ශ්රීමද්වාල්මීකීය රාමායණේ බාලකාංඩම් ।
අථ ත්රයෝදශස්සර්ගඃ ।
පුනඃ ප්රාප්තේ වසංතේ තු පූර්ණස්සංවත්සරෝऽභවත් ।
ප්රසවාර්ථං ගතෝ යෂ්ටුං හයමේධේන වීර්යවාන් ॥ 1 ॥
අභිවාද්ය වසිෂ්ඨං ච න්යායතඃ පරිපූජ්ය ච ।
අබ්රවීත්ප්රශ්රිතං වාක්යං ප්රසවාර්ථං ද්විජෝත්තමම් ॥ 2 ॥
යජ්ඤෝ මේ ක්රියතාං බ්රහ්මන්යථෝක්තං මුනිපුංගව ।
යථා න විඝ්නඃ ක්රියතේ යජ්ඤාංගේෂු විධීයතාම් ॥ 3 ॥
භවාන් ස්නිග්ධස්සුහෘන්මහ්යං ගුරුශ්ච පරමෝ මහාන් ।
ඕඪව්යෝ භවතා චෛව භාරෝ යජ්ඤස්ය චෝද්යතඃ ॥ 4 ॥
තථේති ච ස රාජානමබ්රවීද්ද්විජසත්තමඃ ।
කරිෂ්යේ සර්වමේවෛතද්භවතා යත්සමර්ථිතම් ॥ 5 ॥
තතෝऽබ්රවීද්විජාන්වෘද්ධාන්යජ්ඤකර්මසු නිෂ්ඨිතාන් ।
ස්ථාපත්යේ නිෂ්ඨිතාංශ්චෛව වෘද්ධාන්පරමධාර්මිකාන් ॥ 6 ॥
කර්මාංතිකාන් ශිල්පකරාන්වර්ධකීන් ඛනකානපි ।
ගණකාන්ශිල්පිනශ්චෛව තථෛව නටනර්තකාන් ॥ 7 ॥
තථා ශුචීන්ශාස්ත්රවිදඃ පුරුෂාන් සුබහුශ්රුතාන් ।
යජ්ඤකර්ම සමීහංතාං භවංතෝ රාජශාසනාත් ॥ 8 ॥
ඉෂ්ටකා බහු සාහස්රාශ්ශීඝ්රමානීයතාමිති ।
0 උපකාර්යාඃ ක්රියංතාං ච රාජ්ඤාං බහුගුණාන්විතාඃ ॥ 9 ॥
බ්රාහ්මණාවසථාශ්චෛව කර්තව්යාශ්ශතශශ්ශුභාඃ ।
භක්ෂ්යාන්නපානෛර්බහුභිස්සමුපේතාස්සුනිෂ්ඨිතාඃ ॥ 10 ॥
තථා පෞරජනස්යාපි කර්තව්යා බහුවිස්තරාඃ ।
ආවාසා බහුභක්ෂ්යා වෛ සර්වකාමෛරුපස්ථිතාඃ ॥ 11 ॥
තථා ජානපදස්යාපි ජනස්ය බහුශෝභනම් ।
දාතව්යමන්නං විධිවත්සත්කෘත්ය න තු ලීලයා ॥ 12 ॥
සර්වේ වර්ණා යථා පූජාං ප්රාප්නුවංති සුසත්කෘතාඃ ।
න චාවජ්ඤා ප්රයෝක්තව්යා කාමක්රෝධවශාදපි ॥ 13 ॥
යජ්ඤකර්මසු යේ ව්යග්රාඃ පුරුෂාශ්ශිල්පිනස්තථා ।
තේෂාමපි විශේෂේණ පූජා කාර්යා යථාක්රමම් ॥ 14 ॥
තේ ච ස්යුස්සංභෘතාස්සර්වේ වසුභිර්භෝජනේන ච ।
යථා සර්වං සුවිහිතං න කිංචිත්පරිහීයතේ ॥ 15 ॥
තථා භවංතඃ කුර්වංතු ප්රීතිස්නිග්ධේන චේතසා ।
තතස්සර්වේ සමාගම්ය වසිෂ්ඨමිදමබ්රුවන් ॥ 16 ॥
යථෝක්තං තත්සුවිහිතං න කිංචිත්පරිහීයතේ ।
යථෝක්තං තත්කරිෂ්යාමෝ න කිංචිත්පරිහාස්යතේ ॥ 17 ॥
තතස්සුමංත්රමානීය වසිෂ්ඨෝ වාක්යමබ්රවීත් ।
නිමංත්රයස්ව නෘපතීන්පෘථිව්යාං යේ ච ධාර්මිකාඃ ॥ 18 ॥
බ්රාහ්මණාන්ක්ෂත්රියාන්වෛශ්යාංඡූද්රාංශ්චෛව සහස්රශඃ ।
