ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ද්විචත්වාරිංශස්සර්ගඃ ।
අථ ප්රස්ථාප්ය සුග්රීවස්තාන්හරීංදක්ෂිණාං දිශම් ।
අබ්රවීන්මේඝසංකාශං සුෂේණං නාම යූථපම් ॥ 1 ॥
තාරායාඃ පිතරං රාජා ශ්වශුරං භීමවික්රමම් ।
අබ්රවීත්ප්රාංජලිර්වාක්යමභිගම්ය ප්රණම්ය ච ॥ 2 ॥
මරීචිපුත්රං මාරීචමර්චිෂ්මංතං මහාකපිම් ।
වෘතං කපිවරෛ ශ්ශූරෛර්මහේංද්රසදෘශද්යුතිම් ॥ 3 ॥
බුද්ධිවික්රමසංපන්නං වෛනතේයසමද්යුතිම් ।
මරීචිපුත්රාන්මාරීචානර්චිර්මාලාන්මහාබලාන් ॥ 4 ॥
ඍෂිපුත්රාංශ්චතාංත්සර්වාන්ප්රතීචීමාදිශද්දිශම් ।
ද්වාභ්යාං ශතසහස්රාභ්යාං කපීනාං කපිසත්තමාඃ ॥ 5 ॥
සුෂේණප්රමුඛා යූයං වෛදේහීං පරිමාර්ගතඃ ।
සුරාෂ්ට්රාන්සහබාහ්ලීකාන් ශ්චංද්රචිත්රාංස්තථෛව ච ॥ 6 ॥
ස්ඵීතාංජනපදාන්රම්යාන්විපුලානි පුරාණි ච ।
පුන්නාගගහනං කුක්ෂිං වකුලෝද්දාලකාකුලම් ॥ 7 ॥
තථා කේතකෂංඩාංශ්ච මාර්ගධ්වං හරියූථපාඃ ।
ප්රත්යක්ස්රෝතෝගමාශ්චෛව නද්යශ්ශීතජලාශ්ශිවාඃ ॥ 8 ॥
තාපසානාමරණ්යානි කාංතාරා ගිරයශ්ච යේ ।
තත්රස්ථලීං මරුප්රායාමත්යුච්චශිරසශ්ශිලාඃ ॥ 9 ॥
ගිරිජාලාවෘතාං දුර්ගාං මාර්ගිත්වා පශ්චිමාං දිශම් ।
තතඃ පශ්චිමමාසාද්ය සමුද්රං ද්රෂ්ටුමර්හථ ॥ 10 ॥
තිමිනක්රායුතජලමක්ෂෝභ්යමථ වානරාඃ ।
තතඃ කේතකෂංඩේෂු තමාලගහනේෂු ච ॥ 11 ॥
කපයෝ විහරිෂ්යංති නාරිකේලවනේෂු ච ।
තත්ර සීතාං ච මාර්ගධ්වං නිලයං රාවණස්ය ච ॥ 12 ॥
වේලාතලනිවිෂ්ටේෂු පර්වතේෂු වනේෂු ච ।
මුරචීපත්තනං චෛව රම්යං චෛව ජටීපුරම් ॥ 13 ॥
අවංතීමංගලෝපාං ච තථා චාලක්ෂිතං වනම් ।
රාෂ්ට්රාණි ච විශාලානි පත්තනානි තතස්තතඃ ॥ 14 ॥
සිංධුසාගරයෝශ්චෛව සංගමේ තත්ර පර්වතඃ ।
මහාන්හේමගිරිර්නාම ශතශෘංගෝ මහාද්රුමඃ ॥ 15 ॥
තස්ය ප්රස්ථේෂු රම්යේෂු සිංහාඃ පක්ෂගමාඃ ස්ථිතාඃ ।
තිමිමත්ස්යගජාංශ්චෛව නීඩාන්යාරෝපයංති තේ ॥ 16 ॥
තානි නීඩානි සිංහානාං ගිරිශෘංගගතාශ්ච යේ ।
දෘප්තාස්තෘප්තාශ්ච මාතංගාස්තෝයදස්වනනිස්වනාඃ ॥ 17 ॥
විචරංති විශාලේऽස්මිංස්තෝයපූර්ණේ සමංතතඃ ।
තස්ය ශෘංගං දිවස්පර්ශං කාංචනං චිත්රපාදපම් ॥ 18 ॥
සර්වමාශු විචේතව්යං කපිභිඃ කාමරූපිභිඃ ।
කෝටිං තත්ර සමුද්රේ තු කාංචනීං ශතයෝජනාම් ॥ 19 ॥
දුර්දර්ශාං පාරියාත්රස්ය ගතාං ද්රක්ෂ්යථ වානරාඃ ।
