ශ්රීමද්වාල්මීකීය රාමායණේ සුංදරකාංඩම් ।
අථ තෘතීයස්සර්ගඃ ।
ස ලංබශිඛරේ ලංබේ ලංබතෝයදසන්නිභේ ।
සත්ත්වමාස්ථාය මේධාවී හනුමාන් මාරුතාත්මජඃ ॥ 1 ॥
නිශි ලංකාං මහාසත්ත්වෝ විවේශ කපිකුංජරඃ ।
රම්යකානනතෝයාඪ්යාං පුරීං රාවණපාලිතාම් ॥ 2 ॥
ශාරදාංබුධරප්රඛ්යෛර්භවනෛරුපශෝභිතාම් ।
සාගරෝපමනිර්ඝෝෂාං සාගරානිලසේවිතාම් ॥ 3 ॥
සුපුෂ්ටබලසංපුෂ්ටාං යථෛව විටපාවතීම් ।
චාරුතෝරණනිර්යූහාං පාංඩුරද්වාරතෝරණාම් ॥ 4 ॥
භුජගාචරිතාං ගුප්තාං ශුභාං භෝගවතීමිව ।
තාං ස විද්යුද්ඝනාකීර්ණාං ජ්යෝතිර්මාර්ගනිෂේවිතාම් ॥ 5 ॥
මංදමාරුතසංචාරාං යථේංද්රස්යාමරාවතීම් ।
ශාතකුංභේන මහතා ප්රාකාරේණාභිසංවෘතාම් ॥ 6 ॥
කිංකිණීජාලඝෝෂාභිඃ පතාකාභිරලංකෘතාම් ।
ආසාද්ය සහසා හෘෂ්ටඃ ප්රාකාරමභිපේදිවාන් ॥ 7 ॥
විස්මයාවිෂ්ටහෘදයඃ පුරීමාලෝක්ය සර්වතඃ ।
ජාංබූනදමයෛර්ද්වාරෛර්වෛඩූර්යකෘතවේදිකෛඃ ॥ 8 ॥
වජ්රස්ඵටිකමුක්තාභිර්මණිකුට්ටිමභූෂිතෛඃ ।
තප්තහාටකනිර්යූහෛ රාජතාමලපාංඩුරෛඃ ॥ 9 ॥
වෛඪූර්යකෘතසෝපානෛඃ ස්ඵාටිකාංතරපාංසුභිඃ ।
චාරුසංජවනෝපේතෛඃ ඛමිවෝත්පතිතෛඃ ශුභෛඃ ॥ 10 ॥
ක්රෞංචබර්හිණසංඝුෂ්ටෛඃ රාජහංස නිෂේවිතෛඃ ।
තූර්යාභරණනිර්ඝෝෂෛඃ සර්වතඃ ප්රතිනාදිතාම් ॥ 11 ॥
වස්වෞකසාරාප්රතිමාං තාං වීක්ෂ්ය නගරීං තතඃ ।
ඛමිවෝත්පතිතුං කාමාං ජහර්ෂ හනුමාන් කපිඃ ॥ 12 ॥
තාං සමීක්ෂ්ය පුරීං රම්යාං රාක්ෂසාධිපතේඃ ශුභාම් ।
අනුත්තමාමෘද්ධියුතාං චිංතයාමාස වීර්යවාන් ॥ 13 ॥
නේයමන්යේන නගරී ශක්යා ධර්ෂයිතුං බලාත් ।
රක්ෂිතා රාවණබලෛරුද්යතායුධධාරිභිඃ ॥ 14 ॥
කුමුදාංගදයෝර්වාපි සුෂේණස්ය මහාකපේඃ ।
ප්රසිද්ධේයං භවේද්භූමිර්මෛංදද්විවිදයෝරපි ॥ 15 ॥
විවස්වතස්තනූජස්ය හරේශ්ච කුශපර්වණඃ ।
ඍක්ෂස්ය කේතුමාලස්ය මම චෛව ගතිර්භවේත් ॥ 16 ॥
සමීක්ෂ්ය තු මහාබාහූ රාඝවස්ය පරාක්රමම් ।
ලක්ෂ්මණස්ය ච වික්රාංතමභවත් ප්රීතිමාන් කපිඃ ॥ 17 ॥
තාං රත්නවසනෝපේතාං කෝෂ්ඨාගාරාවතංසකාම් ।
යංත්රාගාරස්තනීමෘද්ධාං ප්රමදාමිව භූෂිතාම් ॥ 18 ॥
