ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ପଂଚମସ୍ସର୍ଗଃ ।
ସଂଦିଶ୍ୟ ରାମଂ ନୃପତି ଶ୍ଶ୍ଵୋଭାଵିନ୍ୟଭିଷେଚନେ ।
ପୁରୋହିତଂ ସମାହୂୟ ଵଶିଷ୍ଠମିଦମବ୍ରଵୀତ୍ ॥ 1 ॥
ଗଚ୍ଛୋପଵାସଂ କାକୁତ୍ସ୍ଥଂ କାରୟାଦ୍ୟ ତପୋଧନ ।
ଶ୍ରୀୟଶୋରାଜ୍ୟଲାଭାୟ ଵଧ୍ଵା ସହ ୟତଵ୍ରତମ୍ ॥ 2 ॥
ତଥେତି ଚ ସ ରାଜାନମୁକ୍ତ୍ଵା ଵେଦଵିଦାଂ ଵରଃ ।
ସ୍ଵୟଂ ଵସିଷ୍ଠୋ ଭଗଵାନ୍ୟୟୌ ରାମନିଵେଶନମ୍ ॥ 3 ॥
ଉପଵାସୟିତୁଂ ରାମଂ ମଂତ୍ରଵନ୍ମଂତ୍ରକୋଵିଦଃ ।
ବ୍ରାହ୍ମଂ ରଥଵରଂ ୟୁକ୍ତମାସ୍ଥାୟ ସୁଦୃଢଵ୍ରତଃ ॥ 4 ॥
ସ ରାମଭଵନଂ ପ୍ରାପ୍ୟ ପାଂଡୁରାଭ୍ରଘନପ୍ରଭମ୍ ।
ତିସ୍ରଃ କକ୍ଷ୍ୟା ରଥେନୈଵ ଵିଵେଶମୁନିସତ୍ତମଃ ॥ 5 ॥
ତମାଗତମୃଷିଂ ରାମସ୍ତ୍ଵରନ୍ନିଵ ସସଂଭ୍ରମଃ ।
ମାନୟିଷ୍ୟନ୍ସମାନାର୍ହଂ ନିଶ୍ଚକ୍ରାମ ନିଵେଶନାତ୍ ॥ 6 ॥
ଅଭ୍ୟେତ୍ୟ ତ୍ଵରମାଣଶ୍ଚ ରଥାଭ୍ୟାଶଂ ମନୀଷିଣଃ ।
ତତୋଽଵତାରୟାମାସ ପରିଗୃହ୍ୟ ରଥାତ୍ସ୍ଵୟମ୍ ॥ 7 ॥
ସ ଚୈନଂ ପ୍ରଶ୍ରିତଂ ଦୃଷ୍ଟ୍ଵା ସଂଭାଷ୍ୟାଭିପ୍ରସାଦ୍ୟ ଚ ।
ପ୍ରିୟାର୍ହଂ ହର୍ଷୟନ୍ରାମମିତ୍ୟୁଵାଚ ପୁରୋହିତଃ ॥ 8 ॥
ପ୍ରସନ୍ନସ୍ତେ ପିତା ରାମ ୟୌଵରାଜ୍ୟମଵାପ୍ସ୍ୟସି ।
ଉପଵାସଂ ଭଵାନଦ୍ୟ କରୋତୁ ସହ ସୀତୟା ॥ 9 ॥
ପ୍ରାତସ୍ତ୍ଵାମଭିଷେକ୍ତା ହି ୟୌଵରାଜ୍ୟେ ନରାଧିପଃ ।
ପିତା ଦଶରଥଃ ପ୍ରୀତ୍ୟା ୟୟାତିଂ ନହୁଷୋ ୟଥା ॥ 10 ॥
ଇତ୍ୟୁକ୍ତ୍ଵା ସ ତଦା ରାମମୁପଵାସଂ ୟତଵ୍ରତମ୍ ।
ମଂତ୍ରଵତ୍କାରୟାମାସ ଵୈଦେହ୍ୟା ସହିତଂ ମୁନିଃ ॥ 11 ॥
ତତୋ ୟଥାଵଦ୍ରାମେଣ ସ ରାଜ୍ଞୋ ଗୁରୁରର୍ଚିତଃ ।
ଅଭ୍ୟନୁଜ୍ଞାପ୍ୟ କାକୁତ୍ସ୍ଥଂ ୟୟୌ ରାମନିଵେଶନାତ୍ ॥ 12 ॥
ସୁହୃଦ୍ଭିସ୍ତତ୍ର ରାମୋଽପି ସହାସୀନଃ ପ୍ରିୟଂଵଦୈଃ ।
ସଭାଜିତୋ ଵିଵେଶାଽଥ ତାନନୁଜ୍ଞାପ୍ୟ ସର୍ଵଶଃ ॥ 13 ॥
