ශ්රීමද්වාල්මීකීය රාමායණේ කිෂ්කිංධාකාංඩම් ।
අථ දශමස්සර්ගඃ ।
තතඃ ක්රෝධසමාවිෂ්ටං සම්රබ්ධං තමුපාගතම් ।
අහං ප්රසාදයාංචක්රේ භ්රාතරං ප්රියකාම්යයා ॥ 1 ॥
දිෂ්ට්යාසි කුශලී ප්රාප්තෝ නිහතශ්ච ත්වයා රිපුඃ ।
අනාථස්ය හි මේ නාථස්ත්වමේකෝऽනාථනංදනඃ ॥ 2 ॥
ඉදං බහුශලාකං තේ පූර්ණචංද්රමිවෝදිතම් ।
ඡත්රං සවාලව්යජනං ප්රතීච්ඡස්ව මයා ධෘතම් ॥ 3 ॥
ආර්තශ්චාථ බිලද්වාරි ස්ථිතස්සංවත්සරං නෘප ।
දෘෂ්ට්වාऽහං ශෝණිතං ද්වාරි බිලාච්චාපි සමුත්ථිතම් ॥ 4 ॥
ශෝකසංවිග්නහෘදයෝ භෘශං ව්යාකුලිතේංද්රියඃ ।
අපිධාය බිලද්වාරං ශෛලශෘංගේණ තත්තථා ॥ 5 ॥
තස්මාද්දේශාදපාක්රම්ය කිෂ්කිංධාං ප්රාවිශං පුනඃ ।
විෂාදාත්විහ මාං දෘෂ්ට්වා පෞරෛර්මංත්රිභිරේව ච ॥ 6 ॥
අභිෂික්තෝ න කාමේන තන්මේත්වං ක්ෂංතුමර්හසි ।
ත්වමේව රාජා මානාර්හස්සදා චාහං යථා පුරම් ॥ 7 ॥
රාජභාවනියෝගෝऽයං මම ත්වද්විරහාත්කෘතඃ ।
සාමාත්යපෞරනගරං ස්ථිතං නිහතකංටකම් ॥ 8 ॥
න්යාසභූතමිදං රාජ්යං තව නිර්යාතයාම්යහම් ।
මා ච රෝෂං කෘථාස්සෞම්ය මයි ශත්රුනිබර්හණ ॥ 9 ॥
යාචේ ත්වාං ශිරසා රාජන්මයා බද්ධෝऽයමංජලිඃ ।
බලාදස්මින් සමාගම්ය මංත්රිභිඃ පුරවාසිභිඃ ॥ 10 ॥
රාජභාවේ නියුක්තෝऽහං ශූන්යදේශජිගීෂයා ।
ස්නිග්ධමේවං බ්රුවාණං මාං ස තු නිර්භර්ත්ස්ය වානරඃ ॥ 11 ॥
ධික්ත්වාමිති ච මා මුක්ත්වා බහු තත්තදුවාච හ ।
ප්රකෘතීශ්ච සමානීය මුංත්රිණශ්චෛව සම්මතාන් ॥ 12 ॥
මාමාහ සුහෘදාං මධ්යේ වාක්යං පරමගර්හිතම් ।
විදිතං වෝ යථා රාත්රෞ මායාවී ස මහාසුරඃ ॥ 13 ॥
මාං සමාහ්වයත ක්රූරෝ යුද්ධාකාංක්ෂී සුදුර්මතිඃ ।
තස්ය තද්වචනං ශ්රුත්වා නිස්සෘතෝऽහං නෘපාලයාත් ॥ 14 ॥
අනුයාතශ්ච මාං තූර්ණමයං භ්රාතා සුදාරුණඃ ।
ස තු දෘෂ්ට්වෛව මාං රාත්රෞ සද්විතීයං මහාබලඃ ॥ 15 ॥
ප්රාද්රවද්භයසංත්රස්තෝ වීක්ෂ්යාවාං සමුපාගතෞ ।
අනුද්රුතශ්ච වේගේන ප්රවිවේශ මහාබිලම් ॥ 16 ॥
තං ප්රවිෂ්ටං විදිත්වා සුඝෝරං සුමහද්බිලම් ।
අයමුක්තෝऽථ මේ භ්රාතා මයා තු ක්රූරදර්ශනඃ ॥ 17 ॥
අහත්වා නාස්ති මේ ශක්තිඃ ප්රතිගංතුමිතඃ පුරීම් ।
