ශ්රීමද්වාල්මීකීය රාමායණේ අරණ්යකාංඩම් ।
අථ ෂෂ්ටිතමස්සර්ගඃ ।
භෘශමාව්රජමානස්ය තස්යාධෝ වාමලෝචනම් ।
ප්රාස්ඵුරච්චාස්ඛලද්රාමෝ වේපථුශ්චාප්ය ජායත ॥ 1 ॥
උපාලක්ෂ්ය නිමිත්තානි සෝऽශුභානි මුහුර්මුහුඃ ।
අපි ක්ෂේමං නු සීතායා ඉති වෛ ව්යාජහාර ච ॥ 2 ॥
ත්වරමාණෝ ජගාමාථ සීතාදර්ශනලාලසඃ ।
ශූන්යමාවසථං දෘෂ්ට්වා බභූවෝද්විග්නමානසඃ ॥ 3 ॥
උද්භ්රමන්නිව වේගේන වික්ෂිපන්රඝුනංදනඃ ।
තත්ර තත්රෝටජස්ථානමභිවීක්ෂය සමංතතඃ ॥ 4 ॥
දදර්ශ පර්ණශාලාං ච රහිතාං සීතයා තදා ।
ශ්රියා විරහිතාං ධ්වස්තාං හේමංතේ පද්මිනීමිව ॥ 5 ॥
රුදංතමිව වෘක්ෂෛශ්ච ම්ලානපුෂ්පමෘගද්විජම් ।
ශ්රියා විහීනං විධ්වස්තං සංත්යක්තවනදේවතම් ॥ 6 ॥
විප්රකීර්ණාජිනකුශං විප්රවිද්ධබ්රුසීකටම් ।
දෘෂ්ට්වා ශූන්යං නිජස්ථානං විලලාප පුනඃ පුනඃ ॥ 7 ॥
හෘතා මෘතා වා නෂ්ටා වා භක්ෂිතා වා භවිෂ්යති ।
නිලීනාප්යථවා භීරුරථවා වනමාශ්රිතා ॥ 8 ॥
ගතා විචේතුං පුෂ්පාණි ඵලාන්යපි ච වා පුනඃ ।
අථවා පද්මිනීං යාතා ජලාර්ථං වා නදීං ගතා ॥ 9 ॥
යත්නාන්මෘගයමාණස්තු නාසසාද වනේ ප්රියාම් ।
ශෝකරක්තේක්ෂණශ්ශෝකාදුන්මත්ත ඉව ලක්ෂ්යතේ ॥ 10 ॥
වෘක්ෂාද්වෘක්ෂං ප්රධාවන්සගිරේශ්චාද්රිං නදාන්නදීම් ।
බභූව විලපන්රාමශ්ශෝකාර්ණවපරිප්ලුතඃ ॥ 11 ॥
අපි කාචිත්ත්වයා දෘෂ්ටා සා කදංබප්රියා ප්රියා ।
කදංබ යදි ජානීෂේ ශංස සීතාං ශුභානනාම් ॥ 12 ॥
ස්නිග්ධපල්ලවසංකාශා පීතකෞශේයවාසිනී ।
ශංසස්ව යදි වා දෘෂ්ටා බිල්ව බිල්වෝපමස්තනී ॥ 13 ॥
අථවාऽර්ජුන ශංස ත්වං ප්රියාං තාමර්ජුනප්රියාම් ।
ජනකස්ය සුතා භීරුර්යදි ජීවති වා න වා ॥ 14 ॥
කකුභඃ කකුභෝරූං තාං ව්යක්තං ජානාති මෛථිලීම් ।
යථා පල්ලවපුෂ්පාඪ්යෝ භාති හ්යේෂ වනස්පතිඃ ॥ 15 ॥
භ්රමරෛරුපගීතශ්ච යථා ද්රුමවරෝ හ්යයම් ।
ඒෂ ව්යක්තං විජානාති තිලකස්තිලකප්රියාම් ॥ 16 ॥
අශෝක ශෝකාපනුද ශෝකෝපහතචේතසම් ।
ත්වන්නාමානං කුරු ක්ෂිප්රං ප්රියාසංදර්ශනේන මාම් ॥ 17 ॥
යදි තාල ත්වයා දෘෂ්ටා පක්වතාලඵලස්තනී ।
කථයස්ව වරාරෝහාං කාරුණ්යං යදි තේ මයි ॥ 18 ॥
යදි දෘෂ්ටා ත්වයා සීතා ජංබු ජංබූඵලෝපමා ।
ප්රියාං යදි විජානීෂේ නිඃශංකං කථයස්ව මේ ॥ 19 ॥
අහෝ ත්වං කර්ණිකාරාද්ය සුපුෂ්පෛශ්ශෝභසේ භෘශම් ।