තාං නෂ්ටතිමිරාං දීප්තෛර්භාස්වරෛශ්ච මහාගෘහෛඃ ।
නගරීං රාක්ෂසේංද්රස්ය ස දදර්ශ මහාකපිඃ ॥ 19 ॥
ථ සා හරිශාර්දූලං ප්රවිශංතං මහාබලම් ।
නගරී ස්වේන රූපේණ දදර්ශ පවනාත්මජම් ॥ 20 ॥
සා තං හරිවරං දෘෂ්ට්වා ලංකා රාවණපාලිතා ।
ස්වයමේවෝත්ථිතා තත්ර විකෘතානනදර්ශනා ॥ 21 ॥
පුරස්තාත්කපිවර්යස්ය වායුසූනෝරතිෂ්ඨත ।
මුංචමානා මහානාදමබ්රවීත්පවනාත්මජම් ॥ 22 ॥
කස්ත්වං කේන ච කාර්යේණ ඉහ ප්රාප්තෝ වනාලය ।
කථයස්වේහ යත්තත්ත්වං යාවත්ප්රාණා ධරංති තේ ॥ 23 ॥
න ශක්යං ඛල්වියං ලංකා ප්රවේෂ්ටුං වානර ත්වයා ।
රක්ෂිතා රාවණබලෛරභිගුප්තා සමංතතඃ ॥ 24 ॥
අථ තාමබ්රවීද්වීරෝ හනුමානග්රතඃ ස්ථිතාම් ।
කථයිෂ්යාමි තේ තත්ත්වං යන්මාං ත්වං පරිපෘච්ඡසි ॥ 25 ॥
කා ත්වං විරූපනයනා පුරද්වාරේऽවතිෂ්ඨසි ।
කිමර්ථං චාපි මාං රුද්ධ්වා නිර්භර්ත්සයසි දාරුණා ॥ 26 ॥
හනුමද්වචනං ශ්රුත්වා ලංකා සා කාමරූපිණී ।
උවාච වචනං ක්රුද්ධා පරුෂං පවනාත්මජම් ॥ 27 ॥
අහං රාක්ෂසරාජස්ය රාවණස්ය මහාත්මනඃ ।
ආජ්ඤාප්රතීක්ෂා දුර්ධර්ෂා රක්ෂාමි නගරීමිමාම් ॥ 28 ॥
න ශක්යා මාමවජ්ඤාය ප්රවේෂ්ටුං නගරී ත්වයා ।
අද්ය ප්රාණෛඃ පරිත්යක්තඃ ස්වප්ස්යසේ නිහතෝ මයා ॥ 29 ॥
අහං හි නගරී ලංකා ස්වයමේව ප්ලවංගම ।
සර්වතඃ පරිරක්ෂාමි හ්යේතත්තේ කථිතං මයා ॥ 30 ॥
ලංකායා වචනං ශ්රුත්වා හනුමාන් මාරුතාත්මජඃ ।
යත්නවාන්ස හරිශ්රේෂ්ඨඃ ස්ථිතශ්ශෛල ඉවාපරඃ ॥ 31 ॥
ස තාං ස්ත්රීරූපවිකෘතාං දෘෂ්ටවා වානරපුංගවඃ ।
ආබභාෂේऽථ මේධාවී සත්ත්වවාන් ප්ලවගර්ෂභඃ ॥ 32 ॥
ද්රක්ෂ්යාමි නගරීං ලංකාං සාට්ටප්රාකාරතෝරණාම් ।
නිර්විශංකමිමංලෝකං පශ්යංත්යාස්තවසාංප්රතම් ।
ඉත්යර්ථමිහ සංප්රාප්තඃ පරං කෞතූහලං හි මේ ॥ 33 ॥
වනාන්යුපවනානීහ ලංකායාඃ කානනානි ච ।
සර්වතෝ ගෘහමුඛ්යානි ද්රෂ්ටුමාගමනං හි මේ ॥ 34 ॥
තස්ය තද්වචනං ශ්රුත්වා ලංකා සා කාමරූපිණී ।
භූය ඒව පුනර්වාක්යං බභාෂේ පරුෂාක්ෂරම් ॥ 35 ॥
