ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഷഡ്വിംശസ്സര്ഗഃ ।
ദൂഷണസ്തു സ്വകം സൈന്യം ഹന്യമാനം നിരീക്ഷ്യ സഃ ।
സംദിദേശ മഹാബാഹുര്ഭീമവേഗാംദുരാസദാന് ॥ 1 ॥
രാക്ഷസാന്പംചസഹസ്രാന്സമരേഷ്വനിവര്തിനഃ ।
തേ ശൂലൈഃ പട്ടിശൈഃ ഖംഗൈ ശിലാവര്ഷൈര്ദ്രുമൈരപി ॥ 2 ॥
ശരവര്ഷൈരവിച്ഛിന്നം വവര്ഷുസ്തം സമംതതഃ ।
സ ദൃമാണാം ശിലാനാം ച വര്ഷം പ്രാണഹരം മഹത് ॥ 3 ॥
പ്രതിജഗ്രാഹ ധര്മാത്മാ രാഘവസ്തീക്ഷ്ണസായകൈഃ ।
പ്രതിഗൃഹ്യ ച തദ്വര്ഷം നിമീലിത ഇവര്ഷഭഃ ॥ 4 ॥
രാമഃ ക്രോധം പരം ഭേജേ വധാര്ഥം സർവരക്ഷസാമ് ।
തതഃ ക്രോധസമാവിഷ്ടഃ പ്രദീപ്ത ഇവ തേജസാ ॥ 5 ॥
ശരൈരവാകിരത്സൈന്യം സർവതസ്സഹദൂഷണമ് ।
തതസ്സേനാപതിഃ ക്രുദ്ധോ ദൂഷണശ്ശത്രുദൂഷണഃ ॥ 6 ॥
ശരൈരശനികല്പൈസ്തം രാഘവം സമവാകിരത് ।
തതോ രാമസ്സുസംകൃദ്ധഃ ക്ഷുരേണാസ്യ മഹദ്ധനുഃ ॥ 7 ॥
ചിച്ഛേദ സമരേ വീരശ്ചതുര്ഭിശ്ചതുരോ ഹയാന് ।
ഹത്വാ ചാശ്വാന്ശരൈസ്തീക്ഷ്ണൈരര്ധചംദ്രേണ സാരഥേഃ ॥ 8 ॥
ശിരോ ജഹാര തദ്രക്ഷസ്ത്രിഭിർവിവ്യാധ വക്ഷസി ।
സ ച്ഛിന്നധന്വാ വിരഥോ ഹതാശ്വോ ഹതസാരഥിഃ ॥ 9 ॥
ജഗ്രാഹ ഗിരിശൃംഗാഭം പരിഘം രോമഹര്ഷണമ് ।
വേഷ്ടിതം കാംചനൈഃ പട്ടൈര്ദേവസൈന്യപ്രമര്ദനമ് ॥ 10 ॥
ആയസൈശ്ശംകുഭിസ്തീക്ഷ്ണൈഃ കീര്ണം പരവസോക്ഷിതമ് ।
വജ്രാശനിസമസ്പര്ശം പരഗോപുരദാരണമ് ॥ 11 ॥
തം മഹോരഗസംകാശം പ്രഗൃഹ്യ പരിഘം രണേ ।
ദൂഷണോഽഭ്യദ്രവദ്രാമം ക്രൂരകര്മാ നിശാചരഃ ॥ 12 ॥
തസ്യാഭിപതമാനസ്യ ദൂഷണസ്യ സ രാഘവഃ ।
ദ്വാഭ്യാം ശരാഭ്യാം ചിച്ഛേദ സഹസ്താഭരണൌ ഭുജൌ ॥ 13 ॥
ഭ്രഷ്ടസ്തസ്യ മഹാകായഃ പപാത രണമൂര്ധനി ।
പരിഘശ്ഛിന്നഹസ്തസ്യ ശക്രധ്വജ ഇവാഗ്രതഃ ॥ 14 ॥
സ കരാഭ്യാം വികീര്ണാഭ്യാം പപാത ഭുവി ദൂഷണഃ ।
വിഷാണാഭ്യാം വിശീര്ണാഭ്യാം മനസ്വീവ മഹാഗജഃ ॥ 15 ॥
തം ദൃഷ്ട്വാ പതിതം ഭൂമൌ ദൂഷണം നിഹതം രണേ ।
സാധുസാധ്വിതി കാകുത്സ്ഥം സർവഭൂതാന്യപൂജയന് ॥ 16 ॥
ഏതസ്മിന്നംതരേ ക്രുദ്ധാസ്ത്രയഃ സേനാഗ്രയായിനഃ ।
സംഹൃത്യാഭ്യദ്രവന് രാമം മൃത്യുപാശാവപാശിതാഃ ॥ 17 ॥
മഹാകപാലഃ സ്ഥൂലാക്ഷഃ പ്രമാഥീ ച മഹാബലഃ ।
മഹാകപാലോ വിപുലം ശൂലമുദ്യമ്യ രാക്ഷസഃ ॥ 18 ॥
സ്ഥൂലാക്ഷഃ പട്ടിസം ഗൃഹ്യ പ്രമാഥീ ച പരശ്വധമ് ।
ദൃഷ്ട്വൈവാപതതസ്തൂര്ണം രാഘവസ്സായകൈശ്ശിതൈഃ ॥ 19 ॥
