ශ්රීමද්වාල්මීකීය රාමායණේ අයෝධ්යාකාංඩම් ।
අථ ද්වාදශාධිකශතතමස්සර්ගඃ ।
තමප්රතිමතේජෝභ්යාං භ්රාතෘභ්යාං රෝමහර්ෂණම් ।
විස්මිතාඃ සංගමං ප්රේක්ෂ්ය සමවේතා මහර්ෂයඃ ॥ 1 ॥
අංතර්හිතා මුනිගණාස්සිද්ධාශ්ච පරමර්ෂයඃ ।
තෞ භ්රාතරෞ මහාත්මානෞ කාකුත්ස්ථෞ ප්රශශංසිරේ ॥ 2 ॥
ස ධන්යෝ යස්ය පුත්රෞ ද්වෞ ධර්මජ්ඤෞ ධර්මවික්රමෞ ।
ශ්රුත්වා වයං හි සංභාෂාමුභයෝස්ස්පෘහයාමහේ ॥ 3 ॥
තතස්ත්වෘෂිගණාඃ ක්ෂිප්රං දශග්රීවවධෛෂිණඃ ।
භරතං රාජශාර්දූලමිත්යූචුඃ සංගතා වචඃ ॥ 4 ॥
කුලේ ජාත මහාප්රාජ්ඤ මහාවෘත්ත මහායශඃ ।
ග්රාහ්යං රාමස්ය වාක්යං තේ පිතරං යද්යවේක්ෂසේ ॥ 5 ॥
සදාऽනෘණමිමං රාමං වයමිච්ඡාමහේ පිතුඃ ।
ආනෘණත්වාච්ච කෛකේය්යාඃ ස්වර්ගං දශරථෝ ගතඃ ॥ 6 ॥
ඒතාවදුක්ත්වා වචනං ගංධර්වාඃ සමහර්ෂයඃ ।
රාජර්ෂයශ්චෛව තදා සර්වේ ස්වාං ස්වාං ගතිං ගතාඃ ॥ 7 ॥
හ්ලාදිතස්තේන වාක්යේන ශුභේන ශුභදර්ශනඃ ।
රාම ස්සංහෘෂ්ටවදනස්තානෘෂීනභ්යපූජයත් ॥ 8 ॥
ත්රස්තගාත්රස්තු භරතස්ස වාචා සජ්ජමානයා ।
කෘතාංජලිරිදං වාක්යං රාඝවං පුනරබ්රවීත් ॥ 9 ॥
රාජධර්මමනුප්රේක්ෂ්ය කුලධර්මානුසංතතිම් ।
කර්තුමර්හසි කාකුත්ස්ථ මම මාතුශ්ච යාචනාම් ॥ 10 ॥
රක්ෂිතුං සුමහද්රාජ්යමහමේකස්තු නෝත්සහේ ।
පෞරජානපදාංශ්චාපි රක්තාන්රංජයිතුං තථා ॥ 11 ॥
ජ්ඤාතයශ්ච හි යෝධාශ්ච මිත්රාණි සුහෘදශ්ච නඃ ।
ත්වාමේව ප්රතිවීක්ෂංතේ පර්ජන්යමිව කර්ෂකාඃ ॥ 12 ॥
ඉදං රාජ්යං මහාප්රාජ්ඤ ස්ථාපය ප්රතිපද්ය හි ।
ශක්තිමානසි කාකුත්ස්ථ ලෝකස්ය පරිපාලනේ ॥ 13 ॥
ඉත්යුක්ත්වා න්යපතද්භ්රාතුඃ පාදයෝර්භරතස්තදා ।
භෘශං සංප්රාර්ථයාමාස රාමමේව ප්රියංවදඃ ॥ 14 ॥
තමංකේ භරතං කෘත්වා රාමෝ වචනමබ්රවීත් ।
ශ්යාමං නලිනපත්රාක්ෂං මත්තහංසස්වරං ස්වයම් ॥ 15 ॥
ආගතා ත්වාමියං බුද්ධිස්ස්වජා වෛනයිකී ච යා ।
භෘශමුත්සහසේ තාත රක්ෂිතුං පෘථිවීමපි ॥ 16 ॥
