ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଏକୋନଵିଂଶସ୍ସର୍ଗଃ ।
ତସ୍ମିନ୍ନେଵ ତତଃ କାଲେ ରାଜପୁତ୍ରୀ ତ୍ଵନିଂଦିତା ।
ରୂପୟୌଵନସଂପନ୍ନଂ ଭୂଷଣୋତ୍ତମଭୂଷିତମ୍ ॥ 1 ॥
ତତୋ ଦୃଷ୍ଟ୍ଵୈଵ ଵୈଦେହୀ ରାଵଣଂ ରାକ୍ଷସାଧିପମ୍ ।
ପ୍ରାଵେପତ ଵରାରୋହା ପ୍ରଵାତେ କଦଲୀ ୟଥା ॥ 2 ॥
ଆଚ୍ଛାଦ୍ୟୋଦରମୂରୁଭ୍ୟାଂ ବାହୁଭ୍ୟାଂ ଚ ପୟୋଧରୌ ।
ଉପଵିଷ୍ଟା ଵିଶାଲାକ୍ଷୀ ରୁଦଂତୀ ଵରଵର୍ଣିନୀ ॥ 3 ॥
ଦଶଗ୍ରୀଵସ୍ତୁ ଵୈଦେହୀଂ ରକ୍ଷିତାଂ ରାକ୍ଷସୀଗଣୈଃ ।
ଦଦର୍ଶ ସୀତାଂ ଦୁଃଖାର୍ତାଂ ନାଵଂ ସନ୍ନାମିଵାର୍ଣଵେ ॥ 4 ॥
ଅସଂଵୃତାୟାମାସୀନାଂ ଧରଣ୍ୟାଂ ସଂଶିତଵ୍ରତାମ୍ ।
ଛିନ୍ନାଂ ପ୍ରପତିତାଂ ଭୂମୌ ଶାଖାମିଵ ଵନସ୍ପତେଃ ॥ 5 ॥
ମଲମଂଡନଚିତ୍ରାଂଗୀଂ ମଂଡନାର୍ହାମମଂଡିତାମ୍ ।
ମୃଣାଲୀ ପଂକଦିଗ୍ଧେଵ ଵିଭାତି ନ ଵିଭାତି ଚ ॥ 6 ॥
ସମୀପଂ ରାଜସିଂହସ୍ୟ ରାମସ୍ୟ ଵିଦିତାତ୍ମନଃ ।
ସଂକଲ୍ପହୟସଂୟୁକ୍ସୈର୍ୟାଂତୀମିଵ ମନୋରଥୈଃ ॥ 7 ॥
ଶୁଷ୍ୟଂତୀଂ ରୁଦତୀମେକାଂ ଧ୍ୟାନଶୋକପରାୟଣାମ୍ ।
ଦୁଃଖସ୍ୟାଂତମପଶ୍ୟଂତୀଂ ରାମାଂ ରାମମନୁଵ୍ରତାମ୍ ॥ 8 ॥
ଵେଷ୍ଟମାନାଂ ତଥାଽଵିଷ୍ଟାଂ ପନ୍ନଗେଂଦ୍ରଵଧୂମିଵ ।
ଧୂପ୍ୟମାନାଂ ଗ୍ରହେଣେଵ ରୋହିଣୀଂ ଧୂମକେତୁନା ॥ 9 ॥
ଵୃତ୍ତଶୀଲକୁଲେ ଜାତାମାଚାରଵତି ଧାର୍ମିକେ ।
ପୁନଃସଂସ୍କାରମାପନ୍ନାଂ ଜାତାମିଵ ଚ ଦୁଷ୍କୁଲେ ॥ 10 ॥
ଅଭୂତେନାପଵାଦେନ କୀର୍ତିଂ ନିପତିତାମିଵ ।
ଆମ୍ନାୟାନାମୟୋଗେନ ଵିଦ୍ୟାଂ ପ୍ରଶିଥିଲାମିଵ ॥ 11 ॥
ସନ୍ନାମିଵ ମହାକୀର୍ତିଂ ଶ୍ରଦ୍ଧାମିଵ ଵିମାନିତାମ୍ ।