සමානයස්ව සත්කෘත්ය සර්වදේශේෂු මානවාන් ॥ 19 ॥
මිථිලාධිපතිං ශූරං ජනකං සත්යවික්රමම් ।
නිෂ්ඨිතං සර්වශාස්ත්රේෂු තථා වේදේෂු නිෂ්ඨිතම් ॥ 20 ॥
තමානය මහාභාගං ස්වයමේව සුසත්කෘතම් ।
පූර්වසංබංධිනං ජ්ඤාත්වා තතඃ පූර්වං බ්රවීමි තේ ॥ 21 ॥
තථා කාශීපතිං ස්නිග්ධං සතතං ප්රියවාදිනම් ।
වයස්යං රාජසිංහස්ය ස්වයමේවානයස්ව හ ॥ 22 ॥
තථා කේකයරාජානං වෘද්ධං පරමධාර්මිකම් ।
ශ්වශුරං රාජසිංහස්ය සපුත්රං ත්වමිහානය ॥ 23 ॥
අංගේශ්වරං මහාභාගං රෝමපාදං සුසත්කෘතම් ।
වයස්යං රාජසිංහස්ය සමානය යශස්විනම් ॥ 24 ॥
ප්රාචීනාන්සිංධු සෞවීරාන්සෞරාෂ්ට්රේයාංශ්ච පාර්ථිවාන් ।
දාක්ෂිණාත්යාන්නරේංද්රාංශ්ච සමස්තානානයස්ව හ ॥ 25 ॥
සංති ස්නිග්ධාශ්ච යේ චාන්යේ රාජානඃ පෘථිවීතලේ ।
තානානය යථාක්ෂිප්රං සානුගාන්සහ බාංධවාන් ॥ 26 ॥
වසිෂ්ඨවාක්යං තච්ඡ්රුත්වා සුමංත්රස්ත්වරිතස්තදා ।
ව්යාදිශත්පුරුෂාංස්තත්ර රාජ්ඤාමානයනේ ශුභාන් ॥ 27 ॥
ස්වයමේව හි ධර්මාත්මා ප්රයයෞ මුනිශාසනාත් ।
සුමංත්රස්ත්වරිතෝ භූත්වා සමානේතුං මහීක්ෂිතඃ ॥ 28 ॥
තේ ච කර්මාංතිකාස්සර්වේ වසිෂ්ඨාය ච ධීමතේ ।
සර්වං නිවේදයංති ස්ම යජ්ඤේ යදුපකල්පිතම් ॥ 29 ॥
තතඃප්රීතෝ ද්විජශ්රේෂ්ඨස්තාන් සර්වානිදමබ්රවීත් ।
අවජ්ඤයා න දාතව්යං කස්යචිල්ලීලයාऽපි වා ॥ 30 ॥
අවජ්ඤයා කෘතං හන්යාද්දාතාරං නාත්ර සංශයඃ ।
28 තතඃ කෛශ්චිදහෝරාත්රෛරුපයාතා මහීක්ෂිතඃ ॥ 31 ॥
බහූනි රත්නාන්යාදාය රාජ්ඤෝ දශරථස්ය වෛ ।
තතෝ වසිෂ්ඨස්සුප්රීතෝ රාජානමිදමබ්රවීත් ॥ 32 ॥
උපයාතා නරව්යාඝ්ර රාජානස්තව ශාසනාත් ।
මයාපි සත්කෘතාඃ සර්වේ යථාර්හං රාජසත්තමාඃ ॥ 33 ॥
යජ්ඤීයං ච කෘතං රාජන් පුරුෂෛස්සුසමාහිතෛඃ ।
නිර්යාතු ච භවාන්යෂ්ටුං යජ්ඤායතනමංතිකාත් ॥ 34 ॥
සර්වකාමෛරුපහෘතෛරුපේතං ච සමංතතඃ ।
ද්රෂ්ටුමර්හසි රාජේංද්ර මනසේව විනිර්මිතම් ॥ 35 ॥
තථා වසිෂ්ඨවචනාදෘශ්යශෘංගස්ය චෝභයෝඃ ।
ශුභේ දිවසනක්ෂත්රේ නිර්යාතෝ ජගතීපතිඃ ॥ 36 ॥
තතෝ වසිෂ්ඨප්රමුඛාස්සර්ව ඒව ද්විජෝත්තමාඃ ।
ඍශ්යශෘංගං පුරස්කෘත්ය යජ්ඤකර්මාරභන් තදා ॥ 37 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ත්රයෝදශස්සර්ගඃ ॥