ହୃଷ୍ଟନାରୀନରୟୁତଂ ରାମଵେଶ୍ମ ତଦା ବଭୌ ।
ୟଥା ମତ୍ତଦ୍ଵିଜଗଣଂ ପ୍ରଫୁଲ୍ଲନଲିନଂ ସରଃ ॥ 14 ॥
ସ ରାଜଭଵନପ୍ରଖ୍ୟାତ୍ତସ୍ମାଦ୍ରାମନିଵେଶାନାତ୍ ।
ନିର୍ଗତ୍ୟ ଦଦୃଶେ ମାର୍ଗଂ ଵସିଷ୍ଠୋ ଜନସଂଵୃତମ୍ ॥ 15 ॥
ବୃଂଦବୃଂଦୈରୟୋଧ୍ୟାୟାଂ ରାଜମାର୍ଗାସ୍ସମଂତତଃ ।
ବଭୂଵୁରଭିସଂବାଧାଃ କୁତୂହଲଜନୈର୍ଵୃତାଃ ॥ 16 ॥
ଜନବୃଂଦୋର୍ମିସଂଘର୍ଷହର୍ଷସ୍ଵନଵତସ୍ତଦା ।
ବଭୂଵ ରାଜମାର୍ଗସ୍ୟ ସାଗରସ୍ୟେଵ ନିସ୍ଵନଃ ॥ 17 ॥
ସିକ୍ତସମ୍ମୃଷ୍ଟରଥ୍ୟା ହି ତଦହର୍ଵନମାଲିନୀ ।
ଆସୀଦୟୋଧ୍ୟାନଗରୀ ସମୁଚ୍ଛ୍ରିତଗୃହଧ୍ଵଜା ॥ 18 ॥
ତଦା ହ୍ୟୟୋଧ୍ୟାନିଲୟଃ ସସ୍ତ୍ରୀବାଲାବଲୋ ଜନଃ ।
ରାମାଭିଷେକମାକାଂକ୍ଷନ୍ନାକାଂକ୍ଷଦୁଦୟଂ ରଵେଃ ॥ 19 ॥
ପ୍ରଜାଲଂକାରଭୂତଂ ଚ ଜନସ୍ୟାନଂଦଵର୍ଧନମ୍ ।
ଉତ୍ସୁକୋଽଭୂଜ୍ଜନୋ ଦ୍ରଷ୍ଟୁଂ ତମୟୋଧ୍ୟାମହୋତ୍ସଵମ୍ ॥ 20 ॥
ଏଵଂ ତଜ୍ଜନସଂବାଧଂ ରାଜମାର୍ଗଂ ପୁରୋହିତଃ ।
ଵ୍ୟୂହନ୍ନିଵ ଜନୌଘଂ ତଂ ଶନୈ ରାଜକୁଲଂ ୟୟୌ ॥ 21 ॥
ସିତାଭ୍ରଶିଖରପ୍ରଖ୍ୟଂ ପ୍ରାସାଦମଧିରୁହ୍ୟ ସଃ ।
ସମୀୟାୟ ନରେଂଦ୍ରେଣ ଶକ୍ରେଣେଵ ବୃହସ୍ପତିଃ ॥ 22 ॥
ତମାଗତମଭିପ୍ରେକ୍ଷ୍ୟ ହିତ୍ଵା ରାଜାସନଂ ନୃପଃ ।
ପପ୍ରଚ୍ଛ ସ ଚ ତସ୍ମୈ ତତ୍କୃତମିତ୍ୟଭ୍ୟଵେଦୟତ୍ ॥ 23 ॥
ଚୈଵ ତଦା ତୁଲ୍ୟଂ ସହାସୀନାସ୍ସଭାସଦଃ ।
ଆସନେଭ୍ୟସ୍ସମୁତ୍ତସ୍ଥୁଃ ପୂଜୟଂତଃ ପୁରୋହିତମ୍ ॥ 24 ॥
ଗୁରୁଣା ତ୍ଵଭ୍ୟନୁଜ୍ଞାତୋ ମନୁଜୌଘଂ ଵିସୃଜ୍ୟ ତମ୍ ।
ଵିଵେଶାଂତଃ ପୁରଂ ରାଜା ସିଂହୋ ଗିରିଗୁହାମିଵ ॥ 25 ॥
ତଦଗ୍ୟ୍ରଵେଷପ୍ରମଦାଜନାକୁଲଂ ମହେଂଦ୍ରଵେଶ୍ମପ୍ରତିମଂ ନିଵେଶନମ୍ ।
ଵିଦୀପୟଂଶ୍ଚାରୁ ଵିଵେଶ ପାର୍ଥିଵ ଶ୍ଶଶୀଵ ତାରାଗଣସଂକୁଲଂ ନଭଃ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ପଂଚମସ୍ସର୍ଗଃ ॥