ପୂଜାମିଵ ପରିକ୍ଷୀଣାମାଶାଂ ପ୍ରତିହତାମିଵ ॥ 12 ॥
ଆୟତୀମିଵ ଵିଧ୍ଵସ୍ତାମାଜ୍ଞାଂ ପ୍ରତିହତାମିଵ ।
ଦୀପ୍ତାମିଵ ଦିଶଂ କାଲେ ପୂଜାମପହୃତାମିଵ ॥ 13 ॥
ପଦ୍ମିନୀମିଵ ଵିଧ୍ଵସ୍ତାଂ ହତଶୂରାଂ ଚମୂମିଵ ।
ପ୍ରଭାମିଵ ତମୋଧ୍ଵସ୍ତାମୁପକ୍ଷୀଣାମିଵାପଗାମ୍ ॥ 14 ॥
ଵେଦୀମିଵ ପରାମୃଷ୍ଟାଂ ଶାଂତାମଗ୍ନିଶିଖାମିଵ ।
ପୌର୍ଣମାସୀମିଵ ନିଶାଂ ରାହୁଗ୍ରସ୍ତେଂଦୁମଂଡଲାମ୍ ॥ 15 ॥
ଉତ୍କୃଷ୍ଟପର୍ଣକମଲାଂ ଵିତ୍ରାସିତଵିହଂଗମାମ୍ ।
ହସ୍ତିହସ୍ତପରାମୃଷ୍ଟାମାକୁଲାଂ ପଦ୍ମିନୀମିଵ ॥ 16 ॥
ପତିଶୋକାତୁରାଂ ଶୁଷ୍କାଂ ନଦୀଂ ଵିସ୍ରାଵିତାମିଵ ।
ପରୟା ମୃଜୟା ହୀନାଂ କୃଷ୍ଣପକ୍ଷନିଶାମିଵ ॥ 17 ॥
ସୁକୁମାରୀଂ ସୁଜାତାଂଗୀଂ ରତ୍ନଗର୍ଭଗୃହୋଚିତାମ୍ ।
ତପ୍ୟମାନାମିଵୋଷ୍ଣେନ ମୃଣାଲୀମଚିରୋଦ୍ଧୃତାମ୍ ॥ 18 ॥
ଗୃହୀତାମାଲିତାଂ ସ୍ତଂଭେ ୟୂଥପେନ ଵିନାକୃତାମ୍ ।
ନିଃଶ୍ଵସଂତୀଂ ସୁଦୁଃଖାର୍ତାଂ ଗଜରାଜଵଧୂମିଵ ॥ 19 ॥
ଏକୟା ଦୀର୍ଘୟା ଵେଣ୍ୟା ଶୋଭମାନାମୟତ୍ନତଃ ।
ନୀଲୟା ନୀରଦାପାୟେ ଵନରାଜ୍ୟା ମହୀମିଵ ॥ 20 ॥
ଉପଵାସେନ ଶୋକେନ ଧ୍ୟାନେନ ଚ ଭୟେନ ଚ ।
ପରିକ୍ଷୀଣାଂ କୃଶାଂ ଦୀନାମଲ୍ପାହାରାଂ ତପୋଧନାମ୍ ॥ 21 ॥
ଆୟାଚମାନାଂ ଦୁଃଖାର୍ତାଂ ପ୍ରାଂଜଲିଂ ଦେଵତାମିଵ ।
ଭାଵେନ ରଘୁମୁଖ୍ୟସ୍ୟ ଦଶଗ୍ରୀଵପରାଭଵମ୍ ॥ 22 ॥
ସମୀକ୍ଷମାଣାଂ ରୁଦତୀମନିଂଦିତାଂ ସୁପକ୍ଷ୍ମତାମ୍ରାୟତଶୁକ୍ଲଲୋଚନାମ୍ ।
ଅନୁଵ୍ରତାଂ ରାମମତୀଵ ମୈଥିଲୀଂ ପ୍ରଲୋଭୟାମାସ ଵଧାୟ ରାଵଣଃ ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଏକୋନଵିଂଶସ୍ସର୍ଗଃ ॥
