śrīmadvālmīkīya rāmāyaṇē ayōdhyākāṇḍam ।
atha pañchapañchāśassargaḥ ।
uṣitvā rajanīṃ tatra rājaputrāvarindamau ।
maharṣimabhivādyātha jagmatustaṃ giriṃ prati ॥ 1 ॥
tēṣāṃ chaiva svastyayanaṃ maharṣi ssa chakāra ha ।
prasthitāṃśchaiva tānprēkṣya pitā putrānivānvagāt ॥ 2 ॥
tataḥ prachakramē vaktuṃ vachanaṃ sa mahāmuniḥ ।
bharadvājō mahātējā rāmaṃ satyaparākramam ॥ 3 ॥
gaṅgāyamunayō ssandhimāsādya manujarṣabhau ।
kālindīmanugachChētāṃ nadīṃ paśchānmukhāśritām ॥ 4 ॥
athā'sādya tu kālindī śīghrasrōtasamāpagām ।
tasyāstīrthaṃ prachalitaṃ purāṇaṃ prēkṣya rāghavau ॥ 5 ॥
tatra yūyaṃ plavaṃ kṛtvā taratāṃśumatīṃ nadīm ।
tatō nyagrōdhamāsādya mahāntaṃ haritachChadam ॥ 6 ॥
vivṛddhaṃ bahubhirvṛkṣai śśyāmaṃ siddhōpasēvitam ।
tasmai sītāñjaliṃ kṛtvā prayuñjītāśiṣaśśivāḥ ॥ 7 ॥
samāsādya tu taṃ vṛkṣaṃ vasēdvātikramēta vā ।
krōśamātraṃ tatō gatvā nīlaṃ drakṣyatha kānanam ॥ 8 ॥
palāśabadarīmiśraṃ ramyaṃ vaṃśaiścha yāmunaiḥ ।
sa panthāśchitrakūṭasya gata ssubahuśō mayā ॥ 9 ॥
ramyō mārdavayuktaścha vanadāvairvivarjitaḥ ।
iti panthānamāvēdya maharṣissanyavartata ॥ 10 ॥
abhivādya tathētyuktvā rāmēṇa vinivartitaḥ ।
upāvṛttē munau tasminrāmō lakṣmaṇamabravīt ॥ 11 ॥
kṛtapuṇyāḥ sma saumitrē muniryannō'nukampatē ।
iti tau puruṣavyāghrau mantrayitvā manasvinau ।
sītāmēvāgrataḥ kṛtvā kālindīṃ jagmaturnadīm ॥ 12 ॥
athā'sādya tu kālindīṃ śīghrasrōtōvahāṃ nadīm ।
chintāmāpēdirē sarvē nadījalatitīrṣavaḥ ॥ 13 ॥
tau kāṣṭhasaṅghātamathō chakratu ssumahāplavam ।
śuṣkairvaṃśai ssamāstīrṇamuśīraiścha samāvṛtam ॥ 14 ॥
tatō vētasaśākhāścha jambūśākhāścha vīryavān ।
chakāra lakṣmaṇaśChitvā sītāyā ssukhamāsanam ॥ 15 ॥
tatra śriyamivāchintyāṃ rāmō dāśarathiḥ priyām ।
īṣatsaṃlajjamānāṃ tāmadhyārōpayataplavam ॥ 16 ॥
pārśvē cha tatra vaidēhyā vasanē bhūṣaṇāni cha ।
plavē kaṭhinakājaṃ cha rāmaśchakrē sahāyudhaiḥ ॥ 17 ॥
ārōpya prathamaṃ sītāṃ saṅghāṭaṃ parigṛhya tau ।
tata pratēraturyattau vīrau daśarathātmajau ॥ 18 ॥
kālindīmadhyamāyātā sītā tvēnāmavandata ।
svasti dēvi tarāmi tvāṃ pārayē nmē patirvratam ॥ 19 ॥
kālindī matha sītā tu yāchamānā kṛtāñjaliḥ ।
tīramēvābhisamprāptā dakṣiṇaṃ varavarṇinī ॥ 20 ॥
tata plavēnāṃśumatīṃ śīghragāmūrmimālinīm ।
tīrajai rbahubhirvṛkṣai ssantēruryamunāṃ nadīm ॥ 21 ॥
tē tīrṇāḥ plavamutsṛjya prasthāya yamunāvanāt ।
śyāmaṃ nyagrōdha māsēdu śśītalaṃ haritachChadam ॥ 22 ॥
nyagrōdhaṃ tamupāgamya vaidēhī vākyamabravīt ।
namastē'stu mahāvṛkṣa pārayēnmē patirvratam ॥ 23 ॥
kauśalyāṃ chaiva paśyēyaṃ sumitrāṃ cha yaśaśvinīm ।
iti sītā'ñjaliṃ kṛtvā paryagachChadvanaspatim ॥ 24 ॥
avalōkya tata ssītāmāyāchantīmaninditām ।
dayitāṃ cha vidhēyāṃ cha rāmō lakṣmaṇamabravīt ॥ 25 ॥
sītāmādāya gachChatvamagratō bharatānuja ।
pṛṣṭhatō'haṃ gamiṣyāmi sāyudhō dvipadāṃ vara ॥ 26 ॥
yadyatphalaṃ prārthayatē puṣpaṃ vā janakātmajā ।
tattatpradadyā vaidēhyā yatrā'syā ramatē manaḥ ॥ 27 ॥
gachChatō'stu tayōrmadhyē babhūva janakātmajā ।
mātaṅgayōrmadhyagatā śubhā nāgavadhūriva ॥ 28 ॥
ēkaikaṃ pādapaṃ gulmaṃ latāṃ vā puṣpaśālinīm ।
adṛṣṭapūrvāṃ paśyantī rāmaṃ paprachCha sā'balā ॥ 29 ॥
ramaṇīyānbahuvidhānpādapānkusumōtkaṭān ।
sītāvachanasaṃrabdha ānayāmāsa lakṣmaṇaḥ ॥ 30 ॥
vichitravālukajalāṃ haṃsasārasanāditām ।
rēmē janakarājasya sutā prēkṣya tadā nadīm ॥ 31 ॥
krōśamātraṃ tatō gatvā bhrātarau rāmalakṣmaṇau ।
bahūnmēdhyānmṛgānhatvā chēraturyamunāvanē ॥ 32 ॥
vihṛtya tē barhiṇapūganāditē śubhē vanē vānaravāraṇāyutē ।
samaṃ nadīvapramupētya sammataṃ nivāsa mājagmu radīnadarśanāḥ ॥ 33 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē pañchapañchāśassargaḥ ॥
