ශ්රීමද්වාල්මීකීය රාමායණේ අරණ්යකාංඩම් ।
අථ ෂඩ්විංශස්සර්ගඃ ।
දූෂණස්තු ස්වකං සෛන්යං හන්යමානං නිරීක්ෂ්ය සඃ ।
සංදිදේශ මහාබාහුර්භීමවේගාංදුරාසදාන් ॥ 1 ॥
රාක්ෂසාන්පංචසහස්රාන්සමරේෂ්වනිවර්තිනඃ ।
තේ ශූලෛඃ පට්ටිශෛඃ ඛංගෛ ශිලාවර්ෂෛර්ද්රුමෛරපි ॥ 2 ॥
ශරවර්ෂෛරවිච්ඡින්නං වවර්ෂුස්තං සමංතතඃ ।
ස දෘමාණාං ශිලානාං ච වර්ෂං ප්රාණහරං මහත් ॥ 3 ॥
ප්රතිජග්රාහ ධර්මාත්මා රාඝවස්තීක්ෂ්ණසායකෛඃ ।
ප්රතිගෘහ්ය ච තද්වර්ෂං නිමීලිත ඉවර්ෂභඃ ॥ 4 ॥
රාමඃ ක්රෝධං පරං භේජේ වධාර්ථං සර්වරක්ෂසාම් ।
තතඃ ක්රෝධසමාවිෂ්ටඃ ප්රදීප්ත ඉව තේජසා ॥ 5 ॥
ශරෛරවාකිරත්සෛන්යං සර්වතස්සහදූෂණම් ।
තතස්සේනාපතිඃ ක්රුද්ධෝ දූෂණශ්ශත්රුදූෂණඃ ॥ 6 ॥
ශරෛරශනිකල්පෛස්තං රාඝවං සමවාකිරත් ।
තතෝ රාමස්සුසංකෘද්ධඃ ක්ෂුරේණාස්ය මහද්ධනුඃ ॥ 7 ॥
චිච්ඡේද සමරේ වීරශ්චතුර්භිශ්චතුරෝ හයාන් ।
හත්වා චාශ්වාන්ශරෛස්තීක්ෂ්ණෛරර්ධචංද්රේණ සාරථේඃ ॥ 8 ॥
ශිරෝ ජහාර තද්රක්ෂස්ත්රිභිර්විව්යාධ වක්ෂසි ।
ස ච්ඡින්නධන්වා විරථෝ හතාශ්වෝ හතසාරථිඃ ॥ 9 ॥
ජග්රාහ ගිරිශෘංගාභං පරිඝං රෝමහර්ෂණම් ।
වේෂ්ටිතං කාංචනෛඃ පට්ටෛර්දේවසෛන්යප්රමර්දනම් ॥ 10 ॥
ආයසෛශ්ශංකුභිස්තීක්ෂ්ණෛඃ කීර්ණං පරවසෝක්ෂිතම් ।
වජ්රාශනිසමස්පර්ශං පරගෝපුරදාරණම් ॥ 11 ॥
තං මහෝරගසංකාශං ප්රගෘහ්ය පරිඝං රණේ ।
දූෂණෝऽභ්යද්රවද්රාමං ක්රූරකර්මා නිශාචරඃ ॥ 12 ॥
තස්යාභිපතමානස්ය දූෂණස්ය ස රාඝවඃ ।
ද්වාභ්යාං ශරාභ්යාං චිච්ඡේද සහස්තාභරණෞ භුජෞ ॥ 13 ॥
භ්රෂ්ටස්තස්ය මහාකායඃ පපාත රණමූර්ධනි ।
පරිඝශ්ඡින්නහස්තස්ය ශක්රධ්වජ ඉවාග්රතඃ ॥ 14 ॥
ස කරාභ්යාං විකීර්ණාභ්යාං පපාත භුවි දූෂණඃ ।
විෂාණාභ්යාං විශීර්ණාභ්යාං මනස්වීව මහාගජඃ ॥ 15 ॥
තං දෘෂ්ට්වා පතිතං භූමෞ දූෂණං නිහතං රණේ ।
සාධුසාධ්විති කාකුත්ස්ථං සර්වභූතාන්යපූජයන් ॥ 16 ॥
ඒතස්මින්නංතරේ ක්රුද්ධාස්ත්රයඃ සේනාග්රයායිනඃ ।
සංහෘත්යාභ්යද්රවන් රාමං මෘත්යුපාශාවපාශිතාඃ ॥ 17 ॥
මහාකපාලඃ ස්ථූලාක්ෂඃ ප්රමාථී ච මහාබලඃ ।
මහාකපාලෝ විපුලං ශූලමුද්යම්ය රාක්ෂසඃ ॥ 18 ॥
ස්ථූලාක්ෂඃ පට්ටිසං ගෘහ්ය ප්රමාථී ච පරශ්වධම් ।
දෘෂ්ට්වෛවාපතතස්තූර්ණං රාඝවස්සායකෛශ්ශිතෛඃ ॥ 19 ॥
