ശ്രീമദ്വാല്മീകീയ രാമായണേ സുംദരകാംഡമ് ।
അഥ ചതുഃപംചാശസ്സര്ഗഃ ।
വീക്ഷമാണസ്തതോ ലംകാം കപിഃ കൃതമനോരഥഃ ॥ 1 ॥
വര്ധമാനസമുത്സാഹഃ കാര്യശേഷമചിംതയത് ।
കിന്നു ഖല്വവശിഷ്ടം മേ കര്തവ്യമിഹ സാംപ്രതമ് ॥ 2 ॥
യദേഷാം രക്ഷസാം ഭൂയഃ സംതാപജനനം ഭവേത് ।
വനം താവത്പ്രമഥിതം പ്രകൃഷ്ടാ രാക്ഷസാ ഹതാഃ ॥ 3 ॥
ബലൈകദേശഃ ക്ഷപിതശ്ശേഷം ദുര്ഗവിനാശനമ് ।
ദുര്ഗേ വിനാശിതേ കര്മ ഭവേത്സുഖപരിശ്രമമ് ।
അല്പയത്നേന കാര്യേഽസ്മിന് മമ സ്യാത്സഫലശ്ശ്രമഃ ॥ 4 ॥
യോ ഹ്യയം മമ ലാംഗൂലേ ദീപ്യതേ ഹവ്യവാഹനഃ ।
അസ്യ സംതര്പണം ന്യായ്യം കര്തുമേഭിര്ഗൃഹോത്തമൈഃ ॥ 5 ॥
തതഃ പ്രദീപ്തലാംഗൂലസ്സവിദ്യുദിവ തോയദഃ ।
ഭവനാഗ്രേഷു ലംകായാ വിചചാര മഹാകപിഃ ॥ 6 ॥
ഗൃഹാദ്ഗൃഹം രാക്ഷസാനാമുദ്യാനാനി ച വാനരഃ ।
വീക്ഷമാണോ ഹ്യസംത്രസ്തഃ പ്രാസാദാംശ്ച ചചാര സഃ ॥ 7 ॥
അവപ്ലുത്യ മഹാവേഗഃ പ്രഹസ്തസ്യ നിവേശനമ് ।
അഗ്നിം തത്ര സ നിക്ഷിപ്യ ശ്വസനേന സമോ ബലീ ॥ 8 ॥
തതോഽന്യത്പുപ്ലുവേ വേശ്മ മഹാപാര്ശ്വസ്യ വീര്യവാന് ।
മുമോച ഹനുമാനഗ്നിം കാലാനലശിഖോപമമ് ॥ 9 ॥
വജ്രദംഷ്ട്രസ്യ ച തദാ പുപ്ലുവേ സ മഹാകപിഃ ।
ശുകസ്യ ച മഹാതേജാസ്സാരണസ്യ ച ധീമതഃ ॥ 10 ॥
തഥാ ചേംദ്രജിതോ വേശ്മ ദദാഹ ഹരിയൂഥപഃ ।
ജംബുമാലേ സ്സുമാലേശ്ച ദദാഹ ഭവനം തതഃ ॥ 11 ॥
രശ്മികേതോശ്ച ഭവനം സൂര്യശത്രോസ്തഥൈവ ച ।
ഹ്രസ്വകര്ണസ്യ ദംഷ്ട്രസ്യ രോമശസ്യ ച രക്ഷസഃ ॥ 12 ॥
യുദ്ധോന്മത്തസ്യ മത്തസ്യ ധ്വജഗ്രീവസ്യ രക്ഷസഃ ।
വിദ്യുജ്ജിഹ്വസ്യ ഘോരസ്യ തഥാ ഹസ്തിമുഖസ്യ ച ॥ 13 ॥
കരാലസ്യ പിശാചസ്യ ശോണിതാക്ഷസ്യ ചൈവ ഹി ।
കുംഭകര്ണസ്യ ഭവനം മകരാക്ഷസ്യ ചൈവ ഹി ॥ 14 ॥
യജ്ഞശത്രോശ്ച ഭവനം ബ്രഹ്മശത്രോസ്തഥൈവ ച ।
നരാംതകസ്യ കുംഭസ്യ നികുംഭസ്യ ദുരാത്മനഃ ॥ 15 ॥
വര്ജയിത്വാ മഹാതേജാ വിഭീഷണഗൃഹം പ്രതി ।
ക്രമമാണഃ ക്രമേണൈവ ദദാഹ ഹരിപുംഗവഃ ॥ 16 ॥
തേഷു തേഷു മഹാര്ഹേഷു ഭവനേഷു മഹായശാഃ ।
ഗൃഹേഷ്വൃദ്ധിമതാമൃദ്ധിം ദദാഹ സ മഹാകപിഃ ॥ 17 ॥
സർവേഷാം സമതിക്രമ്യ രാക്ഷസേംദ്രസ്യ വീര്യവാന് ।
ആസസാദാഥ ലക്ഷ്മീവാന് രാവണസ്യ നിവേശനമ് ॥ 18 ॥
തതസ്തസ്മിന് ഗൃഹേ മുഖ്യേ നാനാരത്നവിഭൂഷിതേ ।
