ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ പംചപംചാശസ്സര്ഗഃ ।
ഉഷിത്വാ രജനീം തത്ര രാജപുത്രാവരിംദമൌ ।
മഹര്ഷിമഭിവാദ്യാഥ ജഗ്മതുസ്തം ഗിരിം പ്രതി ॥ 1 ॥
തേഷാം ചൈവ സ്വസ്ത്യയനം മഹര്ഷി സ്സ ചകാര ഹ ।
പ്രസ്ഥിതാംശ്ചൈവ താന്പ്രേക്ഷ്യ പിതാ പുത്രാനിവാന്വഗാത് ॥ 2 ॥
തതഃ പ്രചക്രമേ വക്തും വചനം സ മഹാമുനിഃ ।
ഭരദ്വാജോ മഹാതേജാ രാമം സത്യപരാക്രമമ് ॥ 3 ॥
ഗംഗായമുനയോ സ്സംധിമാസാദ്യ മനുജര്ഷഭൌ ।
കാലിംദീമനുഗച്ഛേതാം നദീം പശ്ചാന്മുഖാശ്രിതാമ് ॥ 4 ॥
അഥാഽസാദ്യ തു കാലിംദീ ശീഘ്രസ്രോതസമാപഗാമ് ।
തസ്യാസ്തീര്ഥം പ്രചലിതം പുരാണം പ്രേക്ഷ്യ രാഘവൌ ॥ 5 ॥
തത്ര യൂയം പ്ലവം കൃത്വാ തരതാംശുമതീം നദീമ് ।
തതോ ന്യഗ്രോധമാസാദ്യ മഹാംതം ഹരിതച്ഛദമ് ॥ 6 ॥
വിവൃദ്ധം ബഹുഭിർവൃക്ഷൈ ശ്ശ്യാമം സിദ്ധോപസേവിതമ് ।
തസ്മൈ സീതാംജലിം കൃത്വാ പ്രയുംജീതാശിഷശ്ശിവാഃ ॥ 7 ॥
സമാസാദ്യ തു തം വൃക്ഷം വസേദ്വാതിക്രമേത വാ ।
ക്രോശമാത്രം തതോ ഗത്വാ നീലം ദ്രക്ഷ്യഥ കാനനമ് ॥ 8 ॥
പലാശബദരീമിശ്രം രമ്യം വംശൈശ്ച യാമുനൈഃ ।
സ പംഥാശ്ചിത്രകൂടസ്യ ഗത സ്സുബഹുശോ മയാ ॥ 9 ॥
രമ്യോ മാര്ദവയുക്തശ്ച വനദാവൈർവിവര്ജിതഃ ।
ഇതി പംഥാനമാവേദ്യ മഹര്ഷിസ്സന്യവര്തത ॥ 10 ॥
അഭിവാദ്യ തഥേത്യുക്ത്വാ രാമേണ വിനിവര്തിതഃ ।
ഉപാവൃത്തേ മുനൌ തസ്മിന്രാമോ ലക്ഷ്മണമബ്രവീത് ॥ 11 ॥
കൃതപുണ്യാഃ സ്മ സൌമിത്രേ മുനിര്യന്നോഽനുകംപതേ ।
ഇതി തൌ പുരുഷവ്യാഘ്രൌ മംത്രയിത്വാ മനസ്വിനൌ ।
സീതാമേവാഗ്രതഃ കൃത്വാ കാലിംദീം ജഗ്മതുര്നദീമ് ॥ 12 ॥
അഥാഽസാദ്യ തു കാലിംദീം ശീഘ്രസ്രോതോവഹാം നദീമ് ।
ചിംതാമാപേദിരേ സർവേ നദീജലതിതീര്ഷവഃ ॥ 13 ॥
തൌ കാഷ്ഠസംഘാതമഥോ ചക്രതു സ്സുമഹാപ്ലവമ് ।
ശുഷ്കൈർവംശൈ സ്സമാസ്തീര്ണമുശീരൈശ്ച സമാവൃതമ് ॥ 14 ॥
തതോ വേതസശാഖാശ്ച ജംബൂശാഖാശ്ച വീര്യവാന് ।
ചകാര ലക്ഷ്മണശ്ഛിത്വാ സീതായാ സ്സുഖമാസനമ് ॥ 15 ॥
തത്ര ശ്രിയമിവാചിംത്യാം രാമോ ദാശരഥിഃ പ്രിയാമ് ।
ഈഷത്സംലജ്ജമാനാം താമധ്യാരോപയതപ്ലവമ് ॥ 16 ॥