කෝට්යස්තත්ර චතුර්විංශද්ගංධර්වාණාං තපස්විනාම් ॥ 20 ॥
වසංත්යග්නිනිකාශානාං ඝෝරාණාං කාමරූපිණාම් ।
පාවකාර්චිඃ ප්රතීකාශාස්සමවේතාස්සහස්රශඃ ॥ 21 ॥
නාත්යාසාදයිතව්යාස්තේ වානරෛර්භීමවික්රමෛඃ ।
නාදේයං ච ඵලං තස්මාද්දේශාත්කිංචිත් ප්ලවංගමෛඃ ॥ 22 ॥
දුරාසදා හි තේ වීරා ස්සත්ත්වවංතෝ මහාබලාඃ ।
ඵලමූලානි තේ තත්ර රක්ෂංතේ භීමවික්රමාඃ ॥ 23 ॥
තත්ර යත්නශ්ච කර්තව්යෝ මාර්ගිතව්යා ච ජානකී ।
න හි තේභ්යෝ භයං කිංචිත්කපිත්වමනුවර්තතාම් ॥ 24 ॥
තත්ර වෛඪූර්යවර්ණාභෝ වජ්රසංස්ථානසංස්ථිතඃ ।
නානාද්රුමලතාකීර්ණෝ වජ්රෝ නාම මහාගිරිඃ ॥ 25 ॥
ශ්රීමාන්සමුදිතස්තත්ර යෝජනානාං ශතං සමම් ।
ගුහාස්තත්ර විචේතව්යා ප්රයත්නේන ප්ලවංගමාඃ ॥ 26 ॥
චතුර්භාගේ සමුද්රස්ය චක්රවාන්නාම පර්වතඃ ।
තත්ර චක්රං සහස්රාරං නිර්මිතං විශ්වකර්මණා ॥ 27 ॥
තත්ර පංචජනං හත්වා හයග්රීවං ච දානවම් ।
ආජහාර තතශ්චක්රං ශංඛං ච පුරුෂෝත්තමඃ ॥ 28 ॥
තස්ය සානුෂු චිත්රේෂු විශාලාසු ගුහාසු ච ।
රාවණ ස්සහ වෛදේහ්යා මාර්ගිතව්යස්තත ස්තතඃ ॥ 29 ॥
යෝජනානාං චතුෂ්ෂෂ්ටිර්වරාහෝ නාම පර්වතඃ ।
සුවර්ණශෘංගස්සුශ්රීමා නගාධේ වරුණාලයේ ॥ 30 ॥
තත්ර ප්රාග්ජ්යෝතිෂං නාම ජාතරූපමයං පුරම් ।
යස්මින්වසති දුෂ්ටාත්මා නරකෝ නාම දානවඃ ॥ 31 ॥
තත්ර සානුෂු චිත්රේෂු විශාලාසු ගුහාසු ච ।
රාවණස්සහ වෛදේහ්යා මාර්ගිතව්යස්තතස්තතඃ ॥ 32 ॥
තමතික්රම්ය ශෛලේංද්රං කාංචනාංතරනිර්දරඃ ।
පර්වත ස්සර්වසෞවර්ණෝ ධාරාප්රස්රවණායුතඃ ॥ 33 ॥
තං ගජාශ්ච වරාහාශ්ච සිංහ ව්යාඝ්රාශ්ච සර්වතඃ ।
අභිගර්ජංති සතතං තේන ශබ්දේන දර්පිතාඃ ॥ 34 ॥
යස්මින්හරිහය්ශීමාන්මහේංද්රඃ පාකශාසනඃ ।
අභිෂික්තඃ සුරෛ රාජා මේඝවාන්නාම පර්වතඃ ॥ 35 ॥
තමතික්රම්ය ශෛලේංද්රං මහේංද්රපරිපාලිතම් ।
ෂෂ්ටි ර්ගිරිසහස්රාණි කාංචනානි ගමිෂ්යථ ॥ 36 ॥
තරුණාදිත්යවර්ණානි භ්රාජමානානි සර්වතඃ ।
ජාතරූපමයෛර්වෘක්ෂෛ ශෝභිතානි සුපුෂ්පිතෛඃ ॥ 37 ॥
තේෂාං මධ්යේ ස්ථිතෝ රාජා මේරුරුත්තරපර්වතඃ ।
ආදිත්යේන ප්රසන්නේන ශෛලෝ දත්තවරඃ පුරා ॥ 38 ॥
තේනෛව මුක්තශ්ශෛලේංද්රස්සර්ව ඒව ත්වදාශ්රයාඃ ।
මත්ප්රසාදාද්භවිෂ්යංති දිවා රාත්රං ච කාංචනාඃ ॥ 39 ॥
ත්වයි යේ චාපි වත්ස්යංති දේවගංධර්වදානවාඃ ।