කර්ණිකාරප්රියා සාධ්වී ශංස දෘෂ්ටා ප්රියා යදි ॥ 20 ॥
චූතනීපමහාසාලාන්පනසාන්කුරවාංධවාන් ।
දාඩිමානනසාන්ගත්වා දෘෂ්ට්වා රාමෝ මහායශාඃ ॥ 21 ॥
මල්ලිකා මාධවීශ්චෛව චංපකාන්කේතකීස්තථා ।
පෘච්ඡන්රාමෝ වනේ භාංතඃ උන්මත්ත ඉව ලක්ෂ්යතේ ॥ 22 ॥
අථවා මෘගශාබාක්ෂීං මෘග ජානාසි මෛථිලීම් ।
මෘගවිප්රේක්ෂණී කාංතා මෘගීභිස්සහිතා භවේත් ॥ 23 ॥
ගජ සා ගජනාසෝරූර්යදි දෘෂ්ටා ත්වයා භවේත් ।
තාං මන්යේ විදිතාං තුභ්යමාඛ්යාහි වරවාරණ ॥ 24 ॥
ශාර්දූල යදි සා දෘෂ්ටා ප්රියා චංද්රනිභානනා ।
මෛථිලී මම විස්රබ්ධං කථයස්ව න තේ භයම් ॥ 25 ॥
කිං ධාවසි ප්රියේ දූරේ දෘෂ්ටාසි කමලේක්ෂණේ ।
වෘක්ෂෛරාච්ඡාද්ය චාත්මානං කිං මාං න ප්රතිභාෂසේ ॥ 26 ॥
තිෂ්ඨ තිෂ්ඨ වරාරෝහේ න තේऽස්ති කරුණා මයි ।
නාත්යර්ථං හාස්යශීලාසි කිමර්ථං මාමුපේක්ෂසේ ॥ 27 ॥
පීතකෞශේයකේනාසි සූචිතා වරවර්ණිනි ।
ධාවංත්යපි මයා දෘෂ්ටා තිෂ්ඨ යද්යස්ති සෞහෘදම් ॥ 28 ॥
නෛව සා නූනමථවා හිංසිතා චාරුහාසිනී ।
කෘච්ඡ්රප්රාප්තං න මාං නූනං යථෝපේක්ෂිතුමර්හති ॥ 29 ॥
ව්යක්තං සා භක්ෂිතා බාලා රාක්ෂසෛඃ පිශිතාශනෛඃ ।
විභජ්යාංකානි සර්වාණි මයා විරහිතා ප්රියා ॥ 30 ॥
නූනං තච්ඡුභදංතෝෂ්ඨං සුනාසං චාරුකුංඩලම් ।
පූර්ණචංද්රනිභං ග්රස්තං මුඛංනිෂ්ප්රභතාං ගතම් ॥ 31 ॥
සා හි චංපකවර්ණාභා ග්රීවා ග්රෛවේයශෝභිතා ।
කෝමලා විලපංත්යාස්තු කාංතායා භක්ෂිතා ශුභා ॥ 32 ॥
නූනං වික්ෂිප්යමාණෞ තෞ බාහූ පල්ලවකෝමලෞ ।
භක්ෂිතෞ වේපමානාග්රෞ සහස්තාභරණාංගදෞ ॥ 33 ॥
මයා විරහිතා බාලා රක්ෂසාං භක්ෂණාය වෛ ।
සාර්ධේනේව පරිත්යක්තා භක්ෂිතා බහුබාංධවා ॥ 34 ॥
හා ලක්ෂ්මණ මහාබාහෝ පශ්යසි ත්වං ප්රියාං ක්වචිත් ।
හා ප්රියේ ක්ව ගතා භද්රේ හා සීතේති පුනඃ පුනඃ ॥ 35 ॥
ඉත්යේවං විලපන්රාමඃ පරිධාවන්වනාද්වනම් ।
ක්වචිදුද්භ්රමතේ වේගාත්ක්වචිද්විභ්රමතේ බලාත් ॥ 36 ॥
ක්වචින්මත්ත ඉවාභාති කාංතාන්වේෂණතත්පරඃ ।
ස වනානි නදීශ්ශෛලාන් ගිරිප්රස්රවණානි ච ॥ 37 ॥
කානනානි ච වේගේන භ්රමත්යපරිසංස්ථිතඃ ।
තථා ස ගත්වා විපුලං මහද්වනං පරීත්ය සර්වං ත්වථ මෛථිලීං ප්රති ।
අනිෂ්ඨිතාශස්සචකාර මාර්ගණේ පුනඃ ප්රියායාඃ පරමං පරිශ්රමම් ॥ 38 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ෂෂ්ටිතමස්සර්ගඃ ॥
