ශ්රීමද්වාල්මීකීය රාමායණේ සුංදරකාංඩම් ।
අථ ත්රිංශස්සර්ගඃ ।
හනුමානපි වික්රාංතඃ සර්වං ශුශ්රාව තත්ත්වතඃ ।
සීතායාස්ත්රිජටායාශ්ච රාක්ෂසීනාං ච තර්ජනම් ॥ 1 ॥
අවේක්ෂමාණස්තාං දේවීං දේවතාමිව නංදනේ ।
තතෝ බහුවිධාං චිංතාං චිංතයාමාස වානරඃ ॥ 2 ॥
යාං කපීනාං සහස්රාණි සුබහූන්යයුතානි ච ।
දික්ෂු සර්වාසු මාර්ගංතේ සේයමාසාදිතා මයා ॥ 3 ॥
චාරේණ තු සුයුක්තේන ශත්රෝශ්ශක්තිමවේක්ෂතා ।
ගූඪේන චරතා තාවදවේක්ෂිතමිදං මයා ॥ 4 ॥
රාක්ෂසානාං විශේෂශ්ච පුරී චේයමවේක්ෂිතා ।
රාක්ෂසාධිපතේරස්ය ප්රභාවෝ රාවණස්ය ච ॥ 5 ॥
යුක්තං තස්යාප්රමේයස්ය සර්වසත්ත්වදයාවතඃ ।
සමාශ්වාසයිතුං භාර්යාං පතිදර්ශනකාංක්ෂිණීම් ॥ 6 ॥
අහමාශ්වාසයාම්යේනාං පූර්ණචංද්රනිභානනාම් ।
අදෘෂ්ටදුඃඛාං දුඃඛාර්තාං දුඃඛස්යාංතමගච්ඡතීම් ॥ 7 ॥
යද්යප්යහමිමාං දේවීං ශෝකෝපහතචේතනාම් ।
අනාශ්වාස්ය ගමිෂ්යාමි දෝෂවද්ගමනං භවේත් ॥ 8 ॥
ගතේ හි මයි තත්රේයං රාජපුත්රී යශස්විනී ।
පරිත්රාණමවිංදංතී ජානකී ජීවිතං ත්යජේත් ॥ 9 ॥
මයා ච ස මහාබාහුඃ පූර්ණචංද්රනිභානනඃ ।
සමාශ්යාසයිතුං න්යාය්යස්සීතාදර්ශනලාලසඃ ॥ 10 ॥
නිශාචරීණාං ප්රත්යක්ෂමනර්හං චාභිභාෂිතම් ।
කථන්නු ඛලු කර්තව්යමිදං කෘච්ඡ්රගතෝ හ්යහම් ॥ 11 ॥
අනේන රාත්රිශේෂේණ යදි නාශ්වාස්යතේ මයා ।
සර්වථා නාස්ති සංදේහඃ පරිත්යක්ෂ්යති ජීවිතම් ॥ 12 ॥
රාමශ්ච යදි පෘච්ඡේන්මාං කිං මාං සීතාබ්රවීද්වචඃ ।
කිමහං තං ප්රති බ්රූයාමසංභාෂ්ය සුමධ්යමාම් ॥ 13 ॥
සීතාසංදේශරහිතං මාමිතස්ත්වරයාऽගතම් ।
නිර්දහේදපි කාකුත්ස්ය ක්රුද්ධස්තීව්රේණ චක්ෂුෂා ॥ 14 ॥
යදි චෝද්යෝජයිෂ්යාමි භර්තාරං රාමකාරණාත් ।
ව්යර්ථමාගමනං තස්ය සසෛන්යස්ය භවිෂ්යති ॥ 15 ॥
අංතරං තු අහං ආසාද්ය රාක්ෂසීනාං ඉහ ස්ථිතඃ ।
ශනෛඃ ආශ්වාසයිෂ්යාමි සම්තාප බහුලාං ඉමාම් ॥ 16 ॥
අහං ත්වතිතනුශ්චෛව වානරශ්ච විශේෂතඃ ।
වාචං චෝදාහරිෂ්යාමි මානුෂීමිහ සංස්කෘතාම් ॥ 17 ॥
යදි වාචං ප්රදාස්යාමි ද්විජාතිරිව සංස්කෘතාම් ।
රාවණං මන්යමානා මාං සීතා භීතා භවිෂ්යති ॥ 18 ॥
වානරස්ය විශේෂේණ කථං ස්යාදභිභාෂණම් ।
අවශ්යමේව වක්තව්යං මානුෂං වාක්යමර්ථවත් ॥ 19 ॥
මයා සාංත්වයිතුං ශක්යා නාන්යථේයමනිංදිතා ।
සේයමාලෝක්ය මේ රූපං ජානකී භාෂිතං තථා ॥ 20 ॥
රක්ෂෝභිස්ත්රාසිතා පූර්වං භූයස්ත්රාසං ගමිෂ්යති ।
තතෝ ජාතපරිත්රාසා ශබ්දං කුර්යාන්මනස්විනී ॥ 21 ॥
ජානමානා විශාලාක්ෂී රාවණං කාමරූපිණම් ।
සීතයා ච කෘතේ ශබ්දේ සහසා රාක්ෂසීගණාඃ ।
නානාප්රහරණෝ ඝෝරඃ සමේයාදංතකෝපමඃ ॥ 22 ॥
තතෝ මාං සංපරික්ෂිප්ය සර්වතෝ විකෘතානනාඃ ॥ 23 ॥
