ශ්රීමද්වාල්මීකීය රාමායණේ සුංදරකාංඩම් ।
අථ ද්විචත්වාරිංශස්සර්ගඃ ।
තතඃ පක්ෂිනිනාදේන වෘක්ෂභංගස්වනේන ච ।
බභූවුස්ත්රාසසංභ්රාංතාස්සර්වේ ලංකානිවාසිනඃ ॥ 1 ॥
විද්රුතාශ්ච භයත්රස්තා විනේදුර්මෘගපක්ෂිණඃ ।
රක්ෂසාං ච නිමිත්තානි ක්රූරාණි ප්රතිපේදිරේ ॥ 2 ॥
තතෝ ගතායාං නිද්රායාං රාක්ෂස්යෝ විකෘතානනාඃ ।
තද්වනං දදෘශුර්භග්නං තං ච වීරං මහාකපිම් ॥ 3 ॥
ස තා දෘෂ්ට්වා මහාබාහුර්මහාසත්ත්වෝ මහාබලඃ ।
චකාර සුමහද්රූපං රාක්ෂසීනාං භයාවහම් ॥ 4 ॥
තතස්තං ගිරිසංකාශමතිකායං මහාබලම් ।
රාක්ෂස්යෝ වානරං දෘෂ්ට්වා පප්රච්ඡුර්ජනකාත්මජාම් ॥ 5 ॥
කෝऽයං කස්ය කුතෝ වායං කිං නිමිත්තමිහාගතඃ ।
කථං ත්වයා සහානේන සංවාදඃ කෘත ඉත්යුත ॥ 6 ॥
ආචක්ෂ්ව නෝ විශාලාක්ෂි මා භූත්තේ සුභගේ භයම් ।
සංවාදමසිතාපාංගේ ත්වයා කිං කෘතවානයම් ॥ 7 ॥
අථාබ්රවීන්මහාසාධ්වී සීතා සර්වාංගසුංදරී ।
රක්ෂසාං භීමරූපාණාං විජ්ඤානේ මම කා ගතිඃ ॥ 8 ॥
යූයමේවාභිජානීත යෝऽයං යද්වා කරිෂ්යති ।
අහිරේව හ්යහේඃ පාදාන්විජානාති න සංශයඃ ॥ 9 ॥
අහමප්යස්ය භීතාස්මි නෛනං ජානාමි කෝ න්වයම් ।
වේද්මි රාක්ෂසමේවෛනං කාමරූපිණමාගතම් ॥ 10 ॥
වෛදේහ්යා වචනං ශ්රුත්වා රාක්ෂස්යෝ විද්රුතා දිශඃ ।
ස්ථිතාඃ කාශ්චිද්ගතාඃ කාශ්චිද්රාවණාය නිවේදිතුම් ॥ 11 ॥
රාවණස්ය සමීපේ තු රාක්ෂස්යෝ විකෘතානනාඃ ।
විරූපං වානරං භීමමාඛ්යාතුමුපචක්රමුඃ ॥ 12 ॥
අශෝකවනිකාමධ්යේ රාජන්භීමවපුඃ කපිඃ ।
සීතයා කෘතසංවාදස්තිෂ්ඨත්යමිතවික්රමඃ ॥ 13 ॥
න ච තං ජානකී සීතා හරිං හරිණලෝචනා ।
අස්මාභිර්බහුධා පෘෂ්ටා නිවේදයිතුමිච්ඡති ॥ 14 ॥
වාසවස්ය භවේද්දූතෝ දූතෝ වෛශ්රවණස්ය වා ।
ප්රේෂිතෝ වාපි රාමේණ සීතාන්වේෂණකාංක්ෂයා ॥ 15 ॥
තේන ත්වද්භුතරූපේණ යත්තත්තව මනෝහරම් ।
නානාමෘගගණාකීර්ණං ප්රමෘෂ්ටං ප්රමදාවනම් ॥ 16 ॥
න තත්ර කශ්චිදුද්දේශෝ යස්තේන න විනාශිතඃ ।
යත්ර සා ජානකී සීතා ස තේන න විනාශිතඃ ॥ 17 ॥
ජානකීරක්ෂණාර්ථං වා ශ්රමාද්වා නෝපලභ්යතේ ।
අථවා කශ්ශ්රමස්තස්ය සෛව තේනාභිරක්ෂිතා ॥ 18 ॥
චාරුපල්ලවපුෂ්පාඪ්යං යං සීතා ස්වයමාස්ථිතා ।
ප්රවෘද්ධශ්ශිංශුපාවෘක්ෂ ස්ස ච තේනාභිරක්ෂිතඃ ॥ 19 ॥
තස්යෝග්රරූපස්යෝග්ර ත්වං දංඩමාජ්ඤාතුමර්හසි ।
සීතා සංභාෂිතා යේන තද්වනං ච විනාශිතම් ॥ 20 ॥
මනඃ පරිගෘහීතාං තාං තව රක්ෂෝගණේශ්වර ।
කස්සීතාමභිභාෂේත යෝ න ස්යාත්ත්යක්තජීවිතඃ ॥ 21 ॥
රාක්ෂසීනාං වචශ්ත්රුත්වා රාවණෝ රාක්ෂසේශ්වරඃ ।
හුතාග්නිරිව ජජ්වාල කෝපසංවර්තිතේක්ෂණඃ ॥ 22 ॥