තේ භවිෂ්යංති රක්තාශ්ච ප්රභයා කාංචනප්රභාඃ ॥ 40 ॥
විශ්වේ දේවාශ්ච මරූතෝ වසවශ්ච දිවෞකසඃ ।
ආගම්ය පශ්චිමාං සංධ්යාං මේරුමුත්තමපර්වතම් ॥ 41 ॥
ආදිත්යමුපතිෂ්ඨංති තෛශ්ච සූර්යෝऽභිපූජිතඃ ।
අදෘශ්යස්සර්වභූතානාමස්තං ගච්ඡතිපර්වතම් ॥ 42 ॥
යෝජනානාං සහස්රාණි දශ තානි දිවාකරඃ ।
මුහූර්තාර්ධේන තං ශීඝ්රමභියාති ශිලෝච්චයම් ॥ 43 ॥
ශෘංගේ තස්ය මහද්දිව්යං භවනං සූර්යසන්නිභම් ।
ප්රාසාදගණසංබාධං විහිතං විශ්වකර්මණා ॥ 44 ॥
ශෝභිතං තරුභිශ්චිත්රෛර්නානාපක්ෂිසමාකුලෛඃ ।
නිකේතං පාශහස්තස්ය වරුණස්ය මහාත්මනඃ ॥ 45 ॥
අංතරා මේරුමස්තං ච තාලෝ දශශිරා මහාන් ।
ජාතරූපමය්ශීමාන්භ්රාජතේ චිත්රවේදිකඃ ॥ 46 ॥
තේෂු සර්වේෂු දුර්ගේෂු සරස්සු ච සරිත්සු ච ।
රාවණස්සහ වෛදේහ්යා මාර්ගිතව්යස්තත ස්තතඃ ॥ 47 ॥
යත්ර තිෂ්ඨති ධර්මජ්ඤස්තපසා ස්වේන භාවිතඃ ।
මේරුසාවර්ණිරිත්යේව ඛ්යාතෝ වෛ බ්රහ්මණා සමඃ ॥ 48 ॥
ප්රෂ්ටව්යෝ මේරුසාවර්ණිර්මහර්ෂිඃ සූර්යසන්නිභඃ ।
ප්රණම්ය ශිරසා භූමෞ ප්රවෘත්තිං මෛථිලීං ප්රති ॥ 49 ॥
ඒතාව ජ්ජීවලෝකස්ය භාස්කරෝ රජනීක්ෂ්යේ ।
කෘත්වා විතිමිරං සර්වමස්තං ගච්ඡති පර්වතම් ॥ 50 ॥
ඒතාවද්වානරෛශ්ශක්යං ගංතුං වානරපුංගවාඃ ।
අභාස්කරමමර්යාදං න ජානීමස්තතඃ පරම් ॥ 51 ॥
අධිගම්ය තු වෛදේහීං නිලයං රාවණස්ය ච ।
අස්ත පර්වතමාසාද්ය පූර්ණේ මාසේ නිවර්තත ॥ 52 ॥
ඌර්ධ්වං මාසාන්න වස්තව්යං වසන් වධ්යෝ භවේන්මම ।
සහෛව ශූරෝ යුෂ්මාභිශ්ශ්වශුරෝ මේ ගමිෂ්යති ॥ 53 ॥
ශ්රෝතව්යං සර්වමේතස්ය භවද්භිර්දිෂ්ටකාරිභිඃ ।
ගුරුරේෂ මහාබාහුශ්ශ්වශුරෝ මේ මහාබලඃ ॥ 54 ॥
භවංතශ්චාපි වික්රාංතාඃ ප්රමාණං සර්ව කර්මසු ।
ප්රමාණමේනං සංස්ථාප්ය පශ්යධ්වං පශ්චිමාං දිශම් ॥ 55 ॥
දෘෂ්ටායාං තු නරේංද්රස්ය පත්න්යාමමිතතේජසඃ ।
කෘතකෘත්යා භවිෂ්යාමඃ කෘතස්ය ප්රතිකර්මණා ॥ 56 ॥
අතෝऽන්යදපි යත්කාර්යං කාර්යස්යාස්ය හිතං භවේත් ।
සංප්රධාර්ය භවද්භිශ්ච දේශකාලාර්ථසංහිතම් ॥ 57 ॥
තතඃ සුෂේණප්රමුඛාඃ ප්ලවංගාමාඃ ස්සුග්රීව වාක්යං නිපුණං නිශම්ය ।
ආමංත්ය්ර සර්වේ ප්ලවගාධිපං තේ ජග්මුර්දිශං තාං වරුණාභිගුප්තාම් ॥ 58 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ද්විචත්වාරිංශස්සර්ගඃ ॥
