ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ෂඩ්විංශස්සර්ගඃ ।
තතශ්ශෝකාභිසංතප්තං සුග්රීවං ක්ලින්නවාසසම් ।
ශාඛාමෘගමහාමාත්රාඃ පරිවාර්යෝපතස්ථිරේ ॥ 1 ॥
අභිගම්ය මහාබාහුං රාමමක්ලිෂ්ටකාරිණම් ।
ස්ථිතාඃ ප්රාංජලයස්සර්වේ පිතාමහමිවර්ෂයඃ ॥ 2 ॥
තතඃ කාංචනශෛලාභ ස්තරුණාර්කනිභානනඃ ।
අබ්රවීත්ප්රාංජලිර්වාක්යං හනූමාන්මාරුතාත්මජඃ ॥ 3 ॥
භවත්ප්රසාදාත්සුග්රීවඃ පිතෘපෛතාමහං මහත් ।
වානරාණාං සුදුෂ්ප්රාපං ප්රාප්තෝ රාජ්යමිදං ප්රභෝ ॥ 4 ॥
භවතා සමනුජ්ඤාතඃ ප්රවිශ්ය නගරං ශුභම් ॥ 5 ॥
සංවිධාස්යති කාර්යාණි සර්වාණි සසුහෘජ්ජනඃ ।
ස්නාතෝऽයං විවිධෛර්ගංධෛරෞෂධෛශ්ච යථාවිධි ॥ 6 ॥
අර්චයිෂ්යති රත්නෛශ්ච මාල්යෛශ්ච ත්වාං විශේෂතඃ ।
ඉමාං ගිරිගුහාං රම්යාමභිගංතුමිතෝऽර්හසි ॥ 7 ॥
කුරුෂ්ව ස්වාමිසංබංධං වානරාන්සංප්රහර්ෂය ।
ඒවමුක්තෝ හනුමතා රාඝවඃ පරවීරහා ॥ 8 ॥
ප්රත්යුවාච හනූමංතං බුද්ධිමාන්වාක්යකෝවිදඃ ।
චතුර්දශ සමාස්සෞම්ය ග්රාමං වා යදි වා පුරම් ॥ 9 ॥
න ප්රවේක්ෂ්යාමි හනුමන්පිතුර්නිර්දේශපාලකඃ ।
සුසමෘද්ධාං ගුහාං රම්යාං සුග්රීවෝ වානරර්ෂභඃ ॥ 10 ॥
ප්රවිෂ්ටෝ විධිවද්වීරඃ ක්ෂිප්රං රාජ්යේऽභිෂිච්යතාම් ।
ඒවමුක්ත්වා හනූමංතං රාමස්සුග්රීවමබ්රවීත් ॥ 11 ॥
වෘත්තජ්ඤෝ වෘත්තසංපන්නමුදාරබලවික්රමම් ।
ඉමමප්යංගදං වීර යෞවරාජ්යේऽභිෂේචය ॥ 12 ॥
ජ්යේෂ්ඨස්ය ස සුතෝ ජ්යේෂ්ඨස්සදෘශෝ වික්රමේණ තේ ।
අංගදෝऽයමදීනාත්මා යෞවරාජ්යස්ය භාජනම් ॥ 13 ॥
පූර්වෝऽයං වාර්ෂිකෝ මාසඃ ශ්රාවණස්සලිලාගමඃ ।
ප්රවෘත්තාස්සෞම්ය චත්වාරෝ මාසා වාර්ෂිකසජ්ඤිකාඃ ॥ 14 ॥
නායමුද්යෝගසමයඃ ප්රවිශ ත්වං පුරීං ශුභාම් ।
අස්මින්වත්ස්යාම්යහං සෞම්ය පර්වතේ සහ ලක්ෂ්මණඃ ॥ 15 ॥
ඉයං ගිරිගුහා රම්යා විශාලා යුක්තමාරුතා ।
ප්රභූතසලිලා සෞම්ය ප්රභූතකමලෝත්පලා ॥ 16 ॥
කාර්තිකේ සමනුප්රාප්තේ ත්වං රාවණවධේ යත ।
ඒෂ නස්සමයස්සෞම්ය ප්රවිශ ත්වං ස්වමාලයම් ॥ 17 ॥
අභිෂික්තස්ව රාජ්යේ ච සුහෘදස්සංප්රහර්ෂය ।
ඉති රාමාභ්යනුජ්ඤාතස්සුග්රීවෝ වානරාධිපඃ ॥ 18 ॥
ප්රවිවේශ පුරීං රම්යාං කිෂ්කිංධාං වාලිපාලිතාම් ।
තං වානරසහස්රාණි ප්රවිෂ්ටං වානරේශ්වරම් ॥ 19 ॥
අභිවාද්ය ප්රවිෂ්ටානි සර්වතඃ පර්යවාරයන් ।
තතඃ ප්රකෘතයස්සර්වා දෘෂ්ට්වා හරිගණේශ්වරම් ॥ 20 ॥
ප්රණම්ය මූර්ධ්නා පතිතා වසුධායාං සමාහිතාඃ ।
සුග්රීවඃ ප්රකෘතීස්සර්වාස්සංභාෂ්යෝත්ථාප්ය වීර්යවාන් ॥ 21 ॥
භ්රාතුරංතඃපුරං සෞම්යං ප්රවිවේශ මහාබලඃ ।