බිලද්වාරි ප්රතීක්ෂ ත්වං යාවදේනං නිහන්ම්යහම් ॥ 18 ॥
ස්ථිතෝऽයමිති මත්වා තු ප්රවිෂ්ටෝऽහං දුරාසදම් ।
තං ච මේ මාර්ගමාණස්ය ගතස්සංවත්සරස්තදා ॥ 19 ॥
ස තු දෘෂ්ටෝ මයා ශත්රුරනිර්වේදාද්භයාවහඃ ।
නිහතශ්ච මයා තත්ර සෝऽසුරෝ බංධුභිස්සහ ॥ 20 ॥
තස්යාස්යාත්තු ප්රවෘත්තේන රුධිරෞඝේණ තද්බිලම් ।
පූර්ණමාසීද්දුරාක්රාමං ස්තනතස්තස්ය භූතලේ ॥ 21 ॥
සූදයිත්වා තු තං ශත්රුං වික්රාංතං දුංදුභේස්සුතම් ।
නිෂ්ක්රාමන්නේව පශ්යාමි බිලස්ය පිහිතං මුඛම් ॥ 22 ॥
වික්රෝශමානස්ය තු මේ සුග්රීවේති පුනඃ පුනඃ ।
යදා ප්රතිවචෝ නාස්ති තතෝऽහං භෘශදුඃඛිතඃ ॥ 23 ॥
පාදප්රහාරෛස්තු මයා බහුභිස්තද්විදාරිතම් ।
තතෝऽහං තේන නිෂ්ක්රම්ය යථා පුරමුපාගතඃ ॥ 24 ॥
අත්රානේනාස්මි සංරුද්ධෝ රාජ්යං ප්රාර්ථයතාऽත්මනඃ ।
සුග්රීවේණ නෘශංසේන විස්මෘත්ය භ්රාතෘසෞහෘදම් ॥ 25 ॥
ඒවමුක්ත්වා තු මාං තත්ර වස්ත්රේණෛකේන වානරඃ ।
නිර්වාසයාමාස තදා වාලී විගතසාධ්වසඃ ॥ 26 ॥
තේනාහමපවිද්ධශ්ච හෘතදාරශ්ච රාඝව ।
තද්භයාච්ඡ මහීකෘත්ස්නා ක්රාංතේයං සවනාර්ණවා ॥ 27 ॥
ඍෂ්යමූකං ගිරිවරං භාර්යාහරණදුඃඛිතඃ ।
ප්රවිෂ්ටෝऽස්මි දුරාධර්ෂං වාලිනඃ කාරණාංතරේ ॥ 28 ॥
ඒතත්තේ සර්වමාඛ්යාතං වෛරානුකථනං මහත් ।
අනාගසා මයා ප්රාප්තං ව්යසනං පශ්ය රාඝව ॥ 29 ॥
වාලිනස්තු භයාර්තස්ය සර්වලෝකභයංකර ।
කර්තුමර්හසි මේ වීර ප්රසාදං තස්ය නිග්රහාත් ॥ 30 ॥
ඒවමුක්තස්ස තේජස්වී ධර්මජ්ඤෝ ධර්මසංහිතම් ।
වචනං වක්තුමාරේභේ සුග්රීවං ප්රහසන්නිව ॥ 31 ॥
අමෝඝාස්සූර්යසංකාශා මමෛතේ නිශිතා ශ්ශරාඃ ।
තස්මින්වාලිනි දුර්වෘත්තේ නිපතිෂ්යංති වේගිතාඃ ॥ 32 ॥
යාවත්තං නාභිපශ්යාමි තව භාර්යාපහාරිණම් ।
තාවත්ස ජීවේත්පාපාත්මා වාලී චාරිත්රදූෂකඃ ॥ 33 ॥
ආත්මානුමානාත්පශ්යාමි මග්නං ත්වාං ශෝකසාගරේ ।
ත්වාමහං තාරයිෂ්යාමි කාමං ප්රාප්ස්යසි පුෂ්කලම් ॥ 34 ॥
තස්ය තද්වචනං ශ්රුත්වා හර්ෂපෞරුෂවර්ධනම් ।
සුග්රීවඃ පරමප්රීතස්සුමහද්වාක්යමබ්රවීත් ॥ 35 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ දශමස්සර්ගඃ ॥