මාමනිර්ජිත්ය දුර්බුද්ධේ රාක්ෂසේශ්වරපාලිතාම් ।
න ශක්යමද්ය තේ ද්රෂ්ටුං පුරීයං වානරාධම ॥ 36 ॥
තතඃ ස කපිශාර්දූලස්තාමුවාච නිශාචරීම් ।
දෘෂ්ට්වා පුරීමිමාං භද්රේ පුනර්යාස්යේ යථාගතම් ॥ 37 ॥
තතඃ කෘත්වා මහානාදං සා වෛ ලංකා භයාවහම් ।
තලේන වානරශ්රේෂ්ඨං තාඩයාමාස වේගිතා ॥ 38 ॥
තතඃ ස කපිශාර්දූලෝ ලංකයා තාඩිතෝ භෘශම් ।
නනාද සුමහානාදං වීර්යවාන් පවනාත්මජඃ ॥ 39 ॥
තතඃ සංවර්තයාමාස වාමහස්තස්ය සෝऽංගුලීඃ ।
මුෂ්ටිනාऽऽභිජඝානෛනාං හනුමාන් ක්රෝධමූර්ඡිතඃ ॥ 40 ॥
ස්ත්රී චේති මන්යමානේන නාතික්රෝධඃ ස්වයං කෘතඃ ।
සා තු තේන ප්රහාරේණ විහ්වලාංගී නිශාචරී ॥ 41 ॥
පපාත සහසා භූමෞ විකෘතානනදර්ශනා ।
තතස්තු හනුමාන් ප්රාජ්ඤස්තාං දෘෂ්ට්වා විනිපාතිතාම් ॥ 42 ॥
කෘපාං චකාර තේජස්වී මන්යමානඃ ස්ත්රියං තු තාම් ।
තතෝ වෛ භෘශසංවිග්නා ලංකා සා ගද්ගදාක්ෂරම් ॥ 43 ॥
උවාචාගර්විතං වාක්යං හනූමංතං ප්ලවංගමම් ।
ප්රසීද සුමහාබාහෝ ත්රායස්ව හරිසත්තම ॥ 44 ॥
සමයේ සෞම්ය තිෂ්ඨංති සත්ත්වවංතෝ මහාබලාඃ ।
අහං තු නගරී ලංකා ස්වයමේව ප්ලවංගම ॥ 45 ॥
නිර්ජිතාහං ත්වයා වීර වික්රමේණ මහාබල ।
ඉදං තු තථ්යං ශෘණු වෛ බ්රුවංත්යා මේ හරීශ්වර ॥ 46 ॥
ස්වයංභුවා පුරා දත්තං වරදානං යථා මම ।
යදා ත්වාං වානරඃ කශ්චිද්වික්රමාද්වශමානයේත් ॥ 47 ॥
තදා ත්වයා හි විජ්ඤේයං රක්ෂසාං භයමාගතම් ।
ස හි මේ සමයඃ සෞම්ය ප්රාප්තෝऽද්ය තව දර්ශනාත් ॥ 48 ॥
ස්වයංභූ විහිතඃ සත්යෝ න තස්යාස්ති ව්යතික්රමඃ ।
සීතානිමිත්තං රාජ්ඤස්තු රාවණස්ය දුරාත්මනඃ ॥ 49 ॥
රක්ෂසාං චෛව සර්වේෂාං විනාශඃ සමුපාගතඃ ।
තත්ප්රවිශ්ය හරිශ්රේෂ්ඨ පුරීං රාවණපාලිතාම් ॥ 50 ॥
විධත්ස්ව සර්වකාර්යාණි යානි යානීහ වාංඡසි ।
ප්රවිශ්ය ශාපෝපහතාං හරීශ්වර ශුභාං පුරීං රාක්ෂසමුඛ්යපාලිතාම් ।
යදෘච්ඡයා ත්වං ජනකාත්මජාං සතීං විමාර්ග සර්වත්ර ගතෝ යථාසුඛම් ॥ 51 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ තෘතීයස්සර්ගඃ ॥
