ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഷട്ചത്വാരിംശസ്സര്ഗഃ ।
തയാ പരുഷമുക്തസ്തു കുപിതോ രാഘവാനുജഃ ।
സ വികാംക്ഷന്ഭൃശം രാമം പ്രതസ്ഥേ നചിരാദിവ ॥ 1 ॥
തദാസാദ്യ ദശഗ്രീവഃ ക്ഷിപ്രമംതരമാസ്ഥിതഃ ।
അഭിചക്രാമ വൈദേഹീം പരിവ്രാജകരൂപധൃക് ॥ 2 ॥
ശ്ലക്ഷ്ണകാഷായസംവീതശ്ശിഖീ ഛത്രീ ഉപാനഹീ ।
വാമേ ചാംസേഽവസജ്യാഥ ശുഭേ യഷ്ടികമംഡലൂ ॥ 3 ॥
പരിവ്രാജകരൂപേണ വൈദേഹീമന്വപദ്യത ।
താമാസസാദാതിബലോ ഭ്രാതൃഭ്യാം രഹിതാം വനേ ॥ 4 ॥
രഹിതാം ചംദ്രസൂര്യാഭ്യാം സംധ്യാമിവ മഹത്തമഃ ।
താമപശ്യത്തതോ ബാലാം രാമപത്നീം യശസ്വിനീമ് ॥ 5 ॥
രോഹിണീം ശശിനാ ഹീനാം ഗ്രഹവദ്ഭൃശദാരുണഃ ।
തമുഗ്രതേജഃകര്മാണം ജനസ്ഥാനരൂഹാ ദ്രുമാഃ ॥ 6 ॥
സമീക്ഷ്യ സംപ്രകംപംതേ ന പ്രവാതി ച മാരുതഃ ।
ശീഘ്രസ്രോതാശ്ച തം ദൃഷ്ട്വാ വീക്ഷംതം രക്തലോചനമ് ॥ 7 ॥
സ്തിമിതം ഗംതുമാരേഭേ ഭയാദ്ഗോദാവരീ നദീ ।
രാമസ്യ ത്വംതരപ്രേപ്സുര്ദശഗ്രീവസ്തദംതരേ ॥ 8 ॥
ഉപതസ്ഥേ ച വൈ ദേഹീം ഭിക്ഷുരൂപേണ രാവണഃ ।
അഭവ്യോ ഭവ്യരൂപേണ ഭര്താരമനുശോചതീമ് ॥ 9 ॥
അഭ്യവര്തത വൈദേഹീം ചിത്രാമിവ ശനൈശ്ചരഃ ।
സ പാപോ ഭവ്യരൂപേണ തൃണൈഃ കൂപ ഇവാവൃതഃ ॥ 10 ॥
അതിഷ്ഠത്പ്രേക്ഷ്യ വൈദേഹീം രാമപത്നിം യശസ്വിനീമ് ।
ശുഭാം രുചിരദംതോഷ്ഠീം പൂര്ണചംദ്രനിഭാനനാമ് ॥ 11 ॥
ആസീനാം പര്ണശാലായാം ബാഷ്പശോകാഭിപീഡിതാമ് ।
സ താം പദ്മപലാശാക്ഷീം പീതകൌശേയവാസിനീമ് ॥ 12 ॥
അഭ്യഗച്ഛത വൈദേഹീം ദുഷ്ടചേതാ നിശാചരഃ ।
സ മന്മഥശരാവിഷ്ടോ ബ്രഹ്മഘോഷമുദീരയന് ॥ 13 ॥
അബ്രവീത്പ്രശ്രിതം വാക്യം രഹിതേ രാക്ഷസാധിപഃ ।
താമുത്തമാം സ്ത്രിയം ലോകേ പദ്മഹീനാമിവ ശ്രിയമ് ॥ 14 ॥
വിഭ്രാജമാനാം വപുഷാ രാവണഃ പ്രശശംസ ഹ ।
കാ ത്വം കാംചനവര്ണാഭേ പീതകൌശേയവാസിനി ॥ 15 ॥
കമലാനാം ശുഭാം മാലാം പദ്മിനീവ ഹി ബിഭ്രതീ ।
ഹ്രീഃ കീര്തിഃ ശ്രീശ്ശുഭാ ലക്ഷ്മീരപ്സരാ വാ ശുഭാനനേ ॥ 16 ॥
ഭൂതിർവാ ത്വം വരാരോഹേ രതിർവാ സ്വൈരചാരിണീ ।
സമാശ്ശിഖരിണസ്സ്നിഗ്ധാഃ പാംഡുരാ ദശനാസ്തവ ॥ 17 ॥
വിശാലേ വിമലേ നേത്രേ രക്താംതേ കൃഷ്ണതാരകേ ।
വിശാലം ജഘനം പീനമൂരൂ കരികരോപമൌ ॥ 18 ॥
ഏതാവുപചിതൌ വൃത്തൌ സംഹതൌ സംപ്രവല്ഗിതൌ ।
പീനോന്നതമുഖൌ കാംതൌ സ്നിഗ്ധൌ താലഫലോപമൌ ॥ 19 ॥
മണിപ്രവേകാഭരണൌ രുചിരൌ തേ പയോധരൌ ।