ප්රවිශ්ය ත්වභිනිෂ්ක්රාංතං සුග්රීවං ප්ලවගේශ්වරම් ॥ 22 ॥
අභ්යෂිංචංත සුහෘදස්සහස්රාක්ෂමිවාමරාඃ ।
තස්ය පාංඩුරමාජහ්රුශ්ඡත්රං හේමපරිෂ්කෘතම් ॥ 23 ॥
ශුක්ලේ ච වාලව්යජනේ හේමදංඩේ යශස්කරේ ।
තථා සර්වාණි රත්නානි සර්වබීජෞෂධීරපි ॥ 24 ॥
සක්ෂීරාණාං ච වෘක්ෂාණාං ප්රරෝහාන්කුසුමානි ච ।
ශුක්ලානි චෛව වස්ත්රාණි ශ්වේතං චෛවානුලේපනම් ॥ 25 ॥
සුගංධීනි ච මාල්යානි ස්ථලජාන්යංබුජානි ච ।
චංදනානි ච දිව්යානි ගංධාංශ්ච විවිධාන්බහූන් ॥ 26 ॥
අක්ෂතං ජාතරූපං ච ප්රියංගුමධුසර්පිෂී ।
දධි චර්ම ච වෛයාඝ්රං වාරාහී චාප්යුපානහෞ ॥ 27 ॥
සමාලංභනමාදාය රෝචනාං සමනශ්ශිලාම් ।
ආග්මුස්තත්ර මුදිතා වරාඃ කන්යාස්තු ෂෝඩශ ॥ 28 ॥
තතස්තේ වානරශ්රේෂ්ඨං යථාකාලං යථාවිධි ।
රත්නෛර්වස්ත්රෛශ්ච භක්ෂ්යෛශ්ච තෝෂයිත්වා ද්විජර්ෂභාන් ॥ 29 ॥
තතඃ කුශපරිස්තීර්ණං සමිද්ධං ජාතවේදසම් ।
මංත්රපූතේන හවිෂා හුත්වා මංත්රවිදෝ ජනාඃ ॥ 30 ॥
තතෝ හේමප්රතිෂ්ඨානේ වරාස්තරණසංවෘතේ ।
ප්රාසාදශිඛරේ රම්යේ චිත්රමාල්යෝපශෝභිතේ ॥ 31 ॥
ප්රාඞ්මුඛං විවිධෛර්මංත්රෛඃ ස්ථාපයිත්වා වරාසනේ ।
නදීනදේභ්යස්සංහෘත්ය තීර්ථේභ්යශ්ච සමංතතඃ ॥ 32 ॥
ආහෘත්ය ච සමුද්රේභ්යස්සර්වේභ්යෝ වානරර්ෂභාඃ ।
අපඃ කනකකුංභේෂු නිධාය විමලාශ්ශුභාඃ ॥ 33 ॥
ශුභෛර්වෘෂභශෘංගෛශ්ච කලශෛශ්චාපි කාංචනෛඃ ।
ශාස්ත්රදෘෂ්ටේන විධිනා මහර්ෂිවිහිතේන ච ॥ 34 ॥
ගජෝ ගවාක්ෂෝ ගවයශ්ශරභෝ ගංධමාදනඃ ।
මෛංදශ්ච ද්විවිදශ්චෛව හනුමාන්ජාංබවාන්නලඃ ॥ 35 ॥
අභ්යෂිංචංත සුග්රීවං ප්රසන්නේන සුගංධිනා ।
සලිලේන සහස්රාක්ෂං වසවෝ වාසවං යථා ॥ 36 ॥
අභිෂික්තේ තු සුග්රීවේ සර්වේ වානරපුංගවාඃ ।
ප්රචුක්රුශුර්මහාත්මානෝ හෘෂ්ටා ස්තත්ර සහස්රශඃ ॥ 37 ॥
රාමස්ය තු වචඃ කුර්වන්සුග්රීවෝ හරිපුංගවඃ ।
අංගදං සංපරිෂ්වජ්ය යෞවරාජ්යේऽභ්යෂේචයත් ॥ 38 ॥
අංගදේ චාභිෂික්තේ තු සානුක්රෝශාඃ ප්ලවංගමාඃ ।
සාධු සාධ්විති සුග්රීවං මහාත්මානෝऽභ්යපූජයන් ॥ 39 ॥
රාමං චෛව මහාත්මානං ලක්ෂ්මණං ච පුනඃ පුනඃ ।
ප්රීතාශ්ච තුෂ්ටුවුස්සර්වේ තාදෘශේ තත්ර වර්තිතේ ॥ 40 ॥
හෘෂ්ටපුෂ්ටජනාකීර්ණා පතාකාධ්වජශෝභිතා ।
බභූව නගරී රම්යා කිෂ්කිංධා ගිරිගහ්වරේ ॥ 41 ॥
නිවේද්ය රාමාය තදා මහාත්මනේ මහාභිෂේකං කපිවාහිනීපතිඃ ।
රුමාං ච භාර්යං ප්රතිලභ්ය වීර්යවා නවාප රාජ්යං ත්රිදශාධිපෝ යථා ॥ 42 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ෂඩ්විංශස්සර්ගඃ ॥
