ශ්රීමද්වාල්මීකීය රාමායණේ සුංදරකාංඩම් ।
අථ චතුඃපංචාශස්සර්ගඃ ।
වීක්ෂමාණස්තතෝ ලංකාං කපිඃ කෘතමනෝරථඃ ॥ 1 ॥
වර්ධමානසමුත්සාහඃ කාර්යශේෂමචිංතයත් ।
කින්නු ඛල්වවශිෂ්ටං මේ කර්තව්යමිහ සාංප්රතම් ॥ 2 ॥
යදේෂාං රක්ෂසාං භූයඃ සංතාපජනනං භවේත් ।
වනං තාවත්ප්රමථිතං ප්රකෘෂ්ටා රාක්ෂසා හතාඃ ॥ 3 ॥
බලෛකදේශඃ ක්ෂපිතශ්ශේෂං දුර්ගවිනාශනම් ।
දුර්ගේ විනාශිතේ කර්ම භවේත්සුඛපරිශ්රමම් ।
අල්පයත්නේන කාර්යේऽස්මින් මම ස්යාත්සඵලශ්ශ්රමඃ ॥ 4 ॥
යෝ හ්යයං මම ලාංගූලේ දීප්යතේ හව්යවාහනඃ ।
අස්ය සංතර්පණං න්යාය්යං කර්තුමේභිර්ගෘහෝත්තමෛඃ ॥ 5 ॥
තතඃ ප්රදීප්තලාංගූලස්සවිද්යුදිව තෝයදඃ ।
භවනාග්රේෂු ලංකායා විචචාර මහාකපිඃ ॥ 6 ॥
ගෘහාද්ගෘහං රාක්ෂසානාමුද්යානානි ච වානරඃ ।
වීක්ෂමාණෝ හ්යසංත්රස්තඃ ප්රාසාදාංශ්ච චචාර සඃ ॥ 7 ॥
අවප්ලුත්ය මහාවේගඃ ප්රහස්තස්ය නිවේශනම් ।
අග්නිං තත්ර ස නික්ෂිප්ය ශ්වසනේන සමෝ බලී ॥ 8 ॥
තතෝऽන්යත්පුප්ලුවේ වේශ්ම මහාපාර්ශ්වස්ය වීර්යවාන් ।
මුමෝච හනුමානග්නිං කාලානලශිඛෝපමම් ॥ 9 ॥
වජ්රදංෂ්ට්රස්ය ච තදා පුප්ලුවේ ස මහාකපිඃ ।
ශුකස්ය ච මහාතේජාස්සාරණස්ය ච ධීමතඃ ॥ 10 ॥
තථා චේංද්රජිතෝ වේශ්ම දදාහ හරියූථපඃ ।
ජංබුමාලේ ස්සුමාලේශ්ච දදාහ භවනං තතඃ ॥ 11 ॥
රශ්මිකේතෝශ්ච භවනං සූර්යශත්රෝස්තථෛව ච ।
හ්රස්වකර්ණස්ය දංෂ්ට්රස්ය රෝමශස්ය ච රක්ෂසඃ ॥ 12 ॥
යුද්ධෝන්මත්තස්ය මත්තස්ය ධ්වජග්රීවස්ය රක්ෂසඃ ।
විද්යුජ්ජිහ්වස්ය ඝෝරස්ය තථා හස්තිමුඛස්ය ච ॥ 13 ॥
කරාලස්ය පිශාචස්ය ශෝණිතාක්ෂස්ය චෛව හි ।
කුංභකර්ණස්ය භවනං මකරාක්ෂස්ය චෛව හි ॥ 14 ॥
යජ්ඤශත්රෝශ්ච භවනං බ්රහ්මශත්රෝස්තථෛව ච ।
නරාංතකස්ය කුංභස්ය නිකුංභස්ය දුරාත්මනඃ ॥ 15 ॥
වර්ජයිත්වා මහාතේජා විභීෂණගෘහං ප්රති ।
ක්රමමාණඃ ක්රමේණෛව දදාහ හරිපුංගවඃ ॥ 16 ॥
තේෂු තේෂු මහාර්හේෂු භවනේෂු මහායශාඃ ।
ගෘහේෂ්වෘද්ධිමතාමෘද්ධිං දදාහ ස මහාකපිඃ ॥ 17 ॥
සර්වේෂාං සමතික්රම්ය රාක්ෂසේංද්රස්ය වීර්යවාන් ।
ආසසාදාථ ලක්ෂ්මීවාන් රාවණස්ය නිවේශනම් ॥ 18 ॥
තතස්තස්මින් ගෘහේ මුඛ්යේ නානාරත්නවිභූෂිතේ ।