වධේ ච ග්රහණේ චෛව කුර්යුර්යත්නං යථාබලම් ।
ගෘහ්ය ශාඛාඃ ප්රශාඛාශ්ච ස්කංධාංශ්චෝත්තමශාඛිනාම් ॥ 24 ॥
දෘෂ්ට්වා විපරිධාවංතං භවේයුර්භයශංකිතාඃ ।
මම රූපං ච සංප්රේක්ෂ්ය වනේ විචරතෝ මහත් ॥ 25 ॥
රාක්ෂස්යෝ භයවිත්රස්තා භවේයුර්විකෘතානනාඃ ।
තතඃ කුර්යුස්සමාහ්වානං රාක්ෂස්යෝ රක්ෂසාමපි ॥ 26 ॥
රාක්ෂසේංද්රනියුක්තානාං රාක්ෂසේංද්රනිවේශනේ ।
තේ ශූලශක්තිනිස්ත්රිංශවිවිධායුධපාණයඃ ॥ 27 ॥
ආපතේයුර්විමර්දේऽස්මින්වේගේනෝද්වේගකාරණාත් ।
සමෘද්ධස්තෛස්තු පරිතෝ විධමන් රක්ෂසාං බලම් ॥ 28 ॥
ශක්නුයාං න තු සංප්රාප්තුං පරං පාරං මහෝදධේඃ ।
මාං වා ගෘහ්ණීයුරාප්ලුත්ය බහවශ්ශීඝ්රකාරිණඃ ॥ 29 ॥
ස්යාදියං චාගෘහීතාර්ථා මම ච ග්රහණං භවේත් ।
හිංසාභිරුචයෝ හිංස්යුරිමාං වා ජනකාත්මජාම් ॥ 30 ॥
විපන්නං ස්යාත්තතඃ කාර්යං රාමසුග්රීවයෝරිදම් ।
උද්දේශේ නෂ්ටමාර්ගේऽස්මින් රාක්ෂසෛඃ පරිවාරිතේ ॥ 31 ॥
සාගරේණ පරික්ෂිප්තේ ගුප්තේ වසති ජානකී ।
විශස්තේ වා ගෘහීතේ වා රක්ෂෝභිර්මයි සංයුගේ ॥ 32 ॥
නාන්යං පශ්යාමි රාමස්ය සහායං කාර්යසාධනේ ।
විමෘශංශ්ච න පශ්යාමි යෝ හතේ මයි වානරඃ ॥ 33 ॥
ශතයෝජනවිස්තීර්ණං ලංඝයේත මහෝදධිම් ।
කාමං හංතුං සමර්ථෝऽස්මි සහස්රාණ්යපි රක්ෂසාම් ॥ 34 ॥
න තු ශක්ෂ්යාමි සංප්රාප්තුං පරං පාරං මහෝදධේඃ ।
අසත්යානි ච යුද්ධානි සංශයෝ මේ න රෝචතේ ॥ 35 ॥
කශ්ච නිස්සංශයං කාර්යං කුර්යාත්ප්රාජ්ඤඃ සසංශයම් ।
ප්රාණත්යාගශ්ච වෛදේහ්යා භවේදනභිභාෂණේ ॥ 36 ॥
ඒෂ දෝෂෝ මහාන්හි ස්යාන්මම සීතාභිභාෂණේ ।
භූතාශ්චාර්ථා විනශ්යංති දේශකාලවිරෝධිතාඃ ॥ 37 ॥
වික්ලබං දූතමාසාද්ය තමඃ සූර්යෝදයේ යථා ।
අර්ථානර්ථාංතරේ බුද්ධිනිශ්චිතාපි න ශෝභතේ ॥ 38 ॥
ඝාතයංති හි කාර්යාණි දූතාඃ පංඩිතමානිනඃ ।
න විනශ්යේත්කථං කාර්යං වෛක්ලබ්යං න කථං භවේත් ॥ 39 ॥
ලංඝනං ච සමුද්රස්ය කථං නු න වෘථා භවේත් ।
කථං නු ඛලු වාක්යං මේ ශෘණුයාන්නෝද්විජේත වා ।
ඉති සංචිංත්ය හනුමාංශ්චකාර මතිමාන්මතිම් ॥ 40 ॥
රාමමක්ලිෂ්ටකර්මාණං සුබංධුමනුකීර්තයන් ॥ 41 ॥
නෛනාමුද්වේජයිෂ්යාමි තද්බංධුගතමානසාම් ।
ඉක්ෂ්වාකූණාං වරිෂ්ඨස්ය රාමස්ය විදිතාත්මනඃ ॥ 42 ॥
ශුභානි ධර්මයුක්තානි වචනානි සමර්පයන් ।
ශ්රාවයිෂ්යාමි සර්වාණි මධුරාං ප්රබ්රුවන් ගිරම් ॥ 43 ॥
ශ්රද්ධාස්යති යථාහීයං තථා සර්වං සමාදධේ ।
ඉති ස බහුවිධං මහානුභාවෝ ජගතිපතේඃ ප්රමදාමවේක්ෂමාණඃ ।
මධුරමවිතථං ජගාද වාක්යං ද්රුමවිටපාංතරමාස්ථිතෝ හනූමාන් ॥ 44 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ත්රිංශස්සර්ගඃ ॥
