ශ්රීමද්වාල්මීකීය රාමායණේ අයෝධ්යාකාංඩම් ।
අථ ෂට්චත්වාරිංශස්සර්ගඃ ।
තතස්තු තමසාතීරං රම්යමාශ්රිත්ය රාඝවඃ ।
සීතාමුද්වීක්ෂ්ය සෞමිත්රිමිදං වචනමබ්රවීත් ॥ 1 ॥
ඉයමද්ය නිශා පූර්වා සෞමිත්රේ ප්රහිතා වනම් ।
වනවාසස්ය භද්රං තේ ස නෝත්කංඨිතුමර්හසි ॥ 2 ॥
පශ්ය ශූන්යාන්යරණ්යානි රුදංතීව සමංතතඃ ।
යථානිලයමායද්භිර්නිලීනානි මෘගද්විජෛඃ ॥ 3 ॥
අද්යායෝධ්යා තු නගරී රාජධානී පිතුර්මම ।
සස්ත්රීපුංසා ගතානස්මාඤ්ශෝචිෂ්යති න සංශයඃ ॥ 4 ॥
අනුරක්තා හි මනුජා රාජානං බහුභිර්ගුණෛඃ ।
ත්වාං ච මාං ච නරව්යාඝ්ර ශත්රුඝ්න භරතෞ තථා ॥ 5 ॥
පිතරං චානුශෝචාමි මාතරං ච යශස්විනීම් ।
අපි වාංධෞ භවේතාං තු රුදංතෞ තාවභීක්ෂ්ණශඃ ॥ 6 ॥
භරතඃ ඛලු ධර්මාත්මා පිතරං මාතරං ච මේ ।
ධර්මාර්ථකාමසහිතෛර්වාක්යෛර්වාශ්වාසයිෂ්යති ॥ 7 ॥
භරතස්යානෘශංසත්වං විචිංත්යාහං පුනඃ පුනඃ ।
නානුශෝචාමි පිතරං මාතරං චාපි ලක්ෂ්මණ ॥ 8 ॥
ත්වයා කාර්යං නරව්යාඝ්ර මාමනුව්රජතා කෘතම් ।
අන්වේෂ්ටව්යා හි වෛදේහ්යා රක්ෂණාර්ථේ සහායතා ॥ 9 ॥
අද්භිරේව තු සෞමිත්රේ වත්ස්යාම්යද්ය නිශාමිමාම් ।
ඒතධ්දි රෝචතේ මහ්යං වන්යේऽපි විවිධේ සති ॥ 10 ॥
ඒවමුක්ත්වා තු සෞමිත්රිං සුමංත්රමපි රාඝවඃ ।
අප්රමත්තස්ත්වමශ්වේෂු භව සෞම්යේත්යුවාච හ ॥ 11 ॥
සෝऽශ්වාන්සුමංත්රඃ සංයම්ය සූර්යේऽස්තං සමුපාගතේ ।
ප්රභූතයවසාන් කෘත්වා බභූව ප්රත්යනංතරඃ ॥ 12 ॥
උපාස්ය තු ශිවාං සංධ්යාං දෘෂ්ට්වා රාත්රිමුපස්ථිතාම් ।
රාමස්ය ශයනං චක්රේ සූතඃ සෞමිත්රිණා සහ ॥ 13 ॥
තාං ශය්යාං තමසාතීරේ වීක්ෂ්ය වෘක්ෂදලෛඃ කෘතාම් ।
රාමඃ සෞමිත්රිණා සාර්ධං සභාර්යස්සංවිවේශ හ ॥ 14 ॥
සභාර්යං සංප්රසුප්තං තං භ්රාතරං වීක්ෂ්ය ලක්ෂ්මණඃ ।
කථයාමාස සූතාය රාමස්ය විවිධාන් ගුණාන් ॥ 15 ॥
ජාග්රතෝ හ්යේව තාං රාත්රිං සෞමිත්රේරුදිතෝ රවිඃ ।
සූතස්ය තමසාතීරේ රාමස්ය බ්රුවතෝ ගුණාන් ॥ 16 ॥
ගෝකුලාකුලතීරායාස්තමසායා විදූරතඃ ।
අවසත්තත්ර තාං රාත්රිං රාමඃ ප්රකෘතිභිස්සහ ॥ 17 ॥
උත්ථාය ස මහාතේජාඃ ප්රකෘතීස්තා නිශාම්ය ච ।