මේරුමංදරසංකාශේ සර්වමංගළශෝභිතේ ॥ 19 ॥
ප්රදීප්තමග්නිමුත්සෘජ්ය ලාංගූලාග්රේ ප්රතිෂ්ඨිතම් ।
නනාද හනුමාන්වීරෝ යුගාංතජලදෝ යථා ॥ 20 ॥
ශ්වසනේන ච සංයෝගාදතිවේගෝ මහාබලඃ ।
කාලාග්නිරිව ජජ්වාල ප්රාවර්ධත හුතාශනඃ ॥ 21 ॥
ප්රදීප්තමග්නිං පවනස්තේෂු වේශ්මස්වචාරයත් ।
අභූච්ඡ්වසනසංයෝගාදතිවේගෝ හුතාශනඃ ॥ 22 ॥
තානි කාංචනජාලානි මුක්තාමණිමයානි ච ।
භවනාන්යවශීර්යංත රත්නවංති මහාංති ච ॥ 23 ॥
සංජජ්ඤේ තුමුලශ්ශබ්දෝ රාක්ෂසානාං ප්රධාවතාම් ।
ස්වගෘහස්ය පරිත්රාණේ භග්නෝත්සාහෝර්ජිතශ්රියාම් ॥ 24 ॥
නූනමේෂෝऽග්නිරායාතඃ කපිරූපේණ හා ඉති ।
ක්රංදංත්යස්සහසා පේතුඃ ස්තනංධයධරාඃ ස්ත්රියඃ ॥ 25 ॥
කාශ්චිදග්නිපරීතේභ්යෝ හර්මේභ්යෝ මුක්තමූර්ධජාඃ ।
පතංත්යෝ රේජිරේऽභ්රේභ්යස්සෞදාමන්ය ඉවාංබරාත් ॥ 26 ॥
වජ්රවිද්රුමවෛදූර්යමුක්තාරජතසංහිතාන් ।
විචිත්රාන්භවනාද්ධාතූන් ස්යංදමානාංදදර්ශ සඃ ॥ 27 ॥
නාග්නිස්තෘප්යති කාෂ්ඨානාං තෘණානාං ච යථා තථා ।
හනූමාන් රාක්ෂසේංදාණාං විශස්තානාං න තෘප්යති ॥ 28 ॥
ක්වචිත්කිංශුකසංකාශාඃ ක්වචිච්ඡාල්මලිසන්නිභාඃ ॥ 29 ॥
ක්වචිත්කුංකුමසංකාශාශ්ශිඛා වහ්නේශ්චකාශිරේ ।
හනූමතා වේගවතා වානරේණ මහාත්මනා ।
ලංකාපුරං ප්රදග්ධං තද්රුද්රේණ ත්රිපුරං යථා ॥ 30 ॥
තතස්තු ලංකාපුරපර්වතාග්රේ සමුත්ථිතෝ භීමපරාක්රමෝऽග්නිඃ ।
ප්රසාර්ය චූඩාවලයං ප්රදීප්තෝ හනූමතා වේගවතා විසෘෂ්ටඃ ॥ 31 ॥
යුගාංතකාලානලතුල්යවේග ස්සමාරුතෝऽග්නිර්වවෘධේ දිවිස්පෘක් ।
විධූමරශ්මිර්භවනේෂු සක්තෝ රක්ෂශ්ශරීරාජ්යසමර්පතාර්චිඃ ॥ 32 ॥
ආදිත්යකෝටීසදෘශස්සුතේජා ලංකාං සමස්තාං පරිවාර්ය තිෂ්ඨන් ।
ශබ්දෛරනේකෛරශනිප්රරූඪෛර්භිංදන්නිවාංඩං ප්රබභෞ මහාග්නිඃ ॥ 33 ॥
තත්රාංබරාදග්නිරතිප්රවෘද්ධෝ රූක්ෂප්රභඃ කිංශුකපුෂ්පචූඩඃ ।
නිර්වාණධූමාකුලරාජයශ්ච නීලෝත්පලාභාඃ ප්රචකාශිරේऽභ්රාඃ ॥ 34 ॥
වජ්රී මහේංද්රස්ත්රිදශේශ්වරෝ වා සාක්ෂාද්යමෝ වා වරුණෝऽනිලෝ වා ।
රුද්රෝऽග්නිරර්කෝ ධනදශ්ච සෝමෝ න වානරෝऽයං ස්වයමේව කාලඃ ॥ 35 ॥
කිං බ්රහ්මණස්සර්වපිතාමහස්ය සර්වස්ය ධාතුශ්චතුරානනස්ය ।