තීක්ෂ්ණාග්රෛඃ ප්රතිජග්රාහ සංප්රාප්තානතිථීනිව ।
මහාකපාලස්ය ශිරශ්චිච්ඡේද පරමේෂුභිඃ ॥ 20 ॥
අසංඛ්යේයෛස්තු බාණෞඝෛඃ ප්රමමාථ ප්රමාථිනම් ।
ස පපාත හතෝ භූමෞ විටපීව මහාද්රුමඃ ॥ 21 ॥
ස්ථූලාක්ෂස්යාක්ෂිණී තීක්ෂ්ණෛඃ පූරයාමාස සායකෛඃ ।
දූෂණස්යානුගාන්පංචසහස්රාන්කුපිතඃ ක්ෂණාත් ॥ 22 ॥
බාණෞඝෛඃ පංචසාහස්රෛරනයද්යමසාදනම් ।
දූෂණං නිහතං දෘෂ්ට්වා තස්ය චෛව පදානුගාන් ॥ 23 ॥
ව්යාදිදේශ ඛරඃ ක්රුද්ධඃ සේනාධ්යක්ෂාන්මහාබලාන් ।
අයං විනිහතස්සංඛ්යේ දූෂණස්සපදානුගඃ ॥ 24 ॥
මහත්යා සේනයා සාර්ධං යුද්ධ්වා රාමං කුමානුෂම් ।
ශස්ත්රෛර්නානාවිධාකාරෛර්හනධ්වං සර්වරාක්ෂසාඃ ॥ 25 ॥
ඒවමුක්ත්වා ඛරඃ ක්රුද්ධෝ රාමමේවාභිදුද්රුවේ ।
ශ්යේනගාමී පෘථුග්රීවෝ යජ්ඤශත්රුර්විහංගමඃ ॥ 26 ॥
දුර්ජයඃ කරවීරාක්ෂඃ පරුෂඃ කාලකාර්මුකඃ ।
මේඝමාලී මහාමාලී සර්පාස්යෝ රුධිරාශනඃ ॥ 27 ॥
ද්වාදශෛතේ මහාවීර්යා බලාධ්යක්ෂාස්සසෛනිකාඃ ।
රාමමේවාභ්යධාවංත විසෘජංතශ්ශරෝත්තමාන් ॥ 28 ॥
තතඃ පාවකසංකාශෛර්හේමවජ්රවිභූෂිතෛඃ ।
ජඝාන ශේෂං තේජස්වී තස්ය සෛන්යස්ය සායකෛඃ ॥ 29 ॥
තේ රුක්මපුංඛා විශිඛාස්සධූමා ඉව පාවකාඃ ।
නිජඝ්නුස්තානි රක්ෂාංසි වජ්රා ඉව මහාද්රුමාන් ॥ 30 ॥
රක්ෂසාං තු ශතං රාමශ්ශතේනෛකේන කර්ණිනා ।
සහස්රං ච සහස්රේණ ජඝාන රණමූර්ධනි ॥ 31 ॥
තෛර්භින්නවර්මාභරණාශ්ඡින්නභින්නශරාසනාඃ ।
නිපේතුශ්ශෝණිතාදිග්ධා ධරණ්යාං රජනීචරාඃ ॥ 32 ॥
තෛර්මුක්තකේශෛස්සමරේ පතිතෛශ්ශෝණිතෝක්ෂිතෛඃ ।
ආස්තීර්ණා වසුධා කෘත්ස්නා මහාවේදිඃ කුශෛරිව ॥ 33 ॥
ක්ෂණේන තු මහාඝෝරං වනං නිහතරාක්ෂසම් ।
බභූව නිරයප්රඛ්යං මාංසශෝණිතකර්දමම් ॥ 34 ॥
චතුර්දශ සහස්රාණි රක්ෂසාං භීමකර්මණාම් ।
හතාන්යේකේන රාමේණ මානුෂේණ පදාතිනා ॥ 35 ॥
තස්ය සෛන්යස්ය සර්වස්ය ඛරශ්ශේෂෝ මහාරථඃ ।
රාක්ෂසස්ත්රිශිරාශ්චෛව රාමශ්ච රිපුසූදනඃ ॥ 36 ॥
ශේෂා හතා මහාසත්වා රාක්ෂසා රණමූර්ධනි ।
ඝෝරා දුර්විෂහාඃ සර්වේ ලක්ෂ්මණස්යාග්රජේන තේ ॥ 37 ॥
තතස්තු තද්භීමබලං මහාහවේ සමීක්ෂ්ය රාමේණ හතං බලීයසා ।
රථේන රාමං මහතා ඛරස්තදා සමාසසාදේංද්ර ඉවෝද්යතාශනිඃ ॥ 38 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ෂඩ්විංශස්සර්ගඃ ॥
