ශ්රීමද්වාල්මීකීය රාමායණේ අයෝධ්යාකාංඩම් ।
අථ ත්ර්යාශීතිතමස්සර්ගඃ ।
තත ස්සමුත්ථිතඃ කාල්යමාස්ථාය ස්යංදනෝත්තමම් ।
ප්රයයෞ භරතශ්ශීඝ්රං රාමදර්ශනකාංක්ෂයා ॥ 1 ॥
අග්රතඃ ප්රයයුස්තස්ය සර්වේ මංත්රිපුරෝධසඃ ।
අධිරුහ්ය හයෛර්යුක්තාන්රථාන්සූර්යරථෝපමාන් ॥ 2 ॥
නවනාගසහස්රාණි කල්පිතානි යථාවිධි ।
අන්වයුර්භරතං යාංතමික්ෂ්වාකුකුලනංදනම් ॥ 3 ॥
ෂෂ්ටී රථසහස්රාණි ධන්විනෝ විවිධායුධාඃ ।
අන්වයුර්භරතං යාංතං රාජපුත්රං යශස්විනම් ॥ 4 ॥
ශතං සහස්රාණ්යශ්වානාං සමාරූඪානි රාඝවම් ।
අන්වයුර්භරතං යාංතං සත්යසංධං ජිතේංද්රියම් ॥ 5 ॥
කෛකේයී ච සුමිත්රා ච කෞසල්යා ච යශස්විනී ।
රාමානයනසංහෘෂ්ටා යයුර්යානේන භාස්වතා ॥ 6 ॥
ප්රයාතාශ්චාර්යසංඝාතා රාමං ද්රෂ්ටුං සලක්ෂ්මණම් ।
තස්යෛව ච කථාශ්චිත්රාඃ කුර්වාණා හෘෂ්ටමානසාඃ ॥ 7 ॥
මේඝශ්යාමං මහාබාහුං ස්ථිරසත්ත්වං දෘඪව්රතම් ।
කදා ද්රක්ෂ්යාමහේ රාමං ජගත ශ්ශෝකනාශනම් ॥ 8 ॥
දෘෂ්ට ඒව හි න ශ්ශෝකමපනේෂ්යති රාඝවඃ ।
තම ස්සර්වස්ය ලෝකස්ය සමුද්යන්නිව භාස්කරඃ ॥ 9 ॥
ඉත්යේවං කථයංතස්තේ සංප්රහෘෂ්ටාඃ කථා ශ්ශුභාඃ ।
පරිෂ්වජානාශ්චාන්යෝන්යං යයුර්නාගරිකා ජනාඃ ॥ 10 ॥
යේ ච තත්රාපරේ සර්වේ සම්මතා යේ ච නෛගමාඃ ।
රාමං ප්රති යයුර්හෘෂ්ටා ස්සර්වාඃ ප්රකෘතයස්තථා ॥ 11 ॥
මණිකාරාශ්ච යේ කේචිත්කුංභකාරාශ්ච ශෝභනාඃ ।
සූත්රකර්මකෘතශ්චෛව යේ ච ශස්ත්රෝපජීවිනඃ ॥ 12 ॥
මයූරකාඃ ක්රාකචිකා රෝචකා වේධකාස්තථා ।
දංතකාරා ස්සුධාකාරා ස්තථා ගංධෝපජීවිනඃ ॥ 13 ॥
සුවර්ණකාරාඃ ප්රඛ්යාතාස්තථා කංබලධාවකාඃ ।
ස්නාපකෝෂ්ණෝදකා වෛද්යාධූපකාශ්ශෞංඩිකාස්තථා ॥ 14 ॥
රජකාස්තුන්නවායාශ්ච ග්රාමඝෝෂමහත්තරාඃ ।
ශෛලූෂාශ්ච සහ ස්ත්රීභිර්යයුඃ කෛවර්තකාස්තථා ॥ 15 ॥
සමාහිතා වේදවිදෝ බ්රාහ්මණා වෘත්තසම්මතාඃ ।
ගෝරථෛර්භරතං යාංතමනුජග්මු ස්සහස්රශඃ ॥ 16 ॥
සුවේෂා ශ්ශුද්ධවසනාස්තාම්රමෘෂ්ටානුලේපනාඃ ।
සර්වේ තේ විවිධෛර්යානෛ ශ්ශනෛර්භරතමන්වයුඃ ॥ 17 ॥
ප්රහෘෂ්ටමුදිතා සේනා සාऽන්වයාත්කෛකයීසුතම් ।
භ්රාතුරානයනේ යාංතං භරතං භ්රාතෘවත්සලම් ॥ 18 ॥
තේ ගත්වා දූරමධ්වානං රථයානාශ්වකුංජරෛඃ ।
සමාසේදුස්තතෝ ගංගාං ශෘංගීබේරපුරං ප්රති ॥ 19 ॥
යත්ර රාමසඛෝ වීරෝ ගුහෝ ජ්ඤාතිගණෛර්වෘතඃ ।
නිවසත්යප්රමාදේන දේශං තං පරිපාලයන් ॥ 20 ॥
උපේත්ය තීරං ගංගායාශ්චක්රවාකෛරලංකෘතම් ।
ව්යවාතිෂ්ඨත සා සේනා භරතස්යානුයායිනී ॥ 21 ॥
නිරීක්ෂ්යානුගතාං සේනාං තාං ච ගංගාං ශිවෝදකාම් ।
භරතස්සචිවාන්සර්වානබ්රවීද්වාක්යකෝවිදඃ ॥ 22 ॥
නිවේශයත මේ සෛන්යමභිප්රායේණ සර්වතඃ ।
විශ්රාංතාඃ ප්රතරිෂ්යාමශ්ශ්ව ඉදානීමිමාං නදීම් ॥ 23 ॥
දාතුං ච තාවදිච්ඡාමි ස්වර්ගතස්ය මහීපතේඃ ।
ඖර්ධ්වදේහනිමිත්තාර්ථමවතීර්යෝදකං නදීම් ॥ 24 ॥
තස්යෛවං බ්රුවතෝऽමාත්යාස්තථේත්යුක්ත්වා සමාහිතාඃ ।
න්යවේශයංස්තාං ඡංදේන ස්වේන ස්වේන පෘථක්පෘථක් ॥ 25 ॥
නිවේශ්ය ගංගාමනු තාං මහානදීං චමූං විධානෛඃ පරිබර්හශෝභිනීම් ।
උවාස රාමස්ය තදා මහාත්මනෝ විචිංතයානෝ භරතෝ නිවර්තනම් ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ත්ර්යාශීතිතමස්සර්ගඃ ॥