മേരുമംദരസംകാശേ സർവമംഗളശോഭിതേ ॥ 19 ॥
പ്രദീപ്തമഗ്നിമുത്സൃജ്യ ലാംഗൂലാഗ്രേ പ്രതിഷ്ഠിതമ് ।
നനാദ ഹനുമാന്വീരോ യുഗാംതജലദോ യഥാ ॥ 20 ॥
ശ്വസനേന ച സംയോഗാദതിവേഗോ മഹാബലഃ ।
കാലാഗ്നിരിവ ജജ്വാല പ്രാവര്ധത ഹുതാശനഃ ॥ 21 ॥
പ്രദീപ്തമഗ്നിം പവനസ്തേഷു വേശ്മസ്വചാരയത് ।
അഭൂച്ഛ്വസനസംയോഗാദതിവേഗോ ഹുതാശനഃ ॥ 22 ॥
താനി കാംചനജാലാനി മുക്താമണിമയാനി ച ।
ഭവനാന്യവശീര്യംത രത്നവംതി മഹാംതി ച ॥ 23 ॥
സംജജ്ഞേ തുമുലശ്ശബ്ദോ രാക്ഷസാനാം പ്രധാവതാമ് ।
സ്വഗൃഹസ്യ പരിത്രാണേ ഭഗ്നോത്സാഹോര്ജിതശ്രിയാമ് ॥ 24 ॥
നൂനമേഷോഽഗ്നിരായാതഃ കപിരൂപേണ ഹാ ഇതി ।
ക്രംദംത്യസ്സഹസാ പേതുഃ സ്തനംധയധരാഃ സ്ത്രിയഃ ॥ 25 ॥
കാശ്ചിദഗ്നിപരീതേഭ്യോ ഹര്മേഭ്യോ മുക്തമൂര്ധജാഃ ।
പതംത്യോ രേജിരേഽഭ്രേഭ്യസ്സൌദാമന്യ ഇവാംബരാത് ॥ 26 ॥
വജ്രവിദ്രുമവൈദൂര്യമുക്താരജതസംഹിതാന് ।
വിചിത്രാന്ഭവനാദ്ധാതൂന് സ്യംദമാനാംദദര്ശ സഃ ॥ 27 ॥
നാഗ്നിസ്തൃപ്യതി കാഷ്ഠാനാം തൃണാനാം ച യഥാ തഥാ ।
ഹനൂമാന് രാക്ഷസേംദാണാം വിശസ്താനാം ന തൃപ്യതി ॥ 28 ॥
ക്വചിത്കിംശുകസംകാശാഃ ക്വചിച്ഛാല്മലിസന്നിഭാഃ ॥ 29 ॥
ക്വചിത്കുംകുമസംകാശാശ്ശിഖാ വഹ്നേശ്ചകാശിരേ ।
ഹനൂമതാ വേഗവതാ വാനരേണ മഹാത്മനാ ।
ലംകാപുരം പ്രദഗ്ധം തദ്രുദ്രേണ ത്രിപുരം യഥാ ॥ 30 ॥
തതസ്തു ലംകാപുരപർവതാഗ്രേ സമുത്ഥിതോ ഭീമപരാക്രമോഽഗ്നിഃ ।
പ്രസാര്യ ചൂഡാവലയം പ്രദീപ്തോ ഹനൂമതാ വേഗവതാ വിസൃഷ്ടഃ ॥ 31 ॥
യുഗാംതകാലാനലതുല്യവേഗ സ്സമാരുതോഽഗ്നിർവവൃധേ ദിവിസ്പൃക് ।
വിധൂമരശ്മിര്ഭവനേഷു സക്തോ രക്ഷശ്ശരീരാജ്യസമര്പതാര്ചിഃ ॥ 32 ॥
ആദിത്യകോടീസദൃശസ്സുതേജാ ലംകാം സമസ്താം പരിവാര്യ തിഷ്ഠന് ।
ശബ്ദൈരനേകൈരശനിപ്രരൂഢൈര്ഭിംദന്നിവാംഡം പ്രബഭൌ മഹാഗ്നിഃ ॥ 33 ॥
തത്രാംബരാദഗ്നിരതിപ്രവൃദ്ധോ രൂക്ഷപ്രഭഃ കിംശുകപുഷ്പചൂഡഃ ।
നിർവാണധൂമാകുലരാജയശ്ച നീലോത്പലാഭാഃ പ്രചകാശിരേഽഭ്രാഃ ॥ 34 ॥
വജ്രീ മഹേംദ്രസ്ത്രിദശേശ്വരോ വാ സാക്ഷാദ്യമോ വാ വരുണോഽനിലോ വാ ।
രുദ്രോഽഗ്നിരര്കോ ധനദശ്ച സോമോ ന വാനരോഽയം സ്വയമേവ കാലഃ ॥ 35 ॥
കിം ബ്രഹ്മണസ്സർവപിതാമഹസ്യ സർവസ്യ ധാതുശ്ചതുരാനനസ്യ ।