പാര്ശ്വേ ച തത്ര വൈദേഹ്യാ വസനേ ഭൂഷണാനി ച ।
പ്ലവേ കഠിനകാജം ച രാമശ്ചക്രേ സഹായുധൈഃ ॥ 17 ॥
ആരോപ്യ പ്രഥമം സീതാം സംഘാടം പരിഗൃഹ്യ തൌ ।
തത പ്രതേരതുര്യത്തൌ വീരൌ ദശരഥാത്മജൌ ॥ 18 ॥
കാലിംദീമധ്യമായാതാ സീതാ ത്വേനാമവംദത ।
സ്വസ്തി ദേവി തരാമി ത്വാം പാരയേ ന്മേ പതിർവ്രതമ് ॥ 19 ॥
കാലിംദീ മഥ സീതാ തു യാചമാനാ കൃതാംജലിഃ ।
തീരമേവാഭിസംപ്രാപ്താ ദക്ഷിണം വരവര്ണിനീ ॥ 20 ॥
തത പ്ലവേനാംശുമതീം ശീഘ്രഗാമൂര്മിമാലിനീമ് ।
തീരജൈ ര്ബഹുഭിർവൃക്ഷൈ സ്സംതേരുര്യമുനാം നദീമ് ॥ 21 ॥
തേ തീര്ണാഃ പ്ലവമുത്സൃജ്യ പ്രസ്ഥായ യമുനാവനാത് ।
ശ്യാമം ന്യഗ്രോധ മാസേദു ശ്ശീതലം ഹരിതച്ഛദമ് ॥ 22 ॥
ന്യഗ്രോധം തമുപാഗമ്യ വൈദേഹീ വാക്യമബ്രവീത് ।
നമസ്തേഽസ്തു മഹാവൃക്ഷ പാരയേന്മേ പതിർവ്രതമ് ॥ 23 ॥
കൌശല്യാം ചൈവ പശ്യേയം സുമിത്രാം ച യശശ്വിനീമ് ।
ഇതി സീതാഽംജലിം കൃത്വാ പര്യഗച്ഛദ്വനസ്പതിമ് ॥ 24 ॥
അവലോക്യ തത സ്സീതാമായാചംതീമനിംദിതാമ് ।
ദയിതാം ച വിധേയാം ച രാമോ ലക്ഷ്മണമബ്രവീത് ॥ 25 ॥
സീതാമാദായ ഗച്ഛത്വമഗ്രതോ ഭരതാനുജ ।
പൃഷ്ഠതോഽഹം ഗമിഷ്യാമി സായുധോ ദ്വിപദാം വര ॥ 26 ॥
യദ്യത്ഫലം പ്രാര്ഥയതേ പുഷ്പം വാ ജനകാത്മജാ ।
തത്തത്പ്രദദ്യാ വൈദേഹ്യാ യത്രാഽസ്യാ രമതേ മനഃ ॥ 27 ॥
ഗച്ഛതോഽസ്തു തയോര്മധ്യേ ബഭൂവ ജനകാത്മജാ ।
മാതംഗയോര്മധ്യഗതാ ശുഭാ നാഗവധൂരിവ ॥ 28 ॥
ഏകൈകം പാദപം ഗുല്മം ലതാം വാ പുഷ്പശാലിനീമ് ।
അദൃഷ്ടപൂർവാം പശ്യംതീ രാമം പപ്രച്ഛ സാഽബലാ ॥ 29 ॥
രമണീയാന്ബഹുവിധാന്പാദപാന്കുസുമോത്കടാന് ।
സീതാവചനസംരബ്ധ ആനയാമാസ ലക്ഷ്മണഃ ॥ 30 ॥
വിചിത്രവാലുകജലാം ഹംസസാരസനാദിതാമ് ।
രേമേ ജനകരാജസ്യ സുതാ പ്രേക്ഷ്യ തദാ നദീമ് ॥ 31 ॥
ക്രോശമാത്രം തതോ ഗത്വാ ഭ്രാതരൌ രാമലക്ഷ്മണൌ ।
ബഹൂന്മേധ്യാന്മൃഗാന്ഹത്വാ ചേരതുര്യമുനാവനേ ॥ 32 ॥
വിഹൃത്യ തേ ബര്ഹിണപൂഗനാദിതേ ശുഭേ വനേ വാനരവാരണായുതേ ।
സമം നദീവപ്രമുപേത്യ സമ്മതം നിവാസ മാജഗ്മു രദീനദര്ശനാഃ ॥ 33 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ പംചപംചാശസ്സര്ഗഃ ॥