ඉහාऽऽගතෝ වානරරූපධාරී රක්ෂෝපසංහාරකරඃ ප්රකෝපඃ ॥ 36 ॥
කිං වෛෂ්ණවං වා කපිරූපමේත්ය රක්ෂෝවිනාශාය පරං සුතේජඃ ।
අනංතමව්යක්තමචිංත්යමේකං ස්වමායයා සාංප්රතමාගතං වා ॥ 37 ॥
ඉත්යේවමූචුර්බහවෝ විශිෂ්ටා රක්ෂෝගණාස්තත්ර සමේත්ය සර්වේ ।
සප්රාණිසංඝාං සගෘහාං සවෘක්ෂාං දග්ධාං පුරීං තාං සහසා සමීක්ෂ්ය ॥ 38 ॥
තතස්තු ලංකා සහසා ප්රදග්ධා සරාක්ෂසා සාශ්වරථා සනාගා ।
සපක්ෂිසංඝා සමෘගා සවෘක්ෂා රුරෝද දීනා තුමුලං සශබ්දම් ॥ 39 ॥
හා තාත හා පුත්රක කාංත මිත්ර හා ජීවිතං භෝගයුතං සුපුණ්යම් ।
රක්ෂෝභිරේවං බහුධා බ්රුවද්භි ශ්ශබ්දඃ කෘතෝ ඝෝරතරස්සුභීමඃ ॥ 40 ॥
හුතාශනජ්වාලසමාවෘතා සා හතප්රවීරා පරිවෘත්තයෝධා හනූමතඃ ක්රෝධබලාභිභූතා බභූව ශාපෝපහතේව ලංකා ॥ 41 ॥
ස සංභ්රමත්රස්තවිෂණ්ණරාක්ෂසාං සමුජ්ජ්වලජ්ජ්වාලහුතාශනාංකිතාම් ।
දදර්ශ ලංකාං හනුමාන්මහාමනාඃ ස්වයංභූකෝපෝපහතාමිවාවනිම් ॥ 42 ॥
භංක්ත්වා වනං පාදපරත්නසංකුලං හත්වා තු රක්ෂාංසි මහාංති සංයුගේ ।
දග්ධ්වා පුරීං තාං ගෘහරත්නමාලිනීං තස්ථෞ හනූමාන්පවනාත්මජඃ කපිඃ ॥ 43 ॥
ත්රිකූටශෘංගාග්රතලේ විචිත්රේ ප්රතිෂ්ඨිතෝ වානරරාජසිංහඃ ।
ප්රදීප්තලාංගූලකෘතාර්චිමාලී ව්යරාජතාऽऽදිත්ය ඉවාංශුමාලී ॥ 44 ॥
ස රාක්ෂසාංස්තාන්සුබහූංශ්ච හත්වා වනං ච භංක්ත්වා බහුපාදපං තත් ।
විසෘජ්ය රක්ෂෝභවනේෂු චාග්නිං ජගාම රාමං මනසා මහාත්මා ॥ 45 ॥
තතස්තු තං වානරවීරමුඛ්යං මහාබලං මාරුතතුල්යවේගම් ।
මහාමතිං වායුසුතං වරිෂ්ඨං ප්රතුෂ්ටුවුර්දේවගණාශ්ච සර්වේ ॥ 46 ॥
භංක්ත්වා වනං මහාතේජා හත්වා රක්ෂාංසි සංයුගේ ।
දග්ධ්වා ලංකාපුරීං රම්යාං රරාජ ස මහාකපිඃ ॥ 47 ॥
තත්ර දේවාස්සගංධර්වාස්සිද්ධාශ්ච පරමර්ෂයඃ ।
දෘෂ්ට්වා ලංකාං ප්රදග්ධාං තාං විස්මයං පරමං ගතාඃ ॥ 48 ॥
තං දෘෂ්ට්වා වානරශ්රේෂ්ඨං හනුමංතං මහාකපිම් ।
කාලාග්නිරිති සංචිංත්ය සර්වභූතානි තත්රසුඃ ॥ 49 ॥
දේවාශ්ච සර්වේ මුනිපුංගවාශ්ච ගංධර්වවිද්යාධරනාගයක්ෂාඃ ।
භූතානි සර්වාණි මහාංති තත්ර ජග්මුඃ පරාං ප්රීතිමතුල්යරූපාම් ॥ 50 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ චතුඃපංචාශස්සර්ගඃ ॥
