ශ්රීමද්වාල්මීකීය රාමායණේ බාලකාංඩම් ।
අථ ත්රිචත්වාරිංශස්සර්ගඃ ।
දේවදේවේ ගතේ තස්මින් සෝऽංගුෂ්ඨාග්රනිපීඩිතාම් ।
කෘත්වා වසුමතීං රාම සංවත්සරමුපාසත ॥ 1 ॥
අථ සංවත්සරේ පූර්ණේ සර්වලෝකනමස්කෘතඃ ।
උමාපතිඃ පශුපතී රාජානමිදමබ්රවීත් ॥ 2 ॥
ප්රීතස්තේऽහං නරශ්රේෂ්ඨ කරිෂ්යාමි තව ප්රියම් ।
ශිරසා ධාරයිෂ්යාමි ශෛලරාජසුතාමහම් ॥ 3 ॥
තතෝ හෛමවතී ජ්යේෂ්ඨා සර්වලෝකනමස්කෘතා ।
තදා සාතිමහද්රූපං කෘත්වා වේගං ච දුස්සහම් ॥ 4 ॥
ආකාශාදපතද්රාම ශිවේ ශිවශිරස්යුත ।
අචිංතයච්ච සා දේවී ගංගා පරමදුර්ධරා ॥ 5 ॥
විශාම්යහං හි පාතාලං ස්රෝතසා ගෘහ්ය ශංකරම් ।
තස්යාවලේපනං ජ්ඤාත්වා ක්රුද්ධස්තු භගවාන් හරඃ ॥ 6 ॥
තිරෝභාවයිතුං බුද්ධිං චක්රේ ත්රිනයනස්තදා ।
සා තස්මින් පතිතා පුණ්යා පුණ්යේ රුද්රස්ය මූර්ධනි ॥ 7 ॥
හිමවත්ප්රතිමේ රාම ජටාමංඩලගහ්වරේ ।
සා කථංචින්මහීං ගංතුං නාශක්නෝද්යත්නමාස්ථිතා ॥ 8 ॥
නෛව නිර්ගමනං ලේභේ ජටාමංඩලමෝහිතා ।
තත්රෛවාබංභ්රමද්දේවී සංවත්සරගණාන් බහූන් ॥ 9 ॥
තාමපශ්යන්පුනස්තත්ර තපඃ පරමමාස්ථිතඃ ।
අනේන තෝෂිතශ්චාභූදත්යර්ථං රඝුනංදන ॥ 10 ॥
විසසර්ජ තතෝ ගංගාං හරෝ බිංදුසරඃ ප්රති ।
තස්යාං විසෘජ්යමානායාං සප්තස්රෝතාංසි ජජ්ඤිරේ ॥ 11 ॥
හ්ලාදිනී පාවනී චෛව නලිනී ච තථාऽපරා ।
තිස්රඃ ප්රාචීං දිශං ජග්මුඃ ගංගාශ්ශිවජලාශ්ශුභාඃ ॥ 12 ॥
සුචක්ෂුශ්චෛව සීතා ච සිංධුශ්චෛව මහානදී ।
තිස්රස්ත්වේතා දිශං ජග්මුඃ ප්රතීචීං තු ශුභෝදකාඃ ॥ 13 ॥
සප්තමී චාන්වගාත්තාසාං භගීරථමථෝ නෘපම් ।
භගීරථෝऽපි රාජර්ෂිර්දිව්යං ස්යංදනමාස්ථිතඃ ॥ 14 ॥
ප්රායාදග්රේ මහාතේජා ගංගා තං චාප්යනුව්රජත් ।
ගගනාච්ඡංකරශිරස්තතෝ ධරණිමාශ්රිතා ॥ 15 ॥
ව්යසර්පත ජලං තත්ර තීව්රශබ්දපුරස්කෘතම් ।
මත්ස්යකච්ඡපසංඝෛශ්ච ශිංශුමාරගණෛස්තදා ॥ 16 ॥
පතද්භිඃ පතිතෛශ්චාන්යෛර්ව්යරෝචත වසුංධරා ।
තතෝ දේවර්ෂිගංධර්වා යක්ෂසිද්ධගණාස්තදා ॥ 17 ॥
ව්යලෝකයංත තේ තත්ර ගගනාද්ගාං ගතාං තථා ।
විමානෛර්නගරාකාරෛර්හයෛර්ගජවරෛස්තදා ॥ 18 ॥
පාරිප්ලවගතෛශ්චාපි දේවතාස්තත්ර විෂ්ඨිතාඃ ।
තදද්භුතතමං ලෝකේ ගංගාපතනමුත්තමම් ॥ 19 ॥
දිදෘක්ෂවෝ දේවගණාඃ සමීයුරමිතෞජසඃ ।
සංපතද්භිස්සුරගණෛස්තේෂාං චාභරණෞජසා ॥ 20 ॥
ශතාදිත්යමිවාභාති ගගනං ගතතෝයදම් ।
ශිංශුමාරෝරගගණෛර්මීනෛරපි ච චංචලෛඃ ॥ 21 ॥