අමාත්යෛශ්ච සුහෘද්භිශ්ච බුද්ධිමද්භිශ්ච මංත්රිභිඃ ।
සර්වකාර්යාණි සම්මංත්ර්ය සුමහංත්යපි කාරය ॥ 17 ॥
ලක්ෂ්මීශ්චංද්රාදපේයාද්වා හිමවාන්වා හිමං ත්යජේත් ।
අතීයාත්සාගරෝ වේලාං න ප්රතිජ්ඤාමහං පිතුඃ ॥ 18 ॥
කාමාද්වා තාත ලෝභාද්වා මාත්රාතුභ්යමිදං කෘතම් ।
න තන්මනසි කර්තව්යං වර්තිතව්යං ච මාතෘවත් ॥ 19 ॥
ඒවං බ්රුවාණං භරතඃ කෞසල්යාසුතමබ්රවීත් ।
තේජසාऽऽදිත්යසංකාශං ප්රතිපච්චංද්රදර්ශනම් ॥ 20 ॥
ආධිරෝහාऽර්ය පාදාභ්යාං පාදුකේ හේමභූෂිතේ ।
ඒතේහි සර්වලෝකස්ය යෝගක්ෂේමං විධාස්යතඃ ॥ 21 ॥
සෝऽධිරුහ්ය නරව්යාඝ්රඃ පාදුකේ හ්යවරුහ්ය ච ।
ප්රායච්ඡත්සුමහාතේජා භරතාය මහාත්මනේ ॥ 22 ॥
ස පාදුකේ සංප්රණම්ය රාමං වචනමබ්රවීත් චතුර්දශ හි වර්ෂාණි ජටාචීරධරෝ හ්යාහම් ॥ 23 ॥
ඵලමූලාශනෝ වීර භවේයං රඝුනංදන ।
තවාऽගමනමාකාංක්ෂාන්වසන්වෛ නගරාද්බහිඃ ॥ 24 ॥
තව පාදුකයෝර්න්යස්තරාජ්යතංත්රඃ පරංතප ।
චතුර්දශේ තු සංපූර්ණේ වර්ෂේऽහනි රඝූත්තම ॥ 25 ॥
න ද්රක්ෂ්යාමි යදි ත්වාං තු ප්රවේක්ෂ්යාමි හුතාශනම් ।
තථේති ච ප්රතිජ්ඤාය තං පරිෂ්වජ්ය සාදරම් ॥ 26 ॥
ශත්රුඝ්නං ච පරිෂ්වජ්ය භරතං චේදමබ්රවීත් ।
මාතරං රක්ෂ කෛකේයීං මා රෝෂං කුරු තාං ප්රති ॥ 27 ॥
මයා ච සීතයා චෛව ශප්තෝऽසි රඝුසත්තම ।
ඉත්යුක්ත්වාऽශ්රුපරීතාක්ෂෝ භ්රාතරං විසසර්ජ හ ॥ 28 ॥
ස පාදුකේ තේ භරතඃ ප්රතාපවාන් ස්වලංකෘතේ සංපරිපූජ්ය ධර්මවිත් ।
ප්රදක්ෂිණං චෛව චකාර රාඝවං චකාර තේ චෝත්තමනාගමූර්ධනි ॥ 29 ॥
අථාऽනුපූර්ව්යාත්ප්රතිනංද්ය තං ජනං ගුරූංශ්ච මංත්රිප්රකෘතීස්තථාऽනුජෞ ।
ව්යසර්ජයද්රාඝවවංශවර්ධනස්ථිරඃ ස්වධර්මේ හිමවානිවාචලඃ ॥ 30 ॥
තං මාතරෝ බාෂ්පගෘහීතකංඨ්යෝ දුඃඛේන නාමංත්රයිතුං හි ශේකුඃ ।
ස ත්වේව මාත්රෘරභිවාද්ය සර්වාරුදන්කුටීං ස්වාං ප්රවිවේශ රාඝවඃ ॥ 31 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ද්වාදශාධිකශතතමස්සර්ගඃ ॥
