ශ්රීමද්වාල්මීකීය රාමායණේ අරණ්යකාංඩම් ।
අථ අෂ්ටෂෂ්ටිතමස්සර්ගඃ ।
රාමස්සංප්රේක්ෂ්ය තං ගෘධ්රං භුවි රෞද්රේණ පාතිතම් ।
සෞමිත්රිං මිත්රසංපන්නමිදං වචනමබ්රවීත් ॥ 1 ॥
මමායං නූනමර්ථේෂු යතමානෝ විහංගමඃ ।
රාක්ෂසේන හතස්සංඛ්යේ ප්රාණාංස්ත්යක්ෂ්යති දුස්ත්යජාන් ॥ 2 ॥
අයමස්ය ශරීරේऽස්මින්ප්රාණෝ ලක්ෂ්මණ විද්යතේ ।
තථා හි ස්වරහීනෝऽයං වික්ලබස්සමුදීක්ෂ්යතේ ॥ 3 ॥
ජටායෝ යදි ශක්නෝෂි වාක්යං ව්යාහරිතුං පුනඃ ।
සීතාමාඛ්යාහි භද්රං තේ වධමාඛ්යාහි චාත්මනඃ ॥ 4 ॥
කිං නිමිත්තෝऽහරත්සීතාං රාවණස්තස්ය කිං මයා ।
අපරාද්ධං තු යං දෘෂ්ට්වා රාවණේන හෘතා ප්රියා ॥ 5 ॥
කථං තච්චංද්රසංකාශං මුඛමාසීන්මනෝහරම් ।
සීතයා කානි චෝක්තානි තස්මින්කාලේ ද්විජෝත්තම ॥ 6 ॥
කථං වීර්යඃ කථං රූපඃ කිං කර්මා ස ච රාක්ෂසඃ ।
ක්ව චාස්ය භවනං තාත බ්රූහි මේ පරිපෘච්ඡතඃ ॥ 7 ॥
තමුද්වීක්ෂ්යාථ දීනාත්මා විලපංතමනංතරම් ।
වාචාතිසන්නයා රාමං ජටායුරිදමබ්රවීත් ॥ 8 ॥
හෘතා සා රාක්ෂසේංද්රේණ රාවණේන විහායසා ।
මායාමාස්ථාය විපුලාං වාතදුර්දිනසංකුලාම් ॥ 9 ॥
පරිශ්රාංතස්ය මේ තාත පක්ෂෞ ඡිත්වා ස රාක්ෂසඃ ।
සීතාමාදාය වෛදේහීං ප්රයාතෝ දක්ෂිණාං දිශම් ॥ 10 ॥
උපරුධ්යංති මේ ප්රාණා දෘෂ්ටිර්භ්රමති රාඝව ।
පශ්යාමි වෘක්ෂාන්සෞවර්ණානුශීරකෘතමූර්ධජාන් ॥ 11 ॥
යේන යාති මුහූර්තේන සීතාමාදාය රාවණඃ ।
විප්රණෂ්ටං ධනං ක්ෂිප්රං තත්ස්වාමී ප්රතිපද්යතේ ॥ 12 ॥
විංදෝ නාම මුහූර්තෝऽයං ස ච කාකුත්ස්ථ නාබුධත් ।
ත්වත්ප්රියාං ජානකීං හෘත්වා රාවණෝ රාක්ෂසේශ්වරඃ ॥ 13 ॥
ඣෂවද්බඩිශං ගෘහ්ය ක්ෂිප්රමේව විනශ්යති ।
න ච ත්වයා ව්යථා කාර්යා ජනකස්ය සුතාං ප්රති ॥ 14 ॥
වෛදේහ්යා රංස්යසේ ක්ෂිප්රං හත්වා තං රාක්ෂසං රණේ ।
අසම්මූඪස්ය ගෘධ්රස්ය රාමං ප්රත්යනුභාෂතඃ ॥ 15 ॥
ආස්යාත්සුස්රාව රුධිරං ම්රියමාණස්ය සාමිෂම් ।
පුත්රෝ විශ්රවසස්සාක්ෂාද්භ්රාතා වෛශ්රවණස්ය ච ॥ 16 ॥
ඉත්යුක්ත්වා දුර්ලභාන්ප්රාණාන්මුමෝච පතගේශ්වරඃ ।
බ්රූහි බ්රූහීති රාමස්ය බ්රුවාණස්ය කෘතාංජලේඃ ॥ 17 ॥
ත්වක්ත්වා ශරීරං ගෘධ්රස්ය ජග්මුඃ ප්රාණා විහායසම් ।
ස නික්ෂිප්ය ශිරෝ භූමෞ ප්රසාර්ය චරණෞ තදා ॥ 18 ॥
වික්ෂිප්ය ච ශරීරං ස්වං පපාත ධරණීතලේ ।
තං ගෘධ්රං ප්රේක්ෂ්ය තාම්රාක්ෂං ගතාසුමචලෝපමම් ॥ 19 ॥