තස්ය ක්රුද්ධස්ය නේත්රාභ්යාං ප්රාපතන්නාස්රබිංදවඃ ।
දීප්තාභ්යාමිව දීපාභ්යාං සාර්චිෂ ස්ස්නේහබිංදවඃ ॥ 23 ॥
ආත්මනස්සදෘශාන්ශූරාන්කිංකරාන්නාම රාක්ෂසාන් ।
ව්යාදිදේශ මහාතේජා නිග්රහාර්ථං හනූමතඃ ॥ 24 ॥
තේෂාමශීතිසාහස්රං කිංකරාණාං තරස්විනාම් ।
නිර්යයුර්භවනාත්තස්මාත්කූටමුද්ගරපාණයඃ ॥ 25 ॥
මහෝදරා මහාදංෂ්ට්රා ඝෝරරූපා මහාබලාඃ ।
යුද්ධාභිමනසස්සර්වේ හනුමද්ග්රහණෝද්යතාඃ ॥ 26 ॥
තේ කපීංද්රං සමාසාද්ය තෝරණස්ථමවස්ථිතම් ।
අභිපේතුර්මහාවේගාඃ පතංගා ඉව පාවකම් ॥ 27 ॥
තේ ගදාභිර්විචිත්රාභිඃ පරිඝෛඃ කාංචනාංගදෛඃ ।
ආජඝ්නුර්වානරශ්රේෂ්ඨං ශරෛශ්චාදිත්යසන්නිභෛඃ ॥ 28 ॥
මුද්ගරෛඃ පට්ටිශෛශ්ශූලෛඃ ප්රාසතෝමරශක්තිභිඃ ।
පරිවාර්ය හනූමංතං සහසා තස්ථුරග්රතඃ ॥ 29 ॥
හනුමානපි තේජස්වී ශ්රීමාන්පර්වතසන්නිභඃ ।
ක්ෂිතාවාවිධ්ය ලාංගූලං නනාද ච මහාස්වනම් ॥ 30 ॥
ස භූත්වා සුමහාකායෝ හනුමාන්මාරුතාත්මජඃ ।
ධෘෂ්ටමාස්ඵෝටයාමාස ලංකාං ශබ්දේන පූරයන් ॥ 31 ॥
තස්යාස්ඵෝටිතශබ්දේන මහතා සානුනාදිනා ।
පේතුර්විහංගා ගගනාදුච්චෛශ්චේදමඝෝෂයත් ॥ 32 ॥
ජයත්යතිබලෝ රාමෝ ලක්ෂ්මණශ්ච මහාබලඃ ।
රාජා ජයති සුග්රීවෝ රාඝවේණාභිපාලිතඃ ॥ 33 ॥
දාසෝऽහං කෝසලේංද්රස්ය රාමස්යාක්ලිෂ්ටකර්මණඃ ।
හනුමාන්ශත්රුසෛන්යානාං නිහංතා මාරුතාත්මජඃ ॥ 34 ॥
න රාවණසහස්රං මේ යුද්ධේ ප්රතිබලං භවේත් ।
ශිලාභිස්තු ප්රහරතඃ පාදපෛශ්ච සහස්රශඃ ॥ 35 ॥
අර්දයිත්වා පුරීං ලංකාමභිවාද්ය ච මෛථිලීම් ।
සමෘද්ධාර්ථෝ ගමිෂ්යාමි මිෂතාං සර්වරක්ෂසාම් ॥ 36 ॥
තස්ය සන්නාදශබ්දේන තේऽභවන්භයශංකිතාඃ ।
දදෘශුශ්ච හනූමංතං සංධ්යාමේඝමිවෝන්නතම් ॥ 37 ॥
ස්වාමිසංදේශනිශ්ශංකාස්තතස්තේ රාක්ෂසාඃ කපිම් ।
චිත්රෛඃ ප්රහරණෛර්භීමෛරභිපේතුස්තතස්තතඃ ॥ 38 ॥
ස තෛඃ පරිවෘතශ්ශූරෛස්සර්වතස්සුමහාබලඃ ।
ආසසාදාऽයසං භීමං පරිඝං තෝරණාශ්රිතම් ॥ 39 ॥
ස තං පරිඝමාදාය ජඝාන රජනීචරාන් ।
ස පන්නගමිවාදාය ස්ඵුරංතං විනතාසුතඃ ॥ 40 ॥
විචචාරාංබරේ වීරඃ පරිගෘහ්ය ච මාරුතිඃ ।
ස හත්වා රාක්ෂසාන්වීරාන්කිංකරාන්මාරුතාත්මජඃ ॥ 41 ॥
යුද්ධාකාංක්ෂී පුනර්වීරස්තෝරණං සමුපාශ්රිතඃ ।
තතස්තස්මාද්භයාන්මුක්තාඃ කතිචිත්තත්ර රාක්ෂසාඃ ॥ 42 ॥
නිහතාන්කිංකරාන්සර්වාන්රාවණායන්යවේදයන් ।
ස රාක්ෂසානාං නිහතං මහද්බලං නිශම්ය රාජා පරිවෘත්තලෝචනඃ ।
සමාදිදේශාප්රතිමං පරාක්රමේ ප්රහස්තපුත්රං සමරේ සුදුර්ජයම් ॥ 43 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ද්විචත්වාරිංශස්සර්ගඃ ॥
