ත්වං මේ යථා මනසස්සුඛම් ॥ 3 ॥
සීතේ යථා ත්වාං වක්ෂ්යාමි තථා කාර්යං ත්වයාऽබලේ ।
වනේ හි බහවෝ දෝෂා වදතස්තාන්නිබෝධ මේ ॥ 4 ॥
සීතේ විමුච්යතාමේෂා වනවාසකෘතා මතිඃ ।
බහුදෝෂං හි කාංතාරං වනමිත්යභිධීයතේ ॥ 5 ॥
හිතබුද්ධ්යා ඛලු වචෝ මයෛතදභිධීයතේ ।
සදා සුඛං න ජානාමි දුඃඛමේව සදා වනම් ॥ 6 ॥
ගිරිනිර්ඣරසංභූතා ගිරිකංදර වාසිනාම් ।
සිංහානාං නිනදා දුඃඛා ශ්ශ්රෝතුං දුඃඛමතෝ වනම් ॥ 7 ॥
ක්රීඩමානාශ්ච විස්රබ්ධා මත්තා ශ්ශූන්යේ මහාමෘගාඃ ।
දෘෂ්ට්වා සමභිවර්තංතේ සීතේ දුඃඛමතෝ වනම් ॥ 8 ॥
සග්රාහා ස්සරිතශ්චෛව පංකවත්යස්සු දුස්තරාඃ ।
මත්තෛරපි ගජෛර්නිත්යමතෝ දුඃඛතරං වනම් ॥ 9 ॥
ලතාකංටකසංකීර්ණාඃ කෘකවාකූපනාදිතාඃ ।
නිරපාශ්ච සුදුර්ගාශ්ච මාර්ගා දුඃඛමතෝ වනම් ॥ 10 ॥
සුප්යතේ පර්ණශය්යාසු ස්වයං භග්නාසු භූතලේ ।
රාත්රිෂු ශ්රමඛින්නේන තස්මාද්දුඃඛතරං වනම් ॥ 11 ॥
අහෝරාත්රං ච සංතෝෂඃ කර්තව්යෝ නියතාත්මනා ।
ඵලෛර්වෘක්ෂාවපතිතෛ ස්සීතේ දුඃඛමතෝ වනම් ॥ 12 ॥
උපවාසශ්ච කර්තව්යෝ යථා ප්රාණේන මෛථිලි ।
ජටාභාරශ්ච කර්තව්යෝ වල්කලාංබරධාරිණා ॥ 13 ॥
දේවතානාං පිත්රූණාං කර්තව්යං විධිපූර්වකම් ।
ප්රාප්තානාමතිථීනාං ච නිත්යශඃ ප්රතිපූජනම් ॥ 14 ॥
කාර්යස්ත්රිරභිෂේකශ්ච කාලේ කාලේ ච නිත්යශඃ ।
චරතා නියමේනෛව තස්මාද්ධුඃඛතරං වනම් ॥ 15 ॥
උපහාරශ්ච කර්තව්යඃ කුසුමෛ ස්ස්වයමාහෘතෛඃ ।
ආර්ෂේණ විධිනා වේද්යාං බාලේ දුඃඛමතෝ වනම් ॥ 16 ॥
යථාලබ්ධේන කර්තව්යඃ සංතෝෂස්තේන මෛථිලි ।
යතාහාරෛර්වනචරෛ ර්නිත්යං දුඃඛමතෝ වනම් ॥ 17 ॥
අතීව වාතාස්තිමිරං බුභුක්ෂා චාත්ර නිත්යශඃ ।
භයානි ච මහාංත්යත්ර තතෝ දුඃඛතරං වනම් ॥ 18 ॥
සරීසෘපාශ්ච බහවෝ බහුරූපාශ්ච භාමිනි ।
චරංති පෘථිවීං දර්පාත්තතෝ දුඃඛතරං වනම් ॥ 19 ॥
නදී නිලයනා ස්සර්පා නදීකුටිලගාමිනඃ ।
තිෂඨංත්යාවෘත්ය පංථානං තතෝ දුඃඛතරං වනම් ॥ 20 ॥
පතංගා වෘශ්චිකාඃ කීටා දංශාශ්ච මශකෛ ස්සහ ।
බාධංතේ නිත්යමබලේ සර්වං දුඃඛමතෝ වනම් ॥ 21 ॥
ද්රුමාඃ කංටකිනශ්චෛව කුශාඃ කාශාශ්ච භාමිනි ।
වනේ ව්යාකුලශාඛාග්රාස්තේන දුඃඛතරං වනම් ॥ 22 ॥
කායක්ලේශාශ්ච බහවෝ භයානි විවිධානි ච ।
අරණ්යවාසේ වසතෝ දුඃඛමේව තතෝ වනම් ॥ 23 ॥
ක්රෝධලෝභෞ විමෝක්තව්යෞ කර්තව්යා තපසේ මතිඃ ।
න භේතව්යං ච භේතව්යේ නිත්යං දුඃඛමතෝ වනම් ॥ 24 ॥
තදලං තේ වනං ගත්වා ක්ෂමං න හි වනං තව ।
විමෘශන්නිහ පශ්යාමි බහුදෝෂතරං වනම් ॥ 25 ॥
වනංතු නේතුං න කෘතා මතිස්තදා බභූව රාමේණ යදා මහාත්මනා ।
න තස්ය සීතා වචනං චකාර ත ත්තතෝऽබ්රවීද්රාමමිදං සුදුඃඛිතා ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ අෂ්ටාවිංශස්සර්ගඃ ॥