ചാരുസ്മിതേ ചാരുദതി ചാരുനേത്രേ വിലാസിനി ॥ 20 ॥
മനോ ഹരസി മേ കാംതേ നദീ കൂലമിവാംഭസാ ।
കരാംതമിതമധ്യാസി സുകേശീ സംഹതസ്തനീ ॥ 21 ॥
നൈവ ദേവീ ന ഗംധർവീ ന യക്ഷീ ന ച കിന്നരീ ।
നൈവംരൂപാ മയാ നാരീ ദൃഷ്ടപൂർവാ മഹീതലേ ॥ 22 ॥
രൂപമഗ്ര്യം ച ലോകേഷു സൌകുമാര്യം വയശ്ചതേ ।
ഇഹ വാസശ്ച കാംതാരേ ചിത്തമുന്മാദയംതി മേ ॥ 23 ॥
സാ പ്രതിക്രാമ ഭദ്രം തേ നൈവം വസ്തുമിഹാര്ഹസി ।
രാക്ഷസാനാമയം വാസോ ഘോരാണാം കാമരൂപിണാമ് ॥ 24 ॥
പ്രാസാദാഗ്രാണി രമ്യാണി നഗരോപവനാനി ച ।
സംപന്നാനി സുഗംധീനി യുക്താന്യാചരിതും ത്വയാ ॥ 25 ॥
വരം മാല്യം വരം ഭോജ്യം വരം വസ്ത്രം ച ശോഭനേ ।
ഭര്താരം ച വരം മന്യേ ത്വദ്യുക്തമസിതേക്ഷണേ ॥ 26 ॥
കാ ത്വം ഭവസി രുദ്രാണാം മരുതാം വാ വരാനനേ ।
വസൂനാം വാ വരാവോഹേ ദേവതാ പ്രതിഭാസി മേ ॥ 27 ॥
നേഹ ഗച്ഛംതി ഗംധർവാ ന ദേവാ ന ച കിന്നരാഃ ।
രാക്ഷസാനാമയം വാസഃ കഥം നു ത്വമിഹാഗതാ ॥ 28 ॥
ഇഹ ശാഖാമൃഗാസ്സിംഹാ ദ്വീപിവ്യാഘ്രമൃഗാസ്തഥാ ।
ഋക്ഷാസ്തരക്ഷവഃ കംകാഃ കഥം തേഭ്യോ ന ബിഭ്യസി ॥ 29 ॥
മദാന്വിതാനാം ഘോരാണാം കുംജരാണാം തരസ്വിനാമ് ।
കഥമേകാ മഹാരണ്യേ ന ബിഭേഷി വരാനനേ ॥ 30 ॥
കാസി കസ്യ കുതശ്ചിത്ത്വം കിം നിമിത്തം ച ദംഡകാന് ।
ഏകാ ചരസി കല്യാണി ഘോരാന്രാക്ഷസസേവിതാന് ॥ 31 ॥
ഇതി പ്രശസ്താ വൈദേഹീ രാവണേന ദുരാത്മനാ ।
ദ്വിജാതിവേശേണ ഹി തം ദൃഷ്ട്വാ രാവണമാഗതമ് ॥ 32 ॥
സർവൈരതിഥിസത്കാരൈഃ പൂജയാമാസ മൈഥിലീ ।
ഉപനീയാസനം പൂർവം പാദ്യേനാഭിനിമംത്ര്യ ച ॥ 33 ॥
അബ്രവീത്സിദ്ധമിത്യേവ തദാ തം സൌമ്യദര്ശനമ് ।
ദ്വിജാതിവേഷേണ സമീക്ഷ്യ മൈഥിലീ സമാഗതം പാത്രകുസുംഭധാരിണമ് ।
അശക്യമുദ്വേഷ്ടുമപായദര്ശനം ന്യമംത്രയദ്ബ്രാഹ്മണവത്തദാംഗനാ ॥ 34 ॥
ഇയം ബൃസീ ബ്രാഹ്മണ കാമമാസ്യതാമിദം ച പാദ്യം പ്രതിഗൃഹ്യതാമിതി ।
ഇദം ച സിദ്ധം വനജാതമുത്തമം ത്വദര്ഥമവ്യഗ്രമിഹോപഭുജ്യതാമ് ॥ 35 ॥
നിമംത്ര്യമാണഃ പ്രതിപൂര്ണഭാഷിണീം നരേംദ്രപത്നീം പ്രസമീക്ഷ്യ മൈഥിലീമ് ।
പ്രസഹ്യ തസ്യാഹരണേ ധൃതം മനഃ സമര്പയത്സ്വാത്മവധായ രാവണഃ ॥ 36 ॥
തതഃ സുവേഷം മൃഗയാഗതം പതിം പ്രതീക്ഷമാണാ സഹലക്ഷ്മണം തദാ ।
വിവീക്ഷമാണാ ഹരിതം ദദര്ശ തന്മഹദ്വനം നൈവ തു രാമലക്ഷ്ണൌ ॥ 37 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഷട്ചത്വാരിംശസ്സര്ഗഃ ॥