රාමස්සුබහුභිර්දුඃඛෛර්දීනස්සෞමිත්රිමබ්රවීත් ।
බහූනි රක්ෂසාං වාසේ වර්ෂාණි වසතා සුඛම් ॥ 20 ॥
අනේන දංඩකාරණ්යේ විශීර්ණමිහ පක්ෂිණා ।
අනේකවාර්ෂිකෝ යස්තු චිරකාලසමුත්ථිතඃ ॥ 21 ॥
සෝऽයමද්ය හතශ්ශේතේ කාලෝ හි දුරතික්රමඃ ।
පශ්ය ලක්ෂ්මණ ගෘධ්රෝऽයමුපකාරී හතශ්ච මේ ॥ 22 ॥
සීතාමභ්යවපන්නෝ වෛ රාවණේන බලීයසා ।
ගෘධ්රරාජ්යං පරිත්යජ්ය පිතෘපෛතාමහං මහත් ॥ 23 ॥
මම හේතෝරයං ප්රාණාන්මුමෝච පතගේශ්වරඃ ।
සර්වත්ර ඛලු දෘශ්යංතේ සාධවෝ ධර්මචාරිණඃ ॥ 24 ॥
ශූරාශ්ශරණ්යාස්සෞමිත්රේ තිර්යග්යෝනිගතේෂ්වපි ।
සීතාහරණජං දුඃඛං න මේ සෞම්ය තථාවිධම් ॥ 25 ॥
යථා විනාශේ ගෘධ්රස්ය මත්කෘතේ ච පරංතප ।
රාජා දශරථශ්ශ්රීමාන්යථා මම මහායශාඃ ॥ 26 ॥
පූජනීයශ්ච මාන්යශ්ච තථාऽයං පතගේශ්වරඃ ।
සෞමිත්රේ හර කාෂ්ඨානි නිර්මථිෂ්යාමි පාවකම් ॥ 27 ॥
ගෘධ්රරාජං දිධක්ෂාමි මත්කෘතේ නිධනං ගතම් ।
නාථං පතගලෝකස්ය චිතාමාරෝප්ය රාඝව ॥ 28 ॥
ඉමං ධක්ෂ්යාමි සෞමිත්රේ හතං රෞද්රේණ රක්ෂසා ।
යා ගතිර්යජ්ඤශීලානාමාහිතාග්නේශ්ච යා ගතිඃ ॥ 29 ॥
අපරාවර්තිනාං යා ච යා ච භූමිප්රදායිනාම් ।
මයා ත්වං සමනුජ්ඤාතෝ ගච්ඡ ලෝකානනුත්තමාන් ॥ 30 ॥
ගෘධ්රරාජ මහාසත්ත්ව සංස්කෘතශ්ච මයා ව්රජ ।
ඒවමුක්ත්වා චිතාං දීප්තාමාරෝප්ය පතගේශ්වරම් ॥ 31 ॥
දදාහ රාමෝ ධර්මාත්මා ස්වබංධුමිව දුඃඛිතඃ ।
රාමෝऽථ සහසෞමිත්රිර්වනං ගත්වා ස වීර්යවාන් ॥ 32 ॥
ස්ථූලාන්හත්වා මහාරෝහීනනුතස්තාර තං ද්විජම් ।
රෝහිමාංසානි චෝත්කෘත්ය පේශීකෘත්ය මහායශාඃ ॥ 33 ॥
ශකුනාය දදෞ රාමෝ රම්යේ හරිතශාද්වලේ ।
යත්තත්ප්රේතස්ය මර්ත්යස්ය කථයංති ද්විජාතයඃ ॥ 34 ॥
තත්ස්වර්ගගමනං තස්ය පිත්ර්යං රාමෝ ජජාප හ ।
තතෝ ගෝදාවරීං ගත්වා නදීං නරවරාත්මජෞ ॥ 35 ॥
උදකං චක්රතුස්තස්මෛ ගෘධ්රරාජාය තාවුභෞ ।
ශාස්ත්රදෘෂ්ටේන විධිනා ජලේ ගෘධ්රාය රාඝවෞ ॥ 36 ॥
ස්නාත්වා තෞ ගෘධ්රරාජාය උදකං චක්රතුස්තදා ।
ස ගෘධ්රරාජඃ කෘතවාන්යශස්කරං සුදුෂ්කරං කර්ම රණේ නිපාතිතඃ ।
මහර්ෂිකල්පේන ච සංස්කෘතස්තදා ජගාම පුණ්යාං ගතිමාත්මනශ්ශුභාම් ॥ 37 ॥
කෘතෝදකෞ තාවපි පක්ෂිසත්තමේ ස්ථිරාං ච බුද්ධිං ප්රණිධාය ජග්මතුඃ ।
ප්රවේශ්ය සීතාධිගමේ තතෝ මනෝ වනං සුරේංද්රවිව විෂ්ණුවාසවෞ ॥ 38 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ අෂ්ටෂෂ්ටිතමස්සර්ගඃ ॥