ഇഹാഽഽഗതോ വാനരരൂപധാരീ രക്ഷോപസംഹാരകരഃ പ്രകോപഃ ॥ 36 ॥
കിം വൈഷ്ണവം വാ കപിരൂപമേത്യ രക്ഷോവിനാശായ പരം സുതേജഃ ।
അനംതമവ്യക്തമചിംത്യമേകം സ്വമായയാ സാംപ്രതമാഗതം വാ ॥ 37 ॥
ഇത്യേവമൂചുര്ബഹവോ വിശിഷ്ടാ രക്ഷോഗണാസ്തത്ര സമേത്യ സർവേ ।
സപ്രാണിസംഘാം സഗൃഹാം സവൃക്ഷാം ദഗ്ധാം പുരീം താം സഹസാ സമീക്ഷ്യ ॥ 38 ॥
തതസ്തു ലംകാ സഹസാ പ്രദഗ്ധാ സരാക്ഷസാ സാശ്വരഥാ സനാഗാ ।
സപക്ഷിസംഘാ സമൃഗാ സവൃക്ഷാ രുരോദ ദീനാ തുമുലം സശബ്ദമ് ॥ 39 ॥
ഹാ താത ഹാ പുത്രക കാംത മിത്ര ഹാ ജീവിതം ഭോഗയുതം സുപുണ്യമ് ।
രക്ഷോഭിരേവം ബഹുധാ ബ്രുവദ്ഭി ശ്ശബ്ദഃ കൃതോ ഘോരതരസ്സുഭീമഃ ॥ 40 ॥
ഹുതാശനജ്വാലസമാവൃതാ സാ ഹതപ്രവീരാ പരിവൃത്തയോധാ ഹനൂമതഃ ക്രോധബലാഭിഭൂതാ ബഭൂവ ശാപോപഹതേവ ലംകാ ॥ 41 ॥
സ സംഭ്രമത്രസ്തവിഷണ്ണരാക്ഷസാം സമുജ്ജ്വലജ്ജ്വാലഹുതാശനാംകിതാമ് ।
ദദര്ശ ലംകാം ഹനുമാന്മഹാമനാഃ സ്വയംഭൂകോപോപഹതാമിവാവനിമ് ॥ 42 ॥
ഭംക്ത്വാ വനം പാദപരത്നസംകുലം ഹത്വാ തു രക്ഷാംസി മഹാംതി സംയുഗേ ।
ദഗ്ധ്വാ പുരീം താം ഗൃഹരത്നമാലിനീം തസ്ഥൌ ഹനൂമാന്പവനാത്മജഃ കപിഃ ॥ 43 ॥
ത്രികൂടശൃംഗാഗ്രതലേ വിചിത്രേ പ്രതിഷ്ഠിതോ വാനരരാജസിംഹഃ ।
പ്രദീപ്തലാംഗൂലകൃതാര്ചിമാലീ വ്യരാജതാഽഽദിത്യ ഇവാംശുമാലീ ॥ 44 ॥
സ രാക്ഷസാംസ്താന്സുബഹൂംശ്ച ഹത്വാ വനം ച ഭംക്ത്വാ ബഹുപാദപം തത് ।
വിസൃജ്യ രക്ഷോഭവനേഷു ചാഗ്നിം ജഗാമ രാമം മനസാ മഹാത്മാ ॥ 45 ॥
തതസ്തു തം വാനരവീരമുഖ്യം മഹാബലം മാരുതതുല്യവേഗമ് ।
മഹാമതിം വായുസുതം വരിഷ്ഠം പ്രതുഷ്ടുവുര്ദേവഗണാശ്ച സർവേ ॥ 46 ॥
ഭംക്ത്വാ വനം മഹാതേജാ ഹത്വാ രക്ഷാംസി സംയുഗേ ।
ദഗ്ധ്വാ ലംകാപുരീം രമ്യാം രരാജ സ മഹാകപിഃ ॥ 47 ॥
തത്ര ദേവാസ്സഗംധർവാസ്സിദ്ധാശ്ച പരമര്ഷയഃ ।
ദൃഷ്ട്വാ ലംകാം പ്രദഗ്ധാം താം വിസ്മയം പരമം ഗതാഃ ॥ 48 ॥
തം ദൃഷ്ട്വാ വാനരശ്രേഷ്ഠം ഹനുമംതം മഹാകപിമ് ।
കാലാഗ്നിരിതി സംചിംത്യ സർവഭൂതാനി തത്രസുഃ ॥ 49 ॥
ദേവാശ്ച സർവേ മുനിപുംഗവാശ്ച ഗംധർവവിദ്യാധരനാഗയക്ഷാഃ ।
ഭൂതാനി സർവാണി മഹാംതി തത്ര ജഗ്മുഃ പരാം പ്രീതിമതുല്യരൂപാമ് ॥ 50 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ചതുഃപംചാശസ്സര്ഗഃ ॥