විද්යුද්භිරිව වික්ෂිප්තමාකාශමභවත්තදා ।
පාංඩරෛස්සලිලෝත්පීඩෛඃ කීර්යමාණෛස්සහස්රධා ॥ 22 ॥
ශාරදාභ්රෛරිවාකීර්ණං ගගනං හංසසංප්ලවෛඃ ।
ක්වචිද්ද්රුතතරං යාති කුටිලං ක්වචිදායතම් ॥ 23 ॥
විනතං ක්වචිදුද්ධූතං ක්වචිද්යාති ශනෛශ්ශනෛඃ ।
සලිලේනෛව සලිලං ක්වචිදභ්යාහතං පුනඃ ॥ 24 ॥
මුහුරූර්ධ්වමුඛං ගත්වා පපාත වසුධාතලම් ।
තච්ඡංකරශිරෝභ්රෂ්ටං භ්රෂ්ටං භූමිතලේ පුනඃ ॥ 25 ॥
ව්යරෝචත තදා තෝයං නිර්මලං ගතකල්මෂම් ।
තත්ර දේවර්ෂිගංධර්වා වසුධාතලවාසිනඃ ॥ 26 ॥
භවාංගපතිතං තෝයං පවිත්රමිති පස්පෘශුඃ ।
ශාපාත්ප්රපතිතා යේ ච ගගනාද්වසුධාතලම් ॥ 27 ॥
කෘත්වා තත්රාභිෂේකං තේ බභූවුර්ගතකල්මෂාඃ ।
ධූතපාපාඃ පුනස්තේන තෝයේනාථ සුභාස්වතා ॥ 28 ॥
පුනරාකාශමාවිශ්ය ස්වාන් ලෝකාන් ප්රතිපේදිරේ ।
මුමුදේ මුදිතෝ ලෝකස්තේන තෝයේන භාස්වතා ॥ 29 ॥
කෘතාභිෂේකෝ ගංගායාං බභූව විගතක්ලමඃ ।
භගීරථෝऽපි රාජාර්ෂිර්දිව්යං ස්යංදනමාස්ථිතඃ ।
ප්රායාදග්රේ මහාතේජාස්තං ගංගා පෘෂ්ඨතෝऽන්වගාත් ॥ 30 ॥
දේවාස්සර්ෂිගණාඃ සර්වේ දෛත්යදානවරාක්ෂසාඃ ॥ 31 ॥
ගංධර්වයක්ෂප්රවරාස්සකින්නරමහෝරගාඃ ।
සර්වාශ්චාප්සරසෝ රාම භගීරථරථානුගාම් ॥ 32 ॥
ගංගාමන්වගමන් ප්රීතාස්සර්වේ ජලචරාශ්ච යේ ।
යතෝ භගීරථෝ රාජා තතෝ ගංගායශස්විනී ॥ 33 ॥
ජගාම සරිතාං ශ්රේෂ්ඨා සර්වපාපප්රණාශිනී ।
තතෝ හි යජමානස්ය ජහ්නෝරද්භුතකර්මණඃ ॥ 34 ॥
ගංගා සංප්ලාවයාමාස යජ්ඤවාටං මහාත්මනඃ ।
තස්යාවලේපනං ජ්ඤාත්වා ක්රුද්ධෝ යජ්වා තු රාඝව ॥ 35 ॥
අපිබච්ච ජලං සර්වං ගංගායාඃ පරමාද්භුතම් ।
තතෝ දේවාස්සගංධර්වා ඍෂයශ්ච සුවිස්මිතාඃ ॥ 36 ॥
පූජයංති මහාත්මානං ජහ්නුං පුරුෂසත්තමම් ।
ගංගාං චාපි නයංති ස්ම දුහිතෘත්වේ මහාත්මනඃ ॥ 37 ॥
තතස්තුෂ්ටෝ මහාතේජාශ්ශ්රෝත්රාභ්යාමසෘජත් පුනඃ ॥ 38 ॥
තස්මාජ්ජහ්නුසුතා ගංගා ප්රෝච්යතේ ජාහ්නවීතිච ।
ජගාම ච පුනර්ගංගා භගීරථරථානුගා ।
සාගරං චාපි සංප්රාප්තා සා සරිත්ප්රවරා තදා ॥ 39 ॥
රසාතලමුපාගච්ඡත්සිද්ධ්යර්ථං තස්ය කර්මණඃ ।
භගීරථෝऽපි රාජර්ෂිඃ ගංගාමාදාය යත්නතඃ ।
පිතාමහාන් භස්මකෘතානපශ්යද්දීනචේතනඃ ॥ 40 ॥
අථ තද්භස්මනාං රාශිං ගංගාසලිලමුත්තමම් ।
ප්ලාවයද්ධූතපාප්මානස්ස්වර්ගං ප්රාප්තා රඝූත්තම ॥ 41 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ත්රිචත්වාරිංශස්සර්ගඃ ॥