අබ්රවීද්භ්රාතරං රාමෝ ලක්ෂ්මණං පුණ්යලක්ෂණම් ॥ 18 ॥
අස්මද්ව්යපේක්ෂාන් සෞමිත්රේ නිරපේක්ෂාන් ගෘහේෂ්වපි ।
වෘක්ෂමූලේෂු සංසුප්තාන් පශ්ය ලක්ෂ්මණ සාංප්රතම් ॥ 19 ॥
යථෛතේ නියමං පෞරාඃ කුර්වංත්යස්මන්නිවර්තනේ ।
අපි ප්රාණාන්න්යසිෂ්යංති න තු ත්යක්ෂ්යංති නිශ්චයම් ॥ 20 ॥
යාවදේව තු සංසුප්තා ස්තාවදේව වයං ලඝු ।
රථමාරුහ්ය ගච්ඡාමඃ පංථානමකුතෝභයම් ॥ 21 ॥
අතෝ භූයෝऽපි නේදානීමික්ෂ්වාකුපුරවාසිනඃ ।
ස්වපේයුරනුරක්තා මාං වෘක්ෂමූලානි සංශ්රිතාඃ ॥ 22 ॥
පෞරා හ්යාත්මකෘතාද්දුඃඛාද්විප්රමෝච්යා නෘපාත්මජෛඃ ।
න තු ඛල්වාත්මනා යෝජ්යා දුඃඛේන පුරවාසිනඃ ॥ 23 ॥
අබ්රවීල්ලක්ෂ්මණෝ රාමං සාක්ෂාද්ධර්මමිවස්ථිතම් ।
රෝචතේ මේ තථා ප්රාජ්ඤ ක්ෂිප්ර මාරුහ්යතාමිති ॥ 24 ॥
අථ රාමෝऽබ්රවීච්ඡ්රීමාන්සුමංත්රං යුජ්යතාං රථඃ ।
ගමිෂ්යාමි තතෝऽරණ්යං ගච්ඡ ශීඝ්රමිතඃ ප්රභෝ ॥ 25 ॥
සූතස්තත ස්සත්ත්වරිතඃ ස්යංදනං තෛර්හයෝත්තමෛඃ ।
යෝජයිත්ව්රාऽථ රාමාය ප්රාංජලිඃ ප්රත්යවේදයත් ॥ 26 ॥
අයං යුක්තෝ මහාබාහෝ රථස්තේ රථිනාං වර ।
ත්වමාරෝහස්ව භද්රං තේ සසීත ස්සහලක්ෂ්මණඃ ॥ 27 ॥
තං ස්යංදනමධිෂ්ඨාය රාඝව ස්සපරිච්ඡදඃ ।
ශීඝ්රගාමාකුලාවර්තාං තමසාමතරන්නදීම් ॥ 28 ॥
ස සංතීර්ය මහාබාහුඃ ශ්රීමාන් ශිවමකංටකම් ।
ප්රාපද්යත මහාමාර්ගමභයං භයදර්ශිනාම් ॥ 29 ॥
මෝහනාර්ථං තු පෞරාණාං සූතං රාමෝऽබ්රවීද්වචඃ ।
උදඞ්මුඛඃ ප්රයාහි ත්වං රථමාස්ථාය සාරථේ ॥ 30 ॥
මුහූර්තං ත්වරිතං ගත්වා නිවර්තය රථං පුනඃ ।
යථා න විද්යුඃ පෞරා මාං තථා කුරු සමාහිතඃ ॥ 31 ॥
රාමස්ය වචනං ශ්රුත්වා තථා චක්රේ ස සාරථිඃ ।
ප්රත්යාගම්ය ච රාමස්ය ස්යංදනං ප්රත්යවේදයත් ॥ 32 ॥
තෞ සංප්රයුක්තං තු රථං සමාස්ථිතෞ තදා සසීතෞ රඝුවංශවර්ධනෞ ।
ප්රචෝදයාමාස තතස්තුරංගමාන් ස සාරථිර්යේන පථා තපෝවනම් ॥ 33 ॥
තත ස්සමාස්ථාය රථං මහාරථඃ සසාරථිර්දාශරථිර්වනං යයෞ ।
උදඞ්මුඛං තං තු රථං චකාර ස ප්රයාණමාංගල්ය නිමිත්තදර්ශනාත් ॥ 34 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ෂට්චත්වාරිංශස්සර්ගඃ ॥
