śrīmadvālmīkīya rāmāyaṇē ayōdhyākāṇḍam ।
atha tryāśītitamassargaḥ ।
tata ssamutthitaḥ kālyamāsthāya syandanōttamam ।
prayayau bharataśśīghraṃ rāmadarśanakāṅkṣayā ॥ 1 ॥
agrataḥ prayayustasya sarvē mantripurōdhasaḥ ।
adhiruhya hayairyuktānrathānsūryarathōpamān ॥ 2 ॥
navanāgasahasrāṇi kalpitāni yathāvidhi ।
anvayurbharataṃ yāntamikṣvākukulanandanam ॥ 3 ॥
ṣaṣṭī rathasahasrāṇi dhanvinō vividhāyudhāḥ ।
anvayurbharataṃ yāntaṃ rājaputraṃ yaśasvinam ॥ 4 ॥
śataṃ sahasrāṇyaśvānāṃ samārūḍhāni rāghavam ।
anvayurbharataṃ yāntaṃ satyasandhaṃ jitēndriyam ॥ 5 ॥
kaikēyī cha sumitrā cha kausalyā cha yaśasvinī ।
rāmānayanasaṃhṛṣṭā yayuryānēna bhāsvatā ॥ 6 ॥
prayātāśchāryasaṅghātā rāmaṃ draṣṭuṃ salakṣmaṇam ।
tasyaiva cha kathāśchitrāḥ kurvāṇā hṛṣṭamānasāḥ ॥ 7 ॥
mēghaśyāmaṃ mahābāhuṃ sthirasattvaṃ dṛḍhavratam ।
kadā drakṣyāmahē rāmaṃ jagata śśōkanāśanam ॥ 8 ॥
dṛṣṭa ēva hi na śśōkamapanēṣyati rāghavaḥ ।
tama ssarvasya lōkasya samudyanniva bhāskaraḥ ॥ 9 ॥
ityēvaṃ kathayantastē samprahṛṣṭāḥ kathā śśubhāḥ ।
pariṣvajānāśchānyōnyaṃ yayurnāgarikā janāḥ ॥ 10 ॥
yē cha tatrāparē sarvē sammatā yē cha naigamāḥ ।
rāmaṃ prati yayurhṛṣṭā ssarvāḥ prakṛtayastathā ॥ 11 ॥
maṇikārāścha yē kēchitkumbhakārāścha śōbhanāḥ ।
sūtrakarmakṛtaśchaiva yē cha śastrōpajīvinaḥ ॥ 12 ॥
mayūrakāḥ krākachikā rōchakā vēdhakāstathā ।
dantakārā ssudhākārā stathā gandhōpajīvinaḥ ॥ 13 ॥
suvarṇakārāḥ prakhyātāstathā kambaladhāvakāḥ ।
snāpakōṣṇōdakā vaidyādhūpakāśśauṇḍikāstathā ॥ 14 ॥
rajakāstunnavāyāścha grāmaghōṣamahattarāḥ ।
śailūṣāścha saha strībhiryayuḥ kaivartakāstathā ॥ 15 ॥
samāhitā vēdavidō brāhmaṇā vṛttasammatāḥ ।
gōrathairbharataṃ yāntamanujagmu ssahasraśaḥ ॥ 16 ॥
suvēṣā śśuddhavasanāstāmramṛṣṭānulēpanāḥ ।
sarvē tē vividhairyānai śśanairbharatamanvayuḥ ॥ 17 ॥
prahṛṣṭamuditā sēnā sā'nvayātkaikayīsutam ।
bhrāturānayanē yāntaṃ bharataṃ bhrātṛvatsalam ॥ 18 ॥
tē gatvā dūramadhvānaṃ rathayānāśvakuñjaraiḥ ।
samāsēdustatō gaṅgāṃ śṛṅgībērapuraṃ prati ॥ 19 ॥
yatra rāmasakhō vīrō guhō jñātigaṇairvṛtaḥ ।
nivasatyapramādēna dēśaṃ taṃ paripālayan ॥ 20 ॥
upētya tīraṃ gaṅgāyāśchakravākairalaṅkṛtam ।
vyavātiṣṭhata sā sēnā bharatasyānuyāyinī ॥ 21 ॥
nirīkṣyānugatāṃ sēnāṃ tāṃ cha gaṅgāṃ śivōdakām ।
bharatassachivānsarvānabravīdvākyakōvidaḥ ॥ 22 ॥
nivēśayata mē sainyamabhiprāyēṇa sarvataḥ ।
viśrāntāḥ pratariṣyāmaśśva idānīmimāṃ nadīm ॥ 23 ॥
dātuṃ cha tāvadichChāmi svargatasya mahīpatēḥ ।
aurdhvadēhanimittārthamavatīryōdakaṃ nadīm ॥ 24 ॥
tasyaivaṃ bruvatō'mātyāstathētyuktvā samāhitāḥ ।
nyavēśayaṃstāṃ Chandēna svēna svēna pṛthakpṛthak ॥ 25 ॥
nivēśya gaṅgāmanu tāṃ mahānadīṃ chamūṃ vidhānaiḥ paribarhaśōbhinīm ।
uvāsa rāmasya tadā mahātmanō vichintayānō bharatō nivartanam ॥ 26 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē tryāśītitamassargaḥ ॥
