ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ത്ര്യാശീതിതമസ്സര്ഗഃ ।
തത സ്സമുത്ഥിതഃ കാല്യമാസ്ഥായ സ്യംദനോത്തമമ് ।
പ്രയയൌ ഭരതശ്ശീഘ്രം രാമദര്ശനകാംക്ഷയാ ॥ 1 ॥
അഗ്രതഃ പ്രയയുസ്തസ്യ സർവേ മംത്രിപുരോധസഃ ।
അധിരുഹ്യ ഹയൈര്യുക്താന്രഥാന്സൂര്യരഥോപമാന് ॥ 2 ॥
നവനാഗസഹസ്രാണി കല്പിതാനി യഥാവിധി ।
അന്വയുര്ഭരതം യാംതമിക്ഷ്വാകുകുലനംദനമ് ॥ 3 ॥
ഷഷ്ടീ രഥസഹസ്രാണി ധന്വിനോ വിവിധായുധാഃ ।
അന്വയുര്ഭരതം യാംതം രാജപുത്രം യശസ്വിനമ് ॥ 4 ॥
ശതം സഹസ്രാണ്യശ്വാനാം സമാരൂഢാനി രാഘവമ് ।
അന്വയുര്ഭരതം യാംതം സത്യസംധം ജിതേംദ്രിയമ് ॥ 5 ॥
കൈകേയീ ച സുമിത്രാ ച കൌസല്യാ ച യശസ്വിനീ ।
രാമാനയനസംഹൃഷ്ടാ യയുര്യാനേന ഭാസ്വതാ ॥ 6 ॥
പ്രയാതാശ്ചാര്യസംഘാതാ രാമം ദ്രഷ്ടും സലക്ഷ്മണമ് ।
തസ്യൈവ ച കഥാശ്ചിത്രാഃ കുർവാണാ ഹൃഷ്ടമാനസാഃ ॥ 7 ॥
മേഘശ്യാമം മഹാബാഹും സ്ഥിരസത്ത്വം ദൃഢവ്രതമ് ।
കദാ ദ്രക്ഷ്യാമഹേ രാമം ജഗത ശ്ശോകനാശനമ് ॥ 8 ॥
ദൃഷ്ട ഏവ ഹി ന ശ്ശോകമപനേഷ്യതി രാഘവഃ ।
തമ സ്സർവസ്യ ലോകസ്യ സമുദ്യന്നിവ ഭാസ്കരഃ ॥ 9 ॥
ഇത്യേവം കഥയംതസ്തേ സംപ്രഹൃഷ്ടാഃ കഥാ ശ്ശുഭാഃ ।
പരിഷ്വജാനാശ്ചാന്യോന്യം യയുര്നാഗരികാ ജനാഃ ॥ 10 ॥
യേ ച തത്രാപരേ സർവേ സമ്മതാ യേ ച നൈഗമാഃ ।
രാമം പ്രതി യയുര്ഹൃഷ്ടാ സ്സർവാഃ പ്രകൃതയസ്തഥാ ॥ 11 ॥
മണികാരാശ്ച യേ കേചിത്കുംഭകാരാശ്ച ശോഭനാഃ ।
സൂത്രകര്മകൃതശ്ചൈവ യേ ച ശസ്ത്രോപജീവിനഃ ॥ 12 ॥
മയൂരകാഃ ക്രാകചികാ രോചകാ വേധകാസ്തഥാ ।
ദംതകാരാ സ്സുധാകാരാ സ്തഥാ ഗംധോപജീവിനഃ ॥ 13 ॥
സുവര്ണകാരാഃ പ്രഖ്യാതാസ്തഥാ കംബലധാവകാഃ ।
സ്നാപകോഷ്ണോദകാ വൈദ്യാധൂപകാശ്ശൌംഡികാസ്തഥാ ॥ 14 ॥
രജകാസ്തുന്നവായാശ്ച ഗ്രാമഘോഷമഹത്തരാഃ ।
ശൈലൂഷാശ്ച സഹ സ്ത്രീഭിര്യയുഃ കൈവര്തകാസ്തഥാ ॥ 15 ॥
സമാഹിതാ വേദവിദോ ബ്രാഹ്മണാ വൃത്തസമ്മതാഃ ।
ഗോരഥൈര്ഭരതം യാംതമനുജഗ്മു സ്സഹസ്രശഃ ॥ 16 ॥
സുവേഷാ ശ്ശുദ്ധവസനാസ്താമ്രമൃഷ്ടാനുലേപനാഃ ।
സർവേ തേ വിവിധൈര്യാനൈ ശ്ശനൈര്ഭരതമന്വയുഃ ॥ 17 ॥
പ്രഹൃഷ്ടമുദിതാ സേനാ സാഽന്വയാത്കൈകയീസുതമ് ।
ഭ്രാതുരാനയനേ യാംതം ഭരതം ഭ്രാതൃവത്സലമ് ॥ 18 ॥
തേ ഗത്വാ ദൂരമധ്വാനം രഥയാനാശ്വകുംജരൈഃ ।
സമാസേദുസ്തതോ ഗംഗാം ശൃംഗീബേരപുരം പ്രതി ॥ 19 ॥
യത്ര രാമസഖോ വീരോ ഗുഹോ ജ്ഞാതിഗണൈർവൃതഃ ।
നിവസത്യപ്രമാദേന ദേശം തം പരിപാലയന് ॥ 20 ॥
ഉപേത്യ തീരം ഗംഗായാശ്ചക്രവാകൈരലംകൃതമ് ।
വ്യവാതിഷ്ഠത സാ സേനാ ഭരതസ്യാനുയായിനീ ॥ 21 ॥
നിരീക്ഷ്യാനുഗതാം സേനാം താം ച ഗംഗാം ശിവോദകാമ് ।
ഭരതസ്സചിവാന്സർവാനബ്രവീദ്വാക്യകോവിദഃ ॥ 22 ॥
നിവേശയത മേ സൈന്യമഭിപ്രായേണ സർവതഃ ।
വിശ്രാംതാഃ പ്രതരിഷ്യാമശ്ശ്വ ഇദാനീമിമാം നദീമ് ॥ 23 ॥
ദാതും ച താവദിച്ഛാമി സ്വര്ഗതസ്യ മഹീപതേഃ ।
ഔര്ധ്വദേഹനിമിത്താര്ഥമവതീര്യോദകം നദീമ് ॥ 24 ॥
തസ്യൈവം ബ്രുവതോഽമാത്യാസ്തഥേത്യുക്ത്വാ സമാഹിതാഃ ।
ന്യവേശയംസ്താം ഛംദേന സ്വേന സ്വേന പൃഥക്പൃഥക് ॥ 25 ॥
നിവേശ്യ ഗംഗാമനു താം മഹാനദീം ചമൂം വിധാനൈഃ പരിബര്ഹശോഭിനീമ് ।
ഉവാസ രാമസ്യ തദാ മഹാത്മനോ വിചിംതയാനോ ഭരതോ നിവര്തനമ് ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ത്ര്യാശീതിതമസ്സര്ഗഃ ॥