തീക്ഷ്ണാഗ്രൈഃ പ്രതിജഗ്രാഹ സംപ്രാപ്താനതിഥീനിവ ।
മഹാകപാലസ്യ ശിരശ്ചിച്ഛേദ പരമേഷുഭിഃ ॥ 20 ॥
അസംഖ്യേയൈസ്തു ബാണൌഘൈഃ പ്രമമാഥ പ്രമാഥിനമ് ।
സ പപാത ഹതോ ഭൂമൌ വിടപീവ മഹാദ്രുമഃ ॥ 21 ॥
സ്ഥൂലാക്ഷസ്യാക്ഷിണീ തീക്ഷ്ണൈഃ പൂരയാമാസ സായകൈഃ ।
ദൂഷണസ്യാനുഗാന്പംചസഹസ്രാന്കുപിതഃ ക്ഷണാത് ॥ 22 ॥
ബാണൌഘൈഃ പംചസാഹസ്രൈരനയദ്യമസാദനമ് ।
ദൂഷണം നിഹതം ദൃഷ്ട്വാ തസ്യ ചൈവ പദാനുഗാന് ॥ 23 ॥
വ്യാദിദേശ ഖരഃ ക്രുദ്ധഃ സേനാധ്യക്ഷാന്മഹാബലാന് ।
അയം വിനിഹതസ്സംഖ്യേ ദൂഷണസ്സപദാനുഗഃ ॥ 24 ॥
മഹത്യാ സേനയാ സാര്ധം യുദ്ധ്വാ രാമം കുമാനുഷമ് ।
ശസ്ത്രൈര്നാനാവിധാകാരൈര്ഹനധ്വം സർവരാക്ഷസാഃ ॥ 25 ॥
ഏവമുക്ത്വാ ഖരഃ ക്രുദ്ധോ രാമമേവാഭിദുദ്രുവേ ।
ശ്യേനഗാമീ പൃഥുഗ്രീവോ യജ്ഞശത്രുർവിഹംഗമഃ ॥ 26 ॥
ദുര്ജയഃ കരവീരാക്ഷഃ പരുഷഃ കാലകാര്മുകഃ ।
മേഘമാലീ മഹാമാലീ സര്പാസ്യോ രുധിരാശനഃ ॥ 27 ॥
ദ്വാദശൈതേ മഹാവീര്യാ ബലാധ്യക്ഷാസ്സസൈനികാഃ ।
രാമമേവാഭ്യധാവംത വിസൃജംതശ്ശരോത്തമാന് ॥ 28 ॥
തതഃ പാവകസംകാശൈര്ഹേമവജ്രവിഭൂഷിതൈഃ ।
ജഘാന ശേഷം തേജസ്വീ തസ്യ സൈന്യസ്യ സായകൈഃ ॥ 29 ॥
തേ രുക്മപുംഖാ വിശിഖാസ്സധൂമാ ഇവ പാവകാഃ ।
നിജഘ്നുസ്താനി രക്ഷാംസി വജ്രാ ഇവ മഹാദ്രുമാന് ॥ 30 ॥
രക്ഷസാം തു ശതം രാമശ്ശതേനൈകേന കര്ണിനാ ।
സഹസ്രം ച സഹസ്രേണ ജഘാന രണമൂര്ധനി ॥ 31 ॥
തൈര്ഭിന്നവര്മാഭരണാശ്ഛിന്നഭിന്നശരാസനാഃ ।
നിപേതുശ്ശോണിതാദിഗ്ധാ ധരണ്യാം രജനീചരാഃ ॥ 32 ॥
തൈര്മുക്തകേശൈസ്സമരേ പതിതൈശ്ശോണിതോക്ഷിതൈഃ ।
ആസ്തീര്ണാ വസുധാ കൃത്സ്നാ മഹാവേദിഃ കുശൈരിവ ॥ 33 ॥
ക്ഷണേന തു മഹാഘോരം വനം നിഹതരാക്ഷസമ് ।
ബഭൂവ നിരയപ്രഖ്യം മാംസശോണിതകര്ദമമ് ॥ 34 ॥
ചതുര്ദശ സഹസ്രാണി രക്ഷസാം ഭീമകര്മണാമ് ।
ഹതാന്യേകേന രാമേണ മാനുഷേണ പദാതിനാ ॥ 35 ॥
തസ്യ സൈന്യസ്യ സർവസ്യ ഖരശ്ശേഷോ മഹാരഥഃ ।
രാക്ഷസസ്ത്രിശിരാശ്ചൈവ രാമശ്ച രിപുസൂദനഃ ॥ 36 ॥
ശേഷാ ഹതാ മഹാസത്വാ രാക്ഷസാ രണമൂര്ധനി ।
ഘോരാ ദുർവിഷഹാഃ സർവേ ലക്ഷ്മണസ്യാഗ്രജേന തേ ॥ 37 ॥
തതസ്തു തദ്ഭീമബലം മഹാഹവേ സമീക്ഷ്യ രാമേണ ഹതം ബലീയസാ ।
രഥേന രാമം മഹതാ ഖരസ്തദാ സമാസസാദേംദ്ര ഇവോദ്യതാശനിഃ ॥ 38 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഷഡ്വിംശസ്സര്ഗഃ ॥
