ශ්රීමද්වාල්මීකීය රාමායණේ බාලකාංඩම් ।
අථ ඒකෝනවිංශස්සර්ගඃ ।
තච්ඡ්රුත්වා රාජසිංහස්ය වාක්යමද්භුතවිස්තරම් ।
හෘෂ්ටරෝමා මහාතේජා විශ්වාමිත්රෝऽභ්යභාෂත ॥ 1 ॥
සදෘශං රාජශාර්දූල තවෛතද්භුවි නාන්යථා ।
මහාවංශප්රසූතස්ය වසිෂ්ඨව්යපදේශිනඃ ॥ 2 ॥
යත්තු මේ හෘද්ගතං වාක්යං තස්ය කාර්යස්ය නිශ්චයම් ।
කුරූෂ්ව රාජශාර්දූල භව සත්යප්රතිශ්රවඃ ॥ 3 ॥
අහංනියමමාතිෂ්ඨේ සිධ්යර්ථං පුරුෂර්ෂභ ।
තස්ය විඝ්නකරෞ ද්වෞ තු රාක්ෂසෞ කාමරූපිණෞ ॥ 4 ॥
ව්රතේ මේ බහුශශ්චීර්ණේ සමාප්ත්යාං රාක්ෂසාවිමෞ ।
මාරීචශ්ච සුබාහුශ්ච වීර්යවංතෞ සුශික්ෂිතෞ ॥ 5 ॥
සමාංසරුධිරෞඝේණ වේදිං තාමභ්යවර්ෂතාම් ।
අවධූතේ තථාභූතේ තස්මින්නියමනිශ්චයේ ॥ 6 ॥
කෘතශ්රමෝ නිරුත්සාහස්තස්මාද්දේශාදපාක්රමේ ।
න ච මේ ක්රෝධමුත්ස්රෂ්ටුං බුද්ධිර්භවති පාර්ථිව ॥ 7 ॥
තථා භූතා හි සා චර්යා න ශාපස්තත්ර මුච්යතේ ।
ස්වපුත්රං රාජශාර්දූල රාමං සත්යපරාක්රමම් ॥ 8 ॥
කාකපක්ෂධරං ශූරං ජ්යේෂ්ඨං මේ දාතුමර්හසි ।
ශක්තෝ හ්යේෂ මයා ගුප්තෝ දිව්යේන ස්වේන තේජසා ॥ 9 ॥
රාක්ෂසා යේ විකර්තාරස්තේෂාමපි විනාශනේ ।
ශ්රේයශ්චාස්මෛ ප්රදාස්යාමි බහුරූපං න සංශයඃ ॥ 10 ॥
ත්රයාණාමපි ලෝකානාං යේන ඛ්යාතිං ගමිෂ්යති ।
න ච තෞ රාමමාසාද්ය ශක්තෞ ස්ථාතුං කථංචන ॥ 11 ॥
න ච තෞ රාඝවාදන්යෝ හංතුමුත්සහතේ පුමාන් ।
වීර්යෝත්සික්තෞ හි තෞ පාපෞ කාලපාශවශං ගතෞ ॥ 12 ॥
රාමස්ය රාජශාර්දූල න පර්යාප්තෞ මහාත්මනඃ ।
න ච පුත්රකෘතස්නේහං කර්තුමර්හසි පාර්ථිව ॥ 13 ॥
අහං තේ ප්රතිජානාමි හතෞ තෞ විද්ධි රාක්ෂසෞ ।
අහං වේද්මි මහාත්මානං රාමං සත්යපරාක්රමම් ॥ 14 ॥
වසිෂ්ඨෝऽපි මහාතේජා යේ චේමේ තපසි ස්ථිතාඃ ।
යදි තේ ධර්මලාභං ච යශශ්ච පරමං භුවි ॥ 15 ॥
ස්ථිතමිච්ඡසි රාජේංද්ර රාමං මේ දාතුමර්හසි ।
යදිහ්යනුජ්ඤාං කාකුත්ස්ථ දදතේ තව මංත්රිණඃ ॥ 16 ॥
වසිෂ්ඨප්රමුඛාඃ සර්වේ තතෝ රාමං විසර්ජය ।
අභිප්රේතමසංසක්තමාත්මජං දාතුමර්හසි ॥ 17 ॥
දශරාත්රං හි යජ්ඤස්ය රාමං රාජීවලෝචනම් ।
නාත්යේති කාලෝ යජ්ඤස්ය යථාऽයං මම රාඝව ॥ 18 ॥
තථා කුරුෂ්ව භද්රං තේ මා ච ශෝකේ මනඃ කෘථාඃ ।
ඉත්යේවමුක්ත්වා ධර්මාත්මා ධර්මාර්ථසහිතං වචඃ ॥ 19 ॥
විරරාම මහාතේජා විශ්වාමිත්රෝ මහාමුනිඃ ।
ස තන්නිශම්ය රාජේංද්රෝ විශ්වාමිත්රවචශ්ශුභම් ॥ 20 ॥
ශෝකමභ්යගමත්තීව්රං ව්යෂීදත භයාන්විතඃ ।
ඉති හෘදයමනෝවිදාරණං මුනිවචනං තදතීව ශුශ්රුවාන් ।
නරපතිරභවන්මහාංස්තදා ව්යථිතමනාඃ ප්රචචාල චාසනාත් ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ඒකෝනවිංශස්සර්ගඃ ॥
